Juan

8 12 Dangan nagtaram giraray sa sainda si Jesus, na nagsasabi: “Ako an ilaw kan kinaban. An siisay man na magsunod sa sako dai nanggad malakaw sa kadikluman, kundi mapapasaiya an ilaw nin buhay.” 13 Sa siring sinabi kan mga Fariseo sa saiya: “Ika an nagpapatotoo manungod sa sadiri mo; bakong balido an patotoo mo.” 14 Bilang simbag sinabi ni Jesus sa sainda: “Maski ako mismo an nagpapatotoo manungod sa sadiri ko, balido an sakuyang patotoo, huli ta aram ko kun sain ako hali asin kun sain ako maduman. Alagad dai nindo aram kun sain ako hali asin kun sain ako maduman. 15 Naghuhukom kamo sigun sa laman;* dai lamang ako naghuhukom sa siisay man na tawo. 16 Alagad ta kun maghukom man ako, an sakuyang paghukom kauyon kan katotoohan, huli ta bako sana ako an naghuhukom kundi kaiba ko an Ama na nagsugo sa sako. 17 Siring man, nasusurat sa sadiri nindong Katugunan: ‘An patotoo nin duwang tawo balido.’ 18 Saro ako na nagpapatotoo manungod sa sadiri ko, asin an Ama na nagsugo sa sako nagpapatotoo manungod sa sako.” 19 Dangan sinabi ninda sa saiya: “Hain an saimong Ama?” Nagsimbag si Jesus: “Dai nindo ako midbid pati an sakuyang Ama. Kun namidbid nindo ako, mamimidbid man nindo an sakuyang Ama.” 20 Sinabi niya an mga tataramon na ini kan yaon siya sa namumugtakan kan mga lalagan nin kontribusyon mantang nagtutukdo siya sa templo. Alagad mayo nin duminakop sa saiya, huli ta dai pa nag-aabot an saiyang oras.

21 Kaya sinabi niya giraray sa sainda: “Mahali ako, asin hahanapon nindo ako, alagad ta magagadan kamong makasalan. Sa dudumanan ko, dai kamo makakaduman.” 22 An mga Judio nagsarabi: “Mahugot daw siya? Sabi niya kaya, ‘Sa dudumanan ko, dai kamo makakaduman.’” 23 Sinabi pa niya sa sainda: “Kamo mga taga digdi sa ibaba; ako taga duman sa itaas. Kamo taga digdi sa kinaban na ini; ako bakong taga digdi sa kinaban na ini. 24 Iyan an dahilan kaya sinabi ko sa saindo: Magagadan kamong makasalan. Huli ta kun dai kamo magtubod na ako iyo an sinabi kong ako, magagadan kamong makasalan.” 25 Kaya sinabi ninda sa saiya: “Siisay ka?” Nagsimbag si Jesus sa sainda: “Taano ta nakikipag-ulay pa baya ako sa saindo? 26 Dakul na bagay an kaipuhan kong sabihon mapadapit sa saindo asin dakul na bagay an huhusgaran ko. Sa katunayan, Siya na nagsugo sa sako pirming totoo an sinasabi, asin an mismong mga bagay na nadangog ko sa saiya itinataram ko sa kinaban.” 27 Dai ninda nasabutan na nagtataram siya sa sainda manungod sa Ama. 28 Dangan sinabi ni Jesus: “Pag ikinaitaas na nindo an Aki nin tawo, dangan nindo maaaraman na ako iyo an sinabi kong ako asin na dai akong ginigibo sa sadiri kong kabutan; kundi kun ano an itinukdo kan Ama sa sako, an mga bagay na ini an itinataram ko. 29 Asin Siya na nagsugo sa sako nasa kaibanan ko; dai niya ako pinabayaan na ako sana, huli ta pirmi kong ginigibo an mga bagay na nakakapaugma sa saiya.” 30 Miyentras na sinasabi niya an mga bagay na ini, dakul an nagturubod sa saiya.

