An Punto-de-Vista kan Biblia

Paghuhugot—May Pagkabuhay daw Liwat?

AN MAKATUROTRISTENG bareta manongod sa paghuhugot dai minatapos kan sarong kapitulo sa buhay nin mga paryentes asin amigo; pinoponan kaiyan an saro—kapitulo nin magkasalak na pagkaherak asin kaanggotan, kamondoan asin pakamate nin kasalan. Asin pinalalataw kaiyan an hapot na: Puwede daw kitang magkaigwa nin ano man na paglaom para sa satong katood na naghugot?a

Minsan ngani nungka na makatanosan an paggadan sa sadiri, nungka na matanos, si apostol Pablo nagtao nin magayon na paglaom pati sa nagkapirang maraot. Arog kan sinabi nia sa sarong Romanong husgado: “May paglaom ako sa Dios . . . na magkakaigwa nin pagkabuhay liwat an mga matanos asin an mga bakong matanos.”—Gibo 24:15.

Minsan siring, haloy nang isinikwal nin dakol na teologo an ano man na suhestion na an pagkabuhay liwat kan mga matanos puwedeng magtao nin paglaom sa mga naghuhugot. Taano?

An mga Teologo Kinokontra an Paglaom sa Pagkabuhay Liwat

Sinabi ni William Tyndale an sarong kabtang kan problema sa introduksion kan saiyang Biblia kan ika-16 na siglo: “Sa pagbugtak kan kalag nin mga gadan sa langit, impierno, o purgatoryo linalaglag mo an mga argumento na ginagamit ni Cristo asin Pablo sa pagpatunay sa pagkabuhay liwat.” Iyo, kaidtong dakol nang siglo an nakaagi, an mga klerigo nag-introdusir nin ideyang bakong sono sa Biblia: inmortal na mga kalag na minabaya sa hawak pagkagadan asin minadiretso sa langit, purgatoryo, Limbo, o impierno. An ideyang iyan kontra sa klarong katokdoan kan Biblia sa maabot na pagkabuhay liwat. Arog kan hapot kan ministrong Baptist na si Charles Andrews: “Kun an kalag dati nang maogma sa langit (o makatanosan sanang inaasal na sa impierno), ano pa an dagdag na kaipuhan?” Idinugang pa nia: “An panlaog na kontradiksion na ini nagpadagos na damaton an mga Kristiano sa gabos na siglong nag-agi.”

An sarong resulta nin siring na salang teolohiya iyo na “poon kan panahon ni Agustin [354-430 C.E.], kinondenar kan iglesya an paghuhugot bilang kasalan,” sabi ni Arthur Droge sa Bible Review, Disyembre 1989, “kasalan na dai mababalukat, kapareho nin apostasiya asin pagsambay.”

An maisog na opinyon na “dai mababalukat,” o dai nang paglaom na idinestino sa impiernong may kalayo, dinara sa daing kasarigan na pagpasobra an argumentong paghokom-sa-pagkagadan. An inadmitir kan National Catholic Reporter: “An duwa sa kadarudakulaing doktor kan iglesya tinabuga an paghuhugot—si Agustin inapod iyan na ‘makababalde asin kasumpasumpang karatan’ asin si Aquinas nagparisa na iyan mortal [daing kapatawadan] na kasalan tumang sa Dios asin sa komunidad—pero bakong gabos na klerigo nag-oyon.”

Makaoogma, malilikayan niato an siring na “panlaog na kontradiksion” paagi sa pag-ako sa duwang magkaoyon na katotoohan sa Biblia. Enot, “an kalag na nagkakasala—iyan mismo magagadan.” (Ezequiel 18:4) Ikaduwa, an tunay na paglaom para sa gadan na kalag (tawo) mabuhay liwat paagi sa “pagkabuhay liwat [kan] mga matanos asin [kan] mga bakong matanos.” (Gibo 24:15) Kun siring, ano an rasonableng malalaoman niato para sa mga tawo na naghuhugot?

Bubuhayon Liwat an Sarong Bakong Matanos

Sinabihan ni Jesus an sarong kriminal na sentensiadong magadan: “Ika makakaibahan ko sa Paraiso.” An tawo bakong matanos—sarong paralapas sa ley imbes na nagmomondo nin makuring biktima nin paghuhugot—nagkasala oyon sa mismong pag-admitir nia. (Lucas 23:39-43) Mayo sia nin paglaom na paduman sa langit tanganing maghade kaiba ni Jesus. Kaya an Paraiso na malalaoman kan parahabon na ini na balikan iyo an magayon na daga na sakop kan Kahadean ni Jehova Dios.—Mateo 6:9, 10; Kapahayagan 21:1-4.

