Padagos na Pakusugon an Saimong Relasyon ki Jehova

Sa bilog na pag-adal mong ini nin Bibliya, kadakul ka nang nanudan manungod ki Jehova. Huli sa mga nanudan mo, namutan mo siyang marhay, kaya posibleng idinusay mo na an saimong sadiri sa saiya asin nagpabawtismo. O kun dai pa, tibaad pinag-iisipan mo nang gibuhon iyan. Pero an pag-uswag dai natatapos sa pagpabawtismo. Puwede mong padagos na pakusugon an saimong relasyon ki Jehova sagkod pa man. Paano?

1. Taano ta dapat mong padagos na pakusugon an saimong relasyon ki Jehova?

Dapat na padagos kitang maghinguwang marhay na pakusugon an satong relasyon ki Jehova. Taano? “Tanganing dai kita nuarin man luway-luway na maanod parayo” sa saiya. (Hebreo 2:1) Ano an makakatabang sa sato tanganing padagos kitang maimbod na makapaglingkod ki Jehova? Padagos na magin sibot sa gibuhon na paghuhulit asin maghanap nin iba pang paagi para lubos pang paglingkudan an Diyos. (Basahon an Filipos 3:16.) An paglilingkod ki Jehova an pinakamarahay na paagi na magagamit ta an satong buhay!—Salmo 84:10.

2. Ano pa an dapat na padagos mong gibuhon?

Dawa patapos na an pag-adal mong ini nin Bibliya, an pamumuhay mo bilang Kristiyano magpapadagos. Sinasabi kan Bibliya na kaipuhan tang “isulot an bagong personalidad.” (Efeso 4:23, 24) Mantang padagos kang nag-aadal kan Tataramon nin Diyos asin nag-aatender sa mga pagtiripon kan kongregasyon, makakanuod ka nin bagong mga bagay manungod ki Jehova asin sa saiyang mga kuwalidad. Maghanap nin mga paagi na lalo mo pang maipapahiling sa saimong buhay an saiyang personalidad. Padagos na gumibo nin ano man na kinakaipuhan na mga pagbabago para mapaugma si Jehova.

3. Paano ka tatabangan ni Jehova na umuswag?

Sinasabi kan Bibliya: “An Diyos . . . iyo mismo an makumpleto kan saindong pagsasanay. Paparigunon niya kamo, papakusugon niya kamo, ibubugtak niya kamo sa masarig na pundasyon.” (1 Pedro 5:10) Gabos kita napapaatubang sa sugot na gumibo nin sala. Pero nagtatao si Jehova nin kinakaipuhan na tabang para malabanan ta iyan. (Salmo 139:23, 24) Nangangako siya na tatawan ka niya nin pagmawot asin nin kakayahan tanganing maimbod kang makapaglingkod sa saiya.—Basahon an Filipos 2:13.

ARAMON PA

4. Padagos na makipag-ulay asin magdangog sa pinakamarahay mong Amigo

Nakatabang sa saimo an pamibi asin pag-adal nin Bibliya na magin amigo ni Jehova. Paano an mga iyan makakatabang tanganing lalo ka pang magin harani sa saiya?

Basahon an Salmo 62:8, dangan pag-ulayan an hapot na ini:

• Para kumusog an pagigin mag-amigo nindo ni Jehova, paano mo mapapauswag an kalidad kan saimong mga pamibi?

Basahon an Salmo 1:2 asin an nota sa ibaba, dangan pag-ulayan an hapot na ini:

• Para kumusog an pagigin mag-amigo nindo ni Jehova, ano an puwede mong gibuhon para lalo pang magin kapaki-pakinabang an pagbasa mo nin Bibliya?

Ano an puwede mong gibuhon para lalo pang magin kapaki-pakinabang an personal na pag-adal mo nin Bibliya? Para mahiling an nagkapirang ideya, i-play an VIDEO, dangan pag-ulayan an mga hapot.

VIDEO: Pauswagon an Saimong Personal na Pag-adal nin Bibliya (5:22)

• Arin sa mga suhestiyon sa video an sa hiling mo makakatabang sa saimo?

• Anong mga tema an gusto mong pag-adalan?

5. Magkaigwa nin espirituwal na mga pasuhan

An pagkaigwa nin mga pasuhan sa paglilingkod ki Jehova makakatabang sa saimo na padagos na umuswag. I-play an VIDEO, dangan pag-ulayan an hapot.

VIDEO: An Pinakamaugmang Buhay (3:31)

• Sa video, paano nakinabang si Cameron sa pagkaigwa nin espirituwal na mga pasuhan?

Bako gabos makakabalyo sa ibang lugar para maghulit. Pero gabos kita puwedeng magkaigwa nin mga pasuhan na kaya tang abuton. Basahon an Talinhaga 21:5, dangan pag-isipan an mga pasuhan na gusto mong abuton . . .

• sa kongregasyon.

• sa ministeryo.

Paano makakatabang sa saimo an prinsipyo sa tekstong iyan para maabot mo an mga pasuhan mo?

Mga pasuhan na puwede mong abuton

• Pauswagon an kalidad kan saimong mga pamibi.

• Basahon an bilog na Bibliya.

• Mas bistuhon pa an saimong mga kakongregasyon.

• Magkaigwa nin Bible study.

• Maglingkod bilang auxiliary payunir o regular payunir.

• Kun saro kang brother, hinguwahon na magin ministeryal na lingkod.

SUMARYO

Padagos na pakusugon an saimong relasyon ki Jehova asin magkaigwa nin espirituwal na mga pasuhan. Makakatabang iyan sa saimo na magin maugma ngunyan asin sagkod pa man!

Rebyu

• Taano ta makakapagtiwala ka na tatabangan ka ni Jehova tanganing maimbod kang makapaglingkod sa saiya?

• Paano mo mapapakusog an saimong relasyon ki Jehova?

• Paano makakatabang an espirituwal na mga pasuhan para magin mas harani ka ki Jehova?

HILINGON MAN

Ano an mas pinapahalagahan ni Jehova, an sarong beses na pagpahiling nin kahanga-hangang debosyon sa saiya, o an maimbod na paglilingkod sa saiya aroaldaw sa bilog mong buhay?

Magin Maimbod Arog ni Abraham (9:20)

Dawa an sarong maimbod na lingkod ni Jehova puwedeng mawaran nin kaugmahan sa paglilingkod. Aramon kun paano maibabalik an kaugmahan na iyan.

Ibalik an Kaugmahan Paagi sa Pag-adal Asin Paghurop-hurop (5:25)

Paano kita makakagibo nin espirituwal na mga pasuhan, asin ano an puwede tang gibuhon para maabot an mga iyan?

“Gamiton an Espirituwal na mga Pasohan Tanganing Pamurawayon an Saindong Kaglalang” (An Torrengbantayan, Hulyo 15, 2004)

Taano ta mahalagang marhay na magin maygurang na Kristiyano, asin paano mo iyan magigibo?

“Maghingoang Makaabot sa Pagkamaygurang—‘Harani Na an Dakulang Aldaw ni Jehova’” (An Torrengbantayan, Mayo 15, 2009)