Dai ‘Magparahanap nin Darakulang Bagay Para sa Saimong Sadiri’

1, 2. (a) Kan ikaapat na taon ni Joaquim, sa anong problema napaatubang si Baruc? (b) Paano tinabangan ni Jehova si Baruc?

PAGAL na si Baruc, an maimbod na sekretaryo ni Jeremias. Ikaapat na taon kaidto kan pamamahala kan maraot na si Hadeng Joaquim, o mga 625 B.C.E. Sinabihan ni Jeremias an sekretaryo na isurat sa sarong rolyo nin libro an gabos na sinabi ni Jehova paagi sa propeta manongod sa Jerusalem asin Juda sa laog kan nakaaging 23 na taon kan pagigin propeta ni Jeremias sagkod kan panahon na idto. (Jer. 25:1-3; 36:1, 2) Dai pa kaidto binasa ni Baruc sa mga Judio an laog kan rolyo. Babasahon nia iyan sa sunod na taon pa. (Jer. 36:9, 10) Alagad may ikinakapurisaw daw si Baruc?

² “Herak man sa sakuya,” an agrangay ni Baruc, “ta dinugangan ni Jehova nin kamondoan an sakuyang kakologan! Napagal ako huli sa sakuyang pag-agagha.” Posibleng marhay na kamo nakapagsabi na man na kamo pagal na, baga man iyan itinaram nindo o sa boot sana nindo. Arin man dian an ginibo ni Baruc, si Jehova naghihinanyog. Aram kan Parasiyasat kan puso an dahelan kan kapurisawan ni Baruc, asin paagi ki Jeremias, si Baruc maboot na itinanos nin Dios. (Basahon an Jeremias 45:1-5.) Pero, tibaad iniisip nindo kun taano ta pagal-pagal na si Baruc. Huli daw sa asignasyon sa saiya o tibaad huli sa mga kamugtakan kaidto? An totoo, an nasa puso nia an nakakapagal sa saiya. Si Baruc kaya ‘nagpaparahanap nin darakulang bagay.’ Ano iyan? Ano an inasegurar sa saiya ni Jehova kun aakoon nia an Saiyang hatol asin paggiya? Asin ano an manonodan niato sa naeksperyensiahan ni Baruc?

 3. Ano an dahelan kan problema ni Baruc sa espirituwal?

³ Siertong aram ni Baruc kun ano an “darakulang bagay” na idto. Aram kan sekretaryo na ‘an mga mata nin Dios yaon sa mga dalan nin tawo, asin naheheling Nia an gabos na lakad kaini.’ (Job 34:21) Bako man an asignasyon mismo an dahelan kun taano ta an pagmate ni Baruc ‘dai sia nin pahingaloan’ kan isinusurat nia an mga ihinuhula ni Jeremias. Imbes, an dahelan iyo an sadiri niang pagmansay sa kun ano an garo baga dakula—an nasa puso nia. Huling an pigpaparaisip ni Baruc iyo an paghanap nin “darakulang bagay” para sa saiyang sadiri, nawara sa isip nia an orog na mahalagang mga bagay, mga bagay na may koneksion sa paggibo kan kabotan nin Dios. (Fil. 1:10) Napalataw kan New World Translation an kahulogan kan berbong ginamit asin trinadusir iyan na “nagpaparahanap.” Kaya bako iyan madali sanang pagsabong sa isip. Si Baruc dati nang naghahanap nin “darakulang bagay” kan sia patanidan ni Jehova na pumondo. Minsan ngani an maimbod na sekretaryo ni Jeremias naggigibo man kan kabotan nin Dios, pero kadungan kaiyan, sia nagmamawot nin “darakulang bagay” para sa saiyang sadiri.

4, 5. Taano ta tibaad kalabot sa “darakulang bagay” na iniisip ni Baruc an pagigin bantog asin prestihioso, asin taano ta angay an patanid ni Jehova?

