Pagsuportar sa mga Aktibidad na Pang-Kahadian sa Sadiring Lugar Asin sa Bilog na Kinaban

BILANG kautuban kan hula ni Jesus manungod sa huring mga aldaw, ihinuhulit kan mga Saksi ni Jehova an maugmang bareta sagkod “sa pinakaharayong parte kan daga.” (Gibo 1:8; Mat. 24:14) Para magibo ini, lubos nindang itinatao an saindang panahon asin kusog sa pagpaabot sa iba nin espirituwal na mga bagay. Huling nagtitiwala ki Jehova na itatao an pangangaipo kan saiyang mga kapwa trabahador, padagos nindang iniinot sa saindang buhay an Kahadian nin Diyos. (Mat. 6:25-34; 1 Cor. 3:5-9) Hiling-hiling sa mga resulta an pag-uyon asin bendisyon ni Jehova.

² Pag nahihiling kan iba an satong paagi nin paghuhulit asin naaaraman ninda na daing bayad an idinidistribwir tang mga Bibliya saka mga babasahon na basado sa Bibliya, may mga naghahapot: “Paano nindo iyan nagigibo?” Totoo, nangangaipo nin kuwarta para makaimprenta asin makagibo nin mga Bibliya saka mga babasahon na basado sa Bibliya. Nangangaipo man nin kuwarta para makatugdok asin magmentenar nin mga Bethel home para sa mga ministro na nagtatrabaho sa mga imprentahan, nagtatao nin superbisyon sa paghuhulit, asin naglilingkod sa iba pang paagi para palakupon an maugmang bareta. Dugang pa, an mga paraataman nin sirkito, misyonero, espesyal payunir, asin iba pa na nasa espesyal na bilog na panahon na paglilingkod tinatawan nin materyal na asistensiya para makapadagos sinda sa gibuhon. Iyo, dakulang kantidad an nagagamit sa paghuhulit kan maugmang bareta sa satong panahon, sa sadiri tang lugar man iyan o sa bilog na kinaban. Sain hali an gabos na pondong iyan?

³ Dakul an nagpapahalaga sa ginigibong pagtutukdo sa Bibliya kan mga Saksi ni Jehova asin nauugma sindang magdonar sa pambilog na kinaban na gibuhon. Pero sa panginot, an gibuhon ta suportado niyato mismo na mga Saksi, asin an iba sa sato direktang nagpapadara nin boluntad na mga donasyon sa lokal na mga sangang opisina kan Mga Saksi ni Jehova. Gikan sa buot na itinatao ta iyan arog kan suanoy na mga lingkod nin Diyos na bukas-palad na nagsuportar sa pagtugdok kan lugar nin pagsamba ki Jehova. (Ex. 35:20-29; 1 Cron. 29:9) An nagkapirang donasyon nareresibi bilang ipinamanang mga pagsadiri paagi sa testamento, mantang an ibang mga donasyon hali sa mga indibidwal, kongregasyon, asin sirkito na sa parati saradit na kantidad sana. Pag pinag-iriba, an mga donasyon na iyan an nagigin pondo para maipadagos an ministeryo.

⁴ Para sa mga Saksi ni Jehova, sarong pribilehiyo na gamiton an saindang kuwarta asin iba pang bagay na igwa sinda para sa pagpahiwas kan paghuhulit. Si Jesus asin an mga disipulo niya igwa nin iniingatan na kahon nin kuwarta, na nagpapahiling na may mga nagtatao nin donasyon para tabangan sinda sa saindang panggastos. (Juan 13:29) May sinambit sa Bibliya na mga babaying nag-asikaso sa mga pangangaipo ni Jesus asin kan mga disipulo niya. (Mar. 15:40, 41; Luc. 8:3) Mapagpasalamat na inako ni apostol Pablo an materyal na tabang na may pagkamuot na itinao kan mga tawong gustong mapalakop an maugmang bareta asin suportaran an ministeryo niya. (Fil. 4:14-16; 1 Tes. 2:9) Padagos na inaarog kan mga Saksi ni Jehova an suanoy na mga halimbawang ini nin maigot na paglilingkod asin bukas-palad na pagtao. Huli kaini, an “tubig nin buhay na daing bayad” naiaalok sa mga sadiyosan an puso sain man na lugar.—Kap. 22:17.

⁵ An mga gastos kan kongregasyon natataparan man kan boluntad na mga donasyon. Mayong pangungulekta asin dai man kinukuwenta kun gurano an dapat itao kan kada saro, asin dai man nangso-solicit nin kuwarta. Igwang mga kahon nin donasyon sa mga lugar nin pagtiripon tanganing an lambang saro makapagtao “uyon sa napagdesisyunan niya sa saiyang puso.”—2 Cor. 9:7.

