“Titi amun bɔbɔ amun sa amun wun nian”

“Titi amun bɔbɔ an bu amun klun lɔ nian sɛ an lafi Klist su sakpa o. Titi amun bɔbɔ amun sa amun wun nian.”—2 KORƐNTFUƐ MUN 13:5, NW.

1, 2. (a) ?Wafa sɛ yɛ Ɲanmiɛn sulafilɛ’n nun angunndan nɲɔnnɲɔn bulɛ’n kwla ɲan ta e su ɔ? (b) ?Afuɛ ya kpɔlɛ klikli nun’n, sa mennin ti yɛ Korɛnti lɔ Klistfuɛ wie’m b’a wunman atin ng’ɔ fata kɛ be fa su’n niɔn?

BIAN kun su kɔ lika, kpɔkuun w’a ju anngɔnda kun su. Kɛ m’ɔ siman atin ng’ɔ́ fá su’n ti’n, sran nga bé sín lɛ’n, yɛ ɔ usa be kɛ be kle i atin’n niɔn. Sanngɛ ɔ le sran kun nin i atin liɛ m’ɔ kle ɔ. I sɔ’n ti’n, bian’n w’a kwlá ɔman lika m’ɔ su kɔ’n kun. Sɛ e Ɲanmiɛn sulafilɛ’n nun e bu angunndan nɲɔnnɲɔn’n, sa kunngba’n kwla ju e su. Angunndan nɲɔnnɲɔn bulɛ’n kwla ɲan ta e ajalɛ’m be falɛ’n su. Yɛle kɛ e su wunman atin ng’ɔ fata kɛ e fa’n.

² Korɛnti ti Glɛki lɔ klɔ kun. Afuɛ ya kpɔlɛ klikli nun’n, sa kun m’ɔ yoli lɔ asɔnun’n nun’n, ɔ kwla ɲannin ta kunngba’n sran wie’m be su. Yɛle kɛ, ‘sran kpakpa mɔ be bu i kɛ Klist yɛ ɔ sunmannin be’n,’ be ɲin w’a yiman akoto Pɔlu. Be seli kɛ: ‘Pɔlu i fluwa’m be nun ndɛ’m be ti dandan yɛ be yo ya, sanngɛ kɛ be wun i bɔbɔ’n, ɔ timan like fi, yɛ kɛ ɔ́ íjɔ’n, ɔ yo annvɔ.’ (2 Korɛntfuɛ Mun 10:7-12; 11:5, 6) Angunndan bulɛ wafa sɔ’n ti’n, Korɛnti lɔ Klistfuɛ wie’m b’a wunman atin ng’ɔ fata kɛ be fa’n.

3, 4. ?Ngue ti yɛ ɔ fata kɛ afɔtuɛ mɔ Pɔlu mannin Korɛntfuɛ mun’n, ɔ yo e cinnjin wie ɔ?

³ Kɛ afuɛ 50 nun E Blɛ liɛ’n Nun Pɔlu juli Korɛnti lɔ’n, yɛ ɔ takali lɔ asɔnun’n niɔn. Ɔ dili ‘afuɛ kun anglo nsiɛn lɛ, ɔ kleli be Ɲanmiɛn ndɛ’n.’ Ɔ maan, ‘Korɛntfuɛ kpanngban mɔ be tili Pɔlu ndɛ’n, be fali Ɲanmiɛn ndɛ’n su naan b’a yo be batɛmu.’ (Sa Nga Be Yoli’n 18:5-11) Ɲanmiɛn ninnge’m be nun’n, Pɔlu i wiengu mɔ be o Korɛnti lɔ’n be ndɛ lo i kpa. Asa kusu’n, Korɛnti lɔfuɛ’m be bɔbɔ be klɛli Pɔlu i fluwa be usɛli i ngwlɛlɛ afɛ sa kun su. (1 Korɛntfuɛ Mun 7:1) Pɔlu kusu mannin be afɔtuɛ klanman kpa kun.

