Paghinanyog Kamo—Nagtataram an Bantay ni Jehova!

“Ginibo ta kang bantay sa harong ni Israel, . . . asin kaipuhan na patanidan mo sinda hale sa sako.”—EZEQUIEL 3:17.

 1. Taano ta maninigong maghinanyog kun nagtataram an “bantay” ni Jehova?

AN “BANTAY“ ni Jehova nagtataram kan mensahe nin Dios sa oras mismong ini. Naghihinanyog daw kamo? An saindo mismong buhay nasasarig sa saindong paghinanyog sa mensaheng iyan na may apresasyon asin paghiro. Sa dai na mahahaloy, ‘an mga nasyon makakamidbid ki Jehova’ kun pakangbanalon na nia an saiyang banal na ngaran paagi sa paglaglag sa maraot na palakaw na ini asin pagliligtas sa saiyang banwaan. Naglalaom daw kamo na makabilang sa sainda? (Ezequiel 36:23; 39:7; 2 Pedro 3:8-13) Puwede, alagad an solamenteng paagi maghinanyog kamo kun nagtataram an bantay ni Jehova.

 2. An dai paghinanyog sa mga propeta nin Dios nagbunga nin ano para sa kahadean nin Juda?

² An dai paghinanyog sa mga propeta nin Dios nagdara nin kapahamakan sa kahadean nin Juda kan 607 B.C.E. Ikinaogma nin kaiwal na mga nasyon an pagkagabang idto sa kamot nin Babilonya. Alagad ta kanigoan an pagkapamuraway sa ngaran ni Jehova kan maniobrahon nia an pagpuli kan maimbod na mga Judio sa saindang daga kan 537 B.C.E.!

 3. Ano an laog kan librong Ezequiel?

³ An pagkagaba asin pagkapuling idto pareho ihinula kan bantay ni Jehova, si Ezequiel. An laog kan libro sa Biblia na nagdadara kan saiyang ngaran asin natapos nia sa Babilonya kaidtong mga 591 B.C.E. (1) an pagsugo ki Ezequiel; (2) propetikong mga drama; (3) mga mensahe tumang sa Israel; (4) mga hula sa paghokom sa Jerusalem; (5) mga hula tumang sa ibang nasyon; (6 ) mga panuga sa pakabalik; (7) hula tumang ki Gog nin Magog; asin (8) bisyon sa santuaryo nin Dios. Inaagda mi kamo na basahon an libro mantang iyan pinag-aadalan niato. Sa siring masasabotan nindo kun paano iyan nakakaapektar sa sato ngonyan asin maghihinanyog kamo mantang nagtataram an “bantay” ni Jehova.a

Isinugo an Bantay nin Dios

 4. (a) Ano an naheling ni Ezequiel sa bisyon? (b) Sairisay an “nabubuhay na linalang,” asin ano an mga kuwalidad ninda?

⁴ Kan Tammuz 5, 613 B.C.E. (kan ikalimang taon kan pagkadistiyero sa Babilonya kan hade nin Juda na si Joachin), an 30 anyos na saserdoteng si Ezequiel kaiba kan Judiong mga bihag sa pangpang kan “salog nin Kebar,” sarong dakulang kanal kan Salog nin Eufrates. Sa bisyon, naheling nia an langitnon na karuwahe ni Jehova, na pinaglilingkodan nin “apat na nabubuhay na linalang.” (Basahon an Ezequiel 1:4-10.) An lambang “nabubuhay na linalang,” o kerubin na may pakpak, may apat na lalauogon. (Ezequiel 10:1-20; 11:22) Ini nagpaparisa na an mga kerubin igwa nin itinao nin Dios na pagkamoot (an tawo), hustisya (an leon), kapangyarihan (an baka), asin kadonongan (an agila). An lambang kerubin nagtitindog sa kataed nin sarong dakulang ‘ruweda sa laog nin ruweda,’ asin an espiritu nin Dios, o puwersa aktiba, nagpapahiro sa sainda minsan saen na direksion.—Ezequiel 1:1-21.

 5. Ano an irenerepresentar kan langitnon na karuwahe, asin paano an bisyon na ini kaiyan maninigong makaapektar sa banwaan ni Jehova?