⁶ Sa panginot, an kuwartang idinodonar ginagamit para sa mga gastos sa paggamit kan Kingdom Hall asin sa pagmentenar kaiyan. Puwedeng magdesisyon an grupo nin kamagurangan na an ibang porsiyon kan donasyon ipadara sa lokal na sangang opisina kan Mga Saksi ni Jehova para magamit sa pagpalakop kan pambilog na kinaban na gibuhon. Iaatubang iyan sa kongregasyon bilang resolusyon. Paagi kaini, dakul na kongregasyon an regular na nakakadonar sa pambilog na kinaban na gibuhon. Kun an gabos listo sa pagtabang pag may pangangaipo an kongregasyon sa pana-panahon, dai na kaipuhan na parating ipaisi an mapadapit sa kontribusyon.

⁷ Pagkatapos kan kada pagtiripon, duwang brother an nagkukua kan kuwarta sa mga kahon nin donasyon asin irinerekord iyan. (2 Ha. 12:9, 10; 2 Cor. 8:20) An grupo nin kamagurangan naggigibo nin mga areglo para maingatan an mga pondong ini sagkod na puwede nang ipadara iyan sa sangang opisina o gamiton para sa pangangaipo kan kongregasyon. An brother na nagkakapot kan accounts kan kongregasyon naggigibo nin bulanan na report para maimpormaran an kongregasyon manungod sa accounts. Tapos kada tulong bulan, naggigibo nin areglo an koordineytor kan grupo nin kamagurangan na ma-audit an accounts.

⁸ An mga gastos para sa mga asembleya, saka an iba pang gastos kan sirkito, natataparan paagi sa mga donasyon kan mga Saksi na kabilang sa sirkito. May mga kahon nin donasyon na ilinalaag sa mga pasilidad nin asembleya para sa boluntad na mga donasyon sa sirkito. Apuwera kaiyan, puwedeng magtao nin kontribusyon an mga kongregasyon sa ibang pagkakataon para sa iba pang mga gastuson kan sirkito.

⁹ Inaasahan na matataparan kan sirkito an ano man na kinakaipuhan na gastos, asin na an sobrang pondo idodonar sa pambilog na kinaban na gibuhon. Kun warang igong pondo sa account kan sirkito para mataparan an mga gastos sa asembleya o an patiinot na mga gastos para sa masunod na asembleya arog kan pandeposito sa pasilidad na gagamiton, puwedeng magtao nin instruksiyon an paraataman nin sirkito na ipaisi sa mga kongregasyon na may pribilehiyo sindang magdonar. Pag-uulayan iyan kan lambang grupo nin kamagurangan asin aaramon ninda kun gurano an kayang idonar kan kongregasyon para sa pondo kan sirkito. Dangan, iaatubang ninda iyan sa kongregasyon bilang resolusyon.

¹⁰ Pag may pinansiyal na mga bagay na kaipuhan pag-ulayan kan mga elder sa sirkito, nagkakaigwa nin miting an mga elder sa aldaw mismo kan pansirkitong asembleya. An gabos na desisyon, apuwera sa mga may koneksiyon sa regular na mga gastos kan sirkito dapat na aprubado kan mga elder paagi sa resolusyon. Dapat na nakasurat sa mga resolusyon na ini an eksaktong kantidad asin dapat paaprubaran iyan kada may ilinuluwas na pondo kan sirkito.

¹¹ May ginigibong areglo para sa regular na pag-audit kan accounts kan sirkito.

¹² An sarong katuyuhan kaya igwa nin kahon nin kuwarta si Jesus asin an mga disipulo niya iyo na para tabangan an mga pobre. (Mar. 14:3-5; Juan 13:29) Responsabilidad pa man giraray iyan kan mga Kristiyano ngunyan ta sinabi ni Jesus: “An mga pobre pirmi nindong kaibanan.” (Mar. 14:7) Paano iyan ginigibo ngunyan kan mga Saksi ni Jehova?

