Kapitulo 4

Si Jesus Nagdatong na May Pamparigon sa Boot

 1. Siisay ngonyan an sinusuratan ni Juan, asin sairisay sa presente an maninigong mawili sa saiyang mensahe?

AN SUMINUNOD maninigong magin kawiliwili sa gabos na asosyado sa mga kongregasyon kan banwaan nin Dios ngonyan. Uya an sunod-sunod na mensahe. An mga iyan may partikular na aplikasyon mantang nagrarani “an itinalaan na panahon.” (Kapahayagan 1:3) Para sa satong daing katapusan na pakinabang kaya hinihimate niato an mga kapahayagan na iyan. An rekord nagsasabi: “Si Juan sa pitong kongregasyon na yaon sa distrito nin Asia: Mapasaindo logod an dai na kutana maninigong kabootan asin an katoninongan hale sa ‘Saro na iyo ngonyan asin iyo kaidto patin iyo an madatong,’ asin hale sa pitong espiritu na nasa atubangan kan saiyang trono, asin hale ki Jesu-Cristo.”—Kapahayagan 1:4, 5a.

 2. (a) Ano an kahulogan kan kabilangan na “pito”? (b) Sa aldaw kan Kagurangnan, kiisay minaaplikar an mga mensahe sa “pitong kongregasyon”?

² Digdi kinakaolay ni Juan an “pitong kongregasyon,” asin an mga ini nginangaranan para sa sato sa mas huring kabtang kan propesiya. An kabilangan na iyan, “pito,” parateng inootro sa Kapahayagan. Iyan nangangahulogan nin pagkakompleto, nangorogna may koneksion sa mga bagay nin Dios asin sa saiyang linahidan na kongregasyon. Mantang an kabilangan kan mga kongregasyon kan banwaan nin Dios sa bilog na kinaban nakaabot na sa haros sanggatos na ribo durante kan aldaw kan Kagurangnan, masisierto niato na an sa pangenot sinasabi sa “pitong kongregasyon” nin mga linahidan aplikado man sa bilog na banwaan nin Dios ngonyan. (Kapahayagan 1:10) Iyo, si Juan may mahalagang marhay na mensahe para sa gabos na kongregasyon nin mga Saksi ni Jehova asin sa gabos na asosyado dian, sa gabos na lugar sa ibabaw kan dagang ini.

 3. (a) Sa pataratara ni Juan, saen naghahale an ‘dai na kutana maninigong kabootan asin katoninongan’? (b) Anong mga tataramon ni apostol Pablo an nakakaagid sa pataratara ni Juan?

³ ‘Dai na kutana maninigong kabootan asin katoninongan’—marahayon nanggad an mga ini asin nangorogna kun nasasabotan niato kun gikan iyan kiisay! An “Saro” na ginigikanan kaiyan iyo an Soberanong Kagurangnan na Jehova mismo, an “Hade sa panahon na daing sagkod,” na nabubuhay “poon pa ngani sa panahon na daing talaan sagkod sa panahon na daing talaan.” (1 Timoteo 1:17; Salmo 90:2) Kalabot man digdi an “pitong espiritu,” termino na nagpaparisa kan kalubosan kan paghiro kan puersa aktiba, o banal na espiritu, nin Dios sa pagtao kaiyan nin pakasabot asin bendisyon sa gabos na nagtatao nin atension sa propesiya. May pangenot man na kabtang si “Jesu-Cristo,” na manongod sa saiya si Juan nagsurat sa huri: “Sia pano nin dai na kutana maninigong kabootan asin katotoohan.” (Juan 1:14) Sa siring, an pataratara ni Juan may mga elemento na kapareho kan nasambitan ni apostol Pablo sa pagtatapos kan saiyang ikaduwang surat sa kongregasyon sa Corinto: “An dai na kutana maninigong kabootan kan Kagurangnan na Jesu-Cristo asin an pagkamoot nin Dios patin an banal na espiritu na iriba niatong inaako mapasaindo logod gabos.” (2 Corinto 13:14) Umaplikar man logod an mga tataramon na iyan sa lambang saro sa sato na namomoot sa katotoohan ngonyan!—Salmo 119:97.