⁵ An Nakasakay sa karuwahe mamuraway na representasyon ni Jehova. (Basahon an Ezequiel 1:22-28.) An karuwahe marahayon na representasyon kan organisasyon nin Dios nin espiritung mga anghel! (Salmo 18:10; 103:20, 21; Daniel 7:9, 10) Si Jehova nakasakay dian sa sentido na dominado nia an mga linalang na ini asin ginagamit sinda sono sa saiyang katuyohan. An Nakasakay kalmado, kapareho kan hablondawani, pero si Ezequiel nalunosan. Tunay na an makangingirhat na bisyon na ini sa kamurawayan asin kapangyarihan ni Jehova bilang an Supremong Organisador sa saiyang langitnon na mga hukbo maninigong magpahiro sato na magin mapagpakumbabang nagpapasalamat para sa pribilehiyo na maglingkod sa saiya bilang kabtang kan saiyang daganon na organisasyon.

 6. (a) Anong nombramiento an inako ni Ezequiel, asin ano an punto-de-vista nia sa paglilingkod sa Dios? (b) Sa tahaw nin anong klaseng mga tawo na si Ezequiel maghuhula, asin ano an pakinabang sa pakaaram kun paano sia trinatar nin Dios?

⁶ Minsan ngani pinagirumdom kan saiyang pagkatawo asin hababang kamugtakan paagi sa pag-apod sa saiyang “aki nin tawo,” si Ezequiel ninombrahan na propeta ni Jehova. (Basahon an Ezequiel 2:1-5.) Si Ezequiel maduman sa “rebeldeng mga nasyon,” an mga kahadean nin Israel asin Juda. Enot, sa pagboot nin Dios kinakan nia an sarong balumbon na may laog na mga panambitan, pero an namit kaiyan garo tangguli ta sia nagpapasalamat na magin propeta nin Dios. Siring man, para sa linahidan na mga Kristiano asin sa saindang mga kapwa lingkod mahamis an pagigin mga saksi ni Jehova. Si Ezequiel kaipuhan na maghula sa tahaw nin mga tawong matagas an puso asin matagas an payo, pero gigibohon nin Dios an saiyang lalauogon na arog katagas kan saindang lalauogon, an saiyang angog arog katagas nin brilyante. Sia mapusong maghuhula baga man sinda maghinanyog o dai. Nakapakokosog nin boot na maaraman na kun paanong tinabangan nin Dios si Ezequiel sa masakit na mga kamugtakan, tatabangan man Nia kita na mapusong magpatotoo sa arin man na teritoryo.—Ezequiel 2:6-3:11.

 7. An sugo ki Ezequiel may kaibang anong paninimbagan?

⁷ An pagkakan sa balumbon nagbunga ki Ezequiel nin ‘kainitan nin espiritu’ na angay sa mensahe kaiyan. Sa Tel-abib sia nag-erok na ‵namumungnan sa laog nin pitong aldaw’ mantang garo tinutunaw an mensahe. (Ezequiel 3: 12-15) Kita man kaipuhan na maghorophorop asin maigot na mag-adal tanganing masabotan an harararom na espirituwal na bagay. Huling may mensaheng ipahahayag, si Ezequiel isinugo bilang bantay nin Dios. (Basahon an Ezequiel 3:16-21.) An bagong nombrahan na bantay magpapatanid sa mga Israelitas na naglalapas sa pagboot na sinda napapaatubang sa banal na paglaglag.

 8. Siisay an naglilingkod na “bantay” ni Jehova ngonyan, asin siisay an kaiba ninda?

⁸ Kun si Ezequiel magkulang bilang bantay, sia an papaninimbagon ni Jehova sa pagkagadan nin mga biktima. Minsan ngani an mga habo na sia magtao nin pagsagwe magbubugtak nin piguratibong mga gapos sa saiya, sia mapusong magpapahayag kan mensahe nin Dios. (Ezequiel 3:22-27) Sa satong kaaldawan, an Kakristianohan habong maghinanyog asin naghihingoang pogolan an linahidan na mga Kristiano. Alagad poon kan 1919 an mga linahidan na ini naglingkod bilang “bantay” ni Jehova, na mapusong ipinahahayag an saiyang mensahe para sa “panahon kan katapusan” kan palakaw na ini. (Daniel 12:4) Kaiba ninda sa gibohon na ini an nagdadakol na “dakulang kadaklan” kan “ibang karnero” ni Jesus. (Kapahayagan 7:9, 10; Juan 10:16) Mantang an grupong “bantay” padagos na nagtataram kan mensahe nin Dios, tunay na an lambang saro sa mga linahidan asin sa “dakulang kadaklan” magmamawot na ipahayag iyan bilang regular na parahayag.

