Jeremias

7 Ini an tataramon na uminabot ki Jeremias hali ki Jehova: 2 “Magtindog ka sa may trangkahan kan harong ni Jehova, asin ipahayag mo duman an mensaheng ini, ‘Danguga nindo an sabi ni Jehova, kamong bilog na banwaan nin Juda na minalaog sa mga trangkahan na ini tanganing magduko ki Jehova. 3 Ini an sabi ni Jehova na pamayo nin mga hukbo, an Diyos kan Israel: “Baguhon nindo an saindong mga dalan saka an saindong mga gibo, asin tutugutan ko kamong padagos na mag-istar sa lugar na ini.+ 4 Dai kamo magtiwala sa mapandayang mga tataramon asin magsabi, ‘Ini an* templo ni Jehova, an templo ni Jehova, an templo ni Jehova!’+ 5 Dahil kun talagang babaguhon nindo an saindong mga dalan asin mga gibo; kun talagang idedepensa nindo an hustisya pag may kaso sa pag-ultanan nin sarong tawo asin kan saiyang kapwa;+ 6 kun dai nindo aapihon an mga dayuhan na residente, mga ilo,* asin mga babaying balo;+ kun dai kamo magpapabulos nin dugo nin tawong daing sála sa lugar na ini; asin kun dai kamo masunod sa ibang mga diyos sa ikakapahamak nindo;+ 7 tutugutan ko kamong padagos na mag-istar sa lugar na ini, sa daga na itinao ko sa saindong mga apuon para sa gabos na panahon.”’”*

8 “Alagad nagtitiwala kamo sa mapandayang mga tataramon+—mayo nanggad iyan nin maitataong pakinabang. 9 Puwede daw kamong manghabon,+ manggadan, magsambay, manumpa nin putik,+ magdulot nin mga atang* ki Baal,+ asin magsunod sa mga diyos na dai nindo midbid, 10 asin pagkatapos madulok kamo sa sako asin matindog sa atubangan ko sa harong na ini na kinamumugtakan kan sakuyang pangaran tapos masabi, ‘Maliligtas kami,’ sa ibong kan paggibo nindo kan gabos na makababalding bagay na ini? 11 Ano ibinilang na nindong lungib nin mga parahabon an harong na ini na kinamumugtakan kan sakuyang pangaran?+ Nahiling ko mismo an mga ginigibo nindo,” an sabi ni Jehova.

12 “‘Alagad, paduman kamo ngunyan sa lugar ko sa Shilo,+ na pinili ko kan primero na mamugtakan kan sakuyang pangaran,+ asin hilingon nindo kun anong ginibo ko diyan huli sa karatan kan sakuyang banwaan na Israel.+ 13 Pero padagos nindong ginibo an gabos na bagay na ini,’ an sabi ni Jehova, ‘asin dawa nagtaram ako sa saindo nin pauruutro,* dai kamo nagdangog.+ Padagos ko kamong inapod, pero dai kamo minasimbag.+ 14 Kaya gigibuhon ko man sa harong na kinamumugtakan kan sakuyang pangaran,+ na saindong pinagtitiwalaan,+ asin sa lugar na ini na itinao ko sa saindo saka sa mga apuon nindo, an arog kan ginibo ko sa Shilo.+ 15 Papalayason ko kamo sa atubangan ko, arog kan pagpalayas ko sa gabos nindong tugang, an gabos na gikan ni Efraim.’+

16 “Asin ika, dai ka mamibi para sa banwaan na ini. Dai ka mag-agrangay o mamibi o makimahirak sa sako para sa sainda,+ ta dai taka dadangugon.+ 17 Dai mo nahihiling an ginigibo ninda sa mga siyudad kan Juda asin sa mga tinampo kan Jerusalem? 18 An mga aki nangungua nin panggatong, an mga ama nagpapalaad nin kalayo, asin an mga agom na babayi nagmamasa nin harina tanganing gumibo nin mga atang na tinapay para sa Reyna kan Langit,*+ asin nagbububo sinda nin mga dulot na inumon para sa ibang mga diyos tanganing paangguton ako.+ 19 ‘Pero ako daw an kinukulgan* ninda?’ an sabi ni Jehova. ‘Bakong an sadiri man sana ninda, sa ikakasupog ninda?’+ 20 Kaya ini an sabi kan Soberanong Kagurangnan na Jehova, ‘An sakong kaanggutan asin an sakong pagkaungis iuula ko sa lugar na ini,+ sa tawo asin hayop, sa mga kahoy sa kalangtadan saka sa mga bunga kan daga; maglalaad iyan asin dai iyan masisigbo.’+