⁴ Pɔlu seli be kɛ: “Titi amun bɔbɔ an bu amun klun lɔ nian sɛ an lafi Klist su sakpa o. Titi amun bɔbɔ amun sa amun wun nian.” (2 Korɛntfuɛ Mun 13:5, NW) Afɔtuɛ sɔ’n i su falɛ’n ukali i niaan sɔ mɔ be o Korɛnti lɔ naan b’a wun atin ng’ɔ fata kɛ be fa’n. Afɔtuɛ kunngba’n kwla uka e sɔ wie andɛ. ?Sanngɛ wafa sɛ yɛ e kwla fa afɔtuɛ sɔ mɔ Pɔlu mannin’n su ɔ? ?Wafa sɛ yɛ e bɔbɔ e kwla bu e klun lɔ nian sɛ e lafi Klist su sakpa ɔ? ?Kpɔkun kɛ be se kɛ e bɔbɔ e sa e wun nian’n, i bo’n yɛle mennin?

‘Titi amun bɔbɔ an bu amun klun lɔ nian sɛ an lafi Klist su sakpa o’

5, 6. ?Sɛ e waan e bɔbɔ é bú e klun lɔ nían sɛ e lafi Klist su sakpa’n, mmla mennin yɛ ɔ fata kɛ e ɲɛn i ɔ? ?Yɛ ngue ti yɛ mmla sɔ’n yɛ ɔ ti kpa ɔ?

⁵ Titi’n, like sa nianlɛ nun’n, ɔ le like nga be sɛ i nian’n, annzɛ sran nga be sɛ i nian’n. Kpɔkun ɔ le mmla kun mɔ be nian su be fa sa like’n annzɛ be fa sa sran’n niɔn. Ndɛ nga Pɔlu kɛnnin i yɛ nun’n, like nga e bu e klun lɔ e nian’n, nɛ́n i yɛle e Ɲanmiɛn sulafilɛ’n. Sanngɛ e bɔbɔ e wun yɛ e nian ɔn. Yɛ e le e wun nianlɛ sɔ’n nun mmla kun. Mmla sɔ’n, fiɛn kaan sa nunmɛn i wun. Jue kun mɔ Davidi toli’n, ɔ seli kɛ: ‘Anannganman i mmla’n, fiɛn kaan sa nunmɛn i wun. Kɛ sran’n i wunmiɛn’n wie’n, ɔ mɛn i uflɛ. Anannganman i like ng’ɔ kle’n be ti nanwlɛ. Be kle sran ng’ɔ siman sa’n i ngwlɛlɛ. Sa nga Anannganman jran su kekle kɛ be yo be’n, be ti i su. Aklunjuɛ cɛ yɛ ɔ o sa sɔ’m be sin ɔn. Ɲanmiɛn i mmla’m be ti weiin, be yo maan sran wun sa wlɛ.’ (Jue Mun 19:8, 9) Zoova i mmla mɔ fiɛn kaan sa nunmɛn i wun’n, ɔ nin i like ng’ɔ kle’n mɔ be ti nanwlɛ’n, ɔ nin sa ng’ɔ jran su kekle kɛ be yo be’n mɔ be ti i su’n, ɔ nin i mmla mɔ be ti weiin’n, be o Biblu’n nun. Ndɛ sɔ mɔ be o Biblu’n nun’n, be ti e wun nianlɛ like kpa.

⁶ Ɲanmiɛn i ndɛ sɔ’n su’n, akoto Pɔlu seli kɛ: ‘Ɲanmiɛn i ndɛ nga ɔ ko kan’n, nn w’a kan ɔ kacimɛn i, ɔ maan sran’m be kaci. Sɛ é kwlá sé’n, nn é sé kɛ ɔ la tra tokofi. Ɔ wɔ ɔ wlu lele ɔ ju be wawɛ’n, nin be awlɛn’n, nin be akpɔlɛ’n, ɔ nin be owie i klun lui’m be nun, ɔ si be klun angunndan’n, ɔ nin be klun sa’n.’ (Ebre Mun 4:12) Nanwlɛ, Ɲanmiɛn i ndɛ’n ɔ kwla sa e awlɛn’n, yɛle kɛ e klun angunndan’n. Ɲanmiɛn i ndɛ sɔ’n m’ɔ wɔ ɔ wlu lele’n, wafa sɛ yɛ e kwla yo naan w’a kan e ɔ? Jue tofuɛ’n kannin like nga e kwla yo’n i ndɛ weiin. Jue kun m’ɔ toli’n i nun’n, ɔ seli kɛ: ‘Sran nga i like liɛ ng’ɔ klo i’n yɛle Ɲanmiɛn i mmla’n, m’ɔ bu i angunndan [annzɛ ɔ kanngan nun blɛblɛblɛ] kɔnguɛ nin wia su’n, i sɔfuɛ’n i liɛ su ti ye.’ (Jue Mun 1:1, 2) ‘Ɲanmiɛn i mmla’n,’ ɔ o Biblu’n nun. Ɔ fata kɛ e klo i nun kannganlɛ. Nanwlɛ, ɔ fata kɛ e fa blɛ e kanngan nun blɛblɛblɛ, annzɛ e bu i angunndan. Kɛ e yo sɔ’n, ɔ fata kɛ e lo e wun naan like nga e kanngan’n ɔ kle e wafa nga e ti’n.

