Dinadalisay kan Hadi sa Espirituwal na Paagi an mga Lingkod Niya

1-3. Ano an ginibo ni Jesus kan mahiling niya na inaatian an templo?

DAKULA an paggalang ni Jesus sa templo sa Jerusalem huling aram niya kun sa ano ini nagrerepresentar. Haloy na iyan na nagin sentro nin tunay na pagsamba digdi sa daga. Pero an pagsambang iyan—an pagsamba sa banal na Diyos na si Jehova—dapat na malinig asin dalisay. Huli kaiyan, imahinara kun ano an pagmati ni Jesus pag-abot niya sa templo kan Nisan 10, 33 C.E., kan mahiling na inaatian iyan. Ano an nangyayari?—Basahon an Mateo 21:12, 13.

² Sa Patyo kan mga Hentil, inaaprobetsaran kan mahanab na mga negosyante asin pararibay nin kuwarta an mga nagsasamba na minaduman para magdulot nin atang ki Jehova.a ‘[Pinalayas ni Jesus] an gabos na nagpapabakal asin nagbabakal sa templo, asin [pinabalintok] an mga lamesa nin mga pararibay nin pirak.’ (Ikumparar an Nehemias 13:7-9.) Kinondenar niya an makasadiring mga tawong idto huling ginibo ninda an harong kan saiyang Ama na magin ‘lungib nin mga parahabon.’ Paagi kaiyan, ipinahiling niya an saiyang paggalang sa templo asin kun sa ano iyan nagrerepresentar. Dapat nanggad na papagdanayon na malinig an pagsamba sa saiyang Ama!

³ Pakalihis nin dakul na siglo, pakapatukawa ki Jesus bilang Mesiyanikong Hadi, may lininig giraray siyang templo kaidto—kalabot diyan an gabos ngunyan na gustong sambahon si Jehova sa inuuyunan na paagi. Anong templo iyan?

4, 5. (a) Paano dinalisay asin lininig an mga linahidan puon 1914 sagkod sa kapinunan kan 1919? (b) Iyan daw an katapusan kan pagdalisay asin paglinig sa mga lingkod nin Diyos? Ipaliwanag.

⁴ Arog kan naaraman ta sa Kapitulo 2 kan publikasyon na ini, pakapatukawa ki Jesus sa trono kan 1914, nagdatong siya kaiba kan saiyang Ama para siyasaton an espirituwal na templo—an areglo para sa dalisay na pagsamba.b Bilang resulta kaiyan, nahiling kan Hadi na an linahidan na mga Kristiyano, ‘an mga aking lalaki ni Levi,’ kaipuhan na dalisayon asin linigon. (Mal. 3:1-3) Puon 1914 sagkod sa kapinunan kan 1919, itinugot kan Paradalisay, si Jehova, na mag-agi nin lain-lain na pagbalo asin kasakitan an mga lingkod niya para dalisayon saka linigon sinda. Nakakaugma ta an mga linahidan na nag-agi nin garo kalayong mga pagbalo nagin mas malinig asin gustong-gustong ipahiling an suporta ninda sa Mesiyanikong Hadi!

⁵ Iyan daw an katapusan kan pagdalisay asin paglinig sa mga lingkod nin Diyos? Bako. Mantang nasa huring mga aldaw, padagos na tinatabangan ni Jehova an mga parasunod niya na magin malinig, paagi sa Mesiyanikong Hadi, tanganing magdanay sinda sa espirituwal na templo. Sa sunod na duwang kapitulo, maaaraman ta kun paano niya sinda dinadalisay sa moral asin organisasyonal na paagi. Pero, pag-ulayan ta nguna an espirituwal na paglinig. Nakakapakusog sa pagtubod na isip-isipon an ginigibo ni Jesus—sa paagi na malinaw na nahihiling asin dai nahihiling—para tabangan an mga parasunod na magin malinig sa espirituwal.

 6. Paano nakakatabang sa sato an mga pagbuot ni Jehova sa mga Judiong nadistiyero na masabutan kun ano an kalabot sa espirituwal na kalinigan?

⁶ Ano an espirituwal na kalinigan? Para masimbag iyan, siyasaton ta an propetikong mga tataramon ni Jehova mapadapit sa desteradong mga Judio na pahali na sa Babilonya kan ikaanom na siglo B.C.E. (Basahon an Isaias 52:11.)c Sa panginot, mabalik sa Jerusalem an mga nadistiyero para itugdok liwat an templo asin ibalik an tunay na pagsamba. (Esd. 1:2-4) Gusto ni Jehova na bayaan kan banwaan niya an gabos na gira kan relihiyon kan Babilonya. Mangnuhon na tinawan niya sinda nin sunod-sunod na pagbuot: “Dai kamo dumutdot nin ano man na maati,” “lumuwas kamo sa saiya,” asin “magdanay kamong malinig.” An dalisay na pagsamba ki Jehova dapat na daing digta nin palsong pagsamba. Kun siring, ano an puwede tang ikongklusyon? Kalabot sa espirituwal na kalinigan an pagdadanay na daing digta kun dapit sa mga katukduan asin kaugalian nin palsong relihiyon.