⁴ Kun dapit sa pigpaparaisip ni Baruc, iyan posibleng may koneksion sa pagigin bantog asin prestihioso. Minsan ngani si Baruc nagserbing parasurat ni Jeremias, sia tibaad bakong basta personal na sekretaryo ni Jeremias. Sa Jeremias 36:32, si Baruc inapod na “an sekretaryo.” Isinusuherir nin arkeolohikong ebidensia na halangkaw an posisyon nia bilang opisyal kan hade. Sa katunayan, an titulong iyan ginamit man ki “Elisama na sekretaryo,” na nginaranan na kabilang sa mga prinsipe nin Juda. Isinusuherir kaini na si Baruc nakakaduman man sa “kuartong kakanan kan sekretaryo” sa “harong kan hade” bilang saro sa mga kapwa opisyal ni Elisama. (Jer. 36:11, 12, 14) Kun siring, si Baruc siertong edukadong opisyal sa palasyo kan hade. Si Seraias, na saiyang tugang, iyo an namamahala sa kuartel ni Hadeng Zedequias asin nag-iba sa hade sa importanteng misyon sa Babilonya. (Basahon an Jeremias 51:59.) Bilang namamahala sa kuartel, si Seraias posibleng marhay na iyo an nag-aasikaso sa mga kaipuhan asin dagosan kan hade kun nagbibiahe—halangkaw nanggad na posisyon.

⁵ Masasabotan nindo na an saro na tuod na sa halangkaw na puesto tibaad mapagal sa pagsurat nin sunod-sunod na mga mensahe nin pagdenunsiar sa Juda. Sa katunayan, huli sa pagsuportar ni Baruc sa propeta nin Dios, puedeng nameligro an saiyang posisyon asin propesyon. Asin isip-isipa an magigin epekto kun gabaon na ni Jehova an itinogdok nia, na mababasa niato sa Jeremias 45:4. An “darakulang bagay” na nasa isip ni Baruc—baga man pagkamit nin dagdag na onra sa palasyo o materyal na prosperidad—puedeng sayang sana. Kun si Baruc naghahanap nin may kasegurohan na posisyon sa seguradong malalaglag na sistema nin mga Judio kan panahon na idto, may dahelan an Dios na pugolan sia sa tendensiang iyan.

6, 7. Kun an “darakulang bagay” na iniisip ni Baruc iyo an materyal na mga rogaring, sairisay kaidto an kapareho nia an kaisipan?

⁶ Sa ibong na lado, tibaad kaiba sa “darakulang bagay” na iniisip ni Baruc an materyal na prosperidad. An mga nasyon sa palibot nin Juda nagsarig na gayo sa mga rogaring asin kayamanan. An Moab nagtiwala sa ‘mga gibo asin kayamanan’ kaiyan. Iyo man an Amon. Asin sinabihan ni Jehova si Jeremias na iladawan an Babilonya na “abunda sa mga kayamanan.” (Jer. 48:1, 7; 49:1, 4; 51:1, 13) Alagad an totoo, kinondenar nin Dios an mga nasyon na iyan.

⁷ Huli kaiyan, kun si Baruc naghahanap nin rogaring asin kayamanan, masasabotan nindo kun taano ta pinatanidan sia ni Jehova. Kun ‘unaton na nin Dios an saiyang kamot tumang’ sa mga Judio, an saindang mga harong asin oma magigin sadiri kan saindang mga kaiwal. (Jer. 6:12; 20:5) Ipamugtak ta baga na kamo nakaistar sa Jerusalem kan panahon ni Baruc. An kadaklan sa saindong mga kahimanwa—kaiba an mga prinsipe, saserdote, asin an hade mismo—nag-iisip na maninigo sindang makipaglaban sa nagsasakyadang mga Babilonyo. Pero, naaraman nindo an mensahe ni Jeremias: “Maglingkod kamo sa hade nin Babilonya asin magdanay kamong buhay.” (Jer. 27:12, 17) Kun dakolon an rogaring nindo sa siudad na iyan, magigin mas madali daw sa saindo na kuyogon an instruksion nin Dios? An pagmansay daw nindo sa mga rogaring na iyan makakapahiro sa saindo na himateon an patanid ni Jeremias o na sunodon an kadaklan? An totoo, an gabos na mahalagang bagay sa Juda asin Jerusalem, pati an nasa templo, sinamsam asin dinara sa Babilonya. Kaya dai nin pakinabang an pagmamaigot na magkaigwa nin materyal na mga bagay. (Jer. 27:21, 22) Igwa daw nin leksion na manonodan dian?

