Ezekiel

36 “Asin ika, aki nin tawo, magpropesiya ka manungod sa mga bukid kan Israel asin sabihon mo, ‘O mga bukid kan Israel, danguga an mensahe ni Jehova. 2 Ini an sinabi kan Soberanong Kagurangnan na Jehova: “Arog kaini an sinabi kan kaiwal laban sa saindo, ‘Aha! Pati an suanoy na haralangkaw na lugar nagin pagsadiri mi!’”’+

3 “Kaya magpropesiya ka asin magsabi, ‘Ini an sinabi kan Soberanong Kagurangnan na Jehova: “Dahil ginibo ninda kamong tiwangwang asin sinalakay hali sa gabos na direksiyon, para magin pagsadiri kamo kan mga nakaligtas* hali sa mga nasyon asin dahil pinag-uurulay-ulayan kamo kan mga tawo asin pigpapakaraot kamo,+ 4 kaya, O mga bukid kan Israel, danguga an mensahe kan Soberanong Kagurangnan na Jehova! Ini an sinabi kan Soberanong Kagurangnan na Jehova sa mga bukid saka mga bulod, sa mga sapa saka mga kababan, sa mga kagabaan na tiwangwang,+ asin sa abandonadong mga siyudad na sinamsaman saka pigtuya-tuya kan mga nakaligtas hali sa mga nasyon sa palibot ninda;+ 5 sinabi sa sainda kan Soberanong Kagurangnan na Jehova: ‘Sa naglalaad kong kaanggutan,+ mataram ako laban sa mga nakaligtas hali sa mga nasyon saka sa bilog na Edom, duman sa mga ugmahon saka may pagtuya-tuya+ na sinadiri an sakuyang daga, para mapasainda an mga pasabsaban kaiyan tapos samsaman iyan.’”’+

6 “Kaya magpropesiya ka manungod sa daga nin Israel, asin sabihon mo sa mga bukid saka sa mga bulod, sa mga sapa saka sa mga kababan, ‘Ini an sinabi kan Soberanong Kagurangnan na Jehova: “Uya! Mataram ako sa grabeng kaanggutan ko, dahil nagtios kamo nin panunupog kan mga nasyon.”’+

7 “Kaya ini an sinabi kan Soberanong Kagurangnan na Jehova: ‘Itinataas ko mismo an kamot ko sa pagsumpa na sasaparon kan mga nakapalibot na nasyon an sadiri nindang kasusupgan.+ 8 Pero kamo, O mga bukid kan Israel, may matubo saindong mga sanga asin mamumunga kamo para sa sakuyang banwaan na Israel,+ ta madali na sindang magbalik. 9 Huli ta nasa kaibanan nindo ako, asin ibabaling ko sa saindo an atensiyon ko, asin kukultibaron kamo saka sasabwagan nin banhi. 10 Papadakulon ko an saindong banwaan—an bilog na banwaan* nin Israel, an gabos na iyan—tapos iistaran an mga siyudad+ asin itutugdok liwat an mga nagaba.+ 11 Iyo, papadakulon ko an saindong banwaan saka an saindong mga ataman na hayop;+ madakul sinda asin magigin mainaki.* Asin papaistaran ko kamo arog kan dati,+ asin mas papauswagon ko kamo kisa kan nakaagi;+ asin mamimidbid nanggad nindo na ako si Jehova.+ 12 Papalakawon ko sa saindo an sakuyang banwaan na Israel, asin magigin pagsadiri ninda kamo.+ Magigin mana ninda kamo, asin dai na sinda nuarin man magigin daing aki dahil sa saindo.’”+

13 “Ini an sinabi kan Soberanong Kagurangnan na Jehova: ‘Dahil sinasabihan ninda kamo, “Saro kang daga na naniniba nin mga tawo, asin nawawaran nin mga aki an saimong mga nasyon dahil sa saimo,”’ 14 ‘kaya, dai ka na maniniba nin mga tawo asin dai na magigin daing aki an saimong mga nasyon dahil sa saimo,’ an sabi kan Soberanong Kagurangnan na Jehova. 15 ‘Dai ko na tutugutan na insultuhon ka pa kan mga nasyon o tuya-tuyaon kan mga tawo,+ asin dai ka na magigin dahilan na mapahamak* an saimong mga nasyon,’ an sabi kan Soberanong Kagurangnan na Jehova.”

