“An Tataramon ni Jehova Padagos na Naglalakop”

1-4. Napaatubang si Pedro sa anong dipisil na sitwasyon, asin ano an mamamatian mo kun ika an nasa sitwasyon niya?

MAKUSUGON na tuminagangtang an isinarang dakulaon na lansang na trangkahan sa likudan ni Pedro. Nakakadena siya sa duwang Romanong guwardiya na nasa mag-ibong niya na madara sa saiya pasiring sa selda niya. Dangan naghalat siya nin dakul na oras, tibaad mga aldaw pa ngani, para maaraman kun ano an gigibuhon sa saiya. Mayo siya nin ibang nahihiling kundi an mga lanob saka rehas kan presuhan, an mga kadena niya, saka an mga bantay niya.

² Dangan, may nag-abot sa saiya na sarong marauton na bareta. Determinado si Hading Herodes Agripa I na ipagadan siya.a Sa katunayan, plano niyang iatubang si Pedro sa mga Judio pagkatapos kan Paskuwa, asin an isesentensiya niyang kagadanan ki Pedro an magigin regalo niya tanganing mapaugma an mga tawo. Bako ining patakot sana. Dai pa sana nahahaloy, an saro sa mga kapwa apostol ni Pedro, na si Santiago, ipinagadan man kan iyo man sanang tagapamahala.

³ Kan banggi bago an nakaiskedyul na paggadan ki Pedro, ano daw an iniisip niya mantang yaon siya sa saiyang madiklom na selda? Nagigirumduman daw niya na mga taon bago kaini, ihinayag ni Jesus na maabot an aldaw na igagapos si Pedro asin puwersahan na dadarahon—pasiring sa saiyang kagadanan? (Juan 21:18, 19) Tibaad iniisip ni Pedro na iyo na ini an aldaw na idto.

⁴ Kun ika an nasa sitwasyon ni Pedro, ano an mamamatian mo? Sa arog kaining sitwasyon, dakul an mawawaran na nin paglaom. Alagad, para sa sarong tunay na parasunod ni Jesu-Cristo, igwa daw nin ano man na sitwasyon na talagang wara nang paglaom? Ano an manunudan ta sa nagin reaksiyon ni Pedro asin kan mga kapwa niya Kristiyano sa naeksperyensiyahan nindang persekusyon? Aramon ta.

5, 6. (a) Taano asin paano pinersegir ni Hading Herodes Agripa I an Kristiyanong kongregasyon? (b) Taano ta sarong pagbalo sa kongregasyon an pagkagadan ni Santiago?

⁵ Arog kan naaraman ta sa sinundan na kapitulo kan publikasyon na ini, an pagkakumbertir kan Hentil na si Cornelio asin kan saiyang pamilya sarong nakakaugmang pangyayari para sa Kristiyanong kongregasyon. Alagad siguradong nabigla an mga bakong Kristiyanong Judio kan maaraman nindang pigtutugutan na kan dakul na Kristiyanong Judio na mag-iba sa sainda na magsamba an bakong mga Judio.

⁶ Si Herodes, na sarong tusong pulitiko, nakahiling nin oportunidad digdi tanganing makua an pabor kan mga Judio, kaya pinunan niyang persegiron an mga Kristiyano. Siguradong nabaretaan niyang dayupot na marhay si apostol Santiago ki Jesu-Cristo. Kaya “ipinagadan [ni Herodes] paagi sa espada si Santiago na tugang ni Juan.” (Gibo 12:2) Dakulang pagbalo nanggad iyan sa kongregasyon! Saro si Santiago sa tulong nakahiling mismo kan transpigurasyon ni Jesus asin kan iba pang mga milagrong dai nahiling kan ibang mga apostol. (Mat. 17:1, 2; Mar. 5:37-42) Inapod ni Jesus si Santiago asin an tugang kaining si Juan na “Mga Aki nin Daguldol” huli sa pagigin nindang entusiyastikong marhay. (Mar. 3:17) Kaya nawaran an kongregasyon nin sarong pusuan, maimbod na saksi, asin namumutan na apostol.

