Ezekiel

5 “Asin ika, aki nin tawo, magkua ka nin sarong matarom na espada para gamiton na garo labaha nin barbero. Ahiton mo an buhok mo sa payo saka an saimong barabas, tapos magkua ka nin timbangan para timbangon saka banga-bangaon an mga buhok sa tulong kabtang. 2 Suluon mo an sarong ikatulong kabtang sa laog kan siyudad pag tapos na an mga aldaw kan pagsalikop.+ Dangan kuanon mo an saro pang ikatulong kabtang asin taga-tagaon mo iyan kan espada sa palibot kan siyudad,*+ asin an huring ikatulong kabtang iwarak mo sa duros, asin mahugkot ako nin espada para lapagon an mga iyan.+

3 “Magkua ka man hali diyan nin nagkapirang buhok, asin isuksok mo iyan sa katiklupan* kan bado mo. 4 Asin magkua ka nin nagkapira pang buhok hali diyan asin iapon mo an mga iyan sa kalayo asin suluon mo. Hali diyan, may kalayo na malakop sa bilog na banwaan* nin Israel.+

5 “Ini an sinabi kan Soberanong Kagurangnan na Jehova: ‘Ini an Jerusalem. Ibinugtak ko siya sa tahaw kan mga nasyon, asin may mga banwaan sa palibot niya. 6 Pero nagrebelde siya sa sakuyang mga ipinapautob na desisyon* saka mga reglamento, asin mas nagin maraot pa siya sa mga nasyon sa kadagaan na nakapalibot sa saiya.+ Huli ta isinikwal ninda an sakuyang mga ipinapautob na desisyon, asin dai sinda nagsunod sa sakuyang mga reglamento.’

7 “Kaya ini an sinabi kan Soberanong Kagurangnan na Jehova: ‘Huling mas maraot pa kamo sa mga nasyon sa palibot nindo asin dai kamo nagsunod sa sakuyang mga reglamento saka dai nindo inutob an sakuyang mga ipinapautob na desisyon, imbes nagsunod kamo sa mga ipinapautob na desisyon kan mga nasyon sa palibot nindo,+ 8 ini an sinabi kan Soberanong Kagurangnan na Jehova: “Mahiro ako laban saimo, O siyudad,+ asin ako mismo an mahukom sa saimo sa atubangan kan mga nasyon.+ 9 Huli sa makababaldi mong gibo-gibo, gigibuhon ko saimo an dai ko pa nuarin man ginibo, asin dai ko na gigibuhon giraray an arog kaiyan.+

10 “‘“Kaya an mga ama sa tahaw mo kakakanon an saindang mga aki,+ asin an mga aki kakakanon an saindang mga ama, asin huhukuman taka asin an gabos na iba pa sa saimo iwawarak ko sa gabos na direksiyon.”’*+

11 “‘Kaya isinusumpa ko sa sakong sadiri,’* an sabi kan Soberanong Kagurangnan na Jehova, ‘huling an sakuyang santuwaryo an rinamugan mo paagi sa gabos mong makababalding idolo asin paagi sa gabos mong makababalding gibo-gibo,+ isisikwal* taka man; dai mahihirak an sakuyang mata, asin dai taka pagmamakulgan.+ 12 Sarong ikatulong kabtang mo an magagadan paagi sa damat* o paagi sa tiggutom. Saro pang ikatulong kabtang an magagadan sa palibot mo paagi sa espada.+ Asin iwawarak ko an huring ikatulong kabtang sa gabos na direksiyon,* asin mahugkot ako nin espada para lapagon sinda.+ 13 Dangan mawawara na an kaanggutan ko; mahupa na an sakuyang grabeng kaanggutan sa sainda, asin makokontento ako.+ Asin pag natapos ko nang iluwas an sakuyang grabeng kaanggutan sa sainda, maaaraman nanggad ninda na ako, si Jehova, nakipag-ulay sa sainda dahil naghahagad ako nin eksklusibong* debosyon.+

14 “‘Gigibuhon takang sarong tiwangwang na lugar, asin papangyarihon kong tuya-tuyaon ka kan mga nakapalibot na nasyon asin kan gabos na nag-aagi.+ 15 Mapapasupog ka asin pagtutuya-tuyaon,+ asin magigi kang patanid saka dahilan nin pagkatakot sa mga nasyon na nakapalibot sa saimo. Mangyayari iyan pag hinukuman taka na asin pinadusahan sa sakong grabeng kaanggutan. Ako, si Jehova, an nagsabi kaiyan.

16 “‘Mapadara ako laban sa sainda nin nakakagadan na mga pana nin tiggutom para magkagaradan sinda. Malalaglag kamo dahil sa mga pana na ipapadara ko.+ Mas papagrabehon ko an tiggutom sa saindo paagi sa paghali kan saindong suplay nin kakanon.*+ 17 Mapaabot ako sa saindo nin tiggutom saka nin mga mabangis asin layas na hayop,+ asin magagadanan kamo nin mga aki dahil sa mga iyan. Pangingibabawan kamo nin takot dahil sa damat saka garadanan,* asin madara ako nin espada laban sa saindo.+ Ako, si Jehova, an nagsabi kaiyan.’”