Mga Ministro kan Maugmang Bareta

TINAWAN kita ni Jehova nin perpektong arugan—an saiyang Aki, si Jesu-Cristo. (1 Ped. 2:21) Pag an sarong tawo magin parasunod ni Jesus, ihuhulit niya an maugmang bareta bilang ministro nin Diyos. Para ipahiling na nakakaginhawa ini sa espirituwal, sinabi ni Jesus: “Madya kamo sa sako, kamo gabos na nagpapagal saka nagagabatan, asin papaginhawahon ko kamo. Pasanon nindo an sakuyang sakal asin makanuod kamo sa sako, huli ta ako may mahuyong buot saka may mapakumbabang puso, asin magiginhawahan kamo.” (Mat. 11:28, 29) Inutob niya an ipinanuga niya sa gabos na nag-ako sa imbitasyon na iyan!

² Bilang Panginot na Ministro nin Diyos, may mga inapod si Jesus para magin mga parasunod niya. (Mat. 9:9; Juan 1:43) Sinanay niya sinda sa ministeryo asin sinugo na gibuhon an arog kan ginigibo niya. (Mat. 10:1–11:1; 20:28; Luc. 4:43) Dangan, nagsugo siya nin 70 pa para magpahayag man kan maugmang bareta kan Kahadian nin Diyos. (Luc. 10:1, 8-11) Kan isugo ni Jesus an mga disipulong ini, sinabi niya sa sainda: “An siisay man na nagdadangog sa saindo nagdadangog sa sako. Asin an siisay man na nagbabaliwala sa saindo nagbabaliwala man sa sako. Dugang pa, an siisay man na nagbabaliwala sa sako nagbabaliwala man sa saiya na nagsugo sa sako.” (Luc. 10:16) Idinuon diyan ni Jesus kun gurano kaseryoso kan paninimbagan na itinao sa mga disipulo. Sinda an magigin representante ni Jesus asin kan Kahuruhalangkawing Diyos! Arog man kaiyan ngunyan an paninimbagan kan gabos na iba pa na nag-ako kan imbitasyon ni Jesus: “Madya, magin parasunod taka.” (Luc. 18:22; 2 Cor. 2:17) Sinda gabos mga isinugo nin Diyos tanganing ihulit an maugmang bareta kan Kahadian asin gumibo nin mga disipulo.—Mat. 24:14; 28:19, 20.

³ Huling inako ta an imbitasyon ni Jesus na sumunod sa saiya, biniyayaan kita na “mamidbid” si Jehova Diyos asin si Jesu-Cristo. (Juan 17:3) Itinukdo sa sato an mga dalan ni Jehova. Paagi sa tabang niya, nakaya tang baguhon an satong isip, isulot an bagong personalidad, asin iuyon an satong paggawi sa matanos na mga pamantayan ni Jehova. (Roma 12:1, 2; Efe. 4:22-24; Col. 3:9, 10) An satong udok sa pusong apresasyon nagpahiro sa sato na idusay an satong buhay ki Jehova asin simbolisaran iyan paagi sa bawtismo sa tubig. Kan bawtismuhan kita, nagin mga ordenadong ministro kita.

⁴ Pirming tandaan na tanganing makapaglingkod sa Diyos, dapat na dai kita naggigibo nin maraot asin dalisay an satong puso. (Sal. 24:3, 4; Isa. 52:11; 2 Cor. 6:14–7:1) Paagi sa pagtubod ki Jesu-Cristo, nagkaigwa kita nin malinig na konsiyensiya. (Heb. 10:19-23, 35, 36; Kap. 7:9, 10, 14) Sinadol ni apostol Pablo an mga Kristiyano na gibuhon an gabos na bagay sa ikakamuraway nin Diyos tanganing dai makapasingkog sa iba. Idinuon ni apostol Pedro an kahalagahan kan marahay na paggawi para magkainteres sa katotoohan an mga dai nagtutubod. (1 Cor. 10:31, 33; 1 Ped. 3:1) Paano mo matatabangan an saro na makuwalipikar na magin ministro kan maugmang bareta arog ta?