 7. Siisay an ginagamit ni Jesus para tabangan an mga parasunod niya na magin malinig sa espirituwal?

⁷ Dai nahaloy pakapatukawa ki Jesus bilang Hadi, nag-establisar siya nin sarong madaling mamidbid na pinakapaagihan na gagamiton niya para tabangan an mga parasunod na magin malinig sa espirituwal. Iyan an maimbod asin mapagmansay na uripon, na ninombrahan ni Cristo kan 1919. (Mat. 24:45) Kan taon na iyan, nalinig na kan Mga Estudyante sa Bibliya an sadiri ninda sa dakul na katukduan nin palsong relihiyon. Pero, kaipuhan ninda nin urog pang paglilinig sa espirituwal. Paagi sa maimbod na uripon ni Cristo, luway-luway niyang liniwanag sa mga parasunod an dapit sa lain-lain na selebrasyon asin kaugalian na kaipuhan nindang bayaan. (Tal. 4:18) Pag-ulayan ta an nagkapirang halimbawa kaini.

 8. Ano an haloy nang aram kan Mga Estudyante sa Bibliya dapit sa Pasko, pero ano an dai ninda malinaw na nasabutan?

⁸ Haloy nang aram kan Mga Estudyante sa Bibliya na may paganong ginikanan an Pasko asin bako Disyembre 25 an petsa kan pagkamundag ni Jesus. Nagsabi an Zion’s Watch Tower na Disyembre 1881: “Minilyon na gikan sa Paganismo an ilinaog sa iglesya [o Kakristiyanuhan]. Pero an pagbabago sa panginot sa pag-apod sana, huling an paganong mga padi nagin kristiyanong mga padi asin an paganong mga holiday sinalidahan nin sa kristiyanong mga pag-apod—saro sa mga ini an Pasko.” Kan 1883, sa titulong “Kasuarin Namundag si Jesus?” ipinaliwanag kan Watch Tower na iyan nangyari kan mga kapinunan nin Oktubre.d Pero, dai malinaw na nasabutan kan Mga Estudyante sa Bibliya na kaipuhan nindang pumundo sa pagselebrar nin Pasko. Padagos iyan na sinelebrar dawa kan mga miyembro kan pamilyang Bethel sa Brooklyn. Minsan siring, nagkaigwa nin pagbabago pakalihis nin 1926. Taano?

 9. Ano an nasabutan kan Mga Estudyante sa Bibliya dapit sa Pasko?

⁹ Huli sa mas maingat na pagsiyasat sa temang iyan, nasabutan kan Mga Estudyante sa Bibliya na dai talaga nagtatao nin onra sa Diyos an ginikanan kan Pasko asin an mga kaugalian na konektado diyan. Sinabi kan artikulong “An Ginikanan kan Pasko,” sa The Golden Age na Disyembre 14, 1927, na an Pasko sarong paganong selebrasyon, na nakapokus sana sa kaurugmahan, asin kalabot an pagsamba sa idolo. Lininaw kaiyan na dai ipinagbuot ni Cristo an selebrasyon, dangan diretso sa puntong nagkongklusyon dapit sa Pasko: “Huling gusto kan kinaban, kan laman, asin kan Diyablo na padagos na selebraron iyan . . . an mga nagdusay na lubos na maglingkod ki Jehova may pinal saka dai mapagdududahan na argumento na dai dapat selebraron iyan.” Bakong makangangalas na dai na nuarin man nagselebrar nin Pasko an pamilyang Bethel puon kan Disyembreng idto!

10. (a) Anong detalyadong pagbuyagyag dapit sa Pasko an ipinahayag kan Disyembre 1928? (Hilingon man an kahon na “Pasko, an Ginikanan Asin Katuyuhan Kaiyan.”) (b) Paano pinatanidan an mga lingkod nin Diyos dapit sa iba pang holiday asin selebrasyon na maninigong likayan? (Hilingon an kahon na “Pagbuyagyag sa Iba Pang Holiday Asin Selebrasyon.”)

