Bilang

8 Nakipag-ulay si Jehova ki Moises, na sinasabi: 2 “Kaulayon mo si Aaron asin sabihan mo siya, ‘Pag pinalaad mo an mga ilawan, dapat na maliwanagan kan pitong ilawan an atubangan kan kandelero.’”+ 3 Kaya ini an ginibo ni Aaron: Pinalaad niya an mga ilawan kaiyan tanganing magin maliwanag an atubangan kan kandelero,+ arog kan ipinagbuot ni Jehova ki Moises. 4 Arog kaini an pagkagibo sa kandelero: An bilog na kandelero, puon sa hawak kaiyan sagkod sa mga burak-burak, gibo sa pinulpog na bulawan.+ Ginibo an kandelero sigun sa disenyo na ipinahiling ni Jehova ki Moises sa bisyon.+

5 Nakipag-ulay giraray si Jehova ki Moises, na sinasabi: 6 “Kuanon mo an mga Levita sa mga Israelita, asin linigon mo sinda.+ 7 Ini an gibuhon mo para magin malinig sinda: Wirikan mo sinda kan tubig na panglinig nin kasalan, asin dapat nindang ahitan nin labaha an bilog nindang hawak saka labahan an saindang mga bado; sa paaging iyan magigi sindang malinig.+ 8 Dangan makua sinda nin sarong torilyong baka+ saka nin pinong harina na sinalakan nin lana bilang dulot na tipasi+ na idudulot kaiba kaiyan, asin magkua ka man nin saro pang torilyong baka para iatang bilang dulot para sa kasalan.+ 9 Asin darahon mo an mga Levita sa atubangan kan tolda nin pakipagtagbuan, tapos tiripunon mo an bilog na katiripunan kan mga Israelita.+ 10 Sa pagpresentar mo kan mga Levita sa atubangan ni Jehova, dapat na ipatong kan mga Israelita an saindang mga kamot sa mga Levita.+ 11 Asin idudulot* ni Aaron ki Jehova an mga Levita bilang dulot na pigtuturutabyon+ hali sa mga Israelita, asin gigibuhon ninda an paglilingkod ki Jehova.+

12 “Dangan ipapatong kan mga Levita an saindang mga kamot sa payo kan mga baka.+ Pagkatapos kaiyan, iaatang ki Jehova an saro bilang dulot para sa kasalan asin su saro man bilang dulot na pigtututong para mabayadan an kasalan+ kan mga Levita. 13 Asin papatindugon mo an mga Levita sa atubangan ni Aaron asin kan saiyang mga aki asin idudulot* mo sinda ki Jehova bilang dulot na pigtuturutabyon. 14 Isuway mo an mga Levita sa mga Israelita, asin mapapasakuya an mga Levita.+ 15 Pagkatapos kaiyan, malaog an mga Levita para maglingkod sa tolda nin pakipagtagbuan. Sa arog kaiyan na paagi mo sinda lilinigon asin idudulot* bilang dulot na pigtuturutabyon. 16 Huling sinda an mga itinao, na itinao sa sako hali sa mga Israelita. Kukuanon ko sinda bilang kasalida kan gabos na panganay* kan mga Israelita.+ 17 Huli ta sakuya an lambang panganay sa mga Israelita, iyan man tawo o hayop.+ Pinabanal ko sinda para sa sakong sadiri kan aldaw na gadanon ko an lambang panganay sa daga nin Ehipto.+ 18 Kukuanon ko an mga Levita kasalida kan gabos na panganay sa mga Israelita. 19 Itatao ko an mga Levita ki Aaron saka sa saiyang mga aki bilang an mga itinao hali sa mga Israelita, tanganing gibuhon an paglilingkod sa tolda nin pakipagtagbuan alang-alang sa mga Israelita+ asin tanganing gumibo nin pagbayad sa kasalan kan mga Israelita, para mayo nin kapahamakan na mangyari sa mga Israelita+ huli sa pagrani kan banwaan nin Israel sa banal na lugar.”

20 Iyo iyan an ginibo ni Moises asin ni Aaron saka kan bilog na katiripunan kan mga Israelita sa mga Levita. Ginibo iyan kan mga Israelita sa mga Levita kauyon kan gabos na ipinagbuot ni Jehova ki Moises. 21 Kaya dinalisay kan mga Levita an saindang sadiri asin linabahan an saindang bado,+ tapos idinulot* sinda ni Aaron ki Jehova bilang dulot na pigtuturutabyon.+ Dangan nagdulot si Aaron para mabayadan an saindang kasalan tanganing magin malinig sinda.+ 22 Pagkatapos kaiyan, naglaog an mga Levita para gibuhon an saindang paglilingkod sa tolda nin pakipagtagbuan sa irarom kan pamamahala ni Aaron asin kan mga aki kaini. Ginibo ninda an gabos na ipinagbuot ni Jehova ki Moises may koneksiyon sa mga Levita.

23 Sinabi ni Jehova ki Moises: 24 “Ini an magigin patakaran para sa mga Levita: Puon 25 anyos pataas, an sarong lalaking Levita magigin kabilang na sa mga naglilingkod sa tolda nin pakipagtagbuan. 25 Pero paglampas niya nin 50 anyos, maretiro na siya asin mapundo na sa paglilingkod. 26 Puwede siyang tumabang sa saiyang mga tugang na nag-aasikaso kan mga responsabilidad sa tolda nin pakipagtagbuan, pero dai na siya magkakaigwa nin asignasyon duman. Iyan an gigibuhon may koneksiyon sa mga Levita asin sa saindang mga responsabilidad.”+