Ikaduwang Cronica

23 Kan ikapitong taon, may kusog nin buot na huminiro si Jehoiada asin naggibo siya nin kasunduan* sa mga namamayo nin mananggatos+ na si Azarias na aki ni Jeroham, Ismael na aki ni Jehohanan, Azarias na aki ni Obed, Maaseias na aki ni Adaias, asin Elisafat na aki ni Zicri. 2 Dangan naglibot sinda sa bilog na Juda asin tinipon an mga Levita+ hali sa gabos na siyudad kan Juda saka an mga pamayo kan mga angkan nin Israel. Pag-abot ninda sa Jerusalem, 3 an bilog na katiripunan* nakipagtipan+ sa hadi sa harong kan tunay na Diyos, dangan sinabi ni Jehoiada sa sainda:

“Magdangog kamo! An aki kan hadi an maghahadi, arog kan ipinanuga ni Jehova mapadapit sa mga aki ni David.+ 4 Ini an gigibuhon nindo: Pagtuluhon nindong grupo an mga saserdote saka mga Levita na nakaiskedyul na magbantay+ sa Sabbath. An inot na grupo iyo an mabantay sa mga pintuan,+ 5 an ikaduwang grupo mapuwesto sa harong* kan hadi,+ asin an ikatulong grupo mapuwesto sa Trangkahan kan Pundasyon, asin an bilog na banwaan mapuwesto sa mga patyo kan harong ni Jehova.+ 6 Dai nindo pagpalaugon sa harong ni Jehova an siisay man apuwera sa mga saserdote saka sa mga Levita na mga naglilingkod.+ Makakalaog sinda ta banal na grupo sinda, asin padagos na uutubon kan bilog na banwaan an obligasyon ninda ki Jehova. 7 Dapat nakapalibot sa hadi an mga Levita asin dapat may mga armas an kada saro sa sainda. Gadanon nindo an siisay man na gustong maglaog sa harong. Ibanan nindo an hadi sain man siya magduman.”*

8 Ginibo kan mga Levita asin kan bilog na Juda kun ano an mismong ipinagbuot ni Jehoiada na saserdote. Kaya tinipon kan kada saro sa sainda an saindang mga tawuhan na nakaiskedyul na magbantay sa Sabbath, pati an mga dai nakaiskedyul na magbantay sa Sabbath,+ huling pigpabantay pa man giraray ni Jehoiada na saserdote an mga dibisyon+ dawa bako na nindang turno. 9 Dangan itinao ni Jehoiada na saserdote sa mga namamayo nin mananggatos+ an mga garod asin an mga pansagang* pati an mga bilog na kalasag na mga nagin pagsadiri ni Hading David,+ na nasa harong kan tunay na Diyos.+ 10 Dangan an bilog na banwaan, na kada saro may armas,* ipinuwesto niya puon sa tuong parte kan harong sagkod sa walang parte kan harong, harani sa altar asin sa harong, sa palibot kan hadi. 11 Dangan ilinuwas ninda an aki kan hadi+ asin ibinugtak sa payo kaini an korona* saka ipinatong man sa payo kaini an* Patotoo*+ asin ginibo siyang hadi, asin linahidan siya ni Jehoiada saka kan mga aki kaini. Dangan nagsarabi sinda: “Mabuhay an hadi!”+

12 Kan madangog ni Atalia an ribok kan mga tawong nagdadaralagan asin nag-uurumaw sa hadi, tulos niyang dinumanan an mga tawo na nasa harong ni Jehova.+ 13 Dangan nahiling niyang nakatindog duman an hadi harani sa harigi kaini sa may entrada. Kaiba kan hadi an mga namamayo*+ saka an mga paratrumpeta, asin nag-uurugma an bilog na banwaan+ asin nagpapatanog sinda nin mga trumpeta, asin an mga parakanta na may mga instrumento sa musika an nanginginot* sa pag-umaw. Huli kaini, ginisi ni Atalia an saiyang bado asin nagkurahaw: “Kurumplutan! Kurumplutan!” 14 Pero pinaluwas kan saserdoteng si Jehoiada an mga namamayo kan mananggatos, na mga ninombrahan na mamahala sa hukbo, asin sinabi niya sa sainda: “Iluwas nindo siya sa raya kan mga suldados, asin an siisay man na magsunod sa saiya gadanon nindo sa espada!” Huling nainot nang sinabi kan saserdote: “Dai nindo siya paggadanon sa harong ni Jehova.” 15 Kaya dinakop ninda siya, asin kan madara na ninda siya sa may entrada kan Trangkahan nin Kabayo sa harong* kan hadi, tulos ninda siyang ginadan duman.

16 Dangan naggibo si Jehoiada nin tipan sa pag-ultanan niya asin kan bilog na banwaan asin kan hadi, na padagos sindang magigin banwaan ni Jehova.+ 17 Pagkatapos kaini, nagduruman sa harong* ni Baal an bilog na banwaan asin ginaba iyan,+ asin ginaraba ninda an saiyang mga altar saka pinarasa an saiyang mga imahen,+ asin ginadan ninda sa atubangan kan mga altar si Mattan na saserdote ni Baal.+ 18 Dangan an harong ni Jehova ipinamahala ni Jehoiada sa mga saserdote saka sa mga Levita, na inorganisar ni David sa mga dibisyon tanganing mangataman sa harong ni Jehova asin tanganing magdulot nin mga atang na pigtututong para ki Jehova+ sigun sa nakasurat sa Katugunan ni Moises,+ na may pag-urugma asin may kanta, arog kan ipinagbuot* ni David. 19 Ipinuwesto man niya sa mga trangkahan kan harong ni Jehova an mga bantay sa trangkahan,+ tanganing mayong makalaog na siisay man na bakong malinig sa ano man na dahilan. 20 Dangan, iiniba niya an mga namamayo nin mananggatos,+ an mga respetadong tawo, an mga namamahala sa banwaan, asin an bilog na banwaan, tapos ihinatod ninda an hadi hali sa harong ni Jehova. Nag-agi sinda sa itaas na trangkahan pasiring sa harong* kan hadi asin pinatukaw ninda an hadi sa trono+ kan kahadian.+ 21 Kaya nag-urugma an bilog na banwaan asin nagin matuninong an siyudad, huling nagadan na ninda si Atalia paagi sa espada.