Ikaduwang Cronica

20 Pagkatapos kaini, padangadang an mga Moabita+ asin an mga Ammonita,+ kaiba an nagkapira sa mga Amonim,* tanganing makigiyera ki Jehosafat. 2 Kaya may nagsabi ki Jehosafat: “Sarong dakulang hukbo an masalakay saimo hali sa Edom,+ sa rehiyon harani sa dagat,* asin yaon na sinda sa Hazazon-tamar na iyo an En-gedi.”+ 3 Huli kaini, natakot si Jehosafat, asin determinado siyang* hanapon si Jehova.+ Kaya nagdeklarar siya nin pag-ayuno sa bilog na Juda. 4 Dangan, nagtiripon an mga taga Juda tanganing maghapot ki Jehova;+ nag-arabot sinda hali sa gabos na siyudad kan Juda tanganing kumonsulta ki Jehova.

5 Dangan nagtindog si Jehosafat sa atubangan kan katiripunan* kan Juda asin Jerusalem na yaon sa bagong patyo kan harong ni Jehova, 6 asin nagsabi siya:

“O Jehova na Diyos kan samong mga apuon, bakong ika an Diyos sa kalangitan,+ asin bakong ika an nakakasakop sa gabos na kahadian kan mga nasyon?+ Nasa kamot mo an kapangyarihan asin kusog, asin mayo nin kayang lumaban sa saimo.+ 7 O samuyang Diyos, bakong pinalayas mo sa atubangan kan banwaan mong Israel an mga nag-iistar sa kadagaan na ini asin itinao ini sa mga gikan* kan amigo mong si Abraham para magin pagsadiri sagkod lamang?+ 8 Asin nag-istar sinda digdi, asin nagtugdok sinda digdi para saimo nin sarong santuwaryo para sa saimong pangaran,+ asin an sabi ninda, 9 ‘Kun may kapahamakan na mag-abot sa samo, paagi man ini sa espada, padusa, epidemya, o tiggutom, tuguti kaming magtindog sa atubangan kan harong na ini saka sa atubangan mo (huling yaon sa harong na ini an saimong pangaran)+ tanganing maghagad saimo nin tabang sa samong kasakitan, asin lugod na magdangog ka asin iligtas mo kami.’+ 10 Ngunyan, uya an mga lalaki kan Ammon, kan Moab, asin kan kabukidan nin Seir,+ na dai mo pigtugot na salakayon kan Israel kan magluwas an Israel sa daga nin Ehipto. Linampasan sinda kan Israel asin dai sinda pinuho.+ 11 Ngunyan ini an ibabalos ninda sa samo. Madirigdi sinda tanganing palayason kami sa saimong pagsadiri na itinao mo sa samo bilang pamana.+ 12 O samuyang Diyos, dai mo tabi sinda huhukuman?+ Mayo kaya kaming kalaban-laban sa dakulang hukbong ini na masalakay sa samo; asin dai mi aram an gigibuhon,+ pero sa saimo nakahiling an samong mga mata.”+

13 Sa bilog na panahon na iyan, nakatirindog sa atubangan ni Jehova an gabos na taga Juda, kaiba an saindang mga agom na babayi asin mga aki,* pati an saradit nindang mga aki.

14 Dangan an espiritu ni Jehova uminabot ki Jahaziel na aki ni Zacarias na aki ni Benaias na aki ni Jeiel na aki ni Matanias na Levitang hali sa mga gikan ni Asaf, mantang nasa tahaw siya kan katiripunan. 15 Nagsabi siya: “Magtao kamong atensiyon, bilog na Juda asin kamo na mga nag-iistar sa Jerusalem asin ika, Hading Jehosafat! Ini an sabi sa saindo ni Jehova, ‘Dai kamo matakot o makubhanan sa dakulang hukbong ini; ta bako sa saindo an ralaban, kundi sa Diyos.+ 16 Bumaba kamo laban sa sainda sa aga. Matukad sinda sa agihan kan Ziz, asin manunumpungan nindo sinda sa puro kan kababan* harani sa kaawagan nin Jeruel. 17 Dai nindo kaipuhan na makipaglaban sa ralaban na ini. Pumuwesto lang kamo, magdanay na nakatindog,+ asin hilingon an pagliligtas sa saindo ni Jehova.*+ O Juda asin Jerusalem, dai kamo matakot o makubhanan.+ Lumuwas kamo laban sa sainda sa aga, asin aantabayanan kamo ni Jehova.’”+

18 Tulos na suminubsob si Jehosafat, asin suminubsob man sa atubangan ni Jehova an bilog na Juda asin an mga nag-iistar sa Jerusalem tanganing sambahon si Jehova. 19 Dangan nagtirindog an mga Levita na mga gikan sa mga Kohatita+ asin sa mga Korahita tanganing umawon sa makusugon na boses si Jehova na Diyos kan Israel.+

20 Pagkaaga, nagmarata sinda nin amay asin nagruluwas pasiring sa kaawagan nin Tekoa.+ Mantang paluwas sinda, nagtindog si Jehosafat asin nagsabi: “Magdangog kamo sako, O Juda asin kamong mga nag-iistar sa Jerusalem! Magtubod kamo ki Jehova na saindong Diyos tanganing makatindog kamo nin marigon.* Magtubod kamo sa saiyang mga propeta,+ asin magigin kamong mapanggana.”

