?E nannannan nga be wuli’n be liɛ w’a wie mlɔnmlɔn?

SINUA’M be akpasua’n su lɔ’n, be flɛ nvle kun kɛ Kore. I afuɛ ko ju wie yɛ’n, be lɔ fluwa kun m’ɔ fite cɛn kwlaa’n, m’ɔ kan mɛn’n nun sa’m be ndɛ’n, ɔ kannin ndɛ cinnjin kun. Ndɛ sɔ’n, ɔ kan bla kun m’ɔ wuli mɔ be flɛ i Sim Ceɔng i ndɛ. Be usali kɛ: “‘Sim Ceɔng m’ɔ ti bla kpa’n,’ w’a siman Zezi i su ndɛ naan w’a wu. ?Ɲanmiɛn fɛ i yili i sin dan’n nun?”

Kosan sɔ mɔ fluwa’n usali’n, ɔ ti sran mma tolɛ kosan. Sim Ceɔng ti Kore talua. Be waan ɔ tuli i klun niɛnnin i si’n m’ɔ ti aɲansifuɛ’n i lika kpa lele naan w’a wu. “Sim Ceɔn” i ayeliɛ sɔ’n ti’n, be yili i ayɛ sunman. Ɔ maan Kore lɔ’n, be kɛnnin i ndɛ kɛ ɔ ti talua juejuefuɛ mɔ be kwla niɛn i ajalɛ’n su ɔ.

Sran kɛ ngalɛ sa’n, kɛ be se kɛ b’a yomɛn i batɛmu ti naan i agualiɛ’n yɛle sin dan nun’n, ɔ yo sran sunman be kɛnsrɛn. I kpa bɔbɔ’n, ɔ be be awlɛn. Sim Ceɔng wuli lele i sin naan b’a kan Zezi i su jasin fɛ’n i ndɛ be klɔ lɔ.

Fluwa ng’ɔ kannin Sim Ceɔng i ndɛ’n i nun’n, be usali Katoliki’m be kpɛnngbɛn kun i kosan. Be usɛli i kɛ sɛ be nga b’a siman Zezi i su ndɛ’n naan b’a wu’n, be o sin dan kun nun o. Ɔ tɛli su kɛ: “E kwlá dimɛn i nanwlɛ trele. I sɔ sran’m be liɛ’n, e bu i kɛ Ɲanmiɛn kunngba cɛ yɛ ɔ kwla si be agualiɛ’n niɔn.”

?SAAN FII BÉ YÓ SRAN KUN I BATƐMU NAAN W’A FITE NUN?

Katoliki’m be fluwa dan kun nun’n, be klɛli i kɛ: “Sɛ b’a yoman sran kun i batɛmu’n, ɔ kwlá fiteman nun. Zezi bɔbɔ seli kɛ sɛ sran i awuliɛ’n finman nzue nin Ɲanmiɛn wawɛ’n, ɔ su kwlá yoman mɛn nga Ɲanmiɛn sie’n i nunfuɛ (Zan 3:5).” Ndɛ sɔ’n ti’n, sran wie’m be bu i kɛ sɛ b’a yoman sran kun i batɛmu naan ɔ wu’n, ɔ́ wún i ɲrun lika wie annzɛ kusu bé fɛ́ i yí sin dan kun nun.

I sɔ ndɛ liɛ’n, sran sunman be wunmɛn i nanwlɛ lika’n. Sran nga b’a siman Ɲanmiɛn Ndɛ’n nun mɔ b’a wu’n, be diman be yalɛ. ?É sé kɛ i sɔ sran’m be su wun ɲrɛnnɛn trilili sin dan kun nun? ?Ngue ndɛ yɛ Biblu’n kan ɔn?

NDƐ NGA BIBLU’N KAN’N CICI E WLA

Biblu’n kleman kɛ be nga b’a siman Ɲanmiɛn’n, Ɲanmiɛn nianman be lɔ. I kpa bɔbɔ’n, Sa Nga Be Yoli’n 17:30 se kɛ: “I nun bɔ sran’m be wun-man sa wlɛ’n, sa nga be yoli’n, Nyanmiɛn a fa sie-mɛn i klun.” ?Sɛ ɔ ti sɔ’n, be nga b’a siman Ɲanmiɛn mɔ be wuli’n, be liɛ yó sɛ? ?Ngue ndɛ yɛ Biblu’n kan ɔn?

