An Saindong Kasagkodan—An Sarong Mas Marahay na Paagi na Maaraman Iyan

KAN 1962 an mga astrologo sa India naghula nin lakop sa kinaban na kalamidad “huli sa pambihirang pagtaragbuan nin walong planeta sa signos na Capricorn.” Minsan siring, mayo nin nangyari dian. Mas bago pa, sa paghinanapos nin 1980, an kadaklan na astrologong Pranses naghohona na an presidente kaidto sa Pransia, si Giscard d’Estaing, maeelehir giraray para sa ikaduwang turno. Alagad ta an eleksion ginana kan saiyang kalaban, si François Mitterrand. An mga pagkasudyang arog kaini nagpapagirumdom sato na an astrolohiya bakong seguradong paagi na maaraman an kasagkodan.

Kun siring, igwa daw nin ibang paagi? Halimbawa, matatabangan daw kamo kan mga paghihingoa nin mga sientista na isabi an maabot? Bueno, uya an prediksion kan McGraw Hill Institute (Estados Unidos) kan 1970 manongod sa mangyayari sa 1980: “Mga droga na makadadaog sa kanser, may tawong mga pagbiyahe pasiring sa Mars asin Venus, permanenteng base sa bulan, mga awto na nagdadalagan sa elektrisidad, paggibong pankagabsan sa mga computer sa harong, an posibilidad na pilion an pagkatawo kan saindong omboy, asin an may tolong dimension na telebisyon asin sine.”

Kan 1970 an mga sientista sa asosasyon na ini nagsabi: “An paaging ini [nin paghula] hinihingoang makatao nin masasarigan na prediksion paagi sa may pagkasararong opinyon nin sarong grupo nin mga eksperto.” Alagad ta an mga prediksion kan mga ekspertong ini napatunayan na sala sa mga langtad na ini asin sa dakol pang iba, arog baga kan politika asin ekonomiya.

An Seguradong Makukuanan nin Impormasyon

Kun dai kaya nin mga astrologo asin sientista na aramon nin may kasegurohan an mangyayari sa ngapit, iyan daw nangangahulogan na imposibleng makakua nin masasarigan na impormasyon manongod sa ngapit? Bago sumuko, maninigo niatong helingon an sinasabi kan Biblia manongod sa bagay na ini. Girumdoma, si Jehova, an Autor kan Biblia, sinasabing “an Saro na nagpapaisi kan mangyayari sa huri poon pa sa kapinonan, asin kan mga bagay na dai pa nahahaman poon pa kan kasuanoy.”—Isaias 46:10.

An Tataramon nin Dios igwa nin kadakol na hula. Paano iyan napapalaen sa mga prediksion nin mga astrologo? Uya an simbag nin sarong librong may titulong The Great Ideas: “Alagad kun manongod sa pakaaram sa ngapit nin magagadanon na mga tawo, garo baga pambihira an mga propetang Hebreo. Bakong arog nin paganong mga paratoodtood o parahula, . . . dai sinda kaipuhan na gumamit nin mga abilidad o kasangkapan tanganing marorop an banal na mga hilom. . . . Sa kadaklan an saindang makahulang mga kapahayagan, bakong arog kan sa mga orakulo, garo baga klaro. Minsan paano an intension garo baga ipahayag, bakong itago, an plano nin Dios sa mga bagay na boot Nia Mismong patienot na maaraman nin mga tawo an kaaabtan.”

Bilang halimbawa kaini, dakol na impormasyon manongod ki Jesus an isinurat sa Biblia dakol na siglo bago sia mamundag. Ihinula na sia mamumundag sa banwaan nin Betlehem asin sa pamilya ni Jese, an ama ni Hadeng David. (Miqueas 5:2; Isaias 11:1, 10) Ihinula man kan Kasuratan na sia gagadanon sa sarong hariging pasakitan pero mayo siang tolang na mababari, arog kan kaugalean sa siring na mga paggadan. An mga detalyeng ini naotob, asin iyan pira sanang halimbawa kan kinakarkulo nin sarong iskolar sa Biblia na labing 120 hula na naotob ki Jesus.—Salmo 22:16, 17; 34:20.