21 “Ini an sabi ni Jehova na pamayo nin mga hukbo, an Diyos kan Israel, ‘Sige, idagdag nindo sa iba pa nindong mga atang an saindong mga bílog na dulot na pigtututong, asin kakanon nindo an karne.+ 22 Huli ta kan aldaw na iluwas ko sa daga nin Ehipto an mga apuon nindo, mayo akong sinabi o ipinagbuot sa sainda manungod sa mga bílog na dulot na pigtututong saka mga atang.+ 23 Pero ini an itinao kong pagbuot sa sainda: “Magsunod kamo sa boses ko, asin ako magigin saindong Diyos, asin kamo magigin sakuyang banwaan.+ Dapat kamong maglakaw sa gabos na dalan na ipinagbuot ko, tanganing maparahay kamo.”’+ 24 Pero dai sinda nagdangog o nagtaong atensiyon;*+ imbes, naglakaw sinda uyon sa sadiri nindang mga plano,* na may katagasan an payong sinusunod an saindang maraot na puso, asin nagin pasibog sinda,+ bakong paabante, 25 puon kan aldaw na magluwas sa daga nin Ehipto an mga apuon nindo sagkod sa aldaw na ini.+ Kaya padagos kong isinugo sa saindo an gabos kong lingkod na propeta, na isinusugo sinda nin aroaldaw, pauruutro.*+ 26 Pero habo nindang magdangog sa sako, asin dai sinda nagtaong atensiyon.*+ Imbes, matagas an payo ninda,* asin mas grabe pa an mga ginibo ninda kisa sa mga apuon ninda!

27 “Sasabihon mo sa sainda an gabos na tataramon na ini,+ pero dai sinda madangog sa saimo; aapudon mo sinda, pero dai sinda masimbag sa saimo. 28 Asin sasabihon mo sa sainda, ‘Ini an nasyon na dai nagsunod sa boses ni Jehova na saindang Diyos asin habong mag-ako nin disiplina. Napara na an kaimbudan asin dai na ngani ninda iyan pigsasambit.’*+

29 “Guntingon mo an saimong dai naputulan* na buhok tapos itapok* mo iyan, asin mag-awit ka nin panambitan* sa ibabaw kan mga bulod na mayong ano man na nagtutubo, huling isinikwal na ni Jehova an henerasyon na ini na nagpaanggot sa saiya nin grabe asin saiya ining papabayaan. 30 ‘Huli ta ginibo kan banwaan nin Juda kun ano an maraot sa sakong paghiling,’ an sabi ni Jehova. ‘An mga makababalding idolo ninda ilinaag ninda sa harong na kinamumugtakan kan sakuyang pangaran, tanganing ramugan iyan.+ 31 Itinugdok ninda an mga halangkaw na lugar kan Tofet, na nasa Kababan kan Aki ni Hinom,*+ tanganing suluon sa kalayo an mga aki nindang lalaki saka babayi,+ sarong bagay na dai ko ipinagbuot asin dai man lamang naglaog sa puso* ko.’+

32 “‘Kaya maabot an mga aldaw,’ an sabi ni Jehova, ‘na dai na iyan aapudon na Tofet o Kababan kan Aki ni Hinom* kundi Kababan nin Paggadan. Maglulubong sinda sa Tofet sagkod sa mayo nang lugar na mapaglulubungan.+ 33 Asin an mga bangkay kan banwaan na ini magigin kakanon kan mga gamgam sa kalangitan saka kan mga hayop sa daga, asin mayo nin mabugaw sa sainda.+ 34 Papapunduhon ko an kurahaw nin labi-labing kagaya-gayahan asin an kurahaw nin pag-ugma, an boses kan nobyo saka an boses kan nobya,+ sa mga siyudad kan Juda asin sa mga tinampo kan Jerusalem, huling magigin kagabaan an nasyon.’”+