Mga Hula na Irenepresentar

 9. (a) Paano si Ezequiel nagtao nin halimbawa sa sato? (b) Ano an ginibo ni Ezequiel tanganing iladawan an pagsalikop nin Babilonya sa Jerusalem, asin ano an kahulogan kan 390 aldaw asin 40 aldaw?

⁹ Sumunod ginibo ni Ezequiel an makahulang mga pag-estorya paagi sa mga mustra asin hiro na may kapakumbabaan asin kapusoan, na nagtatao nin halimbawa na maninigong magpahiro sato na mapakumbaba asin mapusong gibohon an mga asignasyon na itinao nin Dios. Tanganing iladawan an pagsalikop nin Babilonya, sia kaipuhan na humigda na paatubang sa sarong ladrilyo na dian iinukit nia an retrato nin Jerusalem. Si Ezequiel dapat na humigda sa saiyang walang hirog sa laog nin 390 aldaw tanganing pasanon an kasalan kan sampulong-tribong kahadean nin Israel, dangan sa saiyang toong hirog sa laog nin 40 aldaw tanganing pasanon an kasalan kan duwang-tribong Juda. An sarong aldaw nagrerepresentar sa sarong taon. Kaya an 390 taon magpoon kan maestablisar an Israel kan 997 B.C.E. sagkod sa kalaglagan nin Jerusalem kan 607 B.C.E. An 40 taon nin Juda magpoon kan si Jeremias nombrahan bilang propeta nin Dios kan 647 B.C.E. sagkod sa pagkagaba nin Juda kan 607 B.C.E.—Ezequiel 4:1-8; Jeremias 1:1-3.

10. Paano irenepresentar ni Ezequiel an mga epekto kan pagsalikop, asin anong leksion an manonodan niato sa bagay na tinabangan sia nin Dios?

¹⁰ Sumunod irenepresentar ni Ezequiel an mga epekto kan pagsalikop. Tanganing ipaheling an gutom, an inubos sana nia labing 200 gramos na kakanon asin mga kabangang litrong tubig kada aldaw. An saiyang tinapay (na bakong sono sa pagboot na pinagsaralak na trigo, sebada, habas, lentejas, mijo, asin avena na linuto na an songo odo) maati. (Levitico 19:19) An ginibong ini nagpaheling na an mga taga-Jerusalem magkukulang nin labi-labi sa ikabubuhay. Alagad nakapakokosog sa boot na maaraman na kun paanong tinabangan ni Jehova si Ezequiel sa masakit na mga kamugtakan, kita tatabangan man nin Dios na makapagdanay na maimbod asin maotob an isinugo sa sato na gibong paghuhulit sa atubang nin gabos na kasakitan!—Ezequiel 4:9-17.

11. (a) Anong mga aksion an sinasabi sa Ezequiel 5:1-4, asin ano an kahulogan kaiyan? (b) An bagay na inotob nin Dios an mga pagrepresentar ni Ezequiel maninigong magkaigwa nin anong epekto sa sato?

¹¹ Ginagamit an sarong espada, inaris ni Ezequiel an saiyang buhok asin barabas. (Basahon an Ezequiel 5:1-4.) An mga magagadan sa gutom asin peste magigin siring sa un-tersio kan buhok kan propeta na sinolo nia sa tahaw nin Jerusalem. An mga nagadan sa guerra magigin siring sa un-tersio na tinaga kan espada. An mga matatadang buhay magkakawararak sa mga nasyon siring sa un-tersio kan saiyang buhok na iwinarak sa doros. Pero an ibang desterrado magigin siring sa pirang buhok na kinua sa kabtang na iwinarak asin pinatos sa gubing ni Ezequiel tanganing ipaheling na gigibohon ninda an tunay na pagsamba sa Juda pakalihis kan 70 taon na pagkagaba. (Ezequiel 5:5-17) An bagay na inotob ini ni Jehova asin an iba pang propetikong mga representasyon maninigong magpahiro sato na manarig sa saiya bilang an Paraotob sa hula.—Isaias 42:9; 55:11.

An Kalaglagan Nagdadangadang!

