Ikaduwang Cronica

21 Dangan nagadan* si Jehosafat asin ilinubong sa Siyudad ni David sa kaibanan kan saiyang mga apuon; asin si Jehoram na saiyang aki an nagsalida sa saiya bilang hadi.+ 2 An saiyang mga tugang na lalaki na mga aki ni Jehosafat iyo si Azarias, Jehiel, Zacarias, Azarias, Miguel, asin Sefatias; gabos sinda mga aki ni Hading Jehosafat kan Israel. 3 Asin tinawan sinda kan saindang ama nin dakul na regalong plata saka bulawan, asin mamahalon na mga bagay, kaiba kan mga may matibay na depensang siyudad sa Juda;+ pero an kahadian itinao niya ki Jehoram,+ huling siya an panganay.

4 Kan nasa kontrol na ni Jehoram an kahadian kan saiyang ama, ginaradan niya paagi sa espada an gabos niyang tugang na lalaki,+ pati an nagkapira sa mga pamayo* kan Israel, tanganing mapakusog an posisyon niya. 5 An edad ni Jehoram kan siya magin hadi 32 anyos, asin namahala siya sa Jerusalem sa laog nin walong taon.+ 6 Inarog niya an mga ginibo kan mga hadi kan Israel,+ arog kan ginibo kan pamilya* ni Ahab, huli ta nagin agom niya an aki ni Ahab;+ asin padagos niyang ginibo kun ano an maraot sa paghiling ni Jehova. 7 Alagad dai gusto ni Jehova na laglagon an dinastiya* ni David alang-alang sa tipan na ipinakipagtipan niya ki David,+ huling nanuga siya na pirming matao sa saiya nin lampara asin sa saiyang mga aki.+

8 Sa panahon kan saiyang pamamahala, nagrebelde sa Juda an Edom+ asin nagtalaga sinda nin sadiri nindang hadi.+ 9 Kaya nagbalyo si Jehoram asin an saiyang mga komandante kaiba an gabos niyang karwahe. Banggi siyang nagsalakay asin nadaog niya an mga Edomita na nakapalibot sa saiya saka sa saiyang mga komandante kan mga karwahe. 10 Pero padagos na nagrebelde an Edom sa Juda sagkod sa aldaw na ini. Nagrebelde man sa saiya an Libna+ kan panahon na idto, huling binayaan niya si Jehova na Diyos kan saiyang mga apuon.+ 11 Naggibo man siya nin mga halangkaw na lugar+ sa mga bukid kan Juda na nagin dahilan kan pagigin bakong maimbod sa Diyos* kan mga nag-iistar sa Jerusalem, asin ilinagalag niya an Juda.

12 Pag-abot nin panahon, may nag-abot sa saiyang nakasurat na mensahe hali ki Elias+ na propeta, na nagsasabi: “Ini an sabi ni Jehova na Diyos ni David na saimong apuon, ‘Dai ka naglakaw sa mga dalan kan saimong amang si Jehosafat+ o sa mga dalan ni Hading Asa+ kan Juda. 13 Kundi naglalakaw ka sa dalan kan mga hadi kan Israel+ asin ika an nagin dahilan kan pagigin bakong maimbod sa Diyos* kan Juda asin kan mga nag-iistar sa Jerusalem+ arog kan pagigin bakong maimbod* kan pamilya ni Ahab,+ asin ginaradan mo pa ngani an sadiri mong mga tugang+ sa pamilya kan saimong ama, na mga mas marahay kisa saimo. 14 Kaya, mapaabot si Jehova nin matinding padusa sa saimong banwaan, sa saimong mga aki, sa saimong mga agom, asin sa gabos mong pagsadiri. 15 Asin magkakaigwa ka nin dakul na hilang, kaiba na an magigin hilang mo sa bituka. Malala kada aldaw an hilang mong iyan sagkod na lumuwas an saimong mga bituka.’”

16 Dangan pinahiro ni Jehova+ laban ki Jehoram an mga Filisteo*+ asin an mga Arabeng+ nakaistar harani sa mga Etiope. 17 Kaya sinalakay ninda an Juda, puwersahan ninda iyan na linaog, asin kinurua an gabos na gamit na yaon sa harong* kan hadi,+ pati an saiyang mga aki saka mga agom; an natada sana sa mga aki niya iyo si Jehoahaz,*+ an saiyang pinakanguhod na aki. 18 Asin pagkatapos kan gabos na ini, pinadusahan siya ni Jehova nin sarong dai nabubulong na hilang sa bituka.+ 19 Dangan, pakalihis nin bilog na duwang taon, luminuwas an saiyang bituka huli sa saiyang hilang, asin nagadan siya mantang nasasakitan na marhay sa hilang niya; asin an saiyang banwaan dai nagpalaad para sa saiya nin kalayo, arog kan ginibo nindang pagpalaad nin kalayo kaidto para sa saiyang mga apuon.+ 20 An edad niya kan siya magin hadi 32 anyos, asin namahala siya sa Jerusalem sa laog nin walong taon. Mayo nin nagmundo kan siya magadan. Asin ilinubong ninda siya sa Siyudad ni David,+ pero bako sa lubungan kan mga hadi.+