 7. ?Sɛ e waan e bɔbɔ é bú e klun lɔ nían sɛ e lafi Klist su sakpa’n, like klikli nga e kwla yo’n yɛle mennin?

⁷ Sɛ e waan e bɔbɔ é bú e klun lɔ nían sɛ e lafi Klist su sakpa’n, ajalɛ klikli ng’ɔ fata kɛ e fa’n yɛle kɛ: Maan e kanngan Ɲanmiɛn Ndɛ’n nun, yɛ e bu i angunndan kpɔkun e nian sɛ e nzuɛn’n ɔ nin like nga e suan’n be kɔ likawlɛ o. Asa ekun’n, kɛ like kpanngban uka e maan e wun Ɲanmiɛn Ndɛ’n i wlɛ’n, ɔ yo e fɛ dan.

 8. ?Sɛ e waan e bɔbɔ é bú e klun lɔ nían sɛ e lafi Klist su sakpa’n, wafa sɛ yɛ fluwa nga ‘sran kpa nanwlɛfuɛ’n m’ɔ si ngwlɛlɛ’n’ yi be’n, be kwla uka e ɔ?

⁸ Zoova fa fluwa nga ‘sran kpa nanwlɛfuɛ’n m’ɔ si ngwlɛlɛ’n’ yi be’n, mɔ be tutu Biblu’n nun ndɛ’m be bo’n, ɔ kle e like kpɔkun ɔ tu e fɔ. (Matie 24:45) I wie yɛle fluwa Approchez-vous de Jéhovah i kuku nga be flɛ i “ Éléments de méditation ” m’ɔ o fluwa sɔ’n i ndɛ tre sunman be agualiɛ’n, i nun’n.a Nanwlɛ, kuku sɔ’m be nun ndɛ’m be yo maan e kwla bu angunndan kpa! Ndɛ kpanngban nga be o e fluwa La Tour de Garde nin Réveillez-vous ! be nun’n, be uka e wie ekun kpa naan y’a bu e klun lɔ y’a nian sɛ e lafi Klist su sakpa o. Kɛ atin bofuɛ kun kán Nyanndra fluwa mɔ koko nga nun be yiyili nun La Tour de Garde nun’n i ndɛ’n, ɔ seli kɛ: “Nanwlɛ, n kloli Nyanndra’m be nun yiyilɛ sɔ’n kpa. Be ukali min maan n niannin sɛ min ijɔlɛ’n, ɔ nin min ayeliɛ’n, ɔ nin min nzuɛn’n, be nin Zoova i mmla mɔ be ti kpa’n be kɔ likawlɛ sakpa o.”

9, 10. ?Kɛ e ko yo naan e bɔbɔ y’a bu e klun lɔ y’a nian sɛ e lafi Klist su sakpa’n ti’n, ngue yɛ ɔ mannin e ɔ?