12. (a) An Ezequiel 6:1-7 nagpaparisa na an mga masalakay ano? (b) Sono sa hula ni Ezequiel, ano an antitipikong Jerusalem, asin ano an mangyayari sa saiya?

¹² Kan 613 B.C.E., kinaolay ni Ezequiel an daga tanganing ipaheling kun ano an mangyayari sa mga taga-Juda na parasamba sa ladawan. (Basahon an Ezequiel 6:1-7.) Gagabaon nin mga masalakay an haralangkaw na lugar, an mga patongtongan nin insenso, asin an mga altar na ginagamit sa falsong pagsamba. Sa pag-isip-isip pa sana sa kalaglagan paagi sa gutom, peste, asin guerra an saro mapapakurahaw na nin “A!” asin idodoon ini paagi sa pag-upak nin kamot asin pagkumpag nin mga bitis. An mga bangkay nin espirituwal na mga parapakisaro mawawarak sa haralangkaw na lugar. Kun an Kakristianohan, an antitipikong Jerusalem, mag-agi naman nin kaparehong pagkalaglag, maaaraman nia na an saiyang kalamidad gikan ki Jehova.—Ezequiel 6: 8-14.

13. Ano “an sogkod” sa kamot ni Jehova, asin ano an ibubunga kan paggamit dian?

¹³ ‘An katapusan nagdadangadang sa apat na kanto kan daga,’ an bakong maimbod na relihiyosong palakaw nin Juda. An “koronang burak” nin kapahapahamak na mga bagay palilibotan an payo nin parasamba sa ladawan kun “an sogkod” sa kamot nin Dios—si Nabucodonosor asin an saiyang mga hukbong taga-Babilonya—humiro na tumang sa banwaan ni Jehova asin sa saiyang templo. An kabilang sa “kadaklan” nin mga parabakal asin parapabakal nin Juda magsalang magagadan o mabibihag, asin an kamot nin siisay man na matadang buhay manluluya. Pagbagsak kan saindang palakaw nin falsong relihiyon, sinda garo baga aarisan an saindang payo sa pagmondo.—Ezequiel 7: 1-18.

14. Ano an nagibo nin pagsoborno para sa Jerusalem, asin ano an ipinaririsa kaiyan para sa Kakristianohan?

¹⁴ Si Jehova asin an saiyang mga hukbong paragadan dai masosobornohan. (Basahon an Ezequiel 7:19.) An pagsoborno dai makapagliligtas sa “natatagong lugar,” an Kabanalbanale, sa paglanghad kun an “mga parahabon” na Caldeo agawon an banal na mga kasangkapan asin bayaan na gaba an templo. Si Jehova ‘pinaontok an kapaabaw-abawan kan mga makosog’ kan si Hadeng Zedequias mabihag asin an mga nangengenot sa mga saserdoteng Levita gadanon. (2 Hade 25:4-7, 18-21) Dai, an mga parakasala sa nasasalikopan na Jerusalem dai makadudulag sa kasakitan paagi sa pagsoborno kun ‵hokoman na sinda’ nin Dios bilang mga paralapas sa tipan. Siring man, sa nagdadangadang na paglanghad sa mga ibinibilang na banal nin Kakristianohan, dai sia makapagsosoborno tanganing makalibre sia sa banal na paghokom sa saiya. Sa panahon na iyan huri nang maghinanyog sa “bantay” ni Jehova.—Ezequiel 7:20-27.

Pag-agagha sa Makababaldeng mga Bagay

15. Ano an naheling ni Ezequiel sa Jerusalem, asin ano an maninigong magin epekto kaini sa sato?

¹⁵ Kan an Dios maheling ni Ezequiel sa bisyon na nasa kamurawayan kan Elul 5, 612 B.C.E., ‵an kaagid nin sarong kamot kinapotan sia sa buhok’ asin dinara sia sa Jerusalem paagi sa espiritu nin pagpasabong. Nagbalyo man duman an langitnon na karuwahe. An naheling ni Ezequiel maninigong magpahiro sato na mabalde minsan sa pag-isip sana na maghinanyog sa mga apostata. (Talinhaga 11:9) Sa templo, an mga apostatang Israelita nagsasamba sa idolatrosong simbolo (seguro banal na harigi) na nagpoprobokar sa Dios sa pag-imon. (Exodo 20: 2-6) Sa paglaog sa panlaog na patyo, kanigoan kamakababalde kan mga bagay na naheling ni Ezequiel! (Basahon an Ezequiel 8: 10, 11.) Makasosopog nanggad na an 70 kamagurangan na Israelita nagdodolot nin insenso sa falsong mga dios na irenerepresentar nin makababaldeng mga inukit sa lanob!—Ezequiel 8:1-12.