⁵ Pag tinutukduan mo na sa Bibliya an sarong interesado, dagkahon siyang sabihon sa iba an manungod sa nanunudan niya. Puwede siyang magpatotoo nin impormal sa mga paryente, amigo, katrabaho, asin iba pa. Mahalaga ini sa pagtutukdo sa mga baguhan na magin mga parasunod ni Jesu-Cristo bilang mga ministro kan maugmang bareta. (Mat. 9:9; Luc. 6:40) Mantang an baguhan nagtatalubo sa espirituwal asin natutuod sa impormal na pagpapatotoo, siyertong masabi siya na gusto na niyang umiba sa ministeryo sa langtad.

⁶ Bago mo agdahon an saro na umiba sa pagharong-harong sa inot na pagkakataon, siguraduhon na naaabot na niya an nagkapirang kuwalipikasyon. Pag an saro nag-iiba na sa ministeryo sa langtad, ipinapahiling niya sa publiko na kabilang siya sa Mga Saksi ni Jehova. Kaya inaasahan na namumuhay na siya uyon sa matanos na mga pamantayan ni Jehova asin puwede nang magin dai pa bawtisadong parahayag.

⁷ Mantang tinutukduan mo an sarong indibidwal asin ipinapakipag-ulay sa saiya an mga prinsipyo sa Bibliya, posibleng marhay na nahihiling mo an kamugtakan niya. Tibaad naobserbaran mong namumuhay na siya kauyon kan nanunudan niya. Pero may ibang bagay pa sa buhay niya na gustong ipakipag-ulay kan mga elder sa saindong duwa na magkaibanan.

⁸ An koordineytor kan grupo nin kamagurangan maasignar nin duwang elder (an saro miyembro kan komite sa paglilingkod) para ipakipag-ulay iyan sa saindong duwa. Sa mga kongregasyon na pipira sana an elder, puwede ining gibuhon nin sarong elder asin sarong may kakayahan na ministeryal na lingkod. An mga brother na pinili dapat na maghinguwang magibo tulos an pakikipag-ulay na ini. Sa katunayan, kun sa panahon nin pagtiripon sa kongregasyon maaraman kan mga elder an pagmawot na iyan kan tinutukduan sa Bibliya, tibaad puwede na nindang kaulayon kamong duwa pagkatapos kan pagtiripon. Dapat na bakong pormal na marhay an pag-urulay. Bago aprubaran an tinutukduan sa Bibliya na magin dai pa bawtisadong parahayag, dapat na naaabot na niya an minasunod na mga kuwalipikasyon:

1. (1) Nagtutubod siya na an Bibliya iyo an ipinasabong na Tataramon nin Diyos.—2 Tim. 3:16.

2. (2) Aram niya asin nagtutubod siya sa panginot na mga katukduan kan Kasuratan tanganing kun may maghapot sa saiya, masimbag siya kauyon kan Bibliya asin bakong sigun sa mga katukduan nin palsong relihiyon o sa saiya mismong mga ideya.—Mat. 7:21-23; 2 Tim. 2:15.

3. (3) Sinusunod niya an pagbuot kan Bibliya na makiiba-iba sa mga lingkod ni Jehova sa mga pagtiripon kan kongregasyon kun itinutugot kan saiyang kamugtakan.—Sal. 122:1; Heb. 10:24, 25.

4. (4) Aram niya an itinutukdo kan Bibliya manungod sa seksuwal na imoralidad, na kaiba diyan an pagsambay, poligamya, asin homoseksuwalidad, saka namumuhay siya kauyon kan mga katukduan na iyan. Kun siya may seksuwal na relasyon sa sarong bakong kasekso asin nakaistar sinda sa sarong harong, dapat na legal sindang kasal.—Mat. 19:9; 1 Cor. 6:9, 10; 1 Tim. 3:2, 12; Heb. 13:4.

