Bilang

35 Padagos na nakipag-ulay si Jehova ki Moises sa disyertong kapatagan kan Moab harani sa Jordan,+ sa kahampang kan Jerico, na sinasabi: 2 “Instruksiyunan mo an mga Israelita na tawan ninda an mga Levita nin mga siyudad na maiistaran hali sa mana na magigin sadiri ninda,+ asin dapat nindang tawan an mga Levita nin mga pasabsaban sa palibot kan mga siyudad.+ 3 Maistar sinda sa mga siyudad na iyan, asin an mga pasabsaban magigin para sa saindang mga ataman na hayop, sa mga gamit asin pagsadiri ninda, asin sa gabos na iba pa nindang hayop. 4 An sukol kan mga pasabsaban kan mga siyudad na itatao nindo sa mga Levita dapat na 1,000 maniko* hali sa pader kan siyudad sa bilog na palibot kaiyan. 5 Magsukol kamo sa luwas kan siyudad nin 2,000 na maniko sa parteng sirangan, 2,000 na maniko sa parteng timog, 2,000 na maniko sa parteng sulnupan, asin 2,000 na maniko sa parteng norte; an siyudad yaon sa tahaw kaiyan. Iyan an magigin mga pasabsaban kan mga siyudad ninda.

6 “Matao kamo sa mga Levita nin 6 na siyudad na pailihan,+ na magigin dulagan nin saro na nakagadan nin tawo,+ saka 42 na iba pang mga siyudad. 7 Bali 48 siyudad an itatao nindo sa mga Levita, kaiba an mga pasabsaban kan mga iyan.+ 8 An mga siyudad na itatao nindo sa sainda kukuanon sa mga pagsadiri kan mga Israelita.+ Dakul an kuanon nindo sa darakulang grupo, asin dikit an kuanon nindo sa saradit na grupo.+ Itatao kan kada grupo sa mga Levita an ibang mga siyudad kaiyan, uyon sa manang inako kaiyan.”

9 Sinabi pa ni Jehova ki Moises: 10 “Kaulayon mo an mga Israelita asin sabihon mo sa sainda, ‘Mabalyo kamo sa Jordan pasiring sa daga nin Canaan.+ 11 Magpili kamo nin mga siyudad na pasil nindong madumanan para magserbing mga siyudad na pailihan; madulag pasiring diyan an saro na dai tinutuyong nakagadan nin tawo.*+ 12 An mga siyudad na iyan magseserbing pailihan nindo sa parabalos kan dugo,+ tanganing an nakagadan nin tawo dai paggadanon sagkod na dai pa siya nabibista sa atubangan kan katiripunan.+ 13 Iyan an magigin katuyuhan kan itatao nindong anom na siyudad na pailihan. 14 Matao kamo nin tulong siyudad sa kamping ini kan Jordan+ asin tulong siyudad sa daga nin Canaan+ na magigin mga siyudad na pailihan. 15 An anom na siyudad na ini magigin pailihan para sa mga Israelita, para sa dayuhan na residente,+ asin para sa nakikihimanwa sa saindo, tanganing magin dulagan kan siisay man na dai tinutuyong nakagadan nin tawo.*+

16 “‘Pero kun binadulan niya ini nin lansang asin nagadan ini, saro siyang paragadan. An paragadan dapat nanggad na gadanon.+ 17 Asin kun pinusakan niya ini nin gapo na puwedeng makagadan asin nagadan ini, saro siyang paragadan. An paragadan dapat nanggad na gadanon. 18 Asin kun binadulan niya ini nin kahoy na puwedeng makagadan asin nagadan ini, saro siyang paragadan. An paragadan dapat nanggad na gadanon.

19 “‘An parabalos kan dugo iyo an magadan sa paragadan. Pag manumpungan niya an tawong iyan, siya mismo an magadan sa saiya. 20 Kun an pagkagadan resulta kan pagtuklang niya digdi dahil sa kaanggutan o kan pagbaribad niya digdi na may maraot na intensiyon,*+ 21 o huli sa pagsuntok niya digdi dahil sa kaanggutan kaya nagadan ini, an naggibo kaiyan sa saiya dapat nanggad na gadanon. Saro siyang paragadan. Gagadanon siya kan parabalos kan dugo pag manumpungan siya kaini.

22 “‘Alagad kun aksidente sana an pagkatuklang o pagkabaribad niya digdi asin bako man iyan dahil sa kaanggutan saka mayo man siyang maraot na intensiyon,*+ 23 o kun dai niya ini nahiling tapos nahulugan niya ini nin gapo asin bako niya man ining kaiwal o mayo man siyang planong kulgan ini, tapos nagadan ini, 24 dapat na an katiripunan an maghusgar sa pag-ultanan kan nakagadan asin kan parabalos kan dugo, kauyon kan mga reglamentong ini.+ 25 Dapat na iligtas kan katiripunan an nakagadan nin tawo sa parabalos kan dugo asin ibalik siya sa siyudad na pailihan na dinumanan niya kan siya magdulag, asin dapat siyang mag-istar diyan sagkod na magadan an halangkaw na saserdote na linahidan nin banal na lana.+

26 “‘Pero kun an nakagadan nin tawo magluwas sa linderos kan siyudad na pailihan na dinumanan niya kan siya magdulag 27 asin manumpungan siya kan parabalos kan dugo sa luwas kan linderos kan saiyang siyudad na pailihan asin ginadan siya kaini, an parabalos kan dugo dai magkakasala sa dugo. 28 Huli ta dapat siyang mag-istar sa saiyang siyudad na pailihan sagkod na magadan an halangkaw na saserdote. Pero pagkagadan kan halangkaw na saserdote, an nakagadan nin tawo puwede nang magpuli sa sadiri niyang daga.+ 29 Iyan an magigin reglamento para sa paghusgar sa arog kaiyan na mga kaso para sa gabos nindong henerasyon sain man kamo mag-istar.

30 “‘An siisay man na maggadan nin tawo* dapat na gadanon bilang sarong paragadan+ sa testimonya* nin mga testigo;+ pero mayo nin siisay man* an dapat na gadanon sa testimonya nin saro sanang testigo. 31 Dai kamo mag-ako nin pantubos para sa buhay* nin sarong paragadan na maninigong magadan, huli ta dapat nanggad siyang gadanon.+ 32 Asin dai kamo magtugot na tawan kamo nin pantubos para sa saro na nagdulag pasiring sa siyudad na pailihan tangani sanang tugutan siyang magpuli na sa saiyang daga mantang buhay pa an halangkaw na saserdote.

33 “‘Dai nindo pagramugan an daga na iniistaran nindo, huling an dugo nakakaramog sa daga,+ asin mayo nin ibang puwedeng ipambayad sa kasalan para sa pinabulos na dugo sa daga apuwera sa dugo kan saro na nagpabulos kaiyan.+ 34 Dai mo pagramugan an daga na iniistaran nindo, na iyo man an iniirukan ko; huli ta ako, si Jehova, nag-iirok ako sa tahaw kan banwaan nin Israel.’”+