¹³ Kun minsan, may mga maimbod na tugang sa kongregasyon na tibaad mangaipo nin materyal na tabang huli sa paggurang, kamatian, o sarong problema na dai ninda kontrolado. An mga kapamilya, paryente, asin iba pa na nakaaram kan sitwasyon tibaad mapahirong tumabang. Kauyon ini kan sinabi ni apostol Juan: “Kun an saro igwa nin materyal na mga pagsadiri sa kinaban na ini asin nahihiling niya na nangangaipo an saiyang tugang pero habo niyang magpahiling nin malasakit sa saiya, paano masasabing igwa siya nin pagkamuot sa Diyos? Mga namumutan kong aki, dapat kitang mamuot, bakong paagi sa tataramon o paagi sa dila, kundi paagi sa gibo asin katotoohan.” (1 Juan 3:17, 18; 2 Tes. 3:6-12) Kaiba sa tunay na pagsamba an pag-asikaso sa mga maimbod na tugang na tibaad nangangaipo nin materyal na tabang.—Sant. 1:27; 2:14-17.

¹⁴ Sa inot na surat ni Pablo ki Timoteo, ipinaliwanag niya kun paano maitatao an materyal na tabang sa mga maninigong tawan kaiyan. Mababasa iyan sa 1 Timoteo 5:3-21. An lambang Kristiyano an may panginot na responsabilidad sa pag-asikaso sa pangangaipo kan saiyang sadiring pamilya. An mga gurang o may kamatian dapat na tabangan kan saindang mga aki, makuapo, o iba pang haraning paryente. Kun minsan, may makukuang pinansiyal na asistensiya hali sa gobyerno o sa mga social welfare program. Kaya puwede sindang tabangan kan mga paryente o kan iba pa na mag-aplay para sa siring na asistensiya. Pero may mga sitwasyon na tibaad kaipuhan na konsideraron kan kongregasyon an pagtao nin sarong partikular na tabang sa nagtitios na mga tugang na haloy nang maimbod na naglilingkod. Kun mayong kapamilya o ibang paryente na makakatabang sa sainda asin warang makukuang igong asistensiya hali sa mga ahensiya nin gobyerno, an grupo nin kamagurangan puwedeng gumibo nin angay na rekomendasyon para makatao nin tabang. Para sa mga Kristiyano, sarong pribilehiyo na ihiras sa mga nangangaipo an materyal na mga bagay na igwa sinda.

¹⁵ Dakul na tugang an posibleng mangaipo nin tabang dahil sa pagpersegir, giyera, linog, baha, tiggutom, o iba pang kalamidad na parating nangyayari sa delikadong mga panahon na ini. (Mat. 24:7-9) An lokal na mga kongregasyon posibleng mayo lamang nin ikakatao sa lambang saro. Kaya may ginigibong areglo an Namamahalang Grupo para makatao nin tabang an mga tugang sa ibang lugar. Kapareho ini kan ginibo kan mga Kristiyano sa Asia Minor kan magpadara sinda nin mga kakanon sa mga tugang sa Judea kan magkaigwa nin tiggutom. (1 Cor. 16:1-4; 2 Cor. 9:1-5) Paagi sa pag-arog sa halimbawa ninda, pinapatunayan ta an satong pagkamuot sa mga tugang asin ipinapahiling niyato na kita tunay na mga disipulo ni Jesu-Cristo.—Juan 13:35.

¹⁶ An pagdistribwir nin mga Bibliya asin mga literatura na basado sa Bibliya may importanteng papel sa pagpalakop kan mensahe kan Kahadian. Sa parati, sarong ministeryal na lingkod an inaasignaran kan grupo nin kamagurangan na mag-asikaso kan suplay nin mga literatura sa kongregasyon. Seryoso sa paninimbagan ninda an mga brother na inasignaran kaiyan. Igwa sinda nin maayos na rekord tanganing masigurado na pirming may igong suplay an kongregasyon.

¹⁷ Bilang nagdusay na mga Kristiyano, aram niyato na an satong panahon, kusog, dunong, talento, materyal na pagsadiri, pati na an sato mismong buhay regalo hali sa Diyos para gamiton ta sa paglilingkod sa saiya. (Luc. 17:10; 1 Cor. 4:7) Kun ginagamit ta sa tamang paagi an gabos na bagay na igwa kita, ipinapahiling ta kun gurano kararom kan satong pagkamuot ki Jehova. Gusto niyato na tawan nin onra si Jehova paagi sa paggamit kan mahalagang mga bagay na igwa kita huling aram niyato na nauugma siya sa ano man na regalong itinatao ta bilang kapahayagan kan satong bilog na kalag na debosyon. (Tal. 3:9; Mar. 14:3-9; Luc. 21:1-4; Col. 3:23, 24) Nagsabi si Jesus: “Inako nindong daing bayad, itao nindong daing bayad.” (Mat. 10:8) Mantang ginagamit ta sa paglilingkod ki Jehova an satong panahon, kusog, saka mga bagay na igwa kita, lalo man na nagigin maugma kita.—Gibo 20:35.