⁹ Asɔnun aɲia mun nin aɲia dandan’m be bo lɔ’n, e ɲan afɔtuɛ nin fanngan wlalɛ kpanngban kpa wie. Ninnge nga Ɲanmiɛn seli kɛ ɔ́ yó fá úka be mɔ i nuan ijɔfuɛ Ezai kannin be ndɛ’n, aɲia sɔ’m be o be nun wie. Ezai seli kɛ: ‘Cɛn wie lele’n, oka nga Anannganman i sua’n kplan su’n, ɔ́ wá táka oka’m be su, yɛ ɔ́ yó fleiin trá kpɔlɛ mun. Nvlenvle’m be kwlaa bé tú sa kpu bé kɔ́ lɔ. Sran kpanngban kpa bé tú ajalɛ bé kɔ́. Bé sé kɛ: “Amun bla maan e wɔ Anannganman i oka’n su lɔ, maan e wɔ Zakɔbu i Ɲanmiɛn’n i sua’n nun lɔ. Ɔ́ klé e i atin mun, yɛ é nánti i akpɔ’m be su.”’ (Ezai 2:2, 3) Nanwlɛ, kɛ be kle e Zoova i atin mun’n, i sɔ’n ti suyralɛ dan.

¹⁰ Sɛ e waan e bɔbɔ é bú e klun lɔ nían sɛ e lafi Klist su sakpa’n, be mɔ Ɲanmiɛn wawɛ’n sie be mɔ be wie yɛle asɔnun kpɛnngbɛn mun’n, afɔtuɛ nga be man’n, bé úka e wie. Kɛ Biblu’n kán sran sɔ’m be ndɛ’n, ɔ seli kɛ: ‘Aniaan mun, sɛ an wun kɛ amun niaan kun su yo sa wie m’ɔ timan kpa’n, amun mɔ Ɲanmiɛn wawɛ’n sie amun’n, an kle i atin ng’ɔ ti kpa’n amanniɛn su. Sanngɛ an nian amun bɔbɔ amun wun naan amun a yoman sa kunngba sɔ’n wie.’ (Galasifuɛ Mun 6:1) Nanwlɛ, wafa nga sran sɔ mɔ Ɲanmiɛn wawɛ’n sie be’n be kle e atin ng’ɔ ti kpa’n, ɔ jɔ e klun dan!

11. ?Sɛ e waan e bɔbɔ é bú e klun lɔ nían sɛ e lafi Klist su sakpa’n, ngue yɛ ɔ fata kɛ e yo ɔ?

¹¹ Biblu’n i akua mun, ɔ nin asɔnun aɲia mun, yɛ asɔnun kpɛnngbɛn mun, be ti ninnge kpa mɔ Zoova mannin e ɔ. Sanngɛ, sɛ e waan e bɔbɔ é bú e klun lɔ nían sɛ e lafi Klist su sakpa’n, ɔ fata kɛ e si e bɔbɔ e wun. Ɔ maan, kɛ é kánngan e Biblu’n i akua’m be nun, annzɛ kɛ bé mán e Ɲanmiɛn ninnge’m be nun afɔtuɛ’n, ɔ fata kɛ e usa e wun kosan nga mun: ‘?Min ndɛ yɛ fluwa’n kan ɔn? ?N yo sa sɔ mun sakpa? ?Klist su mɔ n lafi’n i su sa yɛ n yo ɔ?’ Kɛ Ɲanmiɛn i ninnge siesielɛ sɔ’m be nun e ɲan afɔtuɛ’n, ayeliɛ nga e yi i nglo’n, ɔ kle sran’n i wafa nga Ɲanmiɛn ninnge’m be nun e ti’n. Biblu’n waan: ‘Klɔ Sran’n m’ɔ o sa’n, ɔ faman Ɲanmiɛn wawɛ ninnge’m be su, afin be ti i ɲrun sinnzin like, sran nga Ɲanmiɛn wawɛ sie i’n, i liɛ’n, ɔ si sa ngbɛsungbɛsu’n kwlaa.’ (1 Korɛntfuɛ Mun 2:14, 15) Kɛ e kanngan periodiki nin fluwa mun, ɔ nin Biblu’n i akua wie mun ekun be nun’n, annzɛ kɛ e tie nzra nun ijɔlɛ mun nin afɔtuɛ nga asɔnun kpɛnngbɛn’m be man’n, sɛ e mian e ɲin e bu be wun angunndan kpa titi’n, ɔ ti kpa. ?Nɛ́n i ɔ?

‘Titi amun bɔbɔ amun sa amun wun nian’

12. ?Kɛ be sɛ kɛ amun bɔbɔ amun sa amun wun nian’n, i bo’n yɛle mennin?

