Hukom

7 Dangan si Jerubaal, na iyo si Gideon,+ asin an gabos na suldados na kaiba niya amay na nagmata asin nagkampo sa may Burabod nin Harod, mantang an kampo kan Midian nasa norte kan kampo ni Gideon sa may bulod nin More sa kapatagan sa kababan.* 2 Sinabi ngunyan ni Jehova ki Gideon: “Dakulon an mga suldados na kaibanan mo para itao ko sa kamot ninda an Midian.+ ’Baad maghambog an Israel laban sako asin sabihon ninda, ‘An sadiri kong kamot an nagligtas sa sako.’+ 3 Sabihon mo tabi sa atubangan kan mga suldados: ‘An siisay man na natatakot asin nagtatakig, pumuli na siya.’”+ Kaya tinesting sinda ni Gideon. Huli kaiyan, 22,000 na suldados an nagpuruli, asin 10,000 an natada.

4 Alagad sinabi pa man giraray ni Jehova ki Gideon: “Dakulon pa man giraray an mga suldados. Pababaon mo sinda sa may sapa tanganing matesting ko sinda duman para sa saimo. Pag sinabi ko saimo, ‘Maiba an sarong ini saimo,’ maiba siya saimo, pero pag sinabi ko saimo, ‘Dai maiba saimo an sarong ini,’ dai siya maiba.” 5 Kaya dinara niya an mga suldados sa may sapa.

Dangan sinabi ni Jehova ki Gideon: “Isuway mo an gabos na nag-iinom nin tubig sa saindang kamot;* isuway mo sinda sa mga nagluluhod para mag-inom nin tubig.” 6 An gabos na nag-inom nin tubig sa saindang kamot may bilang na 300. An gabos na iba pang suldados nagluhod para mag-inom nin tubig.

7 Ngunyan sinabi ni Jehova ki Gideon: “Ililigtas ko kamo paagi sa 300 na lalaking ini na nag-inom nin tubig sa saindang kamot, asin itatao ko an Midian sa saimong kamot.+ Pero papulion mo na an gabos na iba pang suldados.” 8 Kaya pagkatapos na makua kan 300 na suldados an mga kakanon saka an mga hamudyong sa iba pang mga suldados, pinapuli na ni Gideon an gabos na iba pang suldados kan Israel, asin an 300 sana an ipinawalat niya. An kampo kan Midian nasa ibaba ninda sa kapatagan sa kababan.+

9 Kan pagkabanggi, sinabihan siya ni Jehova: “Bumangon ka, salakayon mo an kampo, huli ta itinao ko na iyan sa saimong kamot.+ 10 Pero kun natatakot kang sumalakay, bumaba ka pasiring sa kampo kaiba an lingkod mong si Pura. 11 Magdangog ka sa pinag-uurulayan ninda, asin pagkatapos kaiyan magkakaigwa ka nin kusog nin buot* na salakayon an kampo.” Kaya buminaba sinda kan lingkod niyang si Pura pasiring sa gilid kan kampo kan saindang kalaban.

12 Napano kan Midian saka kan Amalek asin kan gabos na taga Sirangan+ an kapatagan sa kababan siring sa mahibog na panganuron nin mga duron, asin dai mabilang an saindang mga kamelyo,+ na kasingdakul kan mga baybay sa gilid kan dagat. 13 Pag-abot ni Gideon, igwa nin sarong lalaki na nag-iistorya kan saiyang napangaturugan sa kaibanan niya, asin an sabi niya: “Ini an napangaturugan ko. Igwa daa nin sarong bilog na tinapay na sebada na nagliligid pasiring sa kampo kan Midian. Tapos tinamaan kaiyan an sarong tolda. Makusugon an pagkabangga kaiyan kaya nagaba an tolda.+ Iyo, tuminaob an tolda asin buminagsak.” 14 Nagsabi sa saiya an kaibanan niya: “Siguradong an espada iyan ni Gideon+ na aki ni Joas, na sarong Israelita. Itinao na nin Diyos an Midian asin an bilog na kampo sa saiyang kamot.”+

15 Kan madangog ni Gideon an pangaturugan asin an pakahulugan kaiyan,+ duminuko siya para sumamba sa Diyos. Pagkatapos kaiyan, buminalik na siya sa kampo kan Israel asin nagsabi: “Maghanda na kamo, huli ta itinao na ni Jehova sa saindong kamot an kampo kan Midian.” 16 Dangan binanga niya sa tulong grupo an 300 na lalaki asin tinawan sinda gabos nin hamudyong+ saka dakulang dulay na may karaba sa laog. 17 Tapos sinabi niya sa sainda: “Hilingon nindo ako tapos arugon nindo nin eksakto an gigibuhon ko. Pag nagduman ako sa gilid kan kampo, iyo man iyan an gibuhon nindo. 18 Pag pinatanog ko saka kan mga kaibanan ko an samong mga hamudyong, patanugon man nindo an saindong mga hamudyong sa palibot kan kampo asin magkururahaw kamo, ‘Para ki Jehova asin para ki Gideon!’”

19 Kan pagpuon kan pagbabantay sa katahawan nin banggi,* kan kakasalida pa sana nin mga bantay, si Gideon saka an 100 na lalaking kaibanan niya nagduman sa gilid kan kampo. Pinatanog ninda an mga hamudyong+ asin pinarasa an darakulang dulay na kapot ninda.+ 20 Kaya pinatanog kan tulong grupo an mga hamudyong asin pinarasa an darakulang dulay. Kinaputan ninda an karaba sa wala nindang kamot asin pinatanog an hamudyong sa tuo nindang kamot tapos nagkururahaw sinda: “An espada ni Jehova asin ni Gideon!” 21 Dai nguna sinda naghali sa natitindugan ninda sa palibot kan kampo, asin an bilog na hukbo kan saindang kalaban nagdaralagan padulag na nagkukururahaw.+ 22 Padagos na pinatanog kan 300 an mga hamudyong, asin pinangyari ni Jehova na an saindang mga kalaban an magralabanan sa bilog na kampo;+ asin an hukbo nagdulag sagkod sa Bet-sita, asin sa Zerera, sagkod sa linderos* kan Abel-mehola+ harani sa Tabat.

23 Asin ipinaapod an mga lalaki kan Israel hali sa Neftali, Aser, saka sa bilog na Manases,+ asin linapag ninda an Midian. 24 Nagsugo si Gideon nin mga mensahero sa bilog na kabukidan nin Efraim para sabihon an mensaheng ini: “Magbaba kamo para salakayon an Midian, asin magduman kamo sa Bet-bara saka sa Jordan tapos magpuwesto kamo sa mga pigbabalyuhan na hababaw na parte kaiyan.” Kaya nagtiripon an gabos na lalaki kan Efraim, asin nagduman sinda sa Bet-bara saka sa Jordan tapos nagpuwesto sinda sa mga pigbabalyuhan na hababaw na parte kaiyan. 25 Nadakop man ninda an duwang pamayo* kan Midian, si Oreb saka si Zeeb; ginadan ninda si Oreb sa sarong dakulang gapo,+ na kan huri inapod na gapo ni Oreb, asin ginadan ninda si Zeeb sa sarong pugaan nin ubas, na kan huri inapod na pugaan nin ubas ni Zeeb. Padagos nindang linapag an Midian,+ asin dinara ninda ki Gideon sa rehiyon kan Jordan an payo ni Oreb saka ni Zeeb.