Marahay na Tindog

BAKONG pambihira na an sarong nagpapahayag nerbioson pagbuhat nia tanganing magpahayag, nangorogna kun dai sia parateng nagpapahayag. An sarong parahayag tibaad medyo ninenerbios sa enot na pirang harong sa ministeryo sa langtad. Kan sugoon na magin propeta, nagsimbag si Jeremias: “Dai talaga ako tataong magtaram, huli ta aki pa ako.” (Jer. 1:5, 6) Si Jeremias tinabangan ni Jehova, asin tatabangan man nia kamo. Pag-abot nin panahon, magkakaigwa kamo nin marahay na tindog.

An nagpapahayag na marahay an tindog saro na kalmado. An pagkakalmadong ini risang-risa sa saiyang pisikal na postura. An postura nia natural asin angay sa okasyon. Makahulogan an hiro kan saiyang mga kamot. An boses nia pano nin ekspresyon asin kontrolado.

Dawa hinohona nindo na bakong tama sa saindo an paglaladawan na ini sa sarong tawong marahay an tindog, puede kamong umoswag. Paano? Estudyaran niato kun taano an nagpapahayag ta ninenerbios asin mayo nin marahay na tindog. Tibaad pisikal an causa.

Kun napapaatubang kamo sa sarong angat asin gusto nindong magibo iyan nin toltol alagad dai nindo segurado kun magigibo nindo iyan, nakakamate kamo nin kahaditan. Bilang resulta, an hawak tinatawan nin senyal kan hotok na magprodusir nin dagdag na adrenalina. An ibinubungang alimbukad puedeng gikanan nin mas marikas na pagpitik kan puso, pagbago kan rikas nin paghangos, orog na pagganot, o pagkubogkubog pa ngani kan mga kamot asin tuhod saka pagkibigkibig kan boses. Hinihingoa kan hawak nindo na tabangan kamong maatubang an saindong situwasyon paagi sa pagdagdag sa saindong enerhiya. An angat nasa paggamit kan alimbukad nin enerhiya sa nakatatabang na pag-isip asin entusiastikong pagpahayag.

Kun Paano Babawasan an Kahaditan. Girumdoma na normal an pakamate nin kahaditan. Minsan siring, tanganing mapagdanay an marahay na tindog, kaipuhan na mabawasan nindo an kahaditan asin maatubang an saindong situwasyon sa kalmado asin may dignidad na paagi. Paano daw nindo magigibo ini?

Mag-andam nin lubos. Tawan nin oras an pag-andam kan saindong pahayag. Seguradohon na malinaw nindong nasasabotan an saindong tema. Kun an pahayag nindo kamo mismo an mapili kan mga puntong ipaliliwanag nindo, konsideraron an dati nang aram kan mga magdadangog sa saindo manongod sa tema asin kun ano an inaasahan nindong magibo. Matabang ini sa saindo na mapili an materyales na pinakakapakipakinabang. Kun sa primero nadedepisilan kamo dian, ipakipag-olay an problema sa sarong eksperyensiadong magpahayag. Matatabangan nia kamo na gumibo nin nakatatabang na pag-analisar sa saindong materyales asin sa mga magdadangog. Kun segurado kamo na may materyales kamo na mapapakinabangan kan mga magdadangog sa saindo asin iyan malinaw sa saindong isip, an kamawotan nindo na ipaabot iyan mapoon na tahoban an kahaditan na tibaad namamatean nindo manongod sa pagpahayag.

Tawan nin espesyal na atension an saindong introduksion. Aramon kun paano kamo mapoon. Oras na nagpapahayag na kamo, posibleng marhay na mawawara an saindong nerbios.

An iyo man sanang pundamental na mga tangga aplikado sa pag-andam para sa ministeryo sa langtad. Konsideraron bako sanang an tema na plano nindong ipakipag-olay kundi siring man an klase nin mga tawo na huhulitan nindo. Maingat na iplano an saindong introduksion. Makinabang sa eksperyensia nin maygurang na mga parahayag.

Tibaad sa paghona nindo mas magigin marahay an tindog nindo kun magamit kamo nin manuskrito sa pagpahayag sa atubangan nin sarong grupo. An totoo, ini tibaad magbunga nin orog na kahaditan kada magpahayag kamo. Totoo na may mga nagpapahayag na naggagamit nin detalyadong mga nota, mantang an iba pira sana an ginagamit. Alagad an makababago sa sentro kan saindong kaisipan asin makababawas sa saindong kahaditan, bakong an mga tataramon na nasa papel, kundi an kombiksion sa saindong puso na talagang kapakipakinabang an inandam nindo para sa mga magdadangog sa saindo.

Ensayohon nin makosog an saindong pagpahayag. An siring na pag-ensayo matao sa saindo nin kompiansa na kaya nindong ipahayag an nasa saindong isip. Mantang kamo nag-eensayo, nagkakaigwa kamo nin mga sistema nin memorya na pasil na maaktibar sa oras na kamo magpahayag. Gibohon na realistiko an saindong pag-ensayo. Imahinaron an mga magdadangog sa saindo. Tumukaw sa may lamesa o tumindog, arog kun nagpapahayag na kamo.