¹² Kɛ be se kɛ amun bɔbɔ amun sa amun wun nian’n, e bɔbɔ yɛ e yo i sɔ liɛ’n niɔn. Nanwlɛ, e kwla se kɛ e o ndɛ nanwlɛ’n nun. ?Sanngɛ e mɛn dilɛ’n ɔ nin ndɛ nanwlɛ’n be kɔ likawlɛ? Kɛ e bɔbɔ e sa e wun nian’n, i sɔ’n kle kɛ y’a tin Ɲanmiɛn ninnge’m be nun naan e klun jɔ ninnge nga Ɲanmiɛn man e’n be su.

13. ?Kɛ nga Ebre Mun 5:14 fa kan’n sa’n, ngue yɛ ɔ kle kɛ y’a yo sran ɔn?

¹³ ?Ngue yɛ ɔ kwla kle kɛ e ti Klistfuɛ mɔ Ɲanmiɛn ninnge’m be nun w’a yo sran ɔn? Akoto Pɔlu seli kɛ: ‘Be nga b’a yo sran mɔ be kunndɛ sa ng’ɔ ti kpa’n nin tɛ’n be ngbaciɛ lele b’a si i kpa’n, aliɛ’n ti be liɛ.’ (Ebre Mun 5:14) Kɛ e suan sa ng’ɔ ti kpa’n ɔ nin ng’ɔ ti tɛ’n be ngbaciɛ i silɛ’n mɔ e si i’n, e kle kɛ y’a yo sran. Be nga be si ngowa kanlɛ’n nun akplowa’n, be dun mmua suan, ɔ si be wun ka naan b’a ɔ akplowa’n i silɛ. I sɔ kunngba’n, kɛ e nian Biblu’n nun mɔ e fa su’n, e suan sa ng’ɔ ti kpa’n ɔ nin ng’ɔ ti tɛ’n be ngbaciɛ’n be silɛ.

14, 15. ?Ngue ti yɛ ɔ fata kɛ e mian e ɲin e suan Ɲanmiɛn Ndɛ’n i nun like ng’ɔ ti kekle’n niɔn?

¹⁴ Ka naan y’a kwla suan sa ng’ɔ ti kpa’n ɔ nin ng’ɔ ti tɛ’n be ngbaciɛ’n i wlɛ wunlɛ’n, ɔ fata kɛ e si be. I lɛ nun’n, e ngunmin like suanlɛ titi’n, ɔ ti cinnjin kpa. Kɛ e suan e ngunmin like titi’n, i li kɛ e bu Ɲanmiɛn Ndɛ’n i angunndan’n, sa ng’ɔ ti kpa’n ɔ nin ng’ɔ ti tɛ’n be ngbaciɛ’n i wlɛ wunlɛ’n i ɲin fite kpa. Afuɛ nga be sinnin’n be nun’n, La Tour de Garde yiyili ndɛ kpanngban kpa be nun. ?Kɛ e fite like suanlɛ kun su’n m’ɔ fata kɛ e bu ndɛ nanwlɛ’n m’ɔ o nun’n i angunndan’n, ngue yɛ e yo ɔ? ?E se kɛ, kɛ mɔ like suanlɛ sɔ’m be ‘nun ndɛ wie’m be wlɛ wunlɛ ti kekle’n’ ti’n, é kpálo i? (2 Piɛr 3:16) Like ng’ɔ ti kpa kɛ e yo’n, yɛle kɛ e mian e ɲin naan e wun ndɛ nga fluwa’n kan’n, i wlɛ.—Efɛzfuɛ Mun 3:18.

