Pirming Magin Harani ki Jehova

1, 2. Sain kita makakakua nin proteksiyon ngunyan?

ISIPON na naglalakaw ka sa luwas. Maduros asin madagom an kalangitan, dangan nagpuon na magkikilat saka magdaguldol. Tapos, buminagsak an makusog na uran. Kaya naghanap ka nin masisirungan. Grabe an pasalamat mo kan makahanap ka nin ligtas asin marang lugar!

² Arog kaiyan an sitwasyon ta ngunyan. Lalo pang nagraraot an mga kamugtakan sa kinaban. Tibaad iniisip mo, ‘Sain daw ako makakakua nin proteksiyon?’ An salmista sa Bibliya nagsurat: “Sasabihon ko ki Jehova: ‘Ika an sakong pailihan asin an sakong kuta, an sakuyang Diyos, na sa saimo ako nagtitiwala.’” (Salmo 91:2, NW) Iyo, matatabangan kita ni Jehova sa satong mga problema ngunyan, asin tinatawan niya kita nin magayunon na paglaom sa maabot na panahon.

3. Paano ta magigin pailihan o proteksiyon si Jehova?

³ Paano kita pinoprotektaran ni Jehova? Matatabangan niya kita na maatubang an ano man na problema ta, saka talagang mas makapangyarihan siya kisa sa siisay man na gustong gumibo nin maraot sa sato. Dawa pa may mangyaring maraot sa sato ngunyan, makakasigurado kita na sa maabot na panahon papakarhayon ni Jehova an ano man na danyos na resulta kaiyan. Pinapakusog kita kan Bibliya: “Magdanay kamo sa pagkamuot nin Diyos.” (Judas 21) Kaipuhan ta pirming magin harani ki Jehova para matabangan niya kita pag may mga problema kita. Pero paano ta iyan magigibo?

4, 5. Paano ipinahiling ni Jehova an saiyang pagkamuot sa sato?

⁴ Tangani na pirming magin harani ki Jehova, dapat tang isip-isipon kun gurano niya kita kapadaba. Isipon an gabos na ginibo ni Jehova para sa sato. Tinawan niya kita nin magayon na planetang Daga na pano nin magagayon na tinanom asin mga hayop. Tinawan man niya kita nin masiram na mga kakanon asin malinig na tubig. Paagi sa Bibliya, itinukdo sa sato ni Jehova an saiyang pangaran asin an marahayon niyang mga karakteristiko. Urog sa gabos, ipinahiling niya an saiyang pagkamuot sa sato kan isugo niya digdi sa daga an namumutan niyang Aki na si Jesus tanganing itao an saiyang buhay para sa sato. (Juan 3:16) Asin huli sa sakripisyong iyan, igwa kita nin magayunon na paglaom sa maabot.

⁵ Ginibo ni Jehova an Mesiyanikong Kahadian, sarong gobyerno sa langit na iyo an matapos kan gabos na kasakitan sa dai na mahahaloy. Gigibuhon kan Kahadian na iyan na magin paraiso an bilog na daga, na diyan an mga tawo mabubuhay nin matuninong asin maugma sagkod pa man. (Salmo 37:29) Ipinahiling man sa sato ni Jehova na namumutan niya kita paagi sa pagtukdo sa sato kun paano kita magkakaigwa nin maugmang buhay ngunyan. Gusto niyang mamibi kita sa saiya, asin pirmi siyang handa na magdangog sa sato. Hiling-hiling talaga na namumutan ni Jehova an kada saro sa sato.

6. Paano mo maipapahiling na pinapahalagahan mo an pagkamuot ni Jehova?

⁶ Paano mo maipapahiling na pinapahalagahan mo an pagkamuot ni Jehova? Ipahiling mo sa saiya na nagpapasalamat ka sa gabos na ginibo niya para sa saimo. Nakakamundo, dakul ngunyan an daing utang na buot. Arog man kaiyan kaidtong yaon pa sa daga si Jesus. Kan paumayan niya an sampulong lalaking may leproso, o ketong, saro sana an nagpasalamat ki Jesus. (Lucas 17:12-17) Gusto tang arugon an sarong idto na nagpasalamat ki Jesus. Gusto ta pirming magpasalamat ki Jehova.

