Ezekiel

21 Nag-abot giraray sako an tataramon ni Jehova, na sinasabi: 2 “Aki nin tawo, umatubang ka sa direksiyon kan Jerusalem, asin magtaram ka laban sa mga banal na lugar, asin magpropesiya ka laban sa daga nin Israel. 3 Sabihon mo sa daga nin Israel, ‘Ini an sinabi ni Jehova: “Mahiro ako laban sa saimo, asin huhugkuton ko an espada ko sa sarungan kaiyan+ asin pareho kong lalaglagon an matanos saka an maraot diyan sa saimo. 4 Dahil lalaglagon ko an matanos saka an maraot diyan sa saimo, an sakuyang espada huhugkuton sa sarungan kaiyan laban sa gabos na tawo,* puon sa timog sagkod sa norte. 5 Maaaraman nanggad kan gabos na tawo na ako mismo, si Jehova, an naghugkot sa espada ko sa sarungan kaiyan. Dai iyan isasarong giraray.”’+

6 “Asin ika, aki nin tawo, mag-agrangay ka mantang nagtatakig,* iyo, mag-agrangay ka nin grabe sa atubangan ninda.+ 7 Asin kun sabihon ninda saimo, ‘Ano ta nag-aagrangay ka?’ sabihon mo, ‘Dahil sa sarong bareta.’ Huli ta maabot nanggad iyan, asin matutunaw sa takot an gabos na puso asin malaylay an gabos na kamot saka pangruruluyahan nin buot an gabos* asin maturo nin tubig an gabos na tuhod.*+ ‘Uya! Maabot nanggad iyan—mangyayari iyan,’ an sabi kan Soberanong Kagurangnan na Jehova.”

8 Nag-abot giraray sako an tataramon ni Jehova, na sinasabi: 9 “Aki nin tawo, magpropesiya ka asin sabihon mo, ‘Ini an sinabi ni Jehova: “Sabihon mo, ‘Sarong espada! Sarong espada+ an tinais, asin pinakintab iyan. 10 Tinais iyan para makagadan nin dakul; pinakintab iyan para magkurukilyab na garo kikilat.’”’”

“Bako daw na dapat kitang mag-ugma?”

“‘Isisikwal daw kaiyan* an setro kan sadiri kong aki,+ arog kan ginigibo kaiyan sa gabos na kahoy?

11 “‘Itinao iyan para pakintabon asin gamiton. Tinais an espadang ini asin pinakintab, para itao sa kamot kan paralaglag.+

12 “‘Magkurahaw ka asin magtangis,+ aki nin tawo, huling maabot iyan laban sa sakuyang banwaan; laban iyan sa gabos na pamayo kan Israel.+ Gagadanon sinda kan espada kaiba an sakuyang banwaan. Kaya hampakon mo an saimong paa sa grabeng kamunduan. 13 Huli ta may ginibong pagsiyasat,+ asin anong mangyayari kun isikwal kan espada an setro? Mawawara na iyan,’*+ an sabi kan Soberanong Kagurangnan na Jehova.

14 “Asin ika, aki nin tawo, magpropesiya ka saka magpalakpak asin sabihon mo nin tulong beses, ‘Sarong espada!’ Iyan an espada na nanggagadan, an espada na guminadan nin dakul, na nagpapalibot sa sainda.+ 15 Matutunaw sa takot an saindang puso+ asin dakul an mabagsak sa mga trangkahan kan saindang siyudad; dakulon an gagadanon ko paagi sa espada. Iyo, nagkukurukilyab iyan na garo kikilat asin pinakintab para gumadan nin dakul! 16 Manigbas ka sa tuo! Magwasiwas ka sa wala! Magpasiring ka sain man nakaatubang an saimong tarom! 17 Mapalakpak man ako, asin papahupaon ko an sakuyang grabeng kaanggutan+ paagi sa pagsagibo nin paghukom. Ako mismo, si Jehova, an nagsabi kaiyan.”