¹⁵ ?Yɛ sɛ e ngunmin like suanlɛ’n ti kekle e sa nun’n nin? Sɛ ɔ ti sɔ’n, e lemɛn i yowlɛ, ɔ ti cinnjin kpa kɛ e mian e ɲin, annzɛ e suɛn i yolɛ naan e klun jɔ i suanlɛ’n su.b (1 Piɛr 2:2) Sɛ e waan é yó sran’n, ɔ fata kɛ aliɛ’n mɔ yɛle Ɲanmiɛn Ndɛ’n m’ɔ ti nanwlɛ’n, e suɛn i dilɛ. Sɛ y’a yoman sɔ’n, e su wunman sa nga be ti kpa’n ɔ nin nga be ti tɛ’n be ngbaciɛ’n be wlɛ kpa titi. Sanngɛ sran yolɛ’n, nɛ́n i ngunmin yɛle sa ng’ɔ ti kpa’n ɔ nin ng’ɔ ti tɛ’n be ngbaciɛ’n be wlɛ wunlɛ’n. Like nga e miannin e ɲin suannin’n, ɔ fata kɛ e fa su cɛn kwlaa e mɛn dilɛ’n nun.

16, 17. ?Kɛ ɔ yo naan sɛ e ti ‘ndɛ’n y’a fa su’ ti’n, afɔtuɛ mennin yɛ Zaki m’ɔ ti Zezi i sɔnnzɔnfuɛ’n ɔ mannin ɔn?

¹⁶ Kɛ e bɔbɔ e sa e wun nian’n, e yi i nglo kɛ e klo nanwlɛ ndɛ’n, yɛle kɛ e yi i nglo junman nga e Ɲanmiɛn sulafilɛ’n ti e di’n, be nun. Kɛ e ko yo naan i sɔ’n nun y’a si sran nga e ti’n ti’n, Zaki m’ɔ ti Zezi sɔnnzɔnfuɛ’n seli kɛ: ‘Ɲanmiɛn ndɛ nga an ti’n, an lafi su. Sɛ an tie i ngbɛn mɔ an faman su’n, nn an su laka amun wun. Afin sɛ sran kun ti Ɲanmiɛn ndɛ’n m’ɔ faman su’n, ɔ ti kɛ sran m’ɔ niɛn i ɲrun niannun nun sa. Kɛ ɔ ko nian nun mɔ w’a wɔ’n, kpɔkun i wla a fi i wafa ng’ɔ ti’n. Sanngɛ Ɲanmiɛn mmla’n m’ɔ ti niannun kpa’n, m’ɔ maan sran’m be ɲan be ti’n, sran ng’ɔ nian nun’n, m’ɔ nian nun tititi’n, mɔ kɛ ɔ ti mmla’n i wla fiman sanngɛ ɔ fa su’n, Ɲanmiɛn maan like ng’ɔ yo’n ɔ́ yó ye.’—Zak 1:22-25.

¹⁷ Ndɛ nga Zaki kan’n yɛle kɛ: ‘Ɲanmiɛn mmla’n m’ɔ ti niannun kpa’n, e nian nun naan e wun sran’n i wafa nga e ti’n. Maan e nian nun titi, kpɔkun e nian sɛ sran’n i wafa nga e ti’n i ndɛ yɛ Biblu’n kan o. Kɛ e yo sɔ’n, nán maan e wla fi like nga e wunnin i’n i su ndɛndɛ. Maan e mian e ɲin e kaci.’ Afɔtuɛ sɔ’n i su falɛ’n timan pɔpɔ titi.

18. ?Ngue ti yɛ afɔtuɛ mɔ Zaki mannin’n i su falɛ’n ti kekle ɔ?

¹⁸ I wie yɛle kɛ Ɲanmiɛn Sielɛ Blɛ jasin fɛ’n bolɛ’n sa. Pɔlu seli kɛ: ‘Afin kɛ be lafi su kpa’n, Ɲanmiɛn bu be sran kpa, yɛ kɛ ɔ fite be nuan’n, be fite nun.’ (Rɔmfuɛ Mun 10:10) Kɛ ɔ ko yo naan y’a bo jasin fɛ’n mɔ maan sran’m be fite nun’n i juejue su’n, naan y’a di junman sɔ’n i kɛ ng’ɔ nin i fata’n sa’n, saan é klɛ́n e wun ninnge wie’m be yolɛ’n nun yɛ é síesíe e mɛn dilɛ’n i wafa uflɛ. (Matie 6:33) Sanngɛ kɛ e di junman sɔ mɔ Ɲanmiɛn mannin e’n, ɔ yo e fɛ. Afin i sɔ’n manman Zoova. ?Sɛ ɔ ti sɔ’n niɔn, amun yo Sielɛ Blɛ’n i juejue su jasin bofuɛ?

