Esdras

1 Kan inot na taon ni Hading Ciro+ kan Persia, tanganing mautob an tataramon ni Jehova na sinabi ni Jeremias,+ pinahiro ni Jehova si* Hading Ciro kan Persia na gumibo nin sarong paisi* sa bilog niyang kahadian, na ipinasurat man niya.+ Iyan nagsasabi:

2 “Ini an sabi ni Hading Ciro kan Persia, ‘Itinao sa sako ni Jehova na Diyos kan kalangitan an gabos na kahadian sa daga,+ asin sinugo niya ako na itugdok siya nin harong sa Jerusalem,+ na nasa Juda. 3 An siisay man sa saindo na kabilang sa banwaan niya, giyahan lugod siya kan saiyang Diyos, asin magduman siya sa Jerusalem, na nasa Juda, dangan itugdok giraray an harong ni Jehova na Diyos kan Israel—siya an tunay na Diyos—na an harong nasa Jerusalem.* 4 An siisay man na nag-iistar bilang dayuhan,+ sain man siya nag-iistar, tabangan siya kan mga kataraid niya* paagi sa pagtao sa saiya nin mga plata* asin bulawan, mga gamit asin mga ataman na hayop, apuwera pa sa gikan-sa-buot na dulot para sa harong kan tunay na Diyos,+ na yaon sa Jerusalem.’”

5 Dangan an mga pamayo kan mga angkan kan Juda asin kan Benjamin saka an mga saserdote asin an mga Levita—an gabos na an puso* pinahiro kan tunay na Diyos—nag-andam para sa paghali asin sa pagtugdok liwat kan harong ni Jehova na yaon sa Jerusalem. 6 An gabos nindang kataraid nagtarabang sa sainda* paagi sa pagtao sa sainda nin mga kagamitan na gibo sa plata saka bulawan, iba pang mga gamit, mga ataman na hayop, asin iba pang mahahalagang bagay, apuwera pa sa gabos na mga gikan-sa-buot na dulot.

7 Ilinuwas man ni Hading Ciro an mga kagamitan sa harong ni Jehova na kinua kaidto ni Nabucodonosor sa Jerusalem asin na ilinaag sa harong kan saiyang diyos.+ 8 Inasignaran ni Hading Ciro kan Persia an tesorerong si Mitredat na mamahala sa pagluwas kan mga kagamitan. Naggibo ini nin lista kan mga kagamitan asin itinao an mga iyan ki Sesbazar*+ na pamayo kan Juda.

9 Iyo ini an mga nasa lista: 30 bulawan na lalagan na korteng basket, 1,000 platang lalagan na korteng basket, 29 reserbang lalagan, 10 30 saradit na bulawan na mangko, 410 na saradit na platang mangko, 1,000 iba pang kagamitan. 11 An bilang kan gabos na kagamitan na gibo sa bulawan saka plata 5,400. Dinara ni Sesbazar an gabos na iyan kan pabalikon sa Jerusalem an mga binihag+ duman* sa Babilonya.