7. Paano ta dapat mamutan si Jehova?

⁷ Dapat man niyatong ipahiling na namumutan ta si Jehova. Sinabi ni Jesus sa saiyang mga disipulo na dapat na mamutan ninda si Jehova sa bilog nindang puso, sa bilog nindang kalag, asin sa bilog nindang isip. (Basahon an Mateo 22:37.) Ano an buot sabihon kaiyan?

8, 9. Paano ta maipapahiling ki Jehova na namumutan ta siya?

⁸ Tama na daw na sabihon tang namumutan ta si Jehova? Bako. Kun namumutan ta si Jehova sa bilog niyatong puso, kalag, asin isip, ipapahiling ta iyan sa gibo. (Mateo 7:16-20) Malinaw na itinutukdo kan Bibliya na kun namumutan ta an Diyos, susunudon ta an mga tugon niya. Dipisil daw iyan? Bako, huling an “mga tugon [ni Jehova] bakong magabat.”—Basahon an 1 Juan 5:3.

⁹ Pag sinusunod ta si Jehova, nagigin maugma kita asin kontento sa buhay. (Isaias 48:17, 18) Pero ano an makakatabang sa sato na pirming magin harani ki Jehova? Aramon ta.

10. Taano ta kaipuhan mong padagos na mag-adal manungod ki Jehova?

¹⁰ Paano ka nagin amigo ni Jehova? Paagi sa pag-adal mo nin Bibliya, mas nabisto mo si Jehova asin nagin amigo mo siya. An pagigin mag-amigong iyan puwedeng iagid sa kalayo na gusto mong padagos na naglalaad. Kun paanong kaipuhan gatungan an kalayo tanganing padagos na maglaad, kaipuhan mo man na padagos na mag-adal manungod ki Jehova tanganing magpadagos na makusog an relasyon mo sa saiya.—Talinhaga 2:1-5.

11. Ano an puwedeng magin epekto sa saimo kan mga katukduan sa Bibliya?

¹¹ Sa padagos mong pag-adal nin Bibliya, may mga manunudan ka na talagang makakapahiro sa puso mo. Isipon an namatian kan duwa sa mga disipulo ni Jesus kan may ipaliwanag siya sa sainda na mga propesiya sa Bibliya. Sinabi ninda: “Bakong naglalaad an satuyang mga puso kan kaulay niya kita sa dalan, mantang ipinapaliwanag niya sa sato nin malinaw an Kasuratan?”—Lucas 24:32.

12, 13. (a) Ano an puwedeng mangyari sa satong pagkamuot sa Diyos? (b) Ano an puwede tang gibuhon tangani na pirming makusog an satong pagkamuot ki Jehova?

¹² Arog kan mga disipulong idto na napahiro an puso kan masabutan ninda an Kasuratan, posibleng namati mo man na garo naglalaad an puso mo kan masabutan mo an Bibliya. Nakatabang ini saimo na mamidbid si Jehova asin mamutan siya. Dai mo gugustuhon na magluya an pagkamuot na iyan.—Mateo 24:12.

¹³ Pag amigo ka na nin Diyos, dapat na pagmaigutan mo na pirming magin harani sa saiya. Dapat na padagos mong pag-adalan an manungod sa saiya saka ki Jesus asin pag-isipan an mga nanunudan mo saka kun paano mo iyan isasabuhay. (Juan 17:3) Pag binabasa o pinag-aadalan mo an Bibliya, haputon an saimong sadiri: ‘Ano an itinutukdo kaini sa sako manungod sa Diyos na Jehova? Taano ta dapat ko siyang mamutan sa bilog kong puso asin kalag?’—1 Timoteo 4:15.

