Jeremias

19 Ini an sabi ni Jehova: “Lakaw asin magbakal ka sa paragibo nin kuron nin sarong lalagan na gibo sa dalipay.+ Mag-iba ka nin nagkapirang kamagurangan kan banwaan saka nagkapirang kamagurangan kan mga saserdote, 2 asin magluwas ka pasiring sa Kababan kan Aki ni Hinom,+ sa may entrada kan Trangkahan kan mga Pasang Kuron. Asin ipahayag mo duman an mga tataramon na sasabihon ko sa saimo. 3 Sabihon mo, ‘Dangugon nindo an tataramon ni Jehova, kamong mga hadi kan Juda asin mga nag-iistar sa Jerusalem. Ini an sabi ni Jehova na pamayo nin mga hukbo, an Diyos kan Israel:

“‘“Mapaabot na ako nin kapahamakan sa lugar na ini, asin ikakabigla iyan* kan siisay man na makakabareta kaini. 4 Huli ta binayaan ninda ako+ asin ginibo ninda an lugar na ini na dai na mamidbid.+ Nag-aatang sinda digdi sa ibang mga diyos, na mga dai ninda midbid pati na kan mga apuon ninda saka kan mga hadi kan Juda, asin pinano ninda an lugar na ini nin dugo kan mga daing sála.+ 5 Itinugdok ninda an mga halangkaw na lugar ni Baal tanganing suluon sa kalayo an mga aki nindang lalaki bilang mga bílog na dulot na pigtututong para ki Baal,+ sarong bagay na dai ko ipinagbuot o sinabi asin dai man lamang naglaog sa puso* ko.”’+

6 “‘“Kaya maabot an mga aldaw,” an sabi ni Jehova, “na dai na aapudon na Tofet o Kababan kan Aki ni Hinom an lugar na ini kundi Kababan nin Paggadan.+ 7 Uulangon ko an mga plano kan Juda asin Jerusalem sa lugar na ini, asin papangyarihon kong magadan sinda paagi sa espada sa atubangan kan saindang mga kalaban asin paagi sa kamot kan mga gustong gumadan sa sainda.* Asin ibabahog ko sa mga gamgam sa kalangitan asin sa mga hayop sa daga an mga bangkay ninda.+ 8 Asin gigibuhon ko an siyudad na ini na magin dahilan na an mga tawo tarakigan asin sarong bagay na tataghuyan. An lambang mag-agi diyan mapapaburarat sa takot asin mapapataghoy huli sa gabos na damat diyan.+ 9 Asin ipapakakan ko sa sainda an laman kan saindang mga aking lalaki asin mga aking babayi, asin kakakanon kan lambang saro sa sainda an laman kan saiyang kapwa, huli kan pagsalikop asin kan kawaran ninda nin paglaom pag pinalibutan sinda kan mga kalaban ninda asin kan mga gustong gumadan sa sainda.”’*+

10 “Dangan an lalagan pasaon mo sa atubangan kan mga lalaking maiba sa saimo, 11 asin sabihon mo sa sainda, ‘Ini an sabi ni Jehova na pamayo nin mga hukbo: “Arog ko kaini papasaon an banwaan na ini asin an siyudad na ini, siring sa saro na pinapasa an lalagan kan paragibo nin kuron tanganing dai na iyan nuarin man mabilog giraray; asin ilulubong ninda sa Tofet an mga bangkay sagkod sa mayo nang lugar na mapaglulubungan kan mga iyan.”’+

12 “‘Arog kaiyan an gigibuhon ko sa lugar na ini,’ an sabi ni Jehova, ‘asin sa mga nag-iistar digdi; gigibuhon kong siring sa Tofet an siyudad na ini. 13 Asin an mga harong sa Jerusalem asin an mga harong kan mga hadi kan Juda magigin maati arog kan lugar na ini, kan Tofet,+ iyo, gabos na harong na sa mga bubungan kaiyan nagdulot sinda nin mga atang para sa bilog na hukbo sa kalangitan*+ asin nagbubo nin mga dulot na inumon para sa ibang mga diyos.’”+

14 Kan makabalik si Jeremias hali sa Tofet, kun sain siya isinugo ni Jehova tanganing magpropesiya, nagtindog siya sa patyo kan harong ni Jehova asin sinabi sa bilog na banwaan: 15 “Ini an sabi ni Jehova na pamayo nin mga hukbo, an Diyos kan Israel, ‘Papaabuton ko sa siyudad na ini asin sa gabos na banwa kaini an gabos na kapahamakan na sinabi ko laban digdi, ta may katagasan nin payo sindang nagsayuma na* magsunod sa mga tataramon ko.’”+