“An Maimbod na Saksi”

 4. Paano ilinadawan ni Juan si Jesu-Cristo, asin taano ta angay na marhay an mga paglaladawan na ini?

⁴ Ikaduwa ki Jehova, si Jesus an pinakamamuraway na persona sa uniberso, siring sa minimidbid ni Juan, na inaapod siang “‘an Maimbod na Saksi,’ ‘An panganay sa mga gadan,’ asin ‘An Namamahala sa mga hade kan daga.’” (Kapahayagan 1:5b) Kapareho kan bulan sa kalangitan, sia marigon na namumugtak bilang an pinakadakulang Saksi sa pagka-Dios ni Jehova. (Salmo 89:37) Pakatapos na sia magdanay na may integridad sagkod sa kagadanan bilang atang, sia an enot sa mga tawo na ibinangon pasiring sa inmortal, espiritung buhay. (Colosas 1:18) Ngonyan na sia nasa presensia ni Jehova, halangkawon na an kamugtakan nia kisa gabos na daganon na hade, ta tinawan sia kan “gabos na autoridad sa langit asin sa daga.” (Mateo 28:18; Salmo 89:27; 1 Timoteo 6:15) Kan 1914 sia pinatukaw bilang Hade tanganing mamahala sa tahaw kan mga nasyon sa daga.—Salmo 2:6-9.

 5. (a) Paano ipinagpadagos ni Juan an pagpahayag nin pag-apresyar sa Kagurangnan na Jesu-Cristo? (b) Siisay an nakikinabang sa pagregalo ni Jesus kan saiyang sangkap na buhay bilang tawo, asin paano nakikikabtang sa sarong espesyal na bendisyon an linahidan na mga Kristiano?

⁵ Ipinagpadagos ni Juan an pagpahayag nin pag-apresyar sa Kagurangnan na Jesu-Cristo sa pano nin pag-omaw na mga tataramon na ini: “Sa saiya na namomoot sa sato asin nagtao sa sato nin katalingkasan hale sa satong mga kasalan paagi sa saiyang sadiring dugo—asin ginibo nia kitang magin sarong kahadean, mga saserdote para sa saiyang Dios asin Ama—iyo, mapasaiya logod an kamurawayan asin an kakosogan sagkod lamang. Amen.” (Kapahayagan 1:5c, 6) Itinao ni Jesus an saiyang sangkap na buhay bilang tawo tanganing an mga tawo na tumubod sa saiya ikabalik sa sangkap na buhay. Kamo, namomotan ming parabasa, puedeng makaiba digdi! (Juan 3:16) Alagad an kagadanan ni Jesus bilang atang nagbukas kan dalan para sa sarong espesyal na bendisyon sa mga nagigin linahidan na Kristiano kapareho ni Juan. An mga ini ipinahayag na matanos basado sa atang na pantubos ni Jesus. Tinalikdan an gabos na paglaom na mabuhay digdi sa daga, arog kan ginibo ni Jesus, an mga kaiba sa sadangoton na aripompon pinaniaki kan espiritu nin Dios, na may paglaom na buhayon liwat tanganing maglingkod bilang mga hade asin saserdote kaiba ni Jesu-Cristo sa saiyang Kahadean. (Lucas 12:32; Roma 8:18; 1 Pedro 2:5; Kapahayagan 20:6) Kanigoan kadakulang pribilehio! Bakong makangangalas na positibong gayo na ikinagsing ni Juan na ki Jesus an kamurawayan asin kakosogan!

“Madatong Kaiba kan mga Panganoron”

 6. (a) Ano an ipinaisi ni Juan manongod sa pagdatong ni Jesus “kaiba kan mga panganoron,” asin anong propesiya ni Jesus an tibaad nagirumdoman ni Juan? (b) Paano ‘madatong’ si Jesus, asin sairisay an makakamate nin makuring kamondoan sa daga?

