Esdras

7 Pagkatapos kan mga bagay na ini, sa panahon kan paghadi ni Hading Artajerjes+ kan Persia, nagbalik si Esdras.*+ Aki siya ni Seraias,+ na aki ni Azarias, na aki ni Hilkias,+ 2 na aki ni Salum, na aki ni Zadok, na aki ni Ahitub, 3 na aki ni Amarias, na aki ni Azarias,+ na aki ni Meraiot, 4 na aki ni Zerahias, na aki ni Uzi, na aki ni Buki, 5 na aki ni Abisua, na aki ni Finehas,+ na aki ni Eleazar,+ na aki ni Aaron+ na panginot na saserdote. 6 Nag-abot si Esdras hali sa Babilonya. Saro siyang parakopya* na eksperto sa* Katugunan ni Moises,+ na itinao ni Jehova na Diyos kan Israel. Itinao kan hadi an gabos na hinagad niya, huling tinatabangan siya* ni Jehova na saiyang Diyos.

7 Kan ikapitong taon ni Hading Artajerjes, nagpasiring sa Jerusalem an ibang mga Israelita, mga saserdote, mga Levita,+ mga parakanta,+ mga bantay sa trangkahan,+ asin mga lingkod sa templo.*+ 8 Asin nakaabot si Esdras sa Jerusalem kan ikalimang bulan, kan ikapitong taon kan hadi. 9 Pinunan niya an pagbiyahe hali sa Babilonya kan inot na aldaw kan inot na bulan, asin nakaabot siya sa Jerusalem kan inot na aldaw kan ikalimang bulan, huling tinatabangan siya* kan saiyang Diyos.+ 10 Inandam ni Esdras an* saiyang puso para konsultahon an Katugunan ni Jehova saka utubon iyan,+ asin para itukdo sa Israel an mga regulasyon asin an mga ipinapautob na desisyon kaiyan.+

11 Ini an kopya kan surat na itinao ni Hading Artajerjes ki Esdras na saserdote asin parakopya,* na eksperto sa pag-adal* sa mga katugunan ni Jehova asin sa mga regulasyon niya sa Israel:

12 * “Hali ki Artajerjes,+ an hadi nin mga hadi, para ki Esdras na saserdote, an parakopya* kan Katugunan kan Diyos nin kalangitan: Magkaigwa ka lugod nin lubos na katuninungan. Asin ngunyan 13 nagpaluwas ako nin pagbuot na an gabos na Israelita na yaon sa sakuyang kahadian asin an saindang mga saserdote saka mga Levita na gustong umiba sa saimo pasiring sa Jerusalem dapat na mag-iba.+ 14 Isinusugo ka kan hadi asin kan saiyang pitong parakonseho tanganing imbestigaran kun baga sinusunod sa Juda asin Jerusalem an Katugunan kan saimong Diyos, na nasa saimo,* 15 asin tanganing darahon an plata asin an bulawan na gikan sa buot na itinao kan hadi saka kan saiyang mga parakonseho para sa Diyos kan Israel, na an harong yaon sa Jerusalem, 16 kaiba an gabos na plata saka bulawan na nareresibi* mo hali sa bilog na probinsiya* nin Babilonya, pati na an mga regalo na gikan sa buot na itinatao kan mga tawo asin kan mga saserdote para sa harong kan saindang Diyos sa Jerusalem.+ 17 Asin ibakal mo tulos an kuwartang ini nin mga baka,+ mga lalaking karnero,+ mga kordero,+ asin nin mga tipasi saka mga inumon na idinudulot kaiba kan mga iyan,+ dangan iatang mo an mga iyan sa ibabaw kan altar sa harong kan saindong Diyos sa Jerusalem.

18 “Asin gamiton mo an iba pang mga plata saka bulawan para sa ano man na bagay na marahay sa paghiling mo saka kan saimong mga tugang, kauyon kan kabutan kan saindong Diyos. 19 Saka darahon mo sa atubangan kan Diyos duman sa Jerusalem an gabos na lalagan na itinao sa saimo para sa paglilingkod sa harong kan saimong Diyos.+ 20 An gabos na iba pang pangangaipo sa harong kan saimong Diyos na kaipuhan mong itao, kuanon mo sa kaban nin yaman kan hadi.+

21 “Ako, si Hading Artajerjes, nagpaluwas nin pagbuot sa gabos na tesorero sa rehiyon na Ibong kan Salog,* na an gabos na hagadon saindo ni Esdras+ na saserdote, an parakopya* kan Katugunan kan Diyos kan kalangitan, dapat nindong itao tulos, 22 sagkod sa 100 na talentong* pirak, 100 na cor* nin trigo, 100 na bath* nin arak,+ 100 na bath nin lana,+ saka asin+ gurano man iyan kadakul. 23 An gabos na ipinagbuot kan Diyos kan kalangitan may koneksiyon sa saiyang harong dapat na gibuhon na may kaigutan,+ tanganing dai magkaigwa nin grabeng kaanggutan sa nasasakupan kan hadi asin sa mga aki kaini.+ 24 Asin ipinapaaram man sa saindo na dai tinutugutan an paghagad nin buhis, tributo,*+ o bayad sa pag-agi sa mga tinampo sa kiisay man sa mga saserdote saka mga Levita, mga musikero,+ mga bantay sa trangkahan, mga lingkod sa templo,*+ asin mga trabahador sa harong na ini nin Diyos.

25 “Saka ika, Esdras, gamit an kadunungan na itinao sa saimo kan saimong Diyos,* magtalaga ka nin mga mahistrado asin mga hukom na iyo an mahusgar sa gabos na tawo sa rehiyon na Ibong kan Salog, sa gabos na mga nakakaaram kan mga katugunan kan saimong Diyos; asin dapat nindong tukduan an siisay man na dai nakakaaram kan mga katugunan.+ 26 Asin an siisay man na dai nagsusunod sa Katugunan kan saimong Diyos asin sa pagbuot kan hadi, dapat siyang padusahan tulos, iyan man kagadanan, pagpalayas, multa, o pagkapreso.”

27 Pag-umawon lugod si Jehova na Diyos kan satuyang mga apuon, na iyo an naglaag sa puso kan hadi na pagayunon an harong ni Jehova sa Jerusalem!+ 28 Pinahilingan niya ako nin maimbod na pagkamuot sa atubangan kan hadi+ asin sa atubangan kan mga parakonseho kaini+ saka sa atubangan kan gabos na makapangyarihan na mga halangkaw na opisyal* kan hadi. Kaya nagkaigwa ako nin kusog nin buot* huling tinatabangan ako* ni Jehova na sakuyang Diyos, asin tiniripon ko an mga nanginginot* sa Israel tanganing umiba sako pasiring sa Jerusalem.