Sa anong katuyohan na pupukawon nin Dios an kriminal na ini? Tanganing daing herak Niang magamit an nakaagi niang mga kasalan tumang sa saiya? Dai man, huli ta an Roma 6:7, 23 nagsasabi: “An nagadan nakabutas na sa saiyang kasalan,” asin “an ibinabayad nin kasalan kagadanan.” Minsan ngani dai na sisingilon sa saiya an saiyang nakaaging mga kasalan, kaipuhan pa man giraray nia an pantubos tanganing madara sia sa pagkasangkap.

Kun siring, an teologong si Albert Barnes sala asin nakapandadaya kan sia magsabi: “An mga nakaginibo nin maraot bubuhayon liwat tanganing kondenaron, o sumpaon. Ini an katuyohan sa pagbuhay liwat sa sainda; ini an solamenteng katuyohan.” Kanigoan kaalangan kaini sa Dios nin hustisya asin pagkamoot! Imbes, an pagkabuhay liwat sa sarong paraisong daga matao sa dating kriminal na ini (asin sa iba pang bakong matanos) nin marahayon na oportunidad na hokoman basado sa gigibohon ninda pagkatapos na sinda buhayon liwat.—1 Juan 4:8-10.

Sarong Maheherakon na Oportunidad

An namungnan na mga katood nin sarong biktima nin paghuhugot kun siring puwedeng maranga kan pakaaram na “si Jehova nagpapaheling man nin pagkaherak sa mga natatakot sa saiya. Huli ta aram niang gayo an satong kamugtakan, na ginigirumdom na kita kabokabo.” (Salmo 103:10-14) Solamente an Dios an lubos na makasasabot sa kabtang nin helang sa isip, grabeng tension, pati mga depektong henetiko, sa sarong “krisis na nakapupukaw kan pagmawot na maghugot,” na, sabi kan National Observer, “bakong karakteristiko sagkod na nabubuhay [kundi] sa parate mga pirang minuto sana o oras.”—Helingon an Eclesiastes 7:7.

Totoo, an naghuhugot hinahalean an sadiri kan oportunidad na pagsolsolan an paggadan sa sadiri. Alagad siisay an makapagsasabi kun baga an saro na naghugot tibaad nagliwat an puso kun nasudya an saiyang pagprobar na maghugot? An pirang midbid na mga paragadan, sa katotoohan, nagbakle asin nagkamit kan kapatawadan nin Dios sa panahon kan saindang pagkabuhay.—2 Hade 21:16; 2 Cronica 33:12, 13.

Kaya, si Jehova, mantang nagbayad nin “pantubos na karibay nin dakol,” may diretso na magtao nin pagkaherak, pati sa mga paragadan sa sadiri, paagi sa pagbuhay liwat sa sainda asin pagtao sainda kan mahalagang oportunidad na “magsorolsol asin bumalik sa Dios paagi sa mga gibo na angay sa pagsolsol.”—Mateo 20:28; Gibo 26:20.

An Responsable, Makakasuratan na Punto-de-Vista sa Buhay

An buhay regalo nin Dios, bakong bagay na aabusohon o tatapuson sa sadiring kamot. (Santiago 1:17) Kaya, dinadagka kita kan Kasuratan na ibilang an satong sadiri na, bakong inmortal na mga kalag, kundi mahahalagang linalang kan Dios na namomoot sa sato, na nagpapahalaga sa pagigin buhay niato, asin magayagayang nagtatanaw sa panahon nin pagbuhay liwat.—Job 14:14, 15.

An pagkamoot nagpapakosog sa satong pagmidbid na an paghuhugot—minsan ngani nakalilikay sa sadiring mga problema—nagtatambak sana nin dagdag na problema sa mga namomotan na nawawalat. Kun manongod sa saro na pabiglabiglang tinapos an sadiri niang buhay, kitang mga tawo dai makapaghuhusgar kun baga sia bubuhayon liwat o dai. Gurano an saiyang kasalan? An Dios sana an nagsisiyasat sa ‘gabos na puso asin gabos na tendensia kan mga kaisipan.’ (1 Cronica 28:9) Pero makalalaom kita na ‘an Hokom sa bilog na daga magibo kan mamomoton, makatanosan, asin tama!’—Genesis 18:25.

[Nota sa Ibaba]

[Picture Credit Line sa pahina 14]

Kollektie Rijksmuseum Kröller-Müller, Otterlo