14. Paano nakakatabang an pamibi para pirming magin makusog an satong pagkamuot ki Jehova?

¹⁴ Pag may dayupot kang amigo, pirmi kamong nag-uulay, kaya pirming makusog an pag-ibanan nindo bilang mag-amigo. Pag regular man kitang nakikipag-ulay ki Jehova sa pamibi, pirmi man na magigin makusog an pagkamuot ta sa saiya. (Basahon an 1 Tesalonica 5:17.) An pamibi sarong marahayon na regalo hali sa satong Ama sa langit. Kaya dapat na pirming hali sa puso an mga sasabihon ta sa saiya. (Salmo 62:8) An satong mga pamibi dapat na bakong tinuom o pauruutro; dapat sinsero iyan. Iyo, kun padagos tang pag-aadalan an Bibliya asin mamimibi nin udok sa puso, padagos na magigin makusog an satong pagkamuot ki Jehova.

15, 16. Ano an masasabi mo manungod sa gibuhon na paghuhulit?

¹⁵ Kun gusto ta na pirming magin harani ki Jehova, dapat ta man na sabihon sa iba an manungod sa satong pagtubod. An pagsabi sa iba manungod ki Jehova sarong magayunon na pribilehiyo. (Lucas 1:74) Saka sarong responsabilidad iyan na itinao ni Jesus sa gabos na tunay na Kristiyano. An lambang saro sa sato dapat na maghulit kan maugmang bareta kan Kahadian nin Diyos. Ginigibo mo na daw iyan?—Mateo 24:14; 28:19, 20.

¹⁶ Mahalagang marhay para ki apostol Pablo an paghuhulit; inapod niya iyan na “kayamanan.” (2 Corinto 4:7) An pakikipag-ulay sa iba manungod ki Jehova asin sa saiyang katuyuhan an pinakaimportanteng gibuhon na magigibo mo. Sarong paagi iyan para mapaglingkudan mo si Jehova, asin pinapahalagahan niya an ginigibo mong iyan para saiya. (Hebreo 6:10) Saka pag naghuhulit ka, ika pati an nagdadangog sa saimo parehong nakikinabang ta natatabangan mo sinda saka an sadiri mo na magin harani ki Jehova asin makamtan an buhay na daing katapusan. (Basahon an 1 Corinto 15:58.) Igwa pa daw nin ibang gibuhon na mas makakapaugma sa saimo?

17. Taano ta apretado an gibuhon na paghuhulit?

¹⁷ Apretadong marhay an gibuhon na paghuhulit. Dapat tang ‘ihulit an tataramon,’ asin ‘gibuhon iyan na may pagkaapurado.’ (2 Timoteo 4:2) Kaipuhan madangog kan mga tawo an mapadapit sa Kahadian nin Diyos. Sinasabi kan Bibliya: “Harani na an dakulang aldaw ni Jehova. Harani na asin marikason an pag-abot kaiyan!” An katapusan “dai mahuhuri!” (Sofonias 1:14, NW; Habacuc 2:3, NW) Iyo, madali nang tapuson ni Jehova an maraot na kinaban ni Satanas. Bago iyan mangyari, dapat na mapatanidan an mga tawo para matawan sinda nin tsansa na paglingkudan si Jehova.

18. Taano ta dapat niyatong sambahon si Jehova kaiba kan iba pang tunay na mga Kristiyano?

¹⁸ Gusto ni Jehova na sambahon ta siya kaiba kan iba pang tunay na mga Kristiyano. Sinasabi kan Bibliya: “Padagos tang isip-isipon an kada saro sa katuyuhan na mapahiro an lambang saro na magpahiling nin pagkamuot asin marahay na mga gibo, na dai pinapabayaan an satuyang pagtiripon, siring kan nakaugalian na nin nagkapira, kundi padagos na pinapakusog an lambang saro, lalo na ta nahihiling nindo na an aldaw harani na.” (Hebreo 10:24, 25) Dapat tang gibuhon an satong pinakamakakaya na makaatender sa gabos na pagtiripon. Tinatawan kita kaiyan nin oportunidad na pakusugon an lambang saro.