21 Pagkatapos niyang kumonsulta sa banwaan, nagpili siya nin mga lalaking makanta+ asin maumaw ki Jehova. Masulot sinda nin banal na gubing mantang naiinot sinda sa mga armadong lalaki, na nagsasarabi: “Magpasalamat kamo ki Jehova, huling nagdadanay sagkod lamang an maimbod na pagkamuot niya.”+

22 Kan punan na nindang maugmang magkanta nin mga pag-umaw, nagbugtak si Jehova nin mga matambang sa mga lalaki kan Ammon, kan Moab, asin kan kabukidan nin Seir na minasalakay sa Juda, asin sinda-sinda man sana an naggaradanan.+ 23 Buminaling an mga Ammonita asin mga Moabita laban sa mga lalaking hali sa kabukidan nin Seir+ tanganing garadanon asin puhuon an mga ini; pagkatapos nindang maubos an mga lalaking hali sa kabukidan nin Seir, sinda na man an naggaradanan.+

24 Kan mag-abot sa torengbantayan sa kaawagan an mga taga Juda+ asin kan tanawon ninda an hukbo, nahiling ninda an saindang mga bangkay na nakawararak sa daga;+ mayong natadang buhay. 25 Kaya dinumanan ini ni Jehosafat asin kan saiyang mga tawuhan tanganing mangua nin mga samsam sa mga bangkay, asin nahiling ninda sa mga ini an dakulon na gamit, bado, asin mamahalon na kagamitan. Kinurua ninda an mga ini sa sainda sagkod na dai na ninda ini kayang madara.+ Inabot sinda nin tulong aldaw sa paghakot nin samsam, huling dakulon ini. 26 Kan ikaapat na aldaw, nagtiripon sinda sa Kababan* nin Beraca, ta diyan ninda inumaw* si Jehova. Iyan an dahilan kun taano ta inapod nindang Kababan nin Beraca*+ an lugar na iyan sagkod ngunyan.

27 Dangan maugmang nagbaralik sa Jerusalem an gabos na lalaki kan Juda asin Jerusalem, asin si Jehosafat an nasa inutan ninda. Maugma sinda huling tinawan sinda ni Jehova nin kapangganahan laban sa saindang mga kalaban.+ 28 Kaya nag-abot sinda sa Jerusalem na nagpapatanog nin mga instrumentong de-kuwerdas, mga arpa,+ saka mga trumpeta+ asin nagpasiring sinda sa harong ni Jehova.+ 29 Asin kan mabaretaan kan gabos na kahadian kan mga nasyon na nakipaglaban si Jehova sa mga kalaban kan Israel, pinangyari nin Diyos na magkatarakot sindang marhay.+ 30 Kaya dai nagkaigwa nin kariribukan sa kahadian ni Jehosafat, asin padagos siyang tinawan kan saiyang Diyos nin kapahingaluan sa enterong palibot.+

31 Asin padagos na naghadi sa Juda si Jehosafat. An edad niya kan siya magin hadi 35 anyos, asin namahala siya sa Jerusalem sa laog nin 25 taon. An saiyang ina iyo si Azuba na aki ni Silhi.+ 32 Padagos siyang naglakaw sa dalan kan saiyang ama na si Asa.+ Dai siya suminiko hali diyan, asin ginibo niya kun ano an tama sa paghiling ni Jehova.+ 33 Alagad, yaon pa man giraray an mga halangkaw na lugar,+ asin dai pa naiaandam kan banwaan an saindang puso para sa Diyos kan saindang mga apuon.+

34 Kun manungod sa iba pang nangyari sa buhay ni Jehosafat, puon sa kapinunan sagkod sa katapusan, nakasurat iyan sa mga isinurat* ni Jehu+ na aki ni Hanani,+ na iiniba sa Libro kan mga Hadi kan Israel. 35 Pagkatapos kaini, nakipag-alyansa si Hading Jehosafat kan Juda ki Hading Ahazias kan Israel, na guminibo nin maraot.+ 36 Ginibo niya ining kasosyo sa paggibo nin mga barko na mabiyahe pasiring sa Tarsis,+ asin sa Ezion-geber+ ninda ginibo an mga barko. 37 Alagad, nagpropesiya laban ki Jehosafat si Eliezer na aki ni Dodavahu na taga Maresa, na sinasabi: “Huling nakipag-alyansa ka ki Ahazias, rarauton ni Jehova an mga ginibo mo.”+ Kaya nagkararaot an mga barko,+ asin dai iyan nakahali pasiring sa Tarsis.