8, 9. Taano ta masasabi nindo na dakula nang bagay na nakamtan ni Baruc an saiyang kalag bilang samsam?

⁸ Isip-isipa ngonyan an bagay na ini: Ano an makakamtan ni Baruc huli sa pagkuyog sa instruksion nin Dios? An saiyang kalag! Iyan garantisadong mapapasaiya “bilang samsam.” (Basahon an Jeremias 45:5.) Medyo dikit sana an nakaligtas. Sairisay? An mga nagkuyog sa instruksion nin Dios na kumampi, o sumuko, sa mga Caldeo. (Jer. 21:9; 38:2) Tibaad mag-isip an nagkapira, ‘Iyan sana daw an itinaong balos sa saindang pagkuyog?’

⁹ Bueno, imahinara an kamugtakan sa Jerusalem kan nasasalikopan iyan kan mga Babilonyo. An mga nasa Jerusalem luway-luway na nagkakagaradan sa kasakitan dahel sa pagsalikop. Sa kabaliktaran, an Sodoma ginaba nin madali sana. Garo man sana masasabi na mas makolog an kalaglagan kan Jerusalem kisa sa Sodoma. (Lam. 4:6) Isinurat ni Baruc an hula na an mga nakaistar sa Jerusalem magagadan sa espada, sa gutom, o sa peste. Asin siertong naheling nia an kaotoban kaiyan. Naubos an suplay nin kakanon sa Jerusalem. Nakakakubhan nanggad na maheling sa siudad an mga ina, na natural nang “mapagmalasakit,” mantang pinapakalakagaan asin kinakakan an sadiri nindang mga aki! (Lam. 2:20; 4:10; Jer. 19:9) Pero, nakaligtas si Baruc. Iyo, sa ibong nin siring kagrabeng karibarawan, an buhay mismo saro nang samsam, arog nin premyo sa mga nanggana sa ralaban. Malinaw nanggad, siertong inako asin sinunod ni Baruc an hatol nin Dios na dai maghanap nin “darakulang bagay.” Asin nakamtan nia an pabor ni Jehova, na pinatunayan kan saiyang pagkaligtas.—Jer. 43:5-7.

10, 11. Paano aplikado sa panahon niato asin sa sato mismo an pagkasaysay dapit ki Baruc?

¹⁰ Minsan ngani sibot si Baruc sa paggibo kan kabotan nin Dios, may panahon na nasakitan siang labanan an pagmawot nin “darakulang bagay.” Pinatanidan sia ni Jehova dapit sa peligro kaiyan, asin sia nakaligtas sa espirituwal na kapahamakan asin pisikal na kagadanan. Arog ni Baruc, kita daw posibleng matentaran man asin madaog nin mga pagmawot na nakatago sa satong puso, dawa kita aktibong naglilingkod ki Jehova?