⁶ Sunod, ogmahon na ipinaisi ni Juan: “Uya! Sia madatong kaiba kan mga panganoron, asin an gabos na mata makakaheling sa saiya, asin an mga suminaksak sa saiya; asin tutumbokon kan gabos na tribo sa daga an saindang sadiri sa pagmondo huli sa saiya. Iyo, Amen.” (Kapahayagan 1:7) Sierto na nagirumdoman digdi ni Juan an mas naenot na propesiya ni Jesus may labot sa pagtatapos kan sistema nin mga bagay. Dian si Jesus nagsabi: “Dangan an tanda kan Aki nin tawo malataw sa langit, asin dangan tutumbokon kan gabos na tribo kan daga an saindang sadiri sa pananangis, asin maheheling ninda an Aki nin tawo na minadatong sa mga panganoron nin langit na may kapangyarihan asin dakulang kamurawayan.” (Mateo 24:3, 30) Kaya, si Jesus ‘madatong’ paagi sa pagtao kan saiyang atension sa paggibo kan mga paghokom ni Jehova sa mga nasyon. Ini magbubunga nin mahahalagang pagkaliwat sa daga, asin mantang “an gabos na tribo sa daga” dai nagmangno sa pagigin tunay kan pagkahade ni Jesus, mananamitan nanggad ninda an “kabangisan kan kaanggotan nin Dios na Makakamhan sa Gabos.”—Kapahayagan 19:11-21; Salmo 2:2, 3, 8, 9.

 7. Paano an “gabos na mata,” pati an sa mga sumbikalan, “makakaheling” ki Jesus?

⁷ Kaidtong huring banggi ni Jesus kaiba kan saiyang mga disipulo, sinabihan nia sinda: “Kadikit pang panahon asin dai na ako maheheling kan kinaban.” (Juan 14:19) Kun siring, paano na “an gabos na mata makakaheling sa saiya”? Dai niato maninigong laoman na an mga kaiwal ni Jesus makakaheling sa saiya paagi sa pisikal na mga mata, ta sinabi ni apostol Pablo, pagkasakat ni Jesus sa langit, na si Jesus ngonyan “nag-eerok sa dai maranihan na liwanag,” asin “mayo ni saro sa mga tawo an nakaheling o makakaheling” sa saiya. (1 Timoteo 6:16) Malinaw na an boot sabihon ni Juan sa “makakaheling” “makabatid,” kun paanong satuyang naheheling, o nababatid, an dai naheheling na mga kualidad nin Dios paagi sa saiyang mga linalang. (Roma 1:20) Si Jesus “madatong kaiba kan mga panganoron” ta sia dai maheheling kan mga mata arog kan saldang kun iyan nasa likod nin mga panganoron. Dawa kun an saldang nakatago sa mga panganoron kun aldaw, aram niato na iyan yaon huli sa liwanag na nasa palibot niato. Kapareho kaiyan, minsan ngani an Kagurangnan na Jesus dai naheheling, sia mahahayag na siring sa ‘naglalaad na kalayo, kun sia mamalos na sa mga dai nagkukuyog kan maogmang bareta manongod sa saiya.’ An mga ini man mapipiritan na ‘makaheling sa saiya.’—2 Tesalonica 1:6-8; 2:8.

 8. (a) Sairisay an “mga suminaksak sa saiya” kan 33 C.E., asin sairisay sinda ngonyan? (b) Mantang si Jesus mayo na digdi sa daga, paano sia ‘nasasaksak’ nin mga tawo?

⁸ Si Jesus ‘maheheling’ man kan “mga suminaksak sa saiya.” Sairisay daw ini? Kan si Jesus gadanon kan 33 C.E., sia literal na sinaksak kan mga soldados na Romano. An mga Judio kulpable man sa paggadan na idto, ta sinabihan ni Pedro an nagkapira sa sainda kan Pentecostes: “Ginibo sia nin Dios na magin Kagurangnan sagkod Cristo, an Jesus na ini na saindong ipinako.” (Gibo 2:5-11, 36; ikomparar an Zacarias 12:10; Juan 19:37.) An mga Romano asin Judiong idto haros 2,000 na taon nang gadan. Kaya an mga ‘minasaksak sa saiya’ ngonyan seguradong nagrerepresentar sa mga nasyon asin banwaan na nagpapaheling nin maongison na aktitud na arog kan ipinaheling kan ipako si Jesus. Si Jesus mayo na digdi sa daga. Alagad kun an mga nagtutumang magsalang aktibong nagpepersegir sa mga Saksi ni Jehova, na nagpapatotoo ki Jesus, o nagkokonsinte sa siring na tratamiento, garo man sana ‘sinasaksak’ mismo si Jesus kan mga nagtutumang na iyan.—Mateo 25:33, 41-46.

