Sa nga Akoto’m be yoli’n

21 I agualiɛ su’n, kɛ e nin be e tili nun mɔ e fali mmeli’n, e ɔli Kɔsu trelele. I cɛn ng’ɔ su i su’n, e ɔli Rɔdu. Kpɛkun e fɛli i lɛ e ɔli Patara. 2 Kɛ e ɲannin mmeli kun m’ɔ su kɔ Fenisi’n, e fuli nun e ɔli. 3 Kɛ e wunnin Sipri m’ɔ o jenvie’n i afiɛn lɔ’n, e sɛnnin i wun, kpɛkun ɔ kali e sa bɛ su.* I sin’n, e ɔli Siri mɛn’n nun lɔ. E jrali Tir klɔ’n su lɛ, afin lɛ yɛ ɔ fata kɛ be yi mmeli’n nun trɔ mun-ɔn. 4 Kpɛkun e kunndɛli Zezi i sɔnnzɔnfuɛ mun naan y’a wun be. Ɔ maan e dili cɛn ba nso lɛ. Sanngɛ Ɲanmiɛn wawɛ’n maan be seli Pɔlu kpɛ sunman kɛ nán maan i ja kpɛn Zerizalɛmun lɔ.+ 5 Kɛ e kɔlɛ dɔ’n juli’n, e tuli e bo lɛ. Be kwlaa, be nin bla mun nin ba kanngan mun be ko sunmannin e lele e kpɛli klɔ’n. Kpɛkun kɛ e juli jenvie’n i nuan lɛ’n, e kotoli aunɲan’n nun e srɛli Ɲanmiɛn. 6 I sin’n, e kaleli e wun. Kɛ e ko fuli mmeli’n nun’n, be sali be sin be awlo.

7 E fali mmeli’n Tir lɛ e ɔli Putolemaisi. Kɛ e juli lɔ’n, e yoli aniaan’m be like, kpɛkun e dili cɛn ba kun be wun lɛ. 8 Kɛ aliɛ cɛnnin’n, e jasoli lɛ e ɔli Sezare. Kɛ e juli lɔ’n, e wluli jasin fɛ bofuɛ Filipu i awlo lɔ. Kpɛkun e sikeli i wun lɛ. Laa’n, ɔ ti sran nso’m be nun kun.+ 9 Bian sɔ’n le ba bla nnan. Be nin-a jaman bian,* yɛ be ti Ɲanmiɛn nuan ijɔfuɛ.+ 10 Kɛ e dili le nɲɔn kun lɛ’n, Ɲanmiɛn nuan ijɔfuɛ kun mɔ be flɛ i Agabisi’n,+ ɔ fin Zide bali. 11 Ɔ bali e wun lɛ, kpɛkun ɔ fali Pɔlu i bo kplo’n ɔ fa cili i bɔbɔ i sa nin i ja mun, yɛ ɔ seli kɛ: “Ndɛ nga Ɲanmiɛn wawɛ’n kan’n yɛ: ‘Sran nga i liɛ yɛle kplo nga’n, Zifu’m bé wá cí i kɛ nga sa Zerizalɛmun lɔ.+ Kpɛkun bé fɛ́ i wlá be nga be timan Zifu’n be sa nun.’”+ 12 Kɛ e tili ndɛ sɔ’n, e nin be nga be o lɛ’n, e srɛli i kpa kɛ nán maan ɔ wɔ Zerizalɛmun. 13 Sanngɛ Pɔlu tɛli su kɛ: “?Ngue ti yɛ amun sun-ɔn? ?Yɛ ngue ti yɛ amun kunndɛ kɛ amún búbú min sa sin-ɔn? Maan amun si kɛ e Min Zezi i dunman nun’n, sɛ bé cí min-o, sɛ bé kún min Zerizalɛmun lɔ-o, m’an buabua min wun w’a wie.”+ 14 Kɛ mɔ w’a faman e ndɛ’n su ti’n, e yacili i diin,* kpɛkun e seli kɛ: “Maan ɔ yo kɛ nga Zoova* bɔbɔ klo’n sa.”