18 Asin nag-abot giraray sako an tataramon ni Jehova, na sinasabi: 19 “Asin ika, aki nin tawo, magkurit ka nin duwang dalan na aagihan kan espada kan hadi kan Babilonya. An duwang dalan na iyan parehong hali sa sarong nasyon, asin dapat kang magbugtak nin posteng may karatula* sa lugar kun sain nagsanga an dalan na pasiring sa duwang siyudad. 20 Maglaag ka nin marka sa lambang dalan para sa espada: an sarong marka matukdo kan dalan na pasiring sa Raba+ kan mga Ammonita, asin an saro pa matukdo kan dalan na pasiring sa Jerusalem+ na may matibay na depensa na nasa Juda. 21 Huli ta an hadi kan Babilonya nagpupundo para maghula sa may sangang-dalan kan tinampo, kun sain nagsuwayan an duwang dalan. Ginugugo niya an mga pana. Nagkokonsulta siya sa saiyang mga idolo;* naghihiling siya sa katoy. 22 An resulta kan paghula na nasa saiyang tuong kamot nagtukdo pasiring sa Jerusalem, para duman magbugtak nin mga pantumbol na panggaba, magpaluwas nin pagbuot na manggadan, magpatanog nin senyal para sa pakikipaglaban, maglaag nin mga pantumbol na panggaba sa tangod kan mga trangkahan, maggibo nin rampang pansalikop, magtugdok nin kudal na pansalikop.+ 23 Alagad sa paghiling kan mga nanumpa* sa sainda garo baga sala an resulta kan paghula.+ Pero magigirumduman niya an pagkakasala ninda asin bibihagon niya sinda.+

24 “Kaya ini an sinabi kan Soberanong Kagurangnan na Jehova: ‘Pinangyari nindong magirumduman an sadiri nindong pagkakasala paagi sa pagbuyagyag kan saindong mga paglapas asin paagi sa pagpahiling sa mga kasalan nindo sa gabos nindong gibo. Ngunyan na nagirumduman kamo, puwersahan kamong kukuanon.’*

25 “Pero nag-abot na an aldaw mo, an panahon kan pangultimong padusa sa saimo, O maraot na pamayo kan Israel,+ na nalugadan nin grabe. 26 Ini an sinabi kan Soberanong Kagurangnan na Jehova: ‘Tanggala an turbante, asin halia an korona.+ Dai na ini magigin arog kan dati.+ Ilangkaw mo an hababa,+ asin ibaba mo an halangkaw.+ 27 Kagabaan, kagabaan, gigibuhon ko iyan na kagabaan. Asin dai iyan magigin sadiri nin siisay man sagkod na an saro na may legal na deretso mag-abot,+ asin itatao ko iyan sa saiya.’+

28 “Asin ika, aki nin tawo, magpropesiya ka asin magsabi, ‘Ini an sinabi kan Soberanong Kagurangnan na Jehova manungod sa mga Ammonita saka sa mga pang-iinsulto ninda.’ Sabihon mo, ‘Sarong espada! Sarong espada an hinugkot para gumadan nin dakul; pinakintab iyan para manglaglag asin magkurukilyab na garo kikilat. 29 Sa ibong kan mga bakong totoong bisyon asin mga putik na panghuhula manungod sa saimo, itatambak ka pa man giraray na kaiba kan mga ginadan,* an mga maraot na tawo na inabutan na kan saindang aldaw, an panahon kan pangultimong padusa sa sainda. 30 Isarong mo iyan sa sarungan kaiyan. Huhukuman taka sa lugar kun sain ka linalang, sa daga na saimong pinaggikanan. 31 Iuula ko sa saimo an kaanggutan ko. Hahayupon ko pasiring sa saimo an kalayo kan sakuyang kabangisan, asin itatao taka sa kamot kan mga madahas na lalaki, an mga matibay sa paglaglag.+ 32 Magigin panggatong ka sa kalayo;+ papabuluson an sadiri mong dugo sa saimong daga, asin dai ka na magigirumduman pa, huli ta ako mismo, si Jehova, an nagsabi kaiyan.’”