16 Asin nag-abot giraray sako an tataramon ni Jehova, na sinasabi: 17 “Aki nin tawo, kan an banwaan nin Israel nag-iistar sa saindang daga, inatian ninda iyan paagi kan saindang pamumuhay* saka mga gibo-gibo.+ Para sa sako, an saindang paggawi* kapareho kan pagigin maati nin babaying nagreregla.+ 18 Kaya inula ko sa sainda an sakuyang kaanggutan dahil sa paggadan na ginibo ninda* sa saindang daga+ asin dahil rinamugan ninda an saindang daga paagi kan saindang mga makababalding idolo.*+ 19 Kaya iwinararak ko sinda sa mga nasyon asin pinagsuruway-suway sa mga kadagaan.+ Hinukuman ko sinda sigun sa saindang pamumuhay saka sigun sa saindang mga gibo-gibo. 20 Pero kan mag-abot sinda sa mga nasyon na idto, linapastangan kan mga tawo an sakuyang banal na pangaran+ paagi sa pagsabi manungod sa sainda, ‘Sinda an banwaan ni Jehova, pero kinaipuhan nindang bayaan an saiyang daga.’ 21 Kaya pagmamalasakitan ko an sakuyang banal na pangaran, na linapastangan kan banwaan nin Israel duman sa mga nasyon na napadumanan ninda.”+

22 “Kaya sabihon mo sa banwaan nin Israel, ‘Ini an sinabi kan Soberanong Kagurangnan na Jehova: “Ginigibo ko ini bakong para sa saindo, O banwaan nin Israel, kundi para sa sakuyang banal na pangaran, na linapastangan nindo sa mga nasyon na napadumanan nindo.”’+ 23 ‘Papabanalon ko nanggad an sakuyang dakulang pangaran,+ na nalapastangan sa mga nasyon, na linapastangan nindo sa tahaw ninda; asin mamimidbid nanggad kan mga nasyon na ako si Jehova,’+ an sabi kan Soberanong Kagurangnan na Jehova, ‘pag napabanal na ako dahil sa saindo sa atubangan ninda. 24 Kukuanon ko kamo sa mga nasyon asin titiripunon hali sa gabos na kadagaan, asin dadarahon ko kamo sa saindong daga.+ 25 Wiwirikan ko kamo nin malinig na tubig, asin magigin malinig kamo;+ lilinigon ko kamo sa gabos nindong kaatian+ saka sa gabos nindong makababalding idolo.+ 26 Tatawan ko kamo nin bagong puso,+ asin ilalaag ko sa laog nindo an bagong espiritu.+ Hahalion ko an pusong gapo+ sa saindong hawak, asin tatawan ko kamo nin pusong laman.* 27 Ilalaag ko sa laog nindo an sakuyang espiritu, asin papalakawon ko kamo sa sakuyang mga regulasyon,+ asin uutubon nindo saka gigibuhon an sakong mga ipinapautob na desisyon.* 28 Dangan maistar kamo sa daga na itinao ko sa mga apuon nindo, asin magigin banwaan ko kamo asin magigin Diyos nindo ako.’+

29 “‘Ililigtas ko kamo hali sa gabos nindong kaatian, tapos sasabihan ko an mga tipasi na magdakul, asin dai ako mapaabot nin tiggutom sa saindo.+ 30 Papabungahon ko nin dakul an mga kahoy asin papadakulon ko an ani sa uma, tanganing dai na kamo nuarin man mapasupog sa mga nasyon dahil sa tiggutom.+ 31 Dangan magigirumduman nindo an saindong maraot na paggawi saka an mga gibo nindo na bakong marahay, asin mababaldi kamo sa sadiri nindo dahil sa saindong pagkakasala saka sa saindong makababalding mga gibo.+ 32 Pero tandaan nindo ini: Ginigibo ko ini bakong para sa saindo,’+ an sabi kan Soberanong Kagurangnan na Jehova. ‘Imbes, masupog kamo dahil sa saindong paggawi, O banwaan nin Israel.’

33 “Ini an sinabi kan Soberanong Kagurangnan na Jehova: ‘Sa aldaw na linigon ko kamo sa gabos nindong pagkakasala, papangyarihon kong istaran an mga siyudad+ asin itugdok liwat an mga nagaba.+ 34 An tiwangwang na daga na dating nahihiling kan gabos na nag-aagi kukultibaron. 35 Asin masarabi an mga tawo: “An tiwangwang na daga nagin siring sa hardin nin Eden,+ asin an mga siyudad na garaba saka tiwangwang asin rumpag igwa na ngunyan nin matibay na depensa saka iniistaran na.”+ 36 Asin maaaraman nanggad kan nagkataradang mga nasyon sa palibot nindo na ako mismo, si Jehova, an nagtugdok liwat kan ginaba, asin ako an nagtanom sa tiwangwang na daga. Ako mismo, si Jehova, an nagsabi kaiyan, asin ginibo ko iyan.’+

37 “Ini an sinabi kan Soberanong Kagurangnan na Jehova: ‘Tutugutan ko man an banwaan nin Israel na hagadon sako na gibuhon ini para sa sainda: Papadakulon ko an saindang banwaan siring sa sarong aripumpon. 38 Siring sa aripumpon nin mga banal, siring sa dakulang grupo nin mga tawo sa Jerusalem* sa panahon kan mga kapiyestahan kaini,+ an mga siyudad na dating gaba mapapano nin dakul na tawo;+ asin mamimidbid nanggad ninda na ako si Jehova.’”