Ndɛ nga Zezi kan kleli sa tɛ yofuɛ nga be sendeli be waka su i wun lɛ’n be nun kun’n, ɔ tɛ su weiin. Sa tɛ yofuɛ’n seli Zezi kɛ: “Blɛ nga á wá dí ɔ famiɛn’n, bu min akunndan.” Yɛ Zezi seli i kɛ: “Nian, maan n kan ndɛ kun n kle wɔ, ndɛkɛn min nin wɔ é jú Nyanmiɛn i lika klanman’n nun lɔ.”​—Lik 23:39-43.

Zezi w’a seman bian’n kɛ ɔ nin i bé kɔ́ ɲanmiɛn su. Ɔ kwlá semɛn i sɔ. Afin bian sɔ’n, b’a ‘wumɛn i ekun.’ Yɛle kɛ, i awuliɛ’n finman nzue nin Ɲanmiɛn wawɛ’n. (Zan 3:3-6) Sanngɛ, Zezi seli i kɛ ɔ́ trán “Nyanmiɛn i lika klanman’n nun.” Sa tɛ yofuɛ sɔ’n ti Zuifu. Ɔ maan, Ɲanmiɛn i “lika klanman’n” mɔ yɛle Edɛni fie’n, ɔ si i su ndɛ nga Bo Bolɛ fluwa’n kan’n. (Bo Bolɛ 2:8) Ndɛ nga Zezi kannin’n, ɔ guɛli i awlɛn su nzue. Yɛle kɛ, kɛ asiɛ’n wá káci lika klanman’n, Zezi cɛ́n i naan ɔ tran nun wie.

Biblu’n se kɛ: “Sran kpa mun o, sran tɛ mun o, bé cɛ́n.” (Sa Nga Be Yoli’n 24:15) “Sran tɛ mun” yɛle be nga b’a siman Ɲanmiɛn i mmla mun’n, annzɛ b’a kwlá yoman Ɲanmiɛn i klun sa’n. I sɔfuɛ mɔ be ti sran kpanngban kpa’n, Zezi cɛ́n be. Yɛ sa tɛ yofuɛ m’ɔ nin Zezi be kokoli yalɛ’n, ɔ́ trán be nun wie. I sin’n, be klé be Ɲanmiɛn i mmla mun. Yɛ bé kwlá klé kɛ be klo Ɲanmiɛn naan be kunndɛ kɛ bé nánti i mmla’m be su.

KƐ SRAN TƐ MUN BÉ CƐ́N’N

?Kɛ bé wá cɛ́n sran tɛ mun’n, sa nga be yoli naan b’a wu’n, i su yɛ bé nían bé dí be jɔlɛ ɔ? Cɛcɛ. Afin Rɔmfuɛ Mun 6:7 se kɛ: “Kɛ sran’n ko wu’n, i ndɛ nun-man sa tɛ yolɛ nun kun.” Sran tɛ’m be wulɛ’n, ɔ ti be sa tɛ’n i akatua. Ɔ maan, kɛ bé wá cɛ́n be’n, sa nga bé wá yó i kasiɛn’n i su yɛ bé nían bé dí be jɔlɛ ɔ. ?Wafa sɛ yɛ i bo gúa mán be ɔ?

Kɛ bé wá cɛ́n sran tɛ mun’n, bé klé be Ɲanmiɛn i mmla mun. Mmla sɔ’m be o fluwa uflɛ wie mɔ bé wá trɛ́ be nun’n, be nun. ‘Sa nga sran sɔ’m bé yó’n,’ sɛ ɔ ti kpa o, sɛ ɔ ti tɛ o, Ɲanmiɛn i mmla sɔ’m be su yɛ bé nían dí be jɔlɛ ɔ. (Sa Nglo Yilɛ 20:12, 13) Sran tɛ sɔ’m be dan lika be liɛ’n, i kpɛ klikli nga bé klé be Ɲanmiɛn i klun sa i yolɛ’n yɛ ɔ o lɛ. Sɛ be kplin su’n, bé ɲán anannganman nguan asiɛ’n su.