5. (5) Sinusunod niya an pagbabawal kan Bibliya sa pagburat, o pagbuyong, asin sa gabos na bakong medikal na paggamit nin natural o sintetikong mga substansiya na nakakaadikto o nakakaapektar sa isip.—2 Cor. 7:1; Efe. 5:18; 1 Ped. 4:3, 4.

6. (6) Nasasabutan niya an kahalagahan nin paglikay sa nakakaraot na pag-iriba.—1 Cor. 15:33.

7. (7) Lubos na niyang pinutol an pagigin miyembro nin ano man na palsong relihiyon na tibaad dati niyang kinabibilangan. Dai na siya nag-aatender sa mga seremonya ninda asin dai na nagpapartisipar o nagsusuportar sa saindang mga aktibidad.—2 Cor. 6:14-18; Kap. 18:4.

8. (8) Dai na siya nakikilabot sa gabos na pulitikal na aktibidad kan kinaban.—Juan 6:15; 15:19; Sant. 1:27.

9. (9) Nagtutubod asin namumuhay siya kauyon kan sinasabi sa Isaias 2:4 manungod sa pagdadanay na neutral sa iriwal kan mga nasyon.

10. (10) Talagang gusto niyang magin saro sa Mga Saksi ni Jehova.—Sal. 110:3.

⁹ Kun dai sigurado an mga elder sa sabuot kan tinutukduan sa Bibliya manungod sa arin man sa mga bagay na ini, dapat ninda siyang haputon, puwedeng paagi sa paggamit kan mga tekstong binanggit digdi bilang basehan kan pag-uulay. Mahalagang masabutan niya na an mga nag-iiba sa mga Saksi ni Jehova sa paghuhulit dapat na namumuhay kauyon kan mga kahagadan na ini na suno sa Kasuratan. An mga simbag niya makakatabang sa mga elder na madeterminaran kun baga aram niya kun ano an inaasahan sa saiya asin kun baga kuwalipikado na siya sa rasonableng lebel para umiba sa ministeryo.

¹⁰ Dapat na paaramon tulos kan mga elder an tinutukduan sa Bibliya kun baga kuwalipikado na siya. Sa kadaklan na kamugtakan, puwede ining gibuhon sa pagtatapos kan pag-urulay. Kun kuwalipikado na siya, maugma siyang aakuon kan mga elder bilang sarong parahayag. (Roma 15:7) Dapat siyang dagkahon na magpartisipar tulos sa ministeryo asin magtao nin report nin paglilingkod sa langtad sa katapusan kan bulan. Puwedeng ipaliwanag kan mga elder na kun an sarong tinutukduan sa Bibliya makuwalipikar bilang dai pa bawtisadong parahayag asin magtao na kan inot niyang report, igigibo siya nin Congregation’s Publisher Record asin iiiba iyan sa file kan kongregasyon. Kinukua kan mga elder an nagkapirang personal na impormasyon manungod sa saiya para ilaag sa dokumentong iyan. Nakakatabang iyan tanganing maasikaso kan organisasyon an pangrelihiyon na mga aktibidad kan Mga Saksi ni Jehova sa bilog na kinaban asin tanganing makapartisipar siya sa espirituwal na mga aktibidad asin matawan nin espirituwal na tabang. Apuwera kaiyan, puwedeng sabihon kan mga elder sa bagong mga parahayag na an ano man na kinuang personal na impormasyon iniingatan kauyon kan Global Data Protection Policy kan Mga Saksi ni Jehova na mahihiling sa jw.org.

¹¹ Pag naghihinguwa kitang mas mamidbid pa an bagong parahayag asin nagpapahiling nin personal na interes sa nagigibo niya, puwede ining magkaigwa nin marahayon na epekto sa saiya. Mapapahiro siya na regular na magtao nin report asin urog pang maghinguwa sa paglilingkod ki Jehova.—Fil. 2:4; Heb. 13:2.