16. An bisyon ni Ezequiel nagpaparisa nin ano manongod sa mga epekto nin apostasiya?

¹⁶ An bisyon ni Ezequiel nagpapaheling kun gurano kanakagagadan sa espirituwal an apostasiya. Tara, an mga babaeng Israelita nakombensir na hibian si Tammuz, dios nin Babilonya asin sambay kan diosa nin sekso na si Ishtar! Asin kanigoan kamakababalde na maheling an 25 lalaking Israelita sa panlaog na patyo kan templo na nagsasamba sa aldaw! (Deuteronomio 4:15-19) Sa dongo nin Dios idinoldol ninda an sarong malaswang sanga, na tibaad nagrerepresentar sa ikinabuhay nin lalaki. Bakong makangangalas na si Jehova habong maghinanyog sa saindang mga pamibi, kun paanong an Kakristianohan basang sanang maghahagad kan saiyang tabang sa “dakulang kahorasaan”! —Ezequiel 8:13-18; Mateo 24:21.

Tinandaan Para sa Kaligtasan

17. Anong pitong lalaki an naheling sa bisyon, asin ano an ginibo ninda?

¹⁷ Sumunod, maheheling niato an pitong lalaki—an saro sekretaryo na an gubing lino asin an anom may kapot na mga panronot. (Basahon an Ezequiel 9: 1-7.) An “anom na lalaki” nagrerepresentar sa langitnon na hukbo nin mga parapadusa ni Jehova, minsan ngani puwede siang gumamit nin daganon na mga ahente. An mga tatandaan an angog kan ‘lalaking nakalino’ makakaeksperyensia kan pagkaherak nin Dios ta dai sinda nakikiiba sa makababaldeng mga bagay na ginigibo sa templo. An pangadan kan “anom na lalaki” nagpoon duman sa 70 idolatrosong kamagurangan, sa mga babaeng naghihibi para ki Tammuz, asin sa 25 parasamba sa aldaw. An mga ini asin an iba pa na bakong maimbod sa Dios ginadan kan mga taga-Babilonya kan 607 B.C.E.

18. (a) Siisay an ‘lalaking nakalino’ sa modernong aldaw? (b) Ano an “tanda,” siisay ngonyan an igwa kaiyan, asin ano an ibubunga kan pagkaigwa kaiyan?

¹⁸ An antitipikong ‘lalaking nakalino’ iyo an grupo nin linahidan na mga Kristiano. Sinda naghaharongharong tanganing bugtakan nin simbolikong tanda an mga nagigin kabtang kan “dakulang kadaklan” kan “ibang karnero” ni Cristo. An “tanda” iyo an ebidensia na an mga karnerong iyan nagdusay, bautisadong mga indibiduwal na may arog-Cristong personalidad. Sinda ‘nag-aaragagha asin nag-aaragrangay huli sa makababaldeng mga bagay’ na ginigibo sa Kakristianohan, asin sinda nagruluwas sa Dakulang Babilonya, an pankinaban na imperyo nin falsong relihiyon. (Kapahayagan 18:4, 5) Paagi sa saindang “tanda” magigin maliwanag sa mga hukbong mangagadan nin Dios na sinda maninigong iligtas sa “dakulang kahorasaan.” Puwede nindang mapagdanay an “tandang” iyan paagi sa pakikiiba sa mga linahidan sa pagtanda pa sa iba. Kaya, kun kamo ‘natandaan,’ maigot na makikabtang sa gibong ‘pagtatanda.’—Ezequiel 9:8-11.

Nagdadangadang an Malaad na Kalaglagan!