19. Ano an makakatabang sa sato na mamutan an satong Kristiyanong mga tugang?

¹⁹ Sa pag-atender mo sa mga pagtiripon, magkakaigwa ka nin marahay na mga amigo na matabang saimo na sambahon si Jehova. Dakul kang mabibistong mga brother asin sister na, arog mo, ginigibo man an saindang pinakamakakaya para sambahon si Jehova. Saka arog mo, bako sindang perpekto kaya nasasala man sinda. Kaya pag nakagibo sinda nin sala, magin handang magpatawad. (Basahon an Colosas 3:13.) Pirming hilingon an marahay na mga kuwalidad kan saimong Kristiyanong mga tugang. Makakatabang iyan para mamutan mo sinda asin mas maparani ka ki Jehova.

20, 21. Ano an “tunay na buhay”?

²⁰ Gusto ni Jehova na an gabos niyang amigo magkaigwa kan pinakamarahay na buhay. Itinutukdo sa sato kan Bibliya na an satong buhay sa maabot na panahon talagang magigin ibang-iba sa buhay ta ngunyan.

²¹ Maabot an panahon, mabubuhay kita, bako sanang 70 o 80 taon, kundi daing sagkod. Magkakaigwa kita nin “buhay na daing katapusan” na perpekto an hawak, asin nin katuninungan saka kaugmahan sa magayunon na paraiso. Iyan an inaapod kan Bibliya na “tunay na buhay.” Nangangako si Jehova na itatao niya sa sato an tunay na buhay na ini, pero dapat tang gibuhon ngunyan an bilog tang makakaya na ‘makapangapot diyan nin higot.’—1 Timoteo 6:12, 19.

22. (a) Paano kita ‘makakapangapot nin higot sa tunay na buhay’? (b) Taano ta bakong bayad sa paglilingkod ta an tunay na buhay?

²² Paano kita ‘makakapangapot nin higot sa tunay na buhay’? Dapat kitang “gumibo . . . nin marahay” asin “magin mayaman sa marahay na mga gibo.” (1 Timoteo 6:18) Nangangahulugan ini na kaipuhan niyatong isabuhay an mga nanunudan ta sa Bibliya. Pero, an tunay na buhay dai nakadepende sa sadiri tang mga paghihinguwa. An buhay na daing sagkod bakong bayad sa paglilingkod ta. Regalo iyan ni Jehova sa saiyang maimbod na mga lingkod, sarong halimbawa kan saiyang “daing kapantay na kabuutan.” (Roma 5:15) Gustong-gusto kan satong Ama sa langit na iregalo iyan sa maimbod niyang mga lingkod.

23. Taano ta kaipuhan mong gumibo nin tamang mga desisyon ngunyan?

²³ Haputon an saimong sadiri, ‘Sinasamba ko daw an Diyos sa paaging inuuyunan niya?’ Kun marisa mo na may kaipuhan kang baguhon, dapat mong gibuhon iyan tulos. Pag nagtitiwala kita ki Jehova asin ginigibo niyato an bilog tang makakaya para sunudon siya, magigin pailihan o proteksiyon ta siya. Poprotektaran niya an saiyang maimbod na mga lingkod sa huring mga aldaw kan maraot na kinaban ni Satanas. Saka sisiguraduhon ni Jehova na mabubuhay kita nin daing katapusan sa Paraiso, arog kan ipinanuga niya. Iyo, mapapasaimo an tunay na buhay kun magibo ka nin tamang mga desisyon ngunyan!