¹² Pag madeterminaran na kan mga elder na an tinutukduan sa Bibliya kuwalipikado nang umiba sa ministeryo sa langtad, puwede na ninda siyang tawan nin sadiring kopya kan Organisado sa Paggibo kan Kabutan ni Jehova. Pakatao niya kan inot na report, magkakaigwa nin halipot na paisi sa kongregasyon na siya saro nang dai pa bawtisadong parahayag.

¹³ An mga aki puwede man na makuwalipikar bilang mga parahayag kan maugmang bareta. Maugmang inako ni Jesus an saradit na aki asin binendisyunan sinda. (Mat. 19:13-15; 21:15, 16) Dawa ngani an mga magurang an may panginot na paninimbagan sa mga aki ninda, an iba sa kongregasyon puwede man na makatabang sa mga aki na talagang gusto nang magpartisipar sa paghuhulit kan Kahadian. Kun ika sarong magurang, dakula an magigibo kan saimong marahay na halimbawa sa ministeryo para madagka an mga aki mo na magin maigot sa paglilingkod sa Diyos. Kun an sarong aki na arugan sa paggawi napapahiro gikan sa puso na sabihon sa iba an manungod sa pagtubod niya, ano pang tabang an puwedeng itao sa saiya?

¹⁴ Marahay na rumani an magurang sa sarong elder na miyembro kan Komite sa Paglilingkod kan Kongregasyon asin ipakipag-ulay kun baga kuwalipikado na an aki niya na magin parahayag. Maasignar an koordineytor kan grupo nin kamagurangan nin duwang elder (an saro miyembro kan komite sa paglilingkod) para makipag-ulay sa aki asin sa saksing (mga) magurang niya o nag-aataman sa saiya. Kun an aki igwa nang kaaraman sa panginot na mga katotoohan sa Bibliya asin ipinapahiling niya na gusto na niyang magpartisipar sa ministeryo, indikasyon ini nin marahay na pag-uswag. Pagkatapos na makonsiderar ini asin an iba pang bagay na aplikado man sa mga adulto, madedeterminaran kan duwang elder kun baga an aki puwede nang magin dai pa bawtisadong parahayag. (Luc. 6:45; Roma 10:10) Kun aki an kakaulayon, dai na kaipuhan iiba sa pag-uulay an mga bagay na para lang sa mga adulto asin malinaw na bako man aplikado sa aki.

¹⁵ Sa pakikipag-ulay, dapat na komendaran kan mga elder an aki huli sa pag-uswag niya asin dagkahon siyang gibuhon na pasuhan an pagpabawtismo. Siyerto man na naghinguwang marhay an mga magurang na itadom an katotoohan sa aki ninda, kaya maninigo man sindang komendaran. Para tabangan an mga magurang na urog pang maalalayan an aki ninda, dapat na sabihon sa sainda kan mga elder na basahon an “Mensahe Para sa Kristiyanong mga Magurang,” sa pahina 179-181.

¹⁶ Ngunyan na midbid mo na si Jehova asin namumutan mo na siya paagi sa pagsunod sa saiyang mga kahagadan asin pagpartisipar sa ministeryo, kaipuhan mong pakusugon an relasyon mo sa saiya. Paano? Paagi sa pagdusay sa saiya kan saimong buhay asin pagsimbolisar kaini paagi sa bawtismo sa tubig.—Mat. 28:19, 20.

¹⁷ An pagdusay nangangahulugan nin pagtagama nin sarong bagay para sa sarong sagradong katuyuhan. An pagdusay sa Diyos ginigibo paagi sa pagdulok sa saiya sa pamibi para udok sa pusong mangako sa saiya na gagamiton mo an saimong buhay sa paglilingkod sa saiya saka malakaw ka sa mga dalan niya. Nangangahulugan iyan na itatao mo saiya an lubos mong debosyon sagkod pa man. (Deut. 5:9) Personal na desisyon ini. Daing ibang makakagibo kaiyan para sa saimo.