¹⁰ Kan suminunod na taon, tinawan an Mga Estudyante sa Bibliya nin mas detalyado pa nganing pagbuyagyag dapit sa Pasko. Kan Disyembre 12, 1928, nagpahayag sa radyo si Brother Richard H. Barber, sarong miyembro kan headquarters, na nagbuyagyag kan maating ginikanan kan holiday na ini. Ano an reaksiyon kan mga lingkod nin Diyos sa malinaw na instruksiyon hali sa headquarters? Nagirumduman ni Brother Charles Brandlein kan siya asin an pamilya niya dai na nagselebrar nin Pasko: “Nanghinayang daw kami sa paganong mga bagay na idto? Dai nanggad! . . . Garo man sana iyan paghuba asin pagtapok nin maati nang bado.” Pareho man an sabuot ni Brother Henry A. Cantwell, na pag-abot nin panahon nagin nagbibiyaheng paraataman: “Maugma kami na nagibo ming bayaan an sarong bagay para patunayan an pagkamuot mi ki Jehova.” Andam an maimbod na mga parasunod ni Cristo na gumibo nin kinakaipuhan na pagbabago asin dai makikabtang sa selebrasyon na naggikan sa maating pagsamba.e—Juan 15:19; 17:14.

11. Paano ta maipapahiling an satong suporta sa Mesiyanikong Hadi?

¹¹ Marahayon nanggad na halimbawa an itinao sa sato kan maimbod na Mga Estudyante sa Bibliya! Sa paghurop-hurop sa halimbawa ninda, marahay na haputon ta an sadiri: ‘Paano ko minamansay an itinataong instruksiyon kan maimbod na uripon? May pasasalamat ko daw na inaako iyan asin inaaplikar an nanunudan ko?’ An pagigin andam ta na kumuyog nagpapahiling kan satong suporta sa Mesiyanikong Hadi, na ginagamit an maimbod na uripon para magtao nin napapanahon na espirituwal na kakanon.—Gui. 16:4, 5.

12. Sa dakul na taon, ano an pagmansay sa krus kan Mga Estudyante sa Bibliya?

¹² Sa dakul na taon, minansay kan Mga Estudyante sa Bibliya an krus bilang akseptableng simbolo nin Kristiyanismo. Pero para sa sainda, dai nanggad iyan maninigong sambahon, huling aram ninda na sala an idolatriya. (1 Cor. 10:14; 1 Juan 5:21) Kaidto pang 1883, prangkang nagsabi an Watch Tower na “ikinakaungis nin Diyos an gabos na klase nin idolatriya.” Alagad, kan inot, daing nahiling na sala an Mga Estudyante sa Bibliya sa iniisip ninda na angay na paggamit kan krus. Halimbawa, may pag-orgulyo nindang ginagamit an tadik na may krus asin korona bilang nagpapamidbid na tanda. Para sa sainda, nangangahulugan iyan na kun magin maimbod sinda sagkod sa kagadanan, tatawan sinda nin korona nin buhay. Puon 1891, ginamit an simbolo na may krus asin korona sa cover kan Watch Tower.

13. Anong kaliwanagan an itinao sa mga parasunod ni Cristo dapit sa paggamit nin krus? (Hilingon man an kahon na “Progresibong Naliwanagan Dapit sa Paggamit nin Krus.”)

¹³ Pinahalagahan kan Mga Estudyante sa Bibliya an simbolo na may krus asin korona. Minsan siring, puon sa huring kabtang kan dekada nin 1920, progresibong naliwanagan an mga parasunod ni Cristo dapit sa paggamit nin krus. Sa paghurop-hurop sa asembleya kan 1928 sa Detroit, Michigan, E.U.A., nagirumduman ni Brother Grant Suiter, na pag-abot nin panahon nagin miyembro kan Namamahalang Grupo: “Ipinaliwanag sa asembleya na an mga simbolo na may krus asin korona bako sanang dai kaipuhan kundi bako man akseptable.” Sa suminunod na pirang taon, nagkaigwa nin urog pang kaliwanagan. Malinaw na an krus dai nin lugar sa pagsamba na dalisay asin malinig sa espirituwal.

14. Ano an reaksiyon kan mga lingkod nin Diyos sa progresibong kaliwanagan na itinao sa sainda dapit sa krus?

¹⁴ Ano an reaksiyon kan mga lingkod nin Diyos sa progresibong kaliwanagan na itinao sa sainda dapit sa krus? Padagos pa daw nindang ginamit an simbolo na may krus asin korona, na minahal nanggad ninda? “Ipinundo mi tulos an paggamit kaiyan kan maaraman mi kun sa ano iyan nagrerepresentar,” an nagirumduman ni Lela Roberts, sarong haloy nang lingkod ni Jehova. Ipinahayag nin saro pang maimbod na sister, si Ursula Serenco, an pagmati nin dakul: “Nasabutan mi na talagang gikan sa pagano an dati ming pinapahalagahan na simbolo o representasyon kan kagadanan kan Kagurangnan ta asin kan Kristiyanong debosyon mi. Kauyon kan Talinhaga 4:18, nagpapasalamat kami na urog na nagliliwanag an dalan.” Habo nanggad kan maimbod na mga parasunod ni Cristo na makikabtang sa maating mga kaugalian nin palsong relihiyon!