31 Dangan sinabi pa ni Jesus sa mga Judio na nagturubod sa saiya: “Kun magdadanay kamo sa sakuyang tataramon, kamo tunay kong mga disipulo, 32 asin maaaraman nindo an katotoohan, asin an katotoohan mapatalingkas sa saindo.” 33 Nagsimbag sinda sa saiya: “Mga aki kami ni Abraham asin dai kami kasuarin man nagin uripon nin siisay man. Ano ta nagsasabi kang ‘Magigin talingkas kamo’?” 34 Sinimbag sinda ni Jesus: “Sinisigurado ko nanggad sa saindo, an lambang naggigibo nin kasalan uripon nin kasalan. 35 Saro pa, an uripon dai nagdadanay sa harong kan saiyang kagurangnan sagkod lamang; an aki nagdadanay diyan sagkod lamang. 36 Kaya kun patalingkason kamo kan Aki, kamo magigin tunay na talingkas. 37 Aram kong mga aki kamo ni Abraham. Alagad pighihinguwa nindo akong gadanon, huli ta an sakuyang tataramon dai nagkakaigwa nin lugar diyan sa saindo. 38 Itinataram ko an mga bagay na nahiling ko kan kaibanan ako kan Ama, alagad ginigibo nindo an mga bagay na nadadangog nindo sa saindong ama.” 39 Bilang simbag sinabi ninda sa saiya: “Si Abraham an samuyang ama.” Sinabi ni Jesus sa sainda: “Kun mga aki kamo ni Abraham, ginigibo dapat nindo an mga gibo ni Abraham. 40 Pero ngunyan pighihinguwa nindo akong gadanon, ako na nagsasabi sa saindo kan katotoohan na nadangog ko sa Diyos. Dai ini ginibo ni Abraham. 41 Ginigibo nindo an mga gibo kan saindong ama.” Sinabi ninda sa saiya: “Dai kami ipinangaki bunga nin imoralidad;* may saro kaming Ama, an Diyos.”

42 Sinabi ni Jesus sa sainda: “Kun an Diyos an saindong Ama, mamumutan nindo ako, huli ta naggikan ako sa Diyos asin yaon ako digdi. Dai ako nagdatong sa sadiri kong kabutan, kundi isinugo Niya ako. 43 Ano ta dai nindo nasasabutan an sinasabi ko? Dahil habo nindong dangugon an tataramon ko. 44 Gikan kamo sa saindong amang Diyablo, asin gusto nindong gibuhon an mga mawot kan saindong ama. An sarong iyan paragadan puon sa kapinunan, asin dai siya nanindugan sa katotoohan, huli ta mayo sa saiya an katotoohan. Pag nagtataram siya kan kaputikan, ginigibo niya iyan kauyon kan naturalesa niya, huli ta siya putikon asin iyo an ama kan kaputikan. 45 Alagad huling katotoohan an sinasabi ko sa saindo, dai kamo nagtutubod sa sako. 46 Siisay sa saindo an makakapagpatunay na may nagibo akong kasalan? Kun nagtataram ako nin katotoohan, taano ta dai kamo nagtutubod sa sako? 47 An saro na gikan sa Diyos naghihimati sa mga tataramon nin Diyos. Ini an dahilan kaya dai kamo naghihimati, huli ta bako kamong gikan sa Diyos.”

48 Bilang simbag sinabi kan mga Judio sa saiya: “Bakong tama an sabi mi, ‘Samaritano ka asin igwa ka nin demonyo’?” 49 Nagsimbag si Jesus: “Mayo akong demonyo, kundi tinatawan ko nin onra an sakuyang Ama, asin rinaraot nindo an sakong reputasyon. 50 Alagad dai ako naghahanap nin kamurawayan para sa sadiri ko; igwa nin Saro na naghahanap kaiyan asin siya an naghuhukom. 51 Sinisigurado ko nanggad sa saindo, kun an siisay man nag-uutob kan sakuyang tataramon, dai siya nuarin man magagadan.” 52 Sinabi kan mga Judio sa saiya: “Ngunyan aram mi nang igwa ka talaga nin demonyo. Nagadan si Abraham, pati na an mga propeta, pero sinasabi mo, ‘Kun an siisay man nag-uutob kan sakuyang tataramon, dai siya nuarin man magagadan.’ 53 Ano mas urog ka pa sa samuyang amang si Abraham? Nagadan siya, pati na an mga propeta. Siisay ka man sa paghuna mo?” 54 Suminimbag si Jesus: “Kun ako an nagpapamuraway sa sadiri ko, daing saysay an sakong kamurawayan. An sakuyang Ama an nagpapamuraway sa sako, an saro na sinasabi nindo na saindong Diyos. 55 Pero dai nindo siya midbid, alagad midbid ko siya. Asin pag ako nagsabing dai ko siya midbid, ako magigin putikon arog nindo. Alagad midbid ko talaga siya asin inuutob ko an saiyang tataramon. 56 An saindong amang si Abraham naugmang marhay sa paglaom na mahiling an sakuyang aldaw, asin nahiling niya iyan asin nag-ugma siya.” 57 Dangan sinabi kan mga Judio sa saiya: “Dai ka pa ngani 50 anyos, tapos nahiling mo na si Abraham?” 58 Sinabi ni Jesus sa sainda: “Sinisigurado ko sa saindo, bago pa nabuhay si Abraham, buhay na ako.” 59 Kaya nagpururot sinda nin gapo na igagapo sa saiya, alagad nagtago si Jesus asin nagluwas sa templo.