¹¹ Para ki Baruc, an pagmawot na magin bantog puedeng nakatentar talaga sa saiya. Maiimahinar daw nindo na sia nag-isip-isip pa ngani: ‘Magdadanay daw ako sa sakong trabaho bilang “sekretaryo”? Puede daw akong magkaigwa nin mas halangkaw pa nganing puesto?’ Ngonyan, kumusta man kita? Hapoton an saimong sadiri, ‘Ako daw tibaad may tago-tago sa boot ko na “mga ambisyon” na umasenso sa kinabanon na propesyon ngonyan o sa maabot?’ Tibaad pag-isipan nin nagkapirang hoben na Kristiano an hapot na, ‘Dahel sa oportunidad na magkamit nin prestihio asin seguridad sa pinansial paagi sa sakong natapos na edukasyon, natetentaran daw akong maghanap nin “darakulang bagay” para sa sakong sadiri?’

12. Paano naghanap nin darakulang bagay para ki Jehova an sarong tugang, asin ano an masasabi nindo sa nagin desisyon nia?

¹² Sarong tugang na lalaki, na naglilingkod na ngonyan sa pambilog na kinaban na opisina prinsipal, an inalokan nin scholarship sa sarong unibersidad kan sia 15 anyos pa sana. Nabigla an saiyang mga maestra kan dai nia akoon an alok na iyan huling pinili nia an pagpayunir. Pero, nungkang nawara an saiyang pagmawot na mag-adal. Sia nagin misyonero sa sarong harayong isla. Duman kaipuhan niang manodan an lenguahe kan medyo labi sanang 10,000 katawo. Mayo nin diksionaryo sa lenguaheng iyan, kaya naggibo sia nin sadiri niang lista nin mga tataramon. Pag-abot nin panahon, sia matibay na sa lenguaheng iyan asin inasignaran na itradusir an nagkapira sa satong Kristianong mga publikasyon. Paghaloyhaloy, an ginibo niang lista nin mga tataramon an ginamit na basehan para sa enot na diksionaryo sa lenguaheng iyan. Sinabi nia kaidto sa dakol na nagdadangog sa sarong pandistritong kombension: “Kun inako ko an edukasyon sa unibersidad, an ano man na akademikong nagibo ko magigin para sa sadiri ko sanang kaomawan. Alagad, mayo ako nin ano man na sekular na kualipikasyon. Kaya bakong ako an naoomaw huli sa nagibo ko. An gabos na kaomawan napapaduman ki Jehova.” (Tal. 25:27) Ano an masasabi nindo sa nagin desisyon nia kan sia 15 anyos? Sa nag-aging mga taon, nagkaigwa sia nin dakol na pribilehio sa banwaan nin Dios. Sa kamugtakan nindo, paano nindo gustong gamiton an saindong mga abilidad? Determinado daw kamong gamiton iyan sa pag-omaw ki Jehova, imbes na sa paghanap nin sadiri nindong kaomawan?

13. Taano ta maninigong pag-isipan nin nagkapirang magurang an problema na napaatubang ki Baruc?

¹³ Igwa nin konektadong peligro: an paghanap nin “darakulang bagay” para sa o paagi sa mga namomotan asin tibaad naiimpluwensiahan niato. Posibleng marhay na may naobserbaran kamong mga magurang na bakong Saksi na minamaniobra an mga bagay-bagay tanganing an saindang aki mas umasenso sa buhay kisa sa sainda o ikaorgolyo ninda. Tibaad may nadangog kamo na nagsasabi nin arog kaini: “Habo ko siang magtrabaho nin magabat arog ko” o “Gusto kong kumua an sakong aki nin mas halangkaw na edukasyon tanganing magin mas maginhawa an buhay nia.” Puedeng arog man kaiyan an saboot nin Kristianong mga magurang. Totoo, an saro tibaad magsabi, ‘Dai man ako naghahanap nin darakulang bagay para sa sakong sadiri.’ Alagad posible daw na ginagamit nia an iba, arog baga kan saiyang aki, sa paghanap kaiyan? Kun paanong si Baruc puedeng natentaran na magmawot na magin prominente paagi sa saiyang posisyon o propesyon, tibaad sa boot nin sarong magurang mawot man niang magkamit kaiyan paagi sa mga nagibo kan saiyang aki. Pero, bako daw na naheheling ini kan “parasiyasat sa mga puso,” kun paanong naheling nia ini ki Baruc? (Tal. 17:3) Bako daw na maninigo niatong ipasiyasat sa Dios an satong kairairaroming mga kaisipan, arog kan ginibo ni David? (Basahon an Salmo 26:2; Jeremias 17:9, 10.) Puedeng gumamit si Jehova nin laen-laen na paagi, arog kan pagtokar na ini dapit ki Baruc, tanganing patanidan kita sa peligro nin paghanap nin “darakulang bagay.”