¹⁸ Pero bako iyan sagkod lang sa pagsabi ki Jehova na gusto mong magin sadiri niya. Kaipuhan mong ipahiling sa iba na nagdusay ka na sa Diyos. Magigibo mo iyan paagi sa pagpabawtismo sa tubig, arog ni Jesus. (1 Ped. 2:21; 3:21) Kun nakapagdesisyon ka nang maglingkod ki Jehova asin gusto mo nang magpabawtismo, ano an dapat mong gibuhon? Sabihon mo iyan sa koordineytor kan grupo nin kamagurangan. Maasignar siya nin nagkapirang elder na makikipag-ulay saimo para siguraduhon na naaabot mo an mga kahagadan nin Diyos para sa bawtismo. Para sa dugang pang impormasyon, repasuhon tabi an “Mensahe Para sa Dai Pa Bawtisadong Parahayag,” sa pahina 182-184 kan librong ini, asin an “Mga Hapot Para sa mga Gusto Nang Magpabawtismo,” sa pahina 185-207.

¹⁹ Sa nag-aging mga taon, nakapakusog sa mga lingkod ni Jehova an mga report manungod sa paghiwas kan dalisay na pagsamba sa bilog na kinaban. Puon kan sabihon ni Jesu-Cristo sa mga disipulo niya na an maugmang bareta ihuhulit sa bilog na daga, gustong-gusto nang mahiling kan tunay na mga Kristiyano kun paano iyan magigibo.—Mat. 28:19, 20; Mar. 13:10; Gibo 1:8.

²⁰ Ugmahon an inot na mga parasunod ni Jesus na madangog an mga report manungod sa pag-uswag sa gibuhon na paghuhulit. (Mar. 6:30) An libro sa Bibliya na Gibo nagsasabi sa sato na mga 120 an presente kan ibubo an banal na espiritu sa mga disipulo kan Pentecostes 33 C.E. Dai nahaloy, an bilang kan mga disipulo uminabot nin mga 3,000 dangan nagin mga 5,000. Sinambit sa report na “padagos na idinadagdag sa sainda ni Jehova aroaldaw idtong mga tawong iliniligtas niya” asin na “dakulang bilang nin mga saserdote an nagturubod.” (Gibo 1:15; 2:5-11, 41, 47; 4:4; 6:7) Siyerto na an mga baretang ini nin pag-uswag nakapakusog sa mga disipulo! An nakakaugmang marhay na mga report na ini siyertong nagpahiro sa sainda na idagos an ipinapagibo sa sainda nin Diyos dawa grabe an pagpersegir na sutsut kan mga Judiong lider nin relihiyon!

²¹ Kan mga 60-61 C.E., irineport ni Pablo sa saiyang surat sa mga taga Colosas na an maugmang bareta “padagos na nagkakaigwa nin bunga asin naglalakop sa bilog na kinaban” saka ‘naihulit na sa gabos na linalang sa irarom nin langit.’ (Col. 1:5, 6, 23) Masinunod an inot na mga Kristiyano sa Tataramon nin Diyos, asin pinakusog sinda kan banal na espiritu para maisagibo an mahiwason na paghuhulit bago an katapusan kan Judiong sistema nin mga bagay kan 70 C.E. Siyertong napakusog an maimbod na mga Kristiyanong idto na madangog an mga report na iyan!

²² Sa kaagid na paagi, hinihinguwa kan organisasyon ni Jehova sa presenteng panahon na magkaigwa nin mga rekord kan gibuhon na paghuhulit bilang kautuban kan Mateo 24:14: “An maugmang baretang ini kan Kahadian ihuhulit sa bilog na kinaban bilang patotoo sa gabos na nasyon, dangan maabot an katapusan.” Bilang nagdusay na mga lingkod nin Diyos, igwa kitang apuradong gibuhon. Dapat na gibuhon ta an sato mismong bilog na makakaya para lubos na maisagibo an ministeryo bago umabot an katapusan. Sisiguraduhon ni Jehova na matapos an gibuhon na ini, asin kun nagpapartisipar kita diyan, mapapasato an pag-uyon niya.—Ezeq. 3:18-21.

