Ezekiel

38 Nag-abot giraray sako an tataramon ni Jehova, na sinasabi: 2 “Aki nin tawo, umatubang ka laban ki Gog kan daga nin Magog,+ an panginot na pamayo* kan Mesec saka Tubal,+ asin magpropesiya ka laban sa saiya.+ 3 Sabihon mo, ‘Ini an sinabi kan Soberanong Kagurangnan na Jehova: “Uya, mahiro ako laban saimo, O Gog, na panginot na pamayo* kan Mesec saka Tubal. 4 Papabirikon taka asin lalagan ko nin mga kawit an saimong mga panga+ saka iluluwas taka kaiba an bilog mong hukbo,+ mga kabayo saka parakabayo, na gabos nakasulot nin magagayon na bado, sarong dakulaon na katiripunan na may darakulang kalasag saka mga pansagang,* na gabos naggagamit nin espada; 5 kaiba ninda an Persia, Etiopia, asin Put,+ na gabos may pansagang saka helmet; 6 an Gomer saka an gabos na hukbo kaini asin an mga gikan* ni Togarma+ hali sa pinakahararayong parte kan norte, kaiba an gabos na hukbo kaini—dakul na banwaan an kaiba mo.+

7 “‘“Mag-andam ka, ihanda nindo an sadiri nindo, ika saka an gabos mong hukbo na tiripon kaiba mo, asin ika an magigin komandante* ninda.

8 “‘“Tatawan ka nin atensiyon* pakalihis nin dakul na aldaw. Sa huring kabtang kan mga taon, sasakupon mo an daga kan banwaan na ibinalik pagkatapos na madestroso kan espada, na tiniripon hali sa dakul na banwaan pasiring sa mga bukid kan Israel na haloy na nagin tiwangwang kaidto. An mga nakaistar sa dagang ini ibinalik hali sa mga banwaan, asin gabos sinda nag-iistar nin tiwasay.+ 9 Sasalakayon mo sinda siring sa sarong bagyo, asin tatahuban mo an kadagaan siring sa mga panganuron, ika saka an gabos mong hukbo asin an dakul na banwaan na kaiba mo.”’

10 “Ini an sinabi kan Soberanong Kagurangnan na Jehova: ‘Sa aldaw na iyan, may masabong sa saimong puso, asin maisip ka nin maraot na plano. 11 Masabi ka: “Sasakupon ko an daga na an mga baryo dai napapalibutan nin pader.+ Sasalakayon ko an mga nag-iistar nin tiwasay, daing nangriribok, sinda gabos na nag-iistar sa mga baryo na dai napoprotektaran nin mga pader, nin mga balagbag na pambarat, o nin mga trangkahan.” 12 An katuyuhan mo iyo na makakua nin dakul na samsam asin salakayon an itiniwangwang na mga lugar na pig-iistaran na ngunyan+ saka an banwaan na tiniripon giraray hali sa mga nasyon,+ sinda na nagdadakul an yaman saka mga pagsadiri,+ an mga nag-iistar sa tahaw kan daga.

13 “‘An Sheba+ saka Dedan,+ na mga negosyante kan Tarsis+ pati an gabos kaiyan na parapakilaban* masabi sa saimo: “Nananakop ka para makakua nin dakul na samsam? Tiniripon mo daw an saimong mga hukbo para makakua nin plata saka bulawan, nin kayamanan saka mga pagsadiri, asin nin dakulon na samsam?”’

14 “Kaya magpropesiya ka, aki nin tawo, asin sabihon mo ki Gog, ‘Ini an sinabi kan Soberanong Kagurangnan na Jehova: “Sa aldaw na iyan na an sakuyang banwaan na Israel namumuhay nin tiwasay, dai mo daw maririsa iyan?+ 15 Maabot ka hali sa saimong lugar, hali sa pinakahararayong parte kan norte,+ ika saka an dakul na banwaan na kaiba mo, na gabos nakasakay sa kabayo, sarong dakulang katiripunan, sarong dakulaon na hukbo.+ 16 Siring sa mga panganuron na nakakatahob sa kadagaan, maabot ka laban sa sakuyang banwaan na Israel. Sa huring kabtang kan mga aldaw papasalakayon taka sa daga ko+ tanganing mamidbid ako kan mga nasyon pag pinabanal ko na an sadiri ko paagi sa saimo sa atubangan ninda, O Gog.”’+

17 “Ini an sinabi kan Soberanong Kagurangnan na Jehova: ‘Bakong ika man sana su sinasabi ko kan suanoy na mga panahon paagi sa mga lingkod ko na mga propeta kan Israel, na sa laog nin dakul na taon nagpropesiyang papasalakayon ka sa sainda?’

18 “‘Sa aldaw na iyan, sa aldaw na salakayon ni Gog an daga nin Israel,’ an sabi kan Soberanong Kagurangnan na Jehova, ‘malaad an grabeng kaanggutan ko.+ 19 Sa sakong kaanggutan, sa kalayo kan sakuyang kabangisan, mataram ako; asin sa aldaw na iyan, magkakaigwa nin makusog na linog sa daga nin Israel. 20 Dahil sa sako, matarakig an mga sira sa dagat, an mga gamgam sa kalangitan, an mga layas na hayop sa kalangtadan, an gabos na reptilyang nagkakamang sa daga, saka an gabos na tawo sa ibabaw kan daga, asin mabagsak an mga bukid,+ tapos matutupag an mga ampas, asin magagaba an gabos na pader.’

21 “‘Mapaabot ako nin espada laban sa saiya sa gabos kong kabukidan,’ an sabi kan Soberanong Kagurangnan na Jehova. ‘An espada kan lambang tawo magigin laban sa saiyang sadiring tugang.+ 22 Huhukuman ko siya paagi sa* damat+ asin paggadan;* siya saka an saiyang mga hukbo asin an dakul na banwaan na kaiba niya+ papauranan ko nin makusugon na uran, yelo,*+ kalayo,+ asin asupre.+ 23 Asin ibabantog ko nanggad an sakong kadakulaan asin papabanalon ko nanggad an sakong sadiri asin ipapamidbid ko nanggad an sakong sadiri sa atubangan kan dakul na nasyon; asin mamimidbid nanggad ninda na ako si Jehova.’