Ikaduwang Cronica

34 Otso anyos si Josias+ kan siya magin hadi, asin namahala siya sa Jerusalem sa laog nin 31 taon.+ 2 Ginibo niya kun ano an tama sa paghiling ni Jehova saka naglakaw siya sa gabos na dalan ni David na saiyang apuon, asin dai siya suminiko sa tuo o sa wala.

3 Kan ika-8 taon kan saiyang paghadi, kan siya hobenon pa, pinunan niyang hanapon an Diyos ni David na saiyang apuon;+ asin kan ika-12 taon, pinunan niyang linigon an Juda asin Jerusalem.+ Hinarali niya an mga halangkaw na lugar+ saka an mga sagradong poste,* an mga inukit na imahen,+ asin an mga metal na estatuwa.* 4 Dugang pa, ginaraba ninda sa atubangan niya an mga altar kan mga Baal, asin pinurutol niya an mga pigsusuluan nin insenso na nasa ibabaw kan mga ini. Piniridaso man niya an mga sagradong poste,* an mga inukit na imahen, asin an mga metal na estatuwa* asin pinurulbos niya an mga iyan dangan isinabwag sa mga linubngan kaidtong mga dating nag-aatang sa mga iyan.+ 5 Asin tinutong niya sa ibabaw kan saindang mga altar an mga tulang kan mga saserdote.+ Sa siring, nalinig niya an Juda asin Jerusalem.

6 Asin sa mga siyudad kan Manases, Efraim,+ Simeon, sagkod sa Neftali, asin sa nakapalibot digding mga gabang lugar, 7 ginaraba niya an mga altar, piniridaso asin pinurulbos an mga sagradong poste* saka an mga inukit na imahen,+ asin pinurutol niya an gabos na pigsusuluan nin insenso sa bilog na kadagaan nin Israel.+ Pagkatapos, nagbalik siya sa Jerusalem.

8 Kan ika-18 taon kan saiyang paghadi, pagkatapos niyang malinigan an nasyon asin an templo,* isinugo niya si Safan+ na aki ni Azalias, si Maaseias na pamayo kan siyudad, asin si Joa na pararekord na aki ni Joahaz tanganing hirahayon an harong ni Jehova na saiyang Diyos.+ 9 Nagduman sinda ki Hilkias na halangkaw na saserdote asin itinao sa saiya an kuwarta na dinara sa harong nin Diyos, na nakolekta kan mga Levitang nagseserbing mga bantay sa pintuan, hali sa Manases, Efraim, asin sa gabos na iba pa sa Israel,+ saka hali sa Juda, Benjamin, asin sa mga nag-iistar sa Jerusalem. 10 Iinentrega ninda iyan sa mga inasignaran na mamahala sa mga patrabaho sa harong ni Jehova. Dangan ginamit iyan kan mga trabahador sa harong ni Jehova tanganing pakarhayon asin hirahayon an harong. 11 Itinao ninda iyan sa mga panday asin sa mga paratugdok tanganing ibakal nin mga tinabas na gapo asin mga kahoy na gagamiton na mga pansuporta saka gagamiton na mga biga para sa mga harong na pinabayaan na maraot kan mga hadi kan Juda.+

12 Maimbod na ginibo kan mga lalaki an trabaho ninda.+ An mga ninombrahan na mamahala sa sainda na magseserbing mga superbisor iyo an mga Levitang si Jahat saka Obadias na mga Merarita+ asin si Zacarias saka Mesulam na mga Kohatita.+ Asin an mga Levita, na gabos ekspertong musikero,+ 13 iyo an namamahala sa mga peyon* asin iyo an mga superbisor kan gabos na nagsasagibo nin lambang klase nin paglilingkod, asin an nagkapira sa mga Levita nagserbing mga sekretaryo, mga opisyal, asin mga bantay sa trangkahan.+

14 Mantang ilinuluwas ninda an kuwarta na dinara sa harong ni Jehova,+ nanumpungan ni Hilkias na saserdote an libro kan Katugunan ni Jehova+ na itinao paagi ki* Moises.+ 15 Kaya sinabi ni Hilkias ki Safan na sekretaryo: “Nanumpungan ko sa harong ni Jehova an libro kan Katugunan.” Dangan itinao ni Hilkias ki Safan an libro. 16 Dangan dinara ni Safan sa hadi an libro asin sinabi niya sa saiya: “Ginigibo kan saimong mga lingkod an gabos na iinasignar sa sainda. 17 Kinolekta* na ninda an kuwarta na yaon sa harong ni Jehova, asin inentrega na ninda iyan sa mga inasignaran na lalaki asin sa mga trabahador.” 18 Sinabihan man ni Safan na sekretaryo an hadi: “May itinao sakong libro si Hilkias na saserdote.”+ Dangan binasa ini ni Safan sa atubangan kan hadi.+