²³ Ano dapat tang ireport? An Field Service Report slip hali sa organisasyon nagpapahiling kun anong impormasyon an iiiba sa report. Pero makakatabang an minasunod na detalye.

²⁴ Sa kolum na “Placements (Printed and Electronic),” ilaag an total na bilang nin mga publikasyon—imprentado man o elektroniko—na naitao mo sa mga bakong bawtisadong Saksi. Sa kolum na “Video Showings,” ilaag kun pirang beses ka nakapahiling kan satong mga video.

²⁵ Sa pagreport nin “Return Visits,” ilaag an total na bilang kan ginibo mong pagdalaw para pakusugon an interes kan saro na bakong dusay asin bakong bawtisadong Saksi. An pagdalaw liwat puwedeng gibuhon paagi sa personal na pagdalaw, paagi sa pagsurat, pag-apod sa telepono, pagpadara nin text message o e-mail, o pagdara nin literatura. An kada pagkondukta nin pag-adal sa Bibliya puwedeng ireport na pagdalaw liwat. An sarong magurang puwedeng magreport nin sarong pagdalaw liwat kada semana pag nanginginot siya sa pampamilyang pagsamba na may dai pa bawtisadong aki na presente.

²⁶ An pagkondukta nin pag-adal sa Bibliya sa parati ginigibo kada semana. Pero irinereport iyan na saro sanang pagkondukta nin pag-adal sa Bibliya kada bulan. Dapat na isurat kan parahayag kun pirang magkakalain na pagkondukta nin pag-adal sa Bibliya an isinagibo niya sa laog nin sarong bulan. Kaiba digdi an pagkondukta nin pag-adal sa Bibliya sa mga bakong dusay asin bakong bawtisadong Saksi, sa sarong inaktibong tugang na pigkokonduktahan nin pag-adal sa Bibliya sigun sa instruksiyon nin miyembro kan komite sa paglilingkod, o sa sarong bago pa sanang mabawtismuhan na dai pa natatapos an librong Mabuhay nin Maugma Sagkod Pa Man!

²⁷ Importante an tamang pagreport nin oras (“Hours”). Sa panginot, ini an oras na ginagamit mo sa ministeryong harong-harong, pagdalaw liwat, pagkondukta nin mga pag-adal sa Bibliya, o pagpapatotoo sa pormal asin impormal na paagi sa mga tawo na bakong dusay asin bakong bawtisadong Saksi. Kun magkaibanan an duwang parahayag, pareho sinda puwedeng magreport nin oras, pero saro sana an mareport kan pagdalaw liwat o pagkondukta nin pag-adal sa Bibliya. An mga magurang na parehong nagtutukdo sa mga aki ninda sa oras kan Pampamilyang Pagsamba puwedeng magreport nin sagkod sa sarong oras kada semana. Puwedeng ireport kan mga brother an oras na ginamit ninda sa pampublikong pahayag. Puwede man na ireport kan interpreter sa pampublikong pahayag an oras na ginamit diyan. May mahalagang mga aktibidad na dai irinereport an oras na ginamit diyan, arog baga kan pag-andam bago maglingkod sa langtad, pag-atender sa pagtiripon bago maglingkod sa langtad, asin pag-asikaso sa iba pang mga bagay.

