Ikaduwang Cronica

24 Siyete anyos si Jehoas kan siya magin hadi,+ asin namahala siya sa Jerusalem sa laog nin 40 taon. An saiyang ina iyo si Zibiah na taga Beer-sheba.+ 2 Padagos na ginibo ni Jehoas kun ano an tama sa paghiling ni Jehova sa bilog na panahon ni Jehoiada na saserdote.+ 3 Ipinili siya ni Jehoiada nin duwang magigin agom niya, asin nagkaigwa siya nin mga aking lalaki asin mga aking babayi.

4 Pagkatapos, minawot kan puso ni Jehoas na pakarhayon an harong ni Jehova.+ 5 Kaya tinipon niya an mga saserdote saka an mga Levita asin sinabi sa sainda: “Magpasiring kamo sa mga siyudad kan Juda asin magkolekta kamo nin kuwarta sa bilog na Israel tanganing mahirahay kada taon an harong kan saindong Diyos;+ dapat asikasuhon na nindo tulos ini.” Alagad dai tulos iyan inasikaso kan mga Levita.+ 6 Kaya ipinaapod kan hadi si Jehoiada na panginot na saserdote asin sinabi sa saiya:+ “Taano ta dai mo inobligar an mga Levita na darahon digdi hali sa Juda asin Jerusalem an sagradong buhis na ipinagbuot ni Moises+ na lingkod ni Jehova, su sagradong buhis kan katiripunan* nin Israel, para sa tolda kan Patotoo?+ 7 Linaog kaya baga kan mga aki kan maraot na babaying si Atalia+ an harong kan tunay na Diyos,+ tapos ginamit ninda para sa mga Baal an gabos na banal na bagay na nasa harong ni Jehova.” 8 Dangan, sa pagbuot kan hadi, sarong kahon+ an ginibo asin ilinaag iyan sa luwas, sa may trangkahan kan harong ni Jehova.+ 9 Pagkatapos kaiyan, sarong paisi an ilinuwas sa bilog na Juda asin Jerusalem na darahon ninda ki Jehova an sagradong buhis+ na ipinagbuot sa Israel ni Moises, na lingkod kan tunay na Diyos, kan yaon sinda sa kaawagan. 10 Nag-urugma an gabos na pamayo* saka an bilog na banwaan,+ asin padagos sindang nagdara nin mga kontribusyon asin ihinulog an mga iyan sa kahon sagkod na mapano ini.*

11 Pag ilinalaog kan mga Levita an kahon tanganing itao sa hadi asin nahihiling nindang dakulon nang kuwarta diyan, minaduman an sekretaryo kan hadi saka an representante kan panginot na saserdote tanganing kuanon gabos an laog kan kahon,+ tapos ibinabalik ninda iyan sa kinamumugtakan kaiyan. Iyan an ginigibo ninda aroaldaw, asin dakulon an natitipon nindang kuwarta. 12 Dangan itinatao iyan kan hadi saka ni Jehoiada sa mga namamahala sa mga gibuhon nin paglilingkod sa harong ni Jehova, dangan nagtatangdan sinda nin mga paratabas nin gapo asin mga ekspertong trabahador para ipahirahay an harong ni Jehova,+ asin siring man nin mga trabahador sa lansang saka tanso para hirahayon an harong ni Jehova. 13 Dangan pinunan na kan mga namamahala kan patrabaho an trabaho, asin nagin dagos-dagos an paghirahay sa pamamahala ninda, asin ibinalik ninda sa marahay na kondisyon an harong kan tunay na Diyos asin pinasarig iyan. 14 Asin kan makatapos na sinda, tulos nindang dinara sa hadi asin ki Jehoiada an natadang kuwarta, asin ginamit ninda iyan sa paggibo nin mga kagamitan para sa harong ni Jehova, mga kagamitan para sa paglilingkod asin para sa pagdulot asin sa paggibo nin mga kopa saka mga kagamitan na gibo sa bulawan asin plata.+ Asin regular sindang nagdudulot nin mga atang na pigtututong+ sa harong ni Jehova sa bilog na panahon na nabubuhay si Jehoiada.

15 Kan gurang na si Jehoiada asin kontento sa halawig niyang buhay, nagadan siya; 130 anyos siya kan magadan. 16 Asin ilinubong ninda siya sa Siyudad ni David sa kaibanan kan mga hadi,+ huling guminibo siya nin marahay sa Israel+ para sa tunay na Diyos asin para sa Saiyang harong.

17 Pagkagadan ni Jehoiada, nagduruman sa hadi an mga pamayo* kan Juda asin nagduruko sa saiya, asin nagdangog sa sainda an hadi. 18 Binayaan ninda an harong ni Jehova na Diyos kan saindang mga apuon asin nagpuon sindang maglingkod sa mga sagradong poste* asin sa mga idolo, kaya an Diyos naanggot* sa Juda asin Jerusalem huli sa kasalan ninda. 19 Padagos siyang nagsugo para sa sainda nin mga propeta tanganing pabalikon sinda ki Jehova, asin padagos sindang nagpatanid* sa sainda, pero habo nindang magdangog.+

20 Uminabot* an espiritu nin Diyos ki Zacarias na aki ni Jehoiada+ na saserdote, asin nagtindog siya sa lugar na mas halangkaw sa mga tawo asin nagsabi sa sainda: “Ini an sabi kan tunay na Diyos, ‘Taano ta binabalga nindo an mga tugon ni Jehova? Dai kamo magigin mapanggana! Huling binayaan nindo si Jehova, babayaan man niya kamo.’”+ 21 Alagad nagkurumplutan sinda laban sa saiya+ asin sa pagbuot kan hadi, ginarapo ninda siya sa patyo kan harong ni Jehova.+ 22 Kaya dai ginirumdom ni Hading Jehoas an maimbod na pagkamuot sa saiya ni Jehoiada na ama kaini,* asin ginadan niya an saiyang aki, na nagsabi kan ini naghihingagdan na: “Padusahan ka lugod ni Jehova sa ginibo mo.”+

23 Sa pagpuon kan taon,* uminabot laban ki Jehoas an hukbong Siriano, asin sinalakay ninda an Juda saka Jerusalem.+ Dangan ginaradan ninda an gabos na pamayo*+ kan banwaan, asin ipinadara ninda sa hadi kan Damasco an gabos nindang nasamsam. 24 Diit sana an mga suldados kan nagsalakay na hukbong Siriano, pero itinao ni Jehova sa kamot ninda an sarong dakulaon na hukbo,+ huling binayaan kan mga ini si Jehova na Diyos kan saindang mga apuon; kaya hinukuman ninda* si Jehoas. 25 Asin kan bayaan ninda siya (binayaan kaya ninda siya na may grabeng tama*), nagkurumplutan laban sa saiya an saiya mismong mga lingkod huling pinabulos niya an dugo kan mga aki* ni Jehoiada+ na saserdote. Ginadan ninda siya sa sadiri niyang higdaan.+ Kaya nagadan siya asin ilinubong ninda siya sa Siyudad ni David,+ pero dai ninda siya ilinubong sa lubungan kan mga hadi.+

26 Ini an mga nagkurumplutan+ laban sa saiya: si Zabad na aki kan babaying Ammonita na si Simeat, asin si Jehozabad na aki kan babaying Moabita na si Simrit. 27 Kun manungod sa saiyang mga aki saka sa dakul na mensahe laban sa saiya+ asin sa pagpakarhay kan* harong kan tunay na Diyos,+ gabos iyan nakasurat sa mga isinurat* sa Libro kan mga Hadi. Asin si Amazias na saiyang aki an nagsalida sa saiya bilang hadi.