14, 15. Paano puedeng magin “darakulang bagay” para sa sato an kayamanan?

¹⁴ Isipon nindo na an “darakulang bagay” na hinahanap ni Baruc posibleng materyal na kayamanan. Arog kan nasambitan sa enotan, kun namotan na gayo ni Baruc an saiyang mga rogaring asin propiedad sa Juda, posible kutanang nasakitan siang kuyogon an pagboot nin Dios na sumuko sa mga Caldeo. Posibleng marhay na naoobserbaran nindo na an mayaman parateng nagsasarig sa saiyang “mahahalagang bagay,” alagad pinapatunayan kan Biblia na ‘nasa imahinasyon’ sana nia an proteksion na itinatao kan siring na mga bagay. (Tal. 18:11) An gabos na lingkod ni Jehova puedeng makinabang kun gigirumdomon ninda an timbang na pagmansay sa materyal na mga bagay na sinabi sa saiyang Tataramon. (Basahon an Talinhaga 11:4.) Pero, tibaad magrason an nagkapira, ‘Taano ta dai na lang niato ikaogma nin dikit sana an mga bagay sa kinaban?’

¹⁵ An pagkamoot sa mga rogaring puedeng magin dahelan na mawoton nin sarong Kristiano an mga bagay na kabtang kan sistema nin mga bagay na malihis sana. Bakong arog kaiyan si Jeremias o Baruc. Pakalihis nin dakol na taon, nagpatanid si Jesus sa mga tawo sa panahon ‘kan paghayag sa Aki nin tawo.’ Sinabihan sinda ni Jesus: “Girumdomon nindo an agom ni Lot.” Angay man na sadolon an mga Kristiano: ‘Girumdomon nindo si Jeremias asin Baruc.’ (Luc. 17:30-33) Kun magkakaigwa kita nin makosog na pagkamoot sa materyal na mga bagay, madedepisilan kitang iaplikar an mga tataramon ni Jesus. Alagad dai paglingawan—isinapuso ni Baruc an patanid nin Dios kaya sia nagdanay na buhay.

16. Isaysay an sarong kamugtakan kun paano an mga lingkod nin Dios nagdanay na timbang an pagmansay sa materyal na mga bagay.

¹⁶ Isip-isipa an kamugtakan kan mga tugang sa Romania durante kan Komunistang rehimen. Sa pagsakyada sa harong nin mga Saksi, kun beses kinokompiskar kan mga autoridad an personal na mga rogaring, nangorogna an mga bagay na puedeng ipabakal. (Lam. 5:2) Dakol na tugang na sakop kan rehimen na iyan an andam na mawaran kan saindang mga rogaring. Kinaipuhan na bayaan nin nagkapira an saindang mga rogaring asin propiedad kan sinda ibalyo sa ibang lugar; pero, nagdanay sinda na may integridad ki Jehova. Kun mapaatubang kamo sa siring na pagbalo, totogotan daw nindo an pagkamoot sa materyal na mga bagay na makaolang sa saindong pagdadanay na maimbod sa Dios?—2 Tim. 3:11.