“An Alfa Asin an Omega”

 9. (a) Siisay ngonyan an nagtaram, asin pirang beses nia iyan na ginibo sa Kapahayagan? (b) Sa pag-apod ni Jehova sa saiyang sadiri na “an Alfa asin an Omega” asin “an Makakamhan sa Gabos,” ano an boot sabihon kaini?

⁹ Ngonyan, abaa kamakangangalas! An Soberanong Kagurangnan na Jehova mismo nagtataram. Kanigoan kaangay kaini bilang introduksion sa mga bisyon na madali nang maheling, huli ta sia an satong Kaharohalangkaweng Paratokdo asin an pinaka-Ginigikanan kan Kapahayagan! (Isaias 30:20) An satong Dios nagpapahayag: “Ako an Alfa asin an Omega, . . . an Saro na iyo ngonyan asin iyo kaidto patin iyo an madatong, an Makakamhan sa Gabos.” (Kapahayagan 1:8) Ini an enot sa tolong beses sa Kapahayagan na si Jehova mismo nagtataram hale sa langit. (Helingon man an Kapahayagan 21:5-8; 22:12-15.) An mga Kristiano kan enot na siglo madaling mamimidbid an alfa asin omega bilang an enot asin ultimong letra sa abakadang Griego. An pag-apod ni Jehova sa saiyang sadiri sa duwang letrang iyan nagdodoon na bago sa saiya, mayo nin Dios na makakamhan sa gabos, asin mayo nin masunod sa saiya. Mapanggana niang tataposon, sagkod sa panahon na daing sagkod, an isyu nin pagka-Dios. Sia sagkod lamang na mabibindikar bilang an solamenteng makakamhan sa gabos na Dios, an Supremong Soberano sa gabos niang linalang.—Ikomparar an Isaias 46:10; 55:10, 11.

10. (a) Paano sunod na ilinadawan ni Juan an saiyang sadiri, asin saen sia nabibilanggo? (b) An rolyong isinurat ni Juan seguradong ipinadara sa mga kongregasyon sa kooperasyon niisay? (c) Paano parateng itinatao an espirituwal na kakanon ngonyan?

¹⁰ Kompiado na gigiyahan ni Jehova an magigin resulta nin mga bagay, sinasabihan ni Juan an saiyang mga kapwa oripon: “Ako si Juan, an saindong tugang asin kadamay nindo sa kahorasaan asin kahadean patin pagtagal sa kaibanan ni Jesus, namugtak sa isla na inaapod Patmos huli sa pagtaram manongod sa Dios asin pagpatotoo ki Jesus.” (Kapahayagan 1:9) Sarong bilanggo sa Patmos huli sa maogmang bareta, nagtatagal nin mga kahorasaan kaiba kan saiyang mga tugang, marigon na naglalaom na makikabtang sa nagdadangadang na Kahadean, naheling ngonyan kan gurang nang si Juan an enot sa mga bisyon sa Kapahayagan. Daing duwa-duwa na naparigon na marhay an saiyang boot kan mga bisyon na ini, kun paanong an grupong Juan napapahiro ngonyan sa pakaheling sa mga kaotoban kaiyan. Dai niato aram kun paano ipinadara ni Juan an rolyo kan Kapahayagan sa mga kongregasyon, ta sia nabibilanggo kaidto. (Kapahayagan 1:11; 22:18, 19) An mga anghel ni Jehova seguradong nagkooperar tanganing magibo ini, kun paanong parate nindang pinoprotehiran an maimbod na mga Saksi ni Jehova na naglilingkod ngonyan sa irarom nin mga pagprohibir asin restriksion, kaya nahimo kan mga ini na ikapaabot an napapanahon na espirituwal na kakanon sa saindang mga tugang na nagugutom sa katotoohan.—Salmo 34:6, 7.