²⁸ Dapat na sunudon kan kada parahayag an sinasabi kan saiyang konsiyensiya na sinanay sa Bibliya pag nagdedesisyon kun pirang oras an masasabi niyang ginamit niya sa paglilingkod. May mga parahayag na naghuhulit sa matawuhon na mga lugar, pero an iba naghuhulit sa mga teritoryong pipira sana an nakaistar tapos kaipuhan an huruhalawig na pagbiyahe. Magkakalain an mga teritoryo; magkakaiba man an mga parahayag sa pagmansay ninda sa ministeryo ninda. Dai ipinipirit kan Namamahalang Grupo an sinasabi kan konsiyensiya ninda manungod sa kun paano bibilangon kan mga parahayag sa bilog na kinaban an oras na ginamit ninda sa paglilingkod sa langtad, asin mayo man nin pignombrahan para magdesisyon manungod sa bagay na ini.—Mat. 6:1; 7:1; 1 Tim. 1:5.

²⁹ An oras na ginagamit sa paglilingkod sa langtad dapat na ireport nin bilog na mga oras. May eksepsiyon digdi kun an sarong parahayag nalilimitaran na marhay huli sa kagurangan, dai na makaluwas sa harong dahil sa hilang o diperensiya sa pisikal, yaon sa nursing home, o limitado na an nagigibo huli sa iba pang dahilan. An siring na parahayag puwedeng magreport nin 15, 30, o 45 minutos. Dawa 15 minutos sana siyang nakapagpatotoo sa laog nin sarong bulan, dapat niyang ireport ini. Ibibilang siya na regular na parahayag kan Kahadian. An areglong ini aplikado man sa sarong parahayag na temporaryong nalilimitaran, tibaad dai makalakaw sa laog nin sarong bulan o labi pa huli sa grabeng hilang o pagkairido. An probisyon na ini para sana sa mga limitadong marhay an magigibo. An komite sa paglilingkod an madeterminar kun baga kuwalipikado sa areglong ini an sarong parahayag.

³⁰ An saimong report nin paglilingkod sa langtad kada bulan irinerekord sa Congregation’s Publisher Record. An mga rekord na ini pagsadiri kan lokal na kongregasyon. Kun plano mong maglipat sa ibang kongregasyon, siguraduhon na paaramon an mga elder nindo. Sisiguraduhon kan sekretaryo na maipadara an saimong mga rekord sa lilipatan mong kongregasyon. Paagi kaini, an mga elder sa lilipatan mong kongregasyon magigin mas andam sa pag-ako saimo asin sa pagtao saimo nin espirituwal na tabang. Kun mayo ka sa kongregasyon nindo sa laog nin dai pang tulong bulan, padagos tabing ipadara sa kongregasyon nindo an saimong mga report.

³¹ Nalilingawan mo daw kun minsan na itao an saimong report? Siyertong gabos kita kaipuhan na pagirumdumon paminsan-minsan. Pero kun igwa kita nin tamang sabuot manungod sa pagreport asin kun nasasabutan niyato kun taano ta mahalaga iyan, makakatabang iyan sa sato na dai malingaw na ireport an satong paglilingkod sa langtad.

³² May mga naghahapot: “Aram na man ni Jehova an ginigibo ko sa paglilingkod sa saiya, kaya taano ta kaipuhan ko pang magtao nin report sa kongregasyon?” Totoo, aram ni Jehova an ginigibo ta, saka aram niya kun baga an satong paglilingkod bilog na puso o paramas sana. Pero, girumdumon na irinekord ni Jehova kun nagpirang aldaw si Noe sa arka asin kun pirang taon na nagbaklay an mga Israelita sa kaawagan. Irinekord nin Diyos kun pira an mga maimbod asin an mga dai nagsunod. Irinekord niya an luway-luway na pagsakop sa daga nin Canaan saka an mga nagibo kan maimbod na mga hukom kan Israel. Iyo, irinekord niya an dakul na detalye mapadapit sa mga aktibidad kan mga lingkod niya. Ipinasurat niya an mga iyan kaya nasasabutan ta na mahalaga sa saiya an pagkaigwa nin tamang mga rekord.

