Bilang

10 Dangan sinabi ni Jehova ki Moises: 2 “Maggibo ka nin duwang trumpeta+ na gibo sa pinulpog na plata,* asin gamiton mo an mga iyan para tiripunon an katiripunan asin para magtaong senyal na mabalyo na nin kampo. 3 Pag parehong pinatanog an duwang trumpeta, an bilog na katiripunan dapat na magtiripon sa saimo sa may entrada kan tolda nin pakipagtagbuan.+ 4 Kun saro lang an pinatanog, an mga pamayo sana, na iyo an mga namamayo sa manangribo sa Israel, an matiripon sa saimo.+

5 “Pag nagpatanog kamo nin paburubagong tanog nin trumpeta, mapuon na sa pagbaklay an mga nagkakampo sa parteng sirangan.+ 6 Pag nagpatanog kamo nin paburubagong tanog nin trumpeta sa ikaduwang beses, mapuon na sa pagbaklay an mga nagkakampo sa parteng timog.+ Arog kaiyan an dapat na magin tanog kan mga trumpeta kada mapuon na sa pagbaklay an saro sa mga dibisyon.

7 “Pag ipapaapod an katiripunan,* dapat nindong patanugon an mga trumpeta,+ pero dapat na bakong paburubago an tanog kaiyan. 8 An mga aki ni Aaron, na mga saserdote, an dapat na magpatanog kan mga trumpeta,+ asin an paggamit kan mga iyan magigin sarong nagdadanay na reglamento para sa gabos nindong henerasyon.

9 “Kun makikigiyera kamo sa saindong mga kaiwal na masalakay sa saindong daga, gamiton nindo an mga trumpeta tanganing magpatanog nin pangapudan sa pakikigiyera,+ asin ta gigirumdumon kamo ni Jehova na saindong Diyos asin ililigtas niya kamo sa saindong mga kaiwal.

10 “Siring man, sa saindong maugmang mga okasyon+—sa saindong mga kapiyestahan+ asin sa kapinunan kan saindong mga bulan—patanugon nindo an mga trumpeta pag nagdulot kamo kan saindong mga dulot na pigtututong+ asin kan saindong mga atang sa pakikikabtang;+ gigirumdumon kamo kan saindong Diyos paagi kan mga iyan. Ako si Jehova na saindong Diyos.”+

11 Kan ikaduwang taon, kan ika-20 aldaw kan ikaduwang bulan,+ nag-itaas an panganuron hali sa ibabaw kan tabernakulo+ kan Patotoo. 12 Kaya nagpuon na maghali an mga Israelita sa kaawagan nin Sinai kauyon kan itinaong areglo sa paghali ninda,+ asin an panganuron nagpundo sa kaawagan nin Paran.+ 13 Ini an inot nindang paghali, na sinusunod an pagbuot ni Jehova paagi ki Moises.+

14 Kaya an dibisyon kan kampo kan mga aki ni Juda na kompuwesto nin tulong tribo an inot na naghali sigun sa saindang mga grupo,* asin si Nason+ na aki ni Aminadab an nanginginot sa saiyang grupo. 15 Sa grupo kan tribo ni Isacar, an nanginginot iyo si Netanel+ na aki ni Zuar. 16 Sa grupo kan tribo ni Zebulon, an nanginginot iyo si Eliab+ na aki ni Helon.

17 Pagkatapos tarangkason an tabernakulo,+ naghali na an mga aki ni Gerson+ asin an mga aki ni Merari+ dara an tabernakulo.

18 Dangan an dibisyon kan kampo ni Ruben na kompuwesto nin tulong tribo an sunod na naghali sigun sa saindang mga grupo,* asin si Elizur+ na aki ni Sedeur an nanginginot sa saiyang grupo. 19 Sa grupo kan tribo ni Simeon, an nanginginot iyo si Selumiel+ na aki ni Zurisadai. 20 Sa grupo kan tribo ni Gad, an nanginginot iyo si Eliasaf+ na aki ni Deuel.

21 Dangan sunod na naghali an mga Kohatita dara an mga gamit sa santuwaryo.+ Ititindog na an tabernakulo bago pa sinda mag-abot.

22 Dangan an dibisyon kan kampo kan mga aki ni Efraim na kompuwesto nin tulong tribo an sunod na naghali sigun sa saindang mga grupo,* asin si Elisama+ na aki ni Amihud an nanginginot sa saiyang grupo. 23 Sa grupo kan tribo ni Manases, an nanginginot iyo si Gamaliel+ na aki ni Pedazur. 24 Sa grupo kan tribo ni Benjamin, an nanginginot iyo si Abidan+ na aki ni Gideoni.

25 Dangan an dibisyon kan kampo kan mga aki ni Dan na kompuwesto nin tulong tribo an sunod na naghali sigun sa saindang mga grupo,* na iyo an nagseserbing depensa sa likudan para sa gabos na dibisyon, asin si Ahiezer+ na aki ni Amisadai an nanginginot sa saiyang grupo. 26 Sa grupo kan tribo ni Aser, an nanginginot iyo si Pagiel+ na aki ni Ocran. 27 Sa grupo kan tribo ni Neftali, an nanginginot iyo si Ahira+ na aki ni Enan. 28 Iyan an areglo sa paghali na sinusunod kan mga Israelita asin kan saindang mga grupo* pag minabalyo sinda nin kampo.+

29 Dangan sinabi ni Moises ki Hobab na aki ni Reuel*+ na Midianita na panugangan ni Moises: “Maduman na kami sa lugar na ipinanuga samo ni Jehova, na sinasabi, ‘Itatao ko iyan sa saindo.’+ Mag-iba ka samo.+ Magigin marahay an kamugtakan mo kaiba mi, huli ta nanuga si Jehova na matao siya nin marahay na mga bagay sa Israel.”+ 30 Pero nagsimbag siya: “Dai ako maiba saindo. Mapuli ako sa sadiri kong nasyon asin sa sakuyang mga paryente.” 31 Kaya nagsabi si Moises: “Dai mo tabi kami pagbayaan, huling ika an nakakaaram kun sain kami dapat magkampo sa kaawagan, asin ika an puwede ming magin giya.* 32 Saka pag nag-iba ka samo,+ siguradong tatawan mi man ika kan ano man na marahay na bagay na itatao sa samo ni Jehova.”

33 Kaya nagpuon sindang magbaklay nin tulong aldaw hali sa bukid ni Jehova,+ asin an kaban+ kan tipan ni Jehova dara-dara sa inutan ninda sa tulong aldaw na pagbaklay na iyan para maghanap nin lugar na mapapahingaluan ninda.+ 34 Asin pag nagbabaklay sinda para magbalyo nin kampo, nasa ibabaw ninda an panganuron ni Jehova+ pag aldaw.

35 Kada papasanon na an Kaban, minasabi si Moises: “Tumindog ka, O Jehova,+ asin iwararak mo an saimong mga kaiwal, asin padulagon mo sa atubangan mo an mga nauungis sa saimo.” 36 Asin pag ibababa na iyan, minasabi siya: “Bumalik ka, O Jehova, sa dai mabilang na manangribo* kan Israel.”+