7, 8. Ano an nagin reaksiyon kan kongregasyon sa pagkapreso ni Pedro?

⁷ Ikinaugma kan mga Judio an paggadan ki Santiago, arog mismo kan inaasahan ni Agripa. Mas nakaengganyar iyan sa saiya na isunod si Pedro. Arog kan sinambit sa kapinunan, ipinaarestar niya si Pedro. Pero posibleng marhay na nagirumduman ni Agripa na milagroso kaidtong nakaluwas sa presuhan an mga apostol, arog kan ipinahiling sa Kapitulo 5 kan librong ini. Tanganing makasigurado, ipinagbuot ni Herodes na ikadena an mga kamot ni Pedro sa duwang guwardiya na nasa mag-ibong niya, asin 16 na guwardiya an maturnuhan sa pagbantay aldaw-banggi tanganing masigurado na dai makakadulag an apostol. Kun makadulag siya, sa mga guwardiyang idto mismo ipapataw an sentensiya ki Pedro. Sa irarom kan marauton na kamugtakan na iyan, ano daw an magigibo kan mga kapwa Kristiyano ni Pedro?

⁸ Aram na marhay kan kongregasyon kun ano an saindang gigibuhon. Ini an sabi sa Gibo 12:5: “Kaya dai si Pedro pinaluwas sa presuhan, pero an kongregasyon maigot na namimibi sa Diyos para sa saiya.” Iyo, udok sa pusong mga pakiulay an mga pamibi ninda para sa saindang namumutan na tugang. Dai sinda nawaran nin paglaom huli kan pagkagadan ni Santiago ni nagluya man an pagtitiwala ninda sa pagpamibi. Mahalagang marhay para ki Jehova an mga pamibi. Kun kauyon iyan kan saiyang kabutan, sisimbagon niya iyan. (Heb. 13:18, 19; Sant. 5:16) Saro ining importanteng leksiyon na marahay na isapuso kan mga Kristiyano ngunyan.

9. Ano an manunudan ta sa itinaong halimbawa kan mga kapwa Kristiyano ni Pedro kun manungod sa pamibi?

⁹ May midbid ka daw na mga kapagtubod na napapaatubang sa mga pagbalo? Tibaad nagtatagal sinda nin persekusyon, mga pagbabawal nin gobyerno, o natural na mga kalamidad. Puwede mo sindang iiba sa saimong udok sa pusong mga pamibi. Tibaad may mga bisto ka man na napapaatubang sa dai gayo risang klase nin mga pagsakit, arog nin mga problema sa pamilya, pagkadisganar, o mga pagbalo sa saindang pagtubod. Kun mahurop-hurop ka bago mamibi, tibaad makaisip ka nin nagkapirang indibidwal na masasambit mo an pangaran sa pakikipag-ulay mo ki Jehova, an “Paradangog nin pamibi.” (Sal. 65:2) Tutal, kakaipuhanon mo man an mga pamibi kan saimong mga tugang pag mapaatubang ka sa masakit na mga kamugtakan.

10, 11. Iistorya kun paano ilinigtas kan anghel ni Jehova si Pedro sa presuhan.

¹⁰ Natakot daw si Pedro sa inaatubang niyang peligro? Dai ta sigurado, pero kan huring bangging iyan sa presuhan, nanok siyang nagtuturog sa pag-ultanan kan duwa niyang alerto asin pukang bantay. Siguradong aram kan may makusog na pagtubod na lalaking ini na ano man an mangyari pagkaaga, ligtas siya sa kamot ni Jehova. (Roma 14:7, 8) Alagad, posibleng dai man lamang inasahan ni Pedro an madali nang mangyaring makangangalas na mga bagay. Bigla na sanang nagliwanag sa saiyang selda. Nagtunga an sarong anghel, na minalataw na dai nahihiling kan mga guwardiya, asin tulos-tulos kaining pinukaw si Pedro. Asin an mga kadena sa kamot niya—mga kadena na garo dai kayang putulon—basta na lang natangkas!