15, 16. Paano ta maipapahiling na determinado kitang papagdanayon na malinig an mga patyo sa daga kan espirituwal na templo ni Jehova?

¹⁵ Iyan man an determinasyon ta ngunyan. Aram ta na ginagamit ni Cristo an sarong madaling mamidbid na pinakapaagihan—an maimbod asin mapagmansay na uripon—para tabangan an mga lingkod niya na magdanay na malinig sa espirituwal. Huli kaini, tulos-tulos kitang minahiro asin minasunod pag an espirituwal na kakanon na itinatao sa sato nagpapatanid dapit sa mga selebrasyon, kaugalian, o kostumbre na may digta nin palsong relihiyon. Arog kan mga tugang ta kan magpuon an presensiya ni Cristo, determinado kitang papagdanayon na malinig an mga patyo sa daga kan espirituwal na templo ni Jehova.

¹⁶ Mantang nasa huring mga aldaw, may ginigibo man si Cristo na dai ta nahihiling para protektaran an mga kongregasyon kan mga lingkod ni Jehova sa mga indibidwal na puwedeng makakontaminar sa sainda sa espirituwal. Paano niya iyan ginigibo? Aramon ta.

17, 18. Sa ilustrasyon dapit sa hikot, ano an kahulugan kan (a) pagtaktak sa dagat nin sarong hikot, (b) pagtipon nin manlain-lain na sira, (c) pagtipon sa mga marahay na sira pasiring sa mga lalagan, asin (d) pagtapok sa mga maraot na sira?

¹⁷ Padagos na binabantayan kan Hading si Jesu-Cristo an mga kongregasyon kan mga lingkod nin Diyos sa bilog na daga. May ginigibo siyang pagbulag-bulag asin an mga anghel sa mga paagi na dai ta lubos na nasasabutan. Ilinadawan niya ini sa saiyang ilustrasyon dapit sa hikot. (Basahon an Mateo 13:47-50.) Ano an kahulugan kaiyan?

¹⁸ ‘Pagtaktak sa dagat nin sarong hikot.’ An hikot nagrerepresentar sa paghuhulit kan Kahadian na ginigibo sa arog-kadagatan na katawuhan. ‘Pagtipon nin manlain-lain’ na sira. Naaakit sa maugmang bareta an gabos na klase nin tawo—an mga naggigibo nin lakdang para magin tunay na mga Kristiyano, siring man an dakul na iba pang nagigin interesado sa primero pero dai talaga naninindugan para sa dalisay na pagsamba.f ‘Pagtipon sa mga marahay [na sira pasiring] sa mga lalagan.’ Tinitipon an mga sadiyosan an puso sa arog-lalagan na mga kongregasyon, na diyan makakasamba sinda ki Jehova sa malinig na paagi. ‘Pagtapok sa mga maraot’ na sira. Mantang nasa huring mga aldaw, binubulag-bulag ni Cristo asin kan mga anghel an ‘mga maraot asin matanos.’g Bilang resulta, an mga bakong tama an kamugtakan nin puso—na tibaad dai andam na bayaan an salang mga paniniwala o kaugalian—dai tinutugutan na digtaan an mga kongregasyon.h

19. Ano an pagmati mo sa pagprotektar ni Cristo sa kalinigan kan mga lingkod nin Diyos asin sa kadalisayan kan tunay na pagsamba?

¹⁹ Bako daw na nakakapakusog liwat sa buot na maaraman na pinoprotektaran kan satong Hadi, si Jesu-Cristo, an mga pinangangatamanan niya? Asin bako daw na nakakarangang maaraman na maiguton pa man giraray siya ngunyan para sa tunay na pagsamba—saka para sa tunay na mga parasamba—siring kan linigon niya an templo kan inot na siglo C.E.? Nagpapasalamat nanggad kita na pinoprotektaran niya an espirituwal na kalinigan kan mga lingkod nin Diyos asin an kadalisayan kan tunay na pagsamba! Maipapahiling ta an satong suporta sa Hadi asin sa Kahadian niya paagi sa paglikay sa gabos na may koneksiyon sa palsong relihiyon.