15 Kɛ cɛn sɔ’m be sinnin’n, e siesieli e wun, kpɛkun e fali atin e ɔli Zerizalɛmun. 16 Zezi i sɔnnzɔnfuɛ nga be o Sezare lɔ’n, be nun wie’m be nin e ɔli. Be fa e ɔli Minasɔn m’ɔ fin Sipri’n i awlo lɔ, afin lɔ yɛ ɔ fata kɛ e sike-ɔ. Bian sɔ’n ti be nga be dun mmua kacili Zezi i sɔnnzɔnfuɛ’n be nun kun. 17 Kɛ e juli Zerizalɛmun lɔ’n, aniaan’m be sɔli e nun klanman. 18 Kɛ aliɛ cɛnnin’n, e nin Pɔlu e ɔli Zaki+ i wun lɔ. Kpɛnngbɛn’m be kwlaa be o lɔ. 19 Ɔ yoli be like, kpɛkun like nga Ɲanmiɛn fanngan nun ɔ yo mannin be nga be timan Zifu’n, ɔ kɛnnin i kwlaa i ndɛ kleli be.

20 Kɛ be tili ndɛ sɔ’n, be manmannin Ɲanmiɛn, sanngɛ be seli i kɛ: “Aniaan, nian, Zifu nga be lafi e Min’n su’n be sɔnnin kpa, yɛ be kwlaa be nanti Moizi Mmla’n su seiin.+ 21 Sanngɛ be tili i flɛnflɛn kɛ a seli Zifu nga be o nvle uflɛ’m be nun’n be kɛ be kaci be sin be si Moizi i Mmla’n, naan nán be wla be mma’m be klɛn annzɛ nán be fa e nannan’m be nzuɛn’n su.+ 22 ?Ɔ maan é yó i sɛ siɛn’n? Afin saan bé sí kɛ w’a ju wa. 23 I sɔ’n ti’n, ndɛ nga e waan é kán klé wɔ naan a nian su’n yɛ: Yasua nnan be nin e o wa, be tali Ɲanmiɛn i nda. 24 Fa be naan amun yo amun wun sanwun kɛ nga mmla’n fa kan’n sa. Yɛ be ti yilɛ i wun kalɛ nga be bo’n, tannin man be. I liɛ’n, sran kwlaa sí kɛ ɔ su ndɛ nga be kan’n, ɔ timan nanwlɛ naan a nanti seiin, yɛ a nanti Moizi Mmla’n su.+ 25 Be nga be lafi e Min’n su mɔ be timan Zifu’n be liɛ’n, e klɛli ndɛ nga e nuan sɛli su’n e ko mannin be. E seli be kɛ nán be di like nga be fa sɔ amuin’n,+ maan be ci mmoja,+ yɛ nán be di nnɛn nga be boli i kɔminʼn,*+ nán be kunndɛ bla nin bian sukusuku yɛ nán be yo i wunsu ɲannzuɛn sa.”*+

26 I cɛn ng’ɔ́ sú i su’n, Pɔlu fali yasua sɔ mun, kpɛkun ɔ nin be yoli be wun sanwun kɛ nga mmla’n fa kan’n sa.+ I sin’n, ɔ ɔli Ɲanmiɛn sua’n nun lɔ ko kleli cɛn nga be wun sanwun yolɛ’n ɔ́ wíe’n, naan Ɲanmiɛn ɲrun jranfuɛ’n yi tɛ man be tinuntinun.