11. Anong pribilehio, kapareho kan pinahalagahan ni Juan, an pinapahalagahan na marhay ngonyan kan grupong Juan?

¹¹ Segurado na hararomon an pagpahalaga ni Juan sa pribilehio nia na gamiton ni Jehova bilang Saiyang pinakapaagihan sa pagkomunikar sa mga kongregasyon! Kaagid kaiyan, pinapahalagahan na marhay kan grupong Juan ngonyan an pribilehio kaiyan na magtao sa pamilya nin Dios nin espirituwal na “kakanon sa tamang panahon.” (Mateo 24:45) Magin logod kamo saro sa mga pinapakosog kan espirituwal na probisyon na ini tanganing makaabot sa mamuraway na pasohan na buhay na daing katapusan!—Talinhaga 3:13-18; Juan 17:3.

[Kahon sa pahina 21]

Pagkaigwa nin Espirituwal na Kakanon sa Masakit na mga Panahon

Sa huring mga aldaw na ini, na an mga Saksi ni Jehova nagtitios nin grabeng persekusyon asin kasakitan, nagin mahalagang marhay na sinda mag-ako nin espirituwal na kakanon tanganing magdanay na makosog sa pagtubod. Sa kadaklan na kaso, may ikinakataong bastanteng kakanon, sa parate huli sa pambihirang mga kapahayagan kan kapangyarihan ni Jehova.

Halimbawa, sa Alemania na sakop kaidto ni Hitler, kinokopya sa mimeograpo asin iwinawaras kan mga Saksi an mga kopya kan An Torrengbantayan, na opisyal na prohibido kan maringis na mga autoridad na Nazi. Sa Hamburg linaog kan Gestapo an sarong harong na duman ginigibo an siring na pagkopya sa mimeograpo. Sadit sana an harong, asin mayo talaga nin mapagtatagoan. An makinilya ibinugtak sa sarong estante, asin an dakulaon na mimeograpo sinaray sa sarong sarayan nin patatas sa sirong. Dugang pa, sa likod kan sarayan may sarong maleta na pano nin mga magasin! Garo baga dai malilikayan na iyan madiskobre. Alagad ta ano an nangyari? An pulis na nagbukas kan estante ginibo iyan sa paagi na dai nia naheling an makinilya. Manongod naman sa sirong, an kagharong nagbabareta: “An tolong pulis nagtindog sa tahaw kan kuarto, duman mismo sa namumugtakan kan sarayan na yaon sa likod an maletang pano nin mga Torrengbantayan. Alagad ta garo mayo sa sainda na nakakarisa kaiyan; garo sinda binuta.” Huli sa pambihirang tabang na ini nin Dios, an pamilya nakapagpadagos sa pagtao nin espirituwal na kakanon sa masakit asin peligrosong mga panahon.

Kan dekada 1960, nagkaigwa nin guerra sibil sa pag-oltanan nin Nigeria asin kan suminiblag na probinsia nin Biafra. Mantang an Biafra biyong napapalibotan kan teritoryo nin Nigeria, saro sanang landingan nin eroplano an koneksion kaiyan sa luwas kan nasyon. Ini nangahulogan na an mga Saksi sa Biafra namemeligrong maputolan nin suplay na espirituwal na kakanon. Dangan, sa kapinonan kan 1968, idinestino kan mga autoridad sa Biafra an saro sa saindang mga empleyado sa serbisyo sibil sa sarong mahalagang katongdan sa Europa asin may saro man na idinestino sa landingan sa Biafra. Nanongod na an duwang ini pareho Saksi ni Jehova, asin ngonyan yaon sinda sa man-ibong-ibong na kampi kan solamenteng koneksion kan Biafra sa luwas kan nasyon. Namidbid kan duwa na an areglo seguradong gikan ki Jehova. Huli kaini, sinda nagboluntaryo para sa delikado asin peligrosong trabaho na pagpalaog nin espirituwal na kakanon sa Biafra. Asin ini nagibo ninda sa bilog na panahon kan guerra. An saro sa sainda nagkomento: “An areglong idto labi sa ano man na kayang planohon nin tawo.”

[Tsart sa pahina 19]

Simbolikong mga Numero sa Kapahayagan

Numero Simbolikong Kahulogan

(Kapahayagan 13:18; ikomparar an 2 Samuel 21:20.)

(Kapahayagan 7:5-8; 12:1; 21:12, 16; 22:2)