Arangon an tabang ni Jehova. Sisimbagon daw nia an siring na pamibi? “Iyo ini an satong mapananarigan mapadapit sa saiya, na, minsan ano an satong hagadon segun sa saiyang kabotan, dinadangog nia kita.” (1 Juan 5:14) Kun boot nindong tawan nin onra an Dios asin tabangan an mga tawo na makinabang sa saiyang Tataramon, seguradong sisimbagon nia an saindong pamibi. An garantiyang iyan dakula an magigibo na mapakosog kamo na otobon an asignasyon sa saindo. Apuera kaini, mantang kinukultibar nindo an mga bunga kan espiritu​—an pagkamoot, kagayagayahan, katoninongan, kahoyoan, asin pagpopogol sa sadiri​—luway-luway kamong magkakaigwa kan nasa isip na aktitud na kaipuhan tanganing marahay an tindog na maatubang an mga situwasyon.​—Gal. 5:22, 23.

Magkaigwa nin eksperyensia. Mientras na orog kamong nakikakabtang sa paglilingkod sa langtad, mas mababawasan man an nerbios nindo. Mientras na orog kamong nagkokomento sa mga pagtiripon kan kongregasyon, mas magigin pasil man na magtaram sa atubangan nin iba. Mantang nagdadakol an pahayag na itinatao nindo sa kongregasyon, maiinaan gayod an kahaditan na namamatean nindo bago an kada pahayag. Gusto daw nindo na magkaigwa nin mas dakol na oportunidad na magpahayag? Kun siring, magboluntaryo na magin kasangli sa paadalan kun dai naootob nin iba an asignasyon sa sainda.

Pakagiboha nindo kan mga tangga na sinasabi sa enotan, maheheling nindo na kapakipakinabang na siyasaton an mga sintomas na dai mamamaluan na tanda nin kadaihan nin pagkakalmado. An pakaaram kun ano an mga sintomas asin pakanood kun paano maaatubang an mga ini makatatabang sa saindo na makapagpahayag na marahay an tindog. An mga sintomas puedeng pisikal o nasa boses.

Pisikal na mga Sintomas. An marahay na tindog nindo, o kadaihan kaiyan, ipinaheheling kan pisikal na postura nindo asin kan paggamit nindo kan saindong mga kamot. Enot na estudyare an mga kamot. Mga kamot na pinipigrit sa likod, tuog sa may iris, o higot an pagkakapot sa podyum; mga kamot na laog-luwas sa mga bulsa, daing ontok na ibinubutones asin tinatangkas an butones kan gubing na pan-itaas, mayo sa boot na pagkapot sa pisngi, dongo, salming sa mata; mga kamot na kinakapotkapotan an relo, lapis, singsing, o nota; mga mustra kan kamot na paulnok-ulnok o dai tinatapos​—ini gabos nagpapaheling nin kadaihan nin marahay na tindog.

An kadaihan nin kompiansa puede man na iparisa kan daing ontok na pagsidsid kan mga bitis, pagkipadkipad, pagtindog na sobra katuog, paghukro, parateng pagbasa kan mga ngabil, paorootrong paghalon, asin paghangos nin marikas saka hababaw.

Paagi sa tuyong paghihingoa puedeng makontrol an mga kapahayagan na ini nin nerbios. Sarosaroon sana iyan. Aramon kun ano an problema, asin isipon antes pa kun ano an kaipuhan nindong gibohon tanganing maolang iyan. Kun ginigibo nindo an paghihingoang iyan, ikaparirisa nindo an marahay na tindog sa saindong pisikal na postura.

Mga Sintomas na Nasa Boses. Puedeng kaiba sa nasa boses na mga tanda nin nerbios an abnormal an lagting o nagkikibigkibig na boses. Tibaad paorootro kamong nag-iighim o marikason an saindong pagtaram. An mga problemang ini asin pinagkakatodan na hiro puedeng mahale nin maigot na paghihingoa na makontrol an boses.

Kun kamo ninenerbios, umontok tanganing pirang beses na humangos nin hararom bago kamo sumakat sa plataporma. Hingoahon na irelaks an bilog nindong hawak. Imbes na isipon an nerbios nindo, magkonsentrar sa kun taano ta gusto nindong ipaabot sa mga magdadangog sa saindo an mga bagay na inandam nindo. Bago pumoon na magtaram, helingon sa madali an mga magdadangog sa saindo, pumili nin makikatood na panlauog, asin maghuyom. Magtaram nin luway-luway sa introduksion, dangan iubos an atension sa saindong pahayag.

Kun Ano an Dapat na Asahan. Dai asahan na mawara an gabos na nerbios. An dakol na nagpapahayag na dakol nang taon an eksperyensia sa plataporma ninenerbios bago sinda tumindog sa atubangan nin mga magdadangog. Minsan siring, nakanood sindang kontrolon an saindang nerbios. An sabi kan saro sa siring na mga nagpapahayag: “Garo nagkakarambola pa man giraray an sakong tulak, alagad ngonyan iyan medyo dikit na sana.”

Kun odok nindong hihingoahon na haleon an panluwas na mga kapahayagan nin nerbios, an magigin pagheling sa saindo kan mga nagdadangog sa saindo sarong nagpapahayag na marahay an tindog. Tibaad ninenerbios pa man giraray kamo, alagad tibaad dai man lamang ninda iyan naririsa.

Girumdoma, an alimbukad nin adrenalina na causa nin mga sintomas nin nerbios nagtatao man nin dagdag na enerhiya. Gamiton iyan tanganing makataram na may pagsaboot.

Dai kaipuhan na halaton na kamo makasakat sa plataporma bago gibohon an gabos na ini. Adalan na magin marahay an tindog asin kontrolado patin magtaram na may angay na pagsaboot sa saindong pan-aroaldaw na buhay. An paggibo nindo kaiyan dakula an ikakokontribwir sa pagtao sa saindo nin kompiansa sa plataporma asin sa ministeryo sa langtad, na dian iyan pinakaimportante.