27 Kɛ i cɛn ba nso su’n wá wíe’n, Zifu nga be fin Azi mɛn’n nun lɔ’n be wunnin i Ɲanmiɛn sua’n nun. Ɔ maan be wlawlali sran’m be kwlaa naan b’a trɛ i. 28 Be kpan seli kɛ: “Izraɛlifuɛ mun, amun uka e! Bian ng’ɔ kan e nvle’n nin e Mmla’n, ɔ nin lika nga be wun ndɛ tɛtɛ lika kwlaa’n, yɛ ɔ o yɛ. I kpa bɔbɔ’n, ɔ fali Glɛki mun wluli Ɲanmiɛn sua’n nun. Ɔ maan sua m’ɔ ti Ɲanmiɛn i liɛ klonglo’n, w’a yo i fiɛn.”+ 29 Like nga ti yɛ be seli sɔ’n, yɛle kɛ be wunnin Pɔlu nin Trofimun+ m’ɔ ti Efɛzifuɛ’n, klɔ’n nun. Ɔ maan be buli i kɛ ɔ fɛ i wluli Ɲanmiɛn sua’n nun. 30 Klɔ wunmuan’n kejeli yekee, sran’m be wanndi bali kpanngban kpa kpɛkun be wa trali Pɔlu. Be fɛli i Ɲanmiɛn sua’n nun fiteli, yɛ be ɲinnin anuan mun. 31 Be waan bé kún i, naan ndɛ’n w’a tɔ sonja akpi su kpɛn’n i su nun. Be seli i kɛ Zerizalɛmun klɔ wunmuan’n w’a sanngan. 32 Ɔ maan ɔ fali sonja mun nin sonja ya su kpɛn mun ndɛndɛ naan b’a wanndi b’a wɔ sran sɔ’m be wun lɔ. Kɛ be wunnin kɛ sonja akpi su kpɛn’n nin sonja mun be su ba’n, be yacili Pɔlu i bolɛ.

33 Yɛ sonja akpi su kpɛn’n wunngeli be wun lɔ-ɔ. Ɔ trɛli i, kpɛkun ɔ seli i sran’m be kɛ be ci i nin jrɔkɔ nɲɔn.+ I sin’n, ɔ usali sran ng’ɔ ti’n, ɔ nin like ng’ɔ yoli’n. 34 Sanngɛ sran wie’m be kpan be kan be ndɛ liɛ’n kɔ wa, wie’m be kan be liɛ’n kɔ wa. Ɔ maan sran’m be otolɛ’n ti’n, w’a wunman ndɛ fi wlɛ. I sɔ’n ti’n, ɔ seli kɛ be fɛ i wɔ sonja’m be tranwlɛ lɔ. 35 Sanngɛ kɛ Pɔlu juli asikalie’n su’n, sonja’m be mɛnnin i su. Afin sran’m be planman aɔwi. 36 Wie’m be suli i su lɔ, kpɛkun be kpannin seli kɛ: “Maan be kun i!”

37 Kɛ bé wá fá Pɔlu wlú sonja’m be tranwlɛ lɔ’n, ɔ seli sonja akpi su kpɛn’n kɛ: “?N kwla kan ndɛ kun n kle wɔ?” Yɛ sonja’n seli kɛ: “?A kan Glɛki? 38 ?Eziptifuɛ nga le kun wie’n, ɔ yoli mɔ sran’m be jasoli kpɛnngbɛn’m be wun’n, m’ɔ fali sran kunfuɛ akpi nnan (4.000) ɔli aawlɛ flɛnnɛn’n nun lɔ’n, nɛ́n i yɛle wɔ?” 39 Yɛ Pɔlu seli kɛ: “N ti Zifu,+ n fin Tasi+ m’ɔ o Silisi lɔ’n su. Sran kwlaa si klɔ sɔ’n. Ɔ maan ń srɛ́ wɔ, man min atin maan n kan ndɛ n kle sran nga mun.” 40 Yɛ ɔ mannin atin-ɔn. Pɔlu jrannin asikalie’n su lɛ, kpɛkun ɔ mɛnnin i sa’n su seli sran’m be kɛ be muan be nuan. Kɛ lika’n tɔli bliin’n, ɔ kannin ndɛ kleli be Ebre nun.+ Ɔ seli kɛ: