Hebreo

9 Kun para sa nainot na tipan, igwa iyan kaidto nin legal na mga regulasyon sa sagradong paglilingkod asin nin banal na lugar digdi sa daga. 2 Huli ta ginibo an tolda na may duwang kuwarto, asin yaon sa inot na kuwarto an kandelero asin an lamesa saka an mga tinapay na pandulot; inaapod an kuwartong iyan na Banal na Lugar. 3 Alagad sa likod kan ikaduwang kurtina iyo an kuwarto kan tolda na inaapod na Kabanal-banali. 4 Yaon digdi an sarong bulawan na insensaryo saka an kaban kan tipan na enterong nakakalupkupan nin bulawan, asin nasa laog kan kaban an bulawan na dulay na linagan kan manna asin an sugkod ni Aaron na nagburak saka an mga tablang gapo kan tipan; 5 asin sa ibabaw kaiyan iyo an mamuraway na mga kerubin na nakalindong sa takop* kan kaban. Pero bako ini an panahon para sabihon nin detalyado an mapadapit sa mga bagay na ini.

6 Kan mahaman sa arog kaining paagi an mga bagay na ini, an mga saserdote regular na minalaog sa inot na kuwarto kan tolda tanganing isagibo an sagradong mga paglilingkod; 7 alagad an halangkaw na saserdote solong minalaog sa ikaduwang kuwarto sarong beses sa sarong taon, asin dai siya minalaog na mayong darang dugo, na saiyang idinudulot para sa sadiri niya asin para sa mga nagibong kasalan kan banwaan na dai ninda tinutuyo. 8 Sa siring malinaw na ipinapahiling kan banal na espiritu na an dalan palaog sa banal na lugar dai pa ihinahayag mantang nakatindog pa an inot na tolda. 9 An toldang ini sarong ilustrasyon para sa presenteng panahon, asin uyon sa areglong ini, igwa nin ipinepresentar na mga dulot saka atang. Alagad, dai kaya kan mga ini na lubos na linigon an konsiyensiya kan tawo na nagsasagibo nin sagradong paglilingkod. 10 An mga iyan may koneksiyon sana sa mga kakanon asin mga inumon saka manlain-lain na klase nin seremonyal na paglilinig.* An mga iyan mga legal na regulasyon mapadapit sa hawak* asin ipinautob sagkod na umabot an itinalaan na panahon para itanos an mga bagay-bagay.

11 Alagad, kan si Cristo magdatong bilang sarong halangkaw na saserdote para magpaabot nin marahay na mga bagay, na ngunyan yaon na, naglaog siya sa sarong mas importante asin mas marahay na tolda na bakong gibo nin mga kamot, an buot sabihon, bakong kabtang kan mga bagay digdi sa daga. 12 Luminaog siya sa banal na lugar na an dara bako an dugo nin mga kanding o nin mga torilyong baka, kundi an sadiri niyang dugo, asin ginibo niya iyan nin saro sanang beses para sa gabos na panahon, na paagi kaiyan nagibo niyang magkamit kita nin daing sagkod na kaligtasan.* 13 Huli ta kun an dugo nin mga kanding asin nin mga toro saka an abo nin sarong tarnerang baka* na iwinirik duman sa mga nadigtaan nakakapadalisay kan laman, 14 bako daw na an dugo kan Cristo, na paagi sa paggiya nin espiritung daing sagkod nagdulot sa Diyos kan saiyang sadiri na mayong digta, lalo nang makakalinig kan satuyang mga konsiyensiya hali sa gadan na mga gibo tanganing makapagtao kita nin sagradong paglilingkod sa buhay na Diyos?

15 Iyan an dahilan kaya tagapag-ultanan siya nin sarong bagong tipan, tanganing idtong mga inapod mag-ako kan ipinanugang mana na magdadanay sagkod lamang, asin nagin posible iyan dahil nagadan siya tanganing paagi sa pantubos mapatalingkas sinda sa mga ginibo nindang pagbalga sa irarom kan nainot na tipan. 16 Pag igwa kaya nin sarong tipan, hinahagad kaiyan na magadan idtong tawo na nagpangyari kan tipan, 17 huli ta an sarong tipan nagigin balido sana paagi sa kagadanan, palibhasa mayo iyan nin epekto sagkod na buhay pa an tawong nagpangyari kan tipan. 18 Kauyon kaiyan, an nainot na tipan dai man nagkaepekto* sagkod na mayong dugo na pinabulos. 19 Huli ta kan ipahayag ni Moises sa bilog na banwaan an lambang pagbuot sa Katugunan, nagkua siya nin dugo nin mga torilyong baka asin mga kanding saka sinalakan iyan nin tubig. Dangan guminamit siya nin pulang telang lana* na nakabugkos sa sanga nin hisopo* tanganing iwirik an dugo sa libro* asin sa bilog na banwaan, 20 na an sabi: “Iyo ini an dugo kan tipan na ipinagbuot nin Diyos na utubon nindo.” 21 Winirikan man niya kan dugo an tolda asin an gabos na kagamitan para sa banal na paglilingkod. 22 Iyo, sigun sa Katugunan haros gabos na bagay nalilinig nin dugo, asin kun mayo nin dugo na pinabulos mayo man nin mangyayaring kapatawadan.

23 Kun siring, an mga bagay na ini na nagseserbing simbolikong ladawan kan mga bagay sa langit kaipuhan na linigon sa arog kaiyan na paagi, alagad an mga bagay sa langit nangangaipo nin mas marahay nanggad na mga atang. 24 Huli ta si Cristo dai naglaog sa sarong banal na lugar na gibo nin mga kamot, na sarong kopya kan tunay na banal na lugar, kundi sa langit mismo. Kaya nasa langit na siya ngunyan tanganing umatubang sa* Diyos para sa sato. 25 Ginibo niya ini bako para idulot an saiyang sadiri nin pauruutro, siring kan ginigibo kan halangkaw na saserdote na minalaog sa banal na lugar kada taon dara an dugo na bako man saiyang dugo. 26 Ta kun bakong siring kaiyan, kaipuhan niyang magsakit nin pauruutro puon sa pagkaestablisar kan kinaban. Alagad ngunyan ihinayag niya an saiyang sadiri nin saro sanang beses para sa gabos na panahon sa pagtatapos kan mga sistema nin mga bagay* tanganing paraon an kasalan paagi sa pag-atang niya kan saiyang sadiri. 27 Asin kun paanong an mga tawo nakatalaan na magadan nin saro sanang beses para sa gabos na panahon, alagad pagkatapos kaini sinda huhukuman, 28 siring man an Cristo idinulot nin saro sanang beses para sa gabos na panahon tanganing darahon an mga kasalan nin dakul; dangan sa ikaduwang beses na siya magpahiling iyan bako nang para halion an kasalan, asin mahihiling siya kan mga udok na naglalaom sa saiya para sa saindang kaligtasan.