19 Kan madangog kan hadi an mga sinasabi sa Katugunan, tulos niyang ginisi an saiyang bado.+ 20 Dangan ini an ipinagbuot kan hadi ki Hilkias, ki Ahikam+ na aki ni Safan, ki Abdon na aki ni Mikas, ki Safan na sekretaryo, saka ki Asaias na lingkod kan hadi: 21 “Lakaw kamo, maghapot kamo ki Jehova para sako asin para sa mga natada sa Israel asin sa Juda manungod sa mga sinasabi sa libro na nanumpungan; huling grabe nanggad an kaanggutan na iuula ni Jehova sa sato ta dai nagsunod sa tataramon ni Jehova an satong mga apuon. Dai ninda ginibo an gabos na nakasurat sa librong ini.”+

22 Kaya si Hilkias, kaiba an mga isinugo kan hadi, nagpasiring ki Hulda na propetisa.+ Agom siya ni Salum na namamahala sa sarayan kan mga bado. Si Salum aki ni Tikva na aki ni Harhas. Nakaistar kaidto si Hulda sa Ikaduwang Seksiyon kan Jerusalem; asin nakipag-ulay sinda sa saiya duman.+ 23 Sinabi niya sa sainda: “Ini an sabi ni Jehova na Diyos kan Israel, ‘Sabihon nindo sa lalaking nagsugo sa saindo sako: 24 “Ini an sabi ni Jehova, ‘Mapaabot ako nin kapahamakan sa lugar na ini saka sa mga nakaistar digdi,+ an gabos na sumpa na nakasurat sa libro+ na binasa ninda sa atubangan kan hadi kan Juda. 25 Huling binayaan ninda ako+ asin nagpapaaso sinda nin mga atang sa ibang mga diyos tanganing paangguton ako+ paagi kan gabos na mga gibo kan saindang mga kamot, iuula ko an kaanggutan ko sa lugar na ini asin dai iyan masisigbo.’”+ 26 Pero sa hadi kan Juda na nagsugo sa saindo tanganing maghapot ki Jehova, ini an sabihon nindo sa saiya, “Ini an sabi ni Jehova na Diyos kan Israel: ‘Manungod sa mensaheng nadangog mo,+ 27 huling naghimati* an saimong puso asin nagpakumbaba ka sa atubangan nin Diyos kan madangog mo an sinabi niya manungod sa lugar na ini asin sa mga nakaistar digdi asin nagpakumbaba ka sa atubangan ko asin ginisi mo an saimong bado saka nagtangis ka sa atubangan ko, dinangog taka man,+ an sabi ni Jehova. 28 Huli kaini, ilulubong ka arog kan saimong mga apuon* asin ilulubong ka sa saimong lubungan sa panahon na may katuninungan, asin dai mo mahihiling an gabos na kapahamakan na papaabuton ko sa lugar na ini asin sa mga nag-iistar digdi.’”’”+

Dangan dinara ninda sa hadi an simbag. 29 Kaya nagpadara nin mensahe an hadi, asin ipinaapod an gabos na kamagurangan kan Juda asin Jerusalem.+ 30 Pagkatapos kaini, nagpasiring sa harong ni Jehova an hadi kaiba an gabos na lalaki kan Juda, an mga nag-iistar sa Jerusalem, an mga saserdote, an mga Levita—an bilog na banwaan, an mga gurang siring man an mga aki. Mantang nagdadangog sinda, binasa niya an gabos na nakasurat sa libro kan tipan na nanumpungan sa harong ni Jehova.+ 31 Nagtindog an hadi sa kinamumugtakan niya asin nakipagtipan+ siya ki* Jehova, na susunudon niya si Jehova asin makuyog siya sa saiyang mga tugon, sa saiyang mga pagirumdom, asin sa saiyang mga regulasyon nin bilog niyang puso saka bilog niyang kalag*+ paagi sa pag-utob sa mga sinasabi sa tipan na nakasurat sa librong ini.+ 32 Dinagka man niya an gabos na nasa Jerusalem asin Benjamin na mag-uyon digdi. Asin ginibo kan mga nag-iistar sa Jerusalem an uyon sa tipan nin Diyos, an Diyos kan saindang mga apuon.+ 33 Dangan hinali ni Josias an gabos na makababalding bagay* sa gabos na daga na pagsadiri kan mga Israelita,+ asin pinahiro niya an lambang saro na nasa Israel na maglingkod ki Jehova na saindang Diyos. Sa bilog niyang buhay,* dai sinda suminuway sa pagsunod ki Jehova na Diyos kan saindang mga apuon.