¹¹ Nagtao an anghel ki Pedro nin sunod-sunod na haralipot na instruksiyon: “Dali, tindog na! . . . Pakarhaya an bado mo asin magsandalyas ka. . . . Suluta an pang-ibabaw mong bado.” Nagkuyog tulos si Pedro. Panghuri, sinabi kan anghel: “Magsunod ka sa sako,” asin iyan an ginibo ni Pedro. Nagluwas sinda sa selda, linampasan an mga grupo nin mga guwardiya sa luwas, asin silensiyong naglakaw pasiring sa may dakulaon na lansang na trangkahan. Paano sinda makakaagi diyan? Kun naisip man iyan ni Pedro, nasimbag tulos iyan. Kan paparani na sinda sa trangkahan, “basta na lang ini buminukas.” Dai nariparo ni Pedro na nag-agi na palan sinda sa trangkahan asin pasiring na sa sarong kalye, asin biglang nawara an anghel. Nawalat duman si Pedro, asin kaidto niya narealisar na totoo an gabos na nangyari. Bako ining sarong bisyon. Talagang talingkas na siya!—Gibo 12:7-11.

12. Taano ta nakakarangang isip-isipon an pagligtas ni Jehova ki Pedro?

¹² Bako daw na nakakarangang isip-isipon an daing limiteng kapangyarihan ni Jehova na iligtas an mga lingkod niya? Ipinapreso si Pedro nin sarong hadi na suportado kan pinakamakapangyarihan na gobyerno sa kinaban kan panahon na idto. Alagad, madalion lang nakaluwas sa presuhan si Pedro! Totoo, dai ginigibo ni Jehova para sa gabos na lingkod niya an siring kaiyan na mga milagro. Dai niya iyan ginibo ki Santiago, asin dai Niya iyan ginibo ki Pedro sa bandang huri kan mautob an sinabi ni Jesus manungod sa mangyayari sa apostol na ini. An mga Kristiyano ngunyan dai naglalaom nin milagrosong mga pagliligtas. Pero pirmi tang isinasaisip na dai nagbabago si Jehova. (Mal. 3:6) Asin madali na niyang gamiton an saiyang Aki tanganing patalingkason an milyon-milyon hali sa garo imposibleng madulagan na presuhan—an kagadanan. (Juan 5:28, 29) Makakakua kita nin pambihirang kusog nin buot hali sa siring na mga panuga pag napapaatubang kita sa mga pagbalo sa ngunyan.

13-15. (a) Ano an nagin reaksiyon kan mga miyembro kan kongregasyon na yaon sa harong ni Maria kan mag-abot si Pedro? (b) Sain na nagpokus an libro nin Mga Gibo, pero ano an padagos na ginibo ni Pedro para sa mga tugang niya sa espirituwal?

¹³ Nakatindog si Pedro sa madiklom na kalye asin iniisip kun sain na siya maduman. Dangan may naisip na siya. Yaon lang sa harani an harong nin sarong Kristiyana na an pangaran Maria. Minalataw na saro siyang balo na medyo may kaya, asin may harong siya na kayang magkaigo an sarong kongregasyon para sa pagtiripon. Siya an ina ni Juan Marcos, asin ini an inot na pagkakataon na nasambit si Marcos sa salaysay kan Mga Gibo, asin ibinilang siya ni Pedro na saiyang aki kan huri. (1 Ped. 5:13) Kan bangging ini, dakul sa kongregasyon an yaon sa harong ni Maria, asin udok sindang namimibi dawa matanga na. Daing duda na ipinapamibi ninda na paluwason na si Pedro sa presuhan—pero dai sinda andam sa magigin simbag sa sainda ni Jehova!

