Namundag daw si Jesus sa Bulan nin Disyembre?

DAI sinasabi sato kan Biblia kun kasuarin namundag si Jesus. Minsan siring, nagtatao iyan sa sato nin marigon na dahelan na magkonklusyon na an saiyang pagkamundag dai nangyari sa bulan nin Disyembre.

Konsideraron an kamugtakan nin panahon sa bulan na iyan sa Betlehem, na duman namundag si Jesus. An Judiong bulan nin Kislev (katimbang kan Nobyembre/Disyembre) malipot asin maoran na bulan. An bulan na kasunod kaiyan iyo an Tebet (Disyembre/Enero). Iyan an pinakamalipot na panahon kan taon, na paminsanminsan may niebe sa kabukidan. Helingon niato kun ano an sinasabi sa sato kan Biblia manongod sa klima kan rehion na iyan.

Ipinapaheling kan kagsurat sa Biblia na si Esdras na an Kislev talagang bulan na midbid sa malipot asin maoran na panahon. Pakatapos sabihon na an sarong kadaklan nagtiripon sa Jerusalem “kan ikasiyam na bulan [Kislev] sa ikaduwang polong aldaw kan bulan,” sinabi ni Esdras na an mga tawo “nagkikiribigkibig huli sa . . . mga pag-oran.” Mapadapit sa kamugtakan nin panahon sa bulan na iyan, an tiripon na banwaan mismo nagsabi: “Panahon ini nin mga pag-oran, asin dai puedeng magtindog sa luwas.” (Esdras 10:9, 13; Jeremias 36:22) Bakong makangangalas na sinisierto kan mga pastor na nag-eerok sa parteng iyan kan kinaban na sinda asin an saindang mga aripompon mayo na sa luwas kun banggi pag-abot nin Disyembre!

Minsan siring, sinasabi kan Biblia na an mga pastor nasa kalangtadan na nagbabantay sa saindang mga aripompon kan bangging mamundag si Jesus. Sa katunayan, ipinapaheling kan kagsurat sa Biblia na si Lucas na kan panahon na idto, an mga pastor “nag-iistar sa luwas asin nagbabantay sa banggi kan saindang mga aripompon” harani sa Betlehem. (Lucas 2:8-12) Mangnohon na an mga pastor aktuwal na nag-iistar sa luwas, bako sanang naglalakawlakaw sa luwas kun aldaw. An saindang mga aripompon nasa kalangtadan sa banggi. An deskripsion daw na iyan manongod sa pag-istar sa luwas kabagay kan malipot asin maoran na kamugtakan nin panahon sa Betlehem kun Disyembre? Dai iyan kabagay. Kaya an mga kamugtakan kan mamundag si Jesus nagpaparisa na dai sia namundag sa bulan nin Disyembre.a

Sinasabi sa sato kan Tataramon nin Dios kun kasuarin eksaktong nagadan si Jesus, alagad kadikit sana an detalyeng itinatao kaiyan na nagpaparisa kun kasuarin sia namundag. Ipinapagirumdom kaini sa sato an mga tataramon ni Hadeng Salomon: “An ngaran mas marahay kisa marahay na lana, asin an aldaw nin pagkagadan kisa aldaw nin pagkamundag.” (Eclesiastes 7:1) Kun siring, bakong makangangalas na an Biblia nagtatao nin dakol na detalye manongod sa ministeryo asin kagadanan ni Jesus alagad pira sanang detalye manongod sa panahon kan saiyang pagkamundag.