Mga Leksiyon sa Bisyon ni Ezekiel Manungod sa Templo

An templo sa bisyon ilinangkaw sa “sarong halangkawon na bukid” (1). Ilinangkaw na daw niyato an dalisay na pagsamba, na ginigibo iyan na pinakapriyoridad sa satong buhay?

An nakapalibot na pader (2) sa bilog na templo saka sa dakulang espasyo (3) nagpapagirumdom sa sato na dai ta nuarin man dapat pagtugutan na maramugan nin ano man na bagay an satong pagsamba ki Jehova. Kun an mga “ordinaryong gibuhon” ngani dapat na irayo sa dalisay na pagsamba, lalo nang dapat halion nin sarong parasamba ni Jehova ngunyan an maati saka imoral na paggawi!—Ezek. 42:20.

May tubig na nagtuturo hali sa santuwaryo kan templo na nagin salog asin nagtatao nin buhay sa daga saka ginigibo iyan na mabunga (4). An mga bendisyon na ini tutukaron sa Kapitulo 19 kan publikasyon na ini.

An halangkawon na mga trangkahan na nasa luwas (5) saka mga trangkahan na nasa laog (9) nagpapagirumdom sa sato na halangkaw an mga pamantayan ni Jehova sa paggawi para sa gabos na nagsasagibo nin dalisay na pagsamba. Mangnuhon na magkakapareho an sukol kan mga trangkahan na nasa luwas saka kan mga trangkahan na nasa laog. Angay nanggad iyan, huling saro sanang pamantayan an itinao ni Jehova para sa gabos niyang parasamba, ano man an saindang pribilehiyo o paninimbagan.

An mga kuwartong kakanan (8) nagpapagirumdom sa sato na kan suanoy na mga panahon puwedeng magkakan an banwaan nin pirang kabtang kan atang na dinara ninda sa templo, na garo man sana nagkakakan sindang kaiba ni Jehova. Lain iyan sa espirituwal na templo na diyan nagsasamba an mga Kristiyano ngunyan, huling an “sarong atang” naidulot na. (Heb. 10:12) Pero nagdudulot pa man giraray kita nin atang nin pag-umaw.—Heb. 13:15.

Tibaad malula ka sa gabos na detalyadong sukol sa bisyon. Pero nagtutukdo iyan nin mahalagang leksiyon: An eksakto asin dai mababagong mga sukol na iyan sarong garantiya na mangyayari an katuyuhan ni Jehova na ibalik an dalisay na pagsamba. Mayong nasambit si Ezekiel na nakahiling siya nin tawo sa saiyang bisyon, pero isinurat niya an manungod sa magabat na sadol ni Jehova para sa mga saserdote, mga pamayo, saka sa banwaan. An gabos na lingkod nin Diyos dapat na suportaran an matanos na mga pamantayan Niya.