¹⁴ Nagtuktok si Pedro sa pinto kan trangkahan sa may patyo sa atubangan kan harong. Sarong suruguon na daragita na an pangaran Roda—sarong komun na Griegong pangaran na nangangahulugan na “Rosas”—an nagduman sa trangkahan. Dai siya makapaniwala sa nadangog niya. Boses ni Pedro! Sa sobrang kaugmahan, imbes na buksan an trangkahan, binayaan kan daragita si Pedro na nakatindog sa kalye, nagdalagan pabalik sa laog kan harong, asin kinumbinsir an kongregasyon na yaon si Pedro sa may trangkahan. Sinabihan ninda an daragita na nabubua na ini, pero dai siya nagsuko. Pig-insistir niya na si Pedro talaga idto. Nakumbinsir man an iba na tibaad may nadangog man talaga siya pero sinabi ninda na posibleng anghel idto na nagrerepresentar ki Pedro. (Gibo 12:12-15) Sa bilog na panahon na iyan, sige lang tuktok ni Pedro sagkod na sa kahuri-hurihi, nagduman sinda sa trangkahan asin binuksan iyan.

¹⁵ Sa may trangkahan, “nahiling ninda siya asin nagngaralas sinda”! (Gibo 12:16) Huli sa grabeng kaugmahan ninda, kinaipuhan pa sindang senyasan ni Pedro na magsilensiyo tanganing maiistorya niya an nangyari saiya, masabi niya sainda na ibareta ini sa disipulong si Santiago saka sa mga tugang, asin para makahali tulos siya bago pa siya maabutan kan mga suldados ni Herodes. Naghali si Pedro tanganing ipagpadagos sa mas ligtas na lugar an saiyang maimbod na paglilingkod. Apuwera sa pagkasambit saiya sa kapitulo 15, na diyan sinabing nagtabang siya sa pagresolber sa isyu manungod sa pagturi, dai na siya nasambitan pa sa libro nin Mga Gibo. Nagpokus na an libro nin Mga Gibo sa mga ginibo asin mga pagbiyahe ni apostol Pablo. Minsan siring, makakasigurado kita na pinakusog ni Pedro an pagtubod kan saiyang mga tugang sain man siya nagduman. Siguradong binayaan niyang maugmahon an mga tugang sa harong ni Maria.

16. Taano ta siguradong magkakaigwa kita nin dakul na maugmang mga pagkakataon sa maabot na panahon?

¹⁶ Kun minsan, an itinatao ni Jehova sa mga lingkod niya urog pa sa inaasahan ninda, na nagreresulta sa labi-labi nindang kaugmahan. Arog kaiyan an namatian kan mga tugang ni Pedro sa espirituwal kan bangging idto. Arog man kaiyan an tibaad namamatian ta kun minsan pag nag-aako kita ngunyan nin abundang bendisyon hali ki Jehova. (Tal. 10:22) Sa maabot na panahon, mahihiling niyato na nauutob sa bilog na daga an gabos na panuga ni Jehova. An makangangalas na kautuban kan mga iyan magigin labi pa nanggad sa maiimahinar ta ngunyan. Kaya, sagkod na nagdadanay kitang maimbod, makakasigurado kita na magkakaigwa kita nin dakul na maugmang mga pagkakataon sa maabot na panahon.

17, 18. Anong mga pangyayari an suminagkod sa sobrang pag-umaw kan mga tawo ki Herodes?

¹⁷ Ikinangalas man na marhay ni Herodes an pagkadulag ni Pedro sa presuhan—pero bako iyan marahay na bareta para sa saiya. Ipinagbuot tulos ni Herodes na sigidong hanapon si Pedro, asin pig-usisa niya an mga guwardiya. Dangan ipinagbuot niyang “padusahan sinda,” posibleng marhay na padusang kagadanan. (Gibo 12:19) Sarong tawong daing hirak si Herodes Agripa. Mapapadusahan daw an maringis na tawong ini?

¹⁸ Posibleng napasupog si Agripa dahil dai niya naipagadan si Pedro, pero dai nahaloy, nagkaoportunidad siya na makabawi sa nagin kasusupgan niya. Sa sarong pagkakataon, may mga kalaban siya na nagduruman sa saiya tanganing makipagkatuninungan, asin siguradong gustong-gusto niyang kuanon an oportunidad na iyan para makapagdiskurso sa dakulon na tawo. Isinurat ni Lucas na bilang preparasyon, “nagsulot si Herodes nin badong panghadi.” An Judiong historyador na si Josephus nagsurat na an bado ni Herodes gibo sa plata, tanganing pag matamaan kan liwanag an hadi, magin garo ini nagliliwanag sa kamurawayan. Dangan nagdiskurso an maduros na pulitiko. Nagkurahaw an mga tawo para umawon siya: “Boses nin diyos, bako nin tawo!”—Gibo 12:20-22.