19. ?Junman fanunfanun nga e Ɲanmiɛn sulafilɛ’n ti e di be’n, yɛle mennin?

¹⁹ ?Junman fanunfanun nga e Ɲanmiɛn sulafilɛ’n ti e di be’n, yɛle mennin? Pɔlu seli kɛ: ‘Like nga n kleli amun mɔ an tili an fa su’n, nin like nga an wun kɛ n yo’n, an nian su yo, yɛ Ɲanmiɛn mɔ maan e wun jɔ e’n, ɔ nin amún trán.’ (Filipfuɛ Mun 4:9) Like nga be kleli e’n, ɔ nin nga e suannin’n, ɔ nin nga e tili’n, ɔ nin nga e wun i’n, sɛ é kwlá sé’n, kɛ e wun mɔ e fa mannin Ɲanmiɛn’n ɔ nin Klistfuɛ mɔ e ti’n, e di i su junman’n, e kle sran’n i wafa nga e ti’n. Ɲanmiɛn sinnin i nuan ijɔfuɛ Ezai lika seli kɛ: “Atin’n yɛ ɔ o yɛ, amun fa su.”—Ezai 30:21.

20. ?Sran mennin mun yɛ be ti asɔnun’n i cinnjin kpa ɔ?

²⁰ Yasua nin bla nga be tu be klun be suan Ɲanmiɛn Ndɛ’n, mɔ be bo jasin fɛ’n i juejue su’n, mɔ be nanti ndɛnman su titi’n, kpɔkun nanwlɛ su be suan Ɲanmiɛn Sielɛ Blɛ’n i bo’n, be ti asɔnun’n nun sran cinnjin kpa. Kɛ be o asɔnun’n nun’n, asɔnun’n taka kpa. Be kle kɛ be ti sran kpa, afin be nian Ɲanmiɛn i sufuɛ uflɛuflɛ kpanngban be lika. Pɔlu seli kɛ: ‘Titi amun bɔbɔ an bu amun klun lɔ nian sɛ an lafi Klist su sakpa o. Titi amun bɔbɔ amun sa amun wun nian.’ Sɛ e fa afɔtuɛ sɔ’n su’n, e kusu é ɲán ta klanman e wiengu’m be su.

Maan Ɲanmiɛn klun sa yolɛ’n, ɔ yo e awlɛn su like

21, 22. ?Wafa sɛ yɛ e kwla fa Ɲanmiɛn klun sa’n e yo e awlɛn su like ɔ?

²¹ Davidi m’ɔ ti laa Izraɛli Famiɛn’n, ɔ seli kɛ: ‘Min Ɲanmiɛn, min waan ń yó ɔ klun sa. Ɔ mmla’n ɔ o min klun.’ (Jue Mun 40:9) Ɲanmiɛn klun sa yolɛ’n ɔ yoli Davidi i awlɛn su like. ?Ngue ti ɔ? Afin Zoova i mmla’n ɔ o Davidi klun. Davidi wunnin atin ng’ɔ fata kɛ ɔ fa su’n i wlɛ weiin.

²² Kɛ Ɲanmiɛn i mmla’n o e klun’n, e wun atin ng’ɔ fata kɛ e fa su’n i wlɛ weiin. E fa Ɲanmiɛn i klun sa yolɛ’n e yo e awlɛn su like. I sɔ’n ti’n, kɛ é tú e klun é sú Zoova’n, maan e ‘mian e ɲin.’—Lik 13:24.

[Ja ngua lɛ ndɛ mun]

?Amun wla kwla kpɛn su?

• ?Wafa sɛ yɛ e bɔbɔ e kwla bu e klun lɔ nian sɛ e lafi Klist su sakpa ɔ?

A• ?Kɛ be se kɛ e bɔbɔ e sa e wun nian’n, i bo’n yɛle mennin?

• ?Ngue yɛ ɔ kwla kle kɛ e ti Klistfuɛ mɔ w’a yo sran ɔn?

• ?Wafa sɛ yɛ Ɲanmiɛn sulafilɛ junman nga e di’n, ɔ uka e maan e wun sran wafa nga e ti’n niɔn?