19. Ano an ilinalakop sa Kakristianohan kan modernong ‘lalaking nakalino’?

¹⁹ An nakalinong lalaki nagduman sa pag-oltanan kan mga ruweda kan langitnon na karuwahe tanganing kumua nin baga. An mga ini iinapon sa Jerusalem, na nagtatao nin patienot na patanid na an kalaglagan kaiyan magigin kapahayagan kan naglalaad na kaanggotan nin Dios. (Ezequiel 10:1-8; Lamentacion 2:2-4; 4:11) Kan kaaldawan ni Ezequiel, an kaanggotan ni Jehova ibinubo paagi sa mga taga-Babilonya. (2 Cronica 36:15-21; Jeremias 25:9-11) Alagad kumusta man an satong aldaw? An antitipikong ‘lalaking nakalino’ ilinalakop an naglalaad na mensahe nin Dios sa bilog na Kakristianohan bilang pagpaisi na sa dai na mahahaloy ibububo an banal na kaanggotan sa saiya asin sa iba pang kabtang kan Dakulang Babilonya. Siyempre, an mga habong maghinanyog sa “bantay” ni Jehova mayo nin paglaom na makaligtas.—Isaias 61:1, 2; Kapahayagan 18:8-10, 20.

20. (a) Ano an maninigong magin epekto sa sato kan pagkakaoyon kan mga ruweda kan langitnon na karuwahe asin kan mga kerubin? (b) Ano an ginigibo nin pirang prinsipe, asin sa ano ninda salang ibinaing an Jerusalem?

²⁰ Dinadara liwat an atension sa langitnon na karuwahe, an langitnon na organisasyon nin Dios. Sa pakarisa sa pagkakaoyon kan mga ruweda kan karuwahe asin kan mga kerubin, maninigo kitang mapahiro na lubos na makikooperar sa daganon na organisasyon nin Dios. Huli sa kaimbodan, maninigo na protehiran man niato iyan sa traydor na mga tawo. (Ezequiel 10:9-22) May siring na mga tawo kan kaaldawan ni Ezequiel, ta may naheling siang 25 prinsipe sa gobyerno na nagpaplano nin pagrebelde tumang sa mga hukbong mangagadan nin Dios sa tabang nin Egipto. Ibinaing ninda sa kaldero an Jerusalem, asin sinda sa laman na ligtas sa laog. Alagad ta sala nanggad sinda! An “espada” nin “mga estrangherong” taga-Babilonya gagadanon an iba sa mga nagpapakana, mantang an iba magigin mga bihag. Ini mangyayari ta pinapanimbag nin Dios an mga Judio sa paglapas sa saiyang tipan. (Ezequiel 11:1-13; Exodo 19:1-8; 24:1-7; Jeremias 52:24-27) Huling an Kakristianohan naghihingakong katipan nin Dios pero nagsasarig sa kinabanon na mga alyansa, sia mapapara sa pagsalakay kan mga hukbong mangagadan ni Jehova.

21. Ano an nangyari pakalihis kan 70 taon na pagkagaba nin Juda, asin anong nakaaagid na pangyayari an nakaapektar sa linahidan na natatada?

²¹ Minsan ngani an mga Israelitas ‘nagkawararak sa mga nasyon,’ kapareho kaidtong 617 B.C.E., an Dios “sarong santuaryo,” o pailihan, para sa nagsolsol na mga nadistiyero. (Ezequiel 11:14-16) Alagad ano pa an malalaoman? (Basahon an Ezequiel 11:17-21.) Pakalihis kan 70 taon na pagkagaba nin Juda, may natatadang nakabalik sa nalinigan na “daga nin Israel.” Katimbang kaiyan, pakalihis kan Babilonikong pagkabihag, an linahidan na natatada ilinigtas kan 1919, asin sa paggiya kan espiritu nin Dios, an dating gabang “daga” nin espirituwal na Israel nalinigan. Kun siring, an mga ‘tinandaan’ para maligtas ngonyan nagkakamit nin banal na pag-oyon kaiba an nakabalik na natatada sa espirituwal na Israel. Asin kun kamo padagos na maghihinanyog sa “bantay” nin Dios, tibaad kamo makabilang sa mga makaliligtas kun lapnoton na ni Jehova an saiyang espada.

[Nota sa Ibaba]

Nagigirumdoman daw Nindo?

◻ Taano ta maninigong maghinanyog kun nagtataram an “bantay” ni Jehova?

◻ Ano an irenerepresentar kan langitnon na karuwahe nin Dios?

◻ Siisay an naglilingkod na “bantay” ni Jehova ngonyan?

◻ Anong apostatang mga gibo an naheling ni Ezequiel sa Jerusalem, asin paano kita, maninigong maapektaran kan bisyon na ini?

◻ Siisay an ’lalaking nakalino’ sa modernong aldaw, asin ano an “tanda” na ibinubugtak nia sa mga angog?