19, 20. (a) Taano ta pinadusahan ni Jehova si Herodes? (b) Taano ta nakakaranga sa sato an salaysay manungod sa biglaan na pagkagadan ni Herodes Agripa?

¹⁹ Para sa Diyos sana an arog kaiyan na kamurawayan, asin nagmamasid an Diyos! May pagkakataon kuta si Herodes na makalikay sa kapahamakan. Puwede niya kutanang sinaway an mga tawo o puwede kutanang, maski paano, dai siya uminuyon sa sinabi ninda. Imbes, nagin siyang mapuwersang halimbawa kan pagigin totoo kan talinhagang ini: “Pagigin orgulyoso nguna bago an pagbagsak.” (Tal. 16:18) “Tulos-tulos, pinadusahan siya kan anghel ni Jehova,” na huli kaiyan sinapar kan makasadiri asin orgulyosong tawong iyan an sarong nakakapanggirabong kagadanan. “Kinakan siya nin mga ulod tapos nagadan.” (Gibo 12:23) Isinurat man ni Josephus na bigla na sanang nagkahilang nin grabe si Agripa asin na inadmitir mismo kan hadi na magagadan siya huling inako niya an pag-umaw kan mga tawo. Sinabi ni Josephus na limang aldaw pa an naglihis bago nagadan si Agripa.b

²⁰ Kun minsan, garo baga dai napapadusahan an bakong diyosnon na mga tawo sa gabos nindang ginigibong karatan. Dai niyato iyan dapat na ipagngalas, huling “an bilog na kinaban nasa kapangyarihan kan saro na maraot.” (1 Juan 5:19) Pero kun minsan, ikinakapurisaw kan maimbod na mga lingkod nin Diyos pag garo baga nalulusutan nin maraot na mga tawo an hustisya. Iyan an sarong dahilan kun taano ta nakakaranga an arog kaining mga salaysay sa Bibliya. Nahihiling ta sa mga iyan na talagang nag-iinterbenir si Jehova, asin nagpapagirumdom an mga iyan sa gabos niyang lingkod na siya mamumuton sa hustisya. (Sal. 33:5) Maabot an panahon na mangingibabaw an hustisya niya.

21. Anong panginot na leksiyon an makukua ta sa Gibo kapitulo 12, asin taano ta nakakaranga iyan sa sato ngunyan?

²¹ Nagtapos an salaysay na ini paagi sa sarong mas lalo pang nakakapakusog na leksiyon: “An tataramon ni Jehova padagos na naglalakop, asin nagdadakul an mga nagtutubod.” (Gibo 12:24) An report na ini nin pag-uswag sa gibuhon na paghuhulit nagpapagirumdom sa sato kun paano binebendisyunan ni Jehova an iyo man sanang gibuhon sa presenteng panahon. Malinaw na an rekord sa Gibo kapitulo 12 bako lang manungod sa sarong apostol na ginadan asin sa saro pang apostol na nakadulag sa presuhan. Kundi panginot nang manungod iyan ki Jehova asin sa pag-ulang niya sa mga pagpurbar ni Satanas na puhuon an Kristiyanong kongregasyon asin papunduhon an maigot na paghuhulit kaiyan. Dai nagin mapanggana an mga pag-atakeng iyan, asin dai man magigin mapanggana an gabos na iba pang arog kaiyan na pakana. (Isa. 54:17) Sa ibong na lado, an mga kuminampi ki Jehova asin ki Jesu-Cristo nakikikabtang sa sarong gibuhon na siyertong magigin mapanggana. Bako daw na nakakapakusog na isip-isipon iyan? Dakulang pribilehiyo nanggad niyato na tumabang na maipalakop sa ngunyan “an tataramon ni Jehova”!