³³ An mga pangyayari sa kasaysayan na mababasa sa Bibliya nagpapahiling na tama asin eksakto an mga report asin rekord kan banwaan ni Jehova. Sa dakul na kamugtakan, kulang an puwersa kan salaysay sa Bibliya kun dai irineport an espesipikong mga bilang. Hilinga an minasunod na mga halimbawa: Genesis 46:27; Exodo 12:37; Hokom 7:7; 2 Hadi 19:35; 2 Cronica 14:9-13; Juan 6:10; 21:11; Gibo 2:41; 19:19.

³⁴ Dawa ngani dai kaiba sa mga report niyato an gabos na ginigibo ta sa pagsamba ki Jehova, dakula an naitatabang kaiyan sa organisasyon ni Jehova. Kan inot na siglo, pagbalik kan mga apostol hali sa paghuhulit, irineport ninda ki Jesus “an gabos na bagay na ginibo asin itinukdo ninda.” (Mar. 6:30) Kun beses, mahihiling sa mga report na kaipuhan tawan nin atensiyon an sarong aspekto kan satong ministeryo. Tibaad mahiling diyan na may pag-uswag sa nagkapirang aktibidad pero nagluya man sa ibang aspekto, arog baga kan pagdakul nin mga parahayag. Tibaad kaipuhan nin pampakusog o may mga problema na dapat resolberan. Tatawan nin atensiyon kan mga paraataman an mga report asin hihinguwahon nindang asikasuhon an ano man na posibleng nakakaulang sa pag-uswag nin mga indibidwal o kan kongregasyon.

³⁵ An mga report nakakatabang man sa organisasyon para mahiling kun sain na mga lugar mas nangangaipo nin mga parahulit. Anong mga lugar an mas mabunga? Sain dikit an pag-uswag? Anong mga publikasyon an kaipuhan para matabangan an mga tawo na makanuod kan katotoohan? An mga report nakakatabang sa organisasyon na maaraman kun anong mga literatura an kaipuhan sa paghuhulit sa lain-lain na parte kan kinaban asin maitao an mga pangangaipong iyan.

³⁶ Nakakapakusog sa sato an mga report. Bako daw na nauugma kitang marhay pag nababaretaan ta an nagigibo kan mga tugang sa paghuhulit kan maugmang bareta sa bilog na kinaban? An mga report nin pag-uswag nakakatabang sa sato na mahiling an paghiwas kan organisasyon ni Jehova. Napapakusog kita kan mga eksperyensiya saka napapahiro kita kaiyan na magin maigot asin lubos na makikabtang sa paghuhulit. (Gibo 15:3) Mahalaga an kooperasyon ta sa pagtao nin mga report nin paglilingkod sa langtad asin ipinapahiling kaiyan na interesado kita sa mga tugang sain man na lugar. Sa sadit na paaging ini, ipinapahiling niyato na nagpapasakop kita sa areglo kan organisasyon ni Jehova.—Luc. 16:10; Heb. 13:17.

³⁷ Mayo nin dahilan na ikumparar ta sa ibang tugang an satong paglilingkod. (Gal. 5:26; 6:4) Iba-iba an satong mga kamugtakan. Pero makikinabang kitang marhay kun magkakaigwa kita nin realistikong mga pasuhan para mahiling ta an satong pag-uswag sa ministeryo. Pag naabot ta an mga iyan, makakamati kita nin kaugmahan sa mga nagigibo ta.

³⁸ Hiling-hiling na talagang pinaparikas ni Jehova an pagtipon sa mga tawong poproteksiyunan niya sa panahon kan “grabeng kasakitan.” Nabubuhay na kita sa panahon na nauutob an hula ni Isaias: “An dikit magigin sangribo, asin an sadit magigin makusog na nasyon. Ako mismo, si Jehova, an maparikas kaiyan sa sadiri kaiyan na panahon.” (Kap. 7:9, 14; Isa. 60:22) Dakulang pribilehiyo nanggad na magin mga ministro kan maugmang bareta sa huring mga aldaw na ini!—Mat. 24:14.