17. Paano puedeng nakatabang ki Jeremias asin Baruc an nagkapirang katemporanyo ninda?

¹⁷ Mahalagang mangnohon na si Jeremias asin Baruc sinuportaran kan nagkapira sa mga katemporanyo ninda. Si Sofonias naghula durante kan paghade ni Josias, kan si Jeremias naglilingkod bilang propeta. Ano daw an nagin saboot ni Jeremias manongod sa mga tataramon na mababasa niato sa Sofonias 1:18? (Basahon.) Asin bako daw na maiimahinar nindo si Jeremias na sinasabi ki Baruc an ipinasabong na hulang iyan? An saro pang katemporanyo iyo si Ezequiel, na dinarang bihag sa Babilonya kan 617 B.C.E. An nagkapira sa saiyang mga aktibidad asin mensahe direktang konektado sa mga Judio na yaon sa saindang nasyon, kaya posibleng marhay na naaraman ni Jeremias asin Ezequiel an sinabi o ginibo kan lambang saro sa sainda. Kaiba dian an mga tataramon na nakasurat sa Ezequiel 7:19. (Basahon.) Kun paanong si Jeremias asin Baruc nakinabang sa ipinasabong na mga tataramon na iyan, kita iyo man. An mga tawo maapod sa saindang mga dios na iligtas sinda sa aldaw ni Jehova. Pero, dai sinda ikakaligtas kan saindang mga dios ni kan saindang kayamanan.—Jer. 2:28.

18. Kiisay na “kalag” an maninigo niatong mawoton na makamtan bilang samsam, asin paano niato iyan makakamtan?

¹⁸ Kaipuhan niatong girumdomon na an ipinanuga ni Jehova na samsam iyo an satong “kalag.” Dawa kun an pira sa mga lingkod nia magadan sa pagpersegir na puedeng mangyari durante kan “dakulang kahorasaan,” kun an relihion balingan na kan politikal na mga sungay kan mabangis na hayop, an mga maimbod na iyan dai man talaga mawawaran kan saindang kalag. An saindang “kalag” garantisadong mabubuhay giraray tanganing magkamit kan “tunay na buhay” sa bagong kinaban. (Kap. 7:14, 15; 1 Tim. 6:19) Minsan siring, makakasierto kita na an kadaklan sa mga lingkod nin Dios na maimbod sa panahon na iyan makakaligtas sa dakulang kahorasaan. Makakasierto kamo na kun an Dios magpaabot na nin kapahamakan sa mga nasyon, mayo nin maimbod na mapapabilang sa “mga gagadanon ni Jehova.”—Jer. 25:32, 33.

19. Paano an halimbawa ni Jeremias asin Baruc nakapakosog sa saimong determinasyon na dai maghanap nin “darakulang bagay” para sa saimong sadiri?

¹⁹ Tibaad nakakadesganar para sa nagkapira na isipon na posibleng makaligtas sinda na “kalag” sana ninda an magigin samsam ninda, alagad dai man talaga dapat ikadesganar iyan. Girumdomon na kan an mga tawo sa Jerusalem nagagadan sa gutom, si Jeremias ilinigtas ni Jehova. Paano? Ipinagboot ni Hadeng Zedequias na idetenir si Jeremias sa Patyo kan Bantay asin tawan nin “sarong bilog na tinapay aroaldaw hale sa tinampo kan mga panadero, sagkod na maubos an gabos na tinapay sa siudad.” (Jer. 37:21) Asin nakaligtas si Jeremias! Puedeng gamiton ni Jehova an ano man na paaging pilion nia tanganing susteniran an saiyang banwaan. Alagad talagang sususteniran nia an saiyang banwaan, huling garantisado an saindang paglaom na buhay na daing katapusan. Huli sa dai ‘paghanap nin darakulang bagay,’ nakaligtas si Baruc kan laglagon an Jerusalem. Kaagid kaiyan, kita makakaasang makaligtas sa Armagedon tanganing omawon si Jehova mantang nakamtan ta an satong “kalag” bilang samsam na puedeng magdanay nin daing katapusan.