Esdras

6 Kaya kan panahon na iyan nagpaluwas nin pagbuot si Hading Dario, asin nagkaigwa nin pagsiyasat sa harong sa Babilonya na pigsasarayan kan mga libro nin kasaysayan saka kan mga kayamanan. 2 Asin sarong rolyo an nakua sa kuta sa Ecbatana, sa probinsiya* nin Media, asin ini an mensahe na nakasurat diyan:

3 “Kan inot na taon kan paghadi ni Hading Ciro, nagpaluwas siya nin pagbuot may koneksiyon sa harong nin Diyos sa Jerusalem:+ ‘Itugdok liwat an harong, tanganing makapagdulot sinda duman nin mga atang, asin ilatag an mga pundasyon kaiyan; 60 maniko* an magigin langkaw kaiyan, asin 60 maniko an magigin lakbang kaiyan,+ 4 na may tulong patong nin darakulang mga gapo asin sarong patong nin mga kahoy;*+ asin an panggastos kukuanon sa kaban nin yaman kan hadi.+ 5 Saro pa, dapat na ibalik an bulawan asin platang mga lalagan kan harong nin Diyos na kinua kaidto ni Nabucodonosor sa templo sa Jerusalem asin dinara sa Babilonya,+ tanganing maibugtak ninda an mga iyan sa tamang namumugtakan kaiyan sa templo sa Jerusalem, sa harong nin Diyos.’+

6 “Kaya ngunyan, ika Tatenai na gobernador kan rehiyon na Ibong kan Salog,* asin ika Setar-bozenai, saka an saindong mga kairiba—an sekondaryong mga gobernador kan rehiyon na Ibong kan Salog+—rumayo kamo diyan. 7 Dai nindo pagpakiaraman an pagtrabaho sa harong na iyan nin Diyos. Itutugdok liwat kan gobernador kan mga Judio asin kan kamagurangan kan mga Judio an harong na iyan nin Diyos sa dating kinamumugtakan kaiyan. 8 Apuwera kaiyan, nagpapaluwas ako nin pagbuot sa kun ano an gigibuhon nindo para sa kamagurangan na ini kan mga Judio sa pagtugdok liwat kan harong na iyan nin Diyos: Sa kaban nin yaman kan hadi,+ hali sa mga buhis na nakokolekta sa rehiyon na Ibong kan Salog, kukuanon an panggastos asin itatao tulos iyan sa mga lalaking ini tanganing dai mapundo an pagtrabaho.+ 9 Asin ano man na kinakaipuhan ninda—mga torilyong baka+ asin mga lalaking karnero+ saka mga kordero+ na gagamiton bilang mga dulot na pigtututong para sa Diyos nin langit, saka trigo,+ asin,+ arak,+ pati lana,+ an mga hinahagad kan mga saserdote na nasa Jerusalem—dapat na dagos-dagos na itao sa sainda nin daing palta aroaldaw, 10 tanganing padagos sindang makapagdulot nin mga dulot na makakapaugma sa Diyos kan kalangitan asin makapamibi para sa buhay kan hadi asin kan saiyang mga aki.+ 11 Nagpaluwas man ako nin pagbuot na kun an siisay man magbalga sa pagbuot na iyan, sarong kahoy an tatangkason sa harong niya asin bibitayon* siya diyan, asin an saiyang harong gigibuhon na pampublikong kasilyasan* bilang padusa sa saiyang pagbalga. 12 Asin pabagsakon lugod kan Diyos na nagbugtak kan saiyang pangaran sa templong iyan+ an siisay man na hadi asin banwaan na magpurbar na balgahon an pagbuot na ini asin rauton an harong na iyan kan Diyos sa Jerusalem. Ako, si Dario, an nagpapaluwas kan pagbuot na ini. Gibuhon tulos iyan.”

13 Kaya ginibo tulos ni Tatenai na gobernador kan rehiyon na Ibong kan Salog, saka ni Setar-bozenai,+ asin kan saindang mga kairiba an gabos na ipinagbuot ni Hading Dario. 14 Ipinadagos kan kamagurangan kan mga Judio an pagtugdok asin dakul na an saindang nahahaman,+ huli ta napakusog sinda kan propesiya ni Hageo+ na propeta asin ni Zacarias+ na makuapo ni Iddo; natapos nindang itugdok iyan kauyon kan ipinagbuot kan Diyos nin Israel+ asin kan pagbuot ni Ciro+ saka ni Dario+ asin ni Hading Artajerjes+ kan Persia. 15 Natapos ninda an harong kan ikatulong aldaw kan bulan nin Adar,* sa ikaanom na taon kan paghadi ni Hading Dario.

16 Dangan an mga Israelita, an mga saserdote, an mga Levita,+ asin an iba pang mga dating bihag sa ibang nasyon maugmang ginibo an inagurasyon* kan harong na ini nin Diyos. 17 Asin sa inagurasyon kan harong na ini nin Diyos nag-atang sinda nin 100 na baka, 200 na lalaking karnero, 400 na kordero, asin bilang dulot para sa kasalan para sa bilog na Israel, nag-atang man sinda nin 12 lalaking kanding, sigun sa bilang kan mga tribo nin Israel.+ 18 Dangan itinalaga ninda an mga saserdote sigun sa saindang mga grupo asin an mga Levita sigun sa saindang mga dibisyon para sa paglilingkod sa Diyos sa Jerusalem,+ kauyon kan nakasurat sa libro ni Moises.+

19 Asin kan ika-14 aldaw kan inot na bulan,+ an mga dating bihag sa ibang nasyon nagselebrar kan Paskuwa. 20 Naglinig kan saindang sadiri an gabos na mga saserdote asin mga Levita, kaya gabos sinda nagin malinig;+ binuno ninda an hayop na pang-atang sa Paskuwa para sa gabos na mga dating bihag sa ibang nasyon, para sa saindang mga kapwa saserdote, asin para sa saindang sadiri. 21 Dangan an mga Israelita na nagbaralik hali sa pagkabihag sa ibang nasyon nagkarakan kaiyan, kaiba an gabos na nag-iriba sa sainda asin nagbaraya sa maating gibo-gibo kan mga nasyon tanganing sambahon* si Jehova na Diyos kan Israel.+ 22 Maugma man nindang isinelebrar sa laog nin pitong aldaw an Kapiyestahan nin Tinapay na Daing Lebadura,+ huli ta pinangyari ni Jehova na magin maugma sinda asin na magin kawili-wili sinda sa paghiling kan hadi kan Asiria,+ kaya tinabangan sinda kaini* sa pagtugdok kan harong kan tunay na Diyos, an Diyos kan Israel.