Like sɔ mɔ Ɲanmiɛn Ndɛ’n kle ti’n, sran sunman be wa lafili Ɲanmiɛn su. Sran sɔ’m be nun kun suan Yeɔn Sug. Katoliki nun yɛ be tɛli i yɛ ɔ ɲinnin ɔn. I osufuɛ wie’m be ti plɛti. I kusu’n, ɔ seli kɛ ɔ́ yó katoliki lɔ bla nga be ti be liɛ ngunmin’n be nun kun. Ɔ maan, sua nga i nun yɛ bla sɔ’m be ngunmin be tran’n, ɔ ko trannin lɔ wie. Sanngɛ kɛ ɔ́ kɔ́ i ɲrun’n, like ng’ɔ wunnin i lɔ’n, ɔ sɛnngɛnnin i akunndan. Yɛ i sa sin bubuli i. Like ng’ɔ sɛnngɛnnin i akunndan’n i dan ekun’n, yɛle sin dan’n i su ndɛ nga be kle’n. Afin, ɔ bu i kɛ i sɔ’n kleman kɛ Ɲanmiɛn klo sran. Ɔ maan, w’a tranman katoliki’m be sua’n nun lɔ kun.

Zoova i Lalofuɛ kun ko fiteli Yeɔn Sug su. Ɔ kleli i be nga b’a wu’n, be su ndɛ nga Biblu’n kan’n. Ɔ kleli i kɛ: “Be nga be nyin o su’n, be si kɛ bé wú cɛn kun, sanngɛ be nga b’a wu’n be liɛ’n be wun-man sa fi wlɛ. Be minndɛ-man akatua fi kun.” (Akunndanfuɛ’n 9:4, 5) Zoova i Lalofuɛ’n ukɛli i naan w’a wun i wlɛ kɛ i nannannan nga b’a siman Ɲanmiɛn naan b’a wu’n, be wunman ɲrɛnnɛn sin dan kun nun. Sanngɛ, be su lafi. Yɛ be su minndɛ kɛ Ɲanmiɛn tinnge be. Yɛle kɛ, ɔ cɛn be.

Yeɔn Sug si kɛ ndɛ nanwlɛ nga Biblu’n kan mɔ w’a si i’n, sran sunman be simɛn i. I sɔ’n ti’n, ndɛ nga Zezi kannin m’ɔ o Matie 24:14 nun’n, ɔ fa yoli i awlɛn su like. Zezi seli kɛ: “Bé wá kán Nyanmiɛn sielɛ’n i jasin fɛ nga mɛn wunmuan’n nun naan sran’n kwlaa be ti Nyanmiɛn ndɛ’n. I sin yɛ mɛn i awieliɛ’n ɔ́ jú-ɔ.” Kɛ é sé yɛ’n, Yeɔn Sug bo jasin fɛ’n. Ɔ kan ninnge ɲɛnmɛn nga Ɲanmiɛn wá yó be’n, be ndɛ fa cici i wiengu’m be wla.

“NYANMIƐN LIƐ’N, Ɔ KPA-MAN SRAN NUN”

Ɲanmiɛn Ndɛ’n se kɛ: “Nyanmiɛn liɛ’n, ɔ kpa-man sran nun, sanngɛ nvle kwlaa nun’n, sran ng’ɔ sro i b’ɔ yo i klun sa’n, i klun jɔ i wun.” (Sa Nga Be Yoli’n 10:34, 35) I sɔ yɛ e kwlakwla e kunndɛ kɛ Ɲanmiɛn m’ɔ “klo sa nga be yo i i nuan su’n, ɔ klo sa ng’ɔ ti nanwlɛ’n,” ɔ yo ɔ.​​—Jue Mun 33:5.