Ihinayag ni Jesus an Gikanan nin Kaugmahan

Inutro pa sana ni Jesus an mga itinukdo niya dapit sa pamibi, pero bako sana iyan an tema na naglataw nin labing sarong beses sa ministeryo niya. Kan naggigibo siya nin mga milagro sa Galilea, sinahutan siya na ginigibo daa niya iyan sa kapangyarihan kan tagapamahala kan mga demonyo. Sa Judea, sinahutan giraray siya nin arog kaiyan.

Kan paluwason ni Jesus sa sarong lalaki an demonyong nakakapagpapúla, napangalas an mga tawo. Pero an mga nagkukuwestiyon sa saiya dai. Isinahot liwat ninda: “Napapalayas niya an mga demonyo paagi ki Beelzebub, an tagapamahala kan mga demonyo.” (Lucas 11:15) An iba, na naghahanap nin urog pang ebidensiya kun siisay si Jesus, naghagad sa saiya nin tanda hali sa langit.

Huling aram ni Jesus na siya pinupurbaran ninda, sinimbag niya sinda arog kan ginibo niya sa mga nagkuwestiyon sa saiya sa Galilea: “Kun nababanga man si Satanas, paano makakatindog an saiyang kahadian?” Dangan direktang sinabi ni Jesus: “Kun paagi sa kamot nin Diyos kaya nakakapalayas ako nin mga demonyo, uminabot na an Kahadian nin Diyos na dai nindo namamangnuhan.”—Lucas 11:18-20.

Kan sinambit ni Jesus an “kamot nin Diyos,” dapat kuta nagirumduman kan mga nagdadangog an kasaysayan kan Israel. An mga nasa palasyo ni Faraon na nakahiling ki Moises na naggibo nin milagro nagsabi: “Kamot ini nin Diyos!” An “kamot nin Diyos” man an nagsurat kan Sampulong Tugon sa duwang tablang gapo. (Exodo 8:19; 31:18) Sa kaagid na paagi, an “kamot nin Diyos”—an saiyang banal na espiritu—an nagpapangyari ngunyan ki Jesus na magpalayas nin mga demonyo asin magpaumay nin mga may hilang. Huli kaini, tunay nanggad na uminabot na an Kahadian nin Diyos na dai namamangnuhan kan mga paratumang na ini, huling an itinalagang magin Hadi kan Kahadian, si Jesus, yaon na mismo na naggigibo kan mga milagrong ini.

An kakayahan ni Jesus na magpalayas nin mga demonyo patunay na siya mas makapangyarihan ki Satanas, kun paanong an mas makusog na tawo minaatake asin dinadaog an armadong marhay na tawo na nagbabantay kan harong kaini. Inutro man ni Jesus an ilustrasyon dapit sa maraot na espiritu na nagluwas sa sarong tawo. Kun dai papanuon kan tawong ini an sadiri niya nin marahay na mga bagay, an espiritung iyan mabalik na may kaibang pitong iba pa, kaya an huring kamugtakan kan tawo nagigin mas grabe kisa kan inot. (Mateo 12:22, 25-29, 43-45) Kaya totoo man iyan sa nasyon nin Israel.

An sarong babayi na nagdadangog ki Jesus nagkurahaw: “Maugma an ina na nagdara sa saimo sa saiyang tulak asin nagpasuso sa saimo!” Mawot kan mga babaying Judio na magin ina nin sarong propeta, lalo na kan Mesiyas. Kaya posibleng iniisip kan babaying ini na si Maria nangurugnang maugma bilang an ina kan siring na paratukdo. Pero itinanos ni Jesus an babayi: “Dai, imbes, maugma an mga nagdadangog kan tataramon nin Diyos asin nag-uutob kaiyan!” (Lucas 11:27, 28) Dai nuarin man sinabi ni Jesus na si Maria dapat tawan nin espesyal na onra. Imbes, an tunay na kaugmahan nin siisay man na lalaki o babayi minagikan sa pagigin maimbod na lingkod nin Diyos, bako sa ano man na koneksiyon sa ibang tawo o mga naginibuhan.

Arog sa Galilea, sinaway ni Jesus an mga tawo huli sa paghagad nin tanda hali sa langit. Sinabi niya na daing tanda na itatao apuwera sa “tanda ni Jonas.” Si Jonas nagserbing tanda kan siya tulong aldaw na nasa laog kan sira asin kan siya kusog-buot na naghulit, na nagpahiro sa mga taga Nineve na magsulsol. Nagsabi si Jesus: “Alagad uya! sarong labi pa ki Jonas an yaon digdi.” (Lucas 11:29-32) Si Jesus nakakalabi man ki Solomon, na dinumanan kan reyna kan Seba para madangog an kadunungan niya.

“Pagkatapos magpalaad nin lampara,” an sabi pa ni Jesus, “dai iyan ibinubugtak nin sarong tawo sa nakatagong lugar ni tinatakluban man niya iyan nin basket, kundi ibinubugtak niya iyan sa patungan nin lampara.” (Lucas 11:33) Posibleng an buot niyang sabihon iyo na dawa nagtukdo siya asin naggibo nin mga milagro sa atubangan kan mga tawong ini, garo baga natatakluban pa man giraray an ilaw kan lampara. Huling dai nakapokus an mga mata ninda, dai ninda nasabutan an katuyuhan kan mga ginibo niya.

Pinalayas pa sana ni Jesus an demonyong nakakapagpapúla kaya nakakataram na an lalaking sinaniban kaini. Dapat na napahiro kutana kaiyan an mga tawo na pamurawayon an Diyos asin sabihon sa iba an mga ginigibo ni Jehova. Kaya nagpatanid si Jesus sa mga nagkukuwestiyon sa saiya: “Mag-ingat ka na an liwanag na yaon sa saimo bakong kadikluman. Kaya, kun an bilog mong hawak maliwanag asin dai iyan nin parteng madiklom, iyan magigin arog kaliwanag nin lamparang nagtatao sa saimo nin liwanag paagi sa sinag kaiyan.”—Lucas 11:35, 36.