Sarong Hula na Naootob Ngonyan

Saro pa, an Biblia igwa nin mga hula na nakasentro sa satong kaaldawan. Pag-olayan niato an saro sa pinakamahalaga digdi. Ilinaladawan kaiyan an sunod-sunod na mga pangyayari na matanda sa panahon bago an dramatikong pag-interbenir kan Kahadean nin Dios sa mga pangyayari sa daga. Kabilang sa mga pangyayaring ini an mga guerra mundial, linog, epidemya, gutom, asin nag-oorog na katampalasanan. Bako daw na an paggrabe kan mga bagay na ini nagin lataw sa mga bareta sa kinaban sa satong ika-20 siglo?—Mateo 24:3, 7-14; Lucas 21:7, 10, 11; 2 Timoteo 3:1-5.

Ipinaliwanag ni Jesus na an kaotoban kan mga hulang ini magigin tanda kan pagdatong kan saiyang Kahadean nin siring kasegurado sa pagparisa kan pagsaringsing nin mga kahoy na nagdatong na an tigsoli. Sinabi pa ngani nia nin espisipiko na iyan maootob sa saro sanang kapag-arakian. An gabos na kabtang kan tanda, kaiba an mga detalyeng sinabi sa enotan, naotob sa atubangan mismo kan satong mga mata poon kan 1914.a Kun siring kita lubos na makasasarig na an Kahadean mahiro sa haranihon nang ngapit.—Lucas 21:29-33.

An saro pang ihinula para sa panahon na ini iyo an “kahandalan nin mga nasyon, na dai naaaraman an gigibohon.” (Lucas 21:25) Ngonyan, taano ta nababangkagan na gayo an astrolohiya asin ibang klase nin okulto? An peryodikong Pranses na Le Monde Dimanche minasimbag: “Huling napapaatubang sa krisis, an mga tawo gigibohon an gabos na medyos na makanompong nin pagpakosog nin boot. An parapsychology nagtatao nin dakulang karangahan sa kadikit sanang paghihingoa, asin sa panahon na ini nin makangingirhat na mga nagigibo kan siensia arog baga nin mga nuklear na ngangalasan asin gene splicing, an mga tawo nasusugotan na dumulag pasiring sa misteryoso asin bakong rasonable, na hinihingoang madiskobre giraray an kahulogan nin buhay.” Kaya dai niato maninigong ipagngalas an lakop na interes sa mga gibo nin okulto, arog baga kan astrolohiya. Iyan saro sa mga tanda kan “kahandalan” na namamatean ngonyan nin mga tawo bilang kaotoban sa hula ni Jesus.

‘Tingagan an Saindong Payo’

Ano an maninigong gibohon nin mga Kristiano kun naheheling ninda an gabos na ini? Matakot, arog kan mga tawong nasa palibot ninda? Itinao ni Jesus an minasunod na hatol: “Alagad kun an mga bagay na ini magpoon nang mangyari, tindog kamo nin tanos asin tingagan an saindong mga payo, huli ta an saindong kaligtasan naghaharani na.”—Lucas 21:28.

Boot daw nindong maaraman nin mas detalyado an saindong kasagkodan? Kun siring tumao nin panahon na siyasaton nin orog an Biblia asin “baloon an ipinasabong na mga tataramon kun baga iyan gikan sa Dios.” (1 Juan 4:1) Magigibo nindo ini sa tabang kan magasin na An Torrengbantayan, na dayaday na nagpapaliwanag kan mga hula sa Biblia asin kan aplikasyon kaiyan sa satong aldaw. Sa siring, mantang nakokombensir kamo na harani na an katapusan kan presenteng maribok na kinaban, kamo man ‘makatitingag kan saindong payo.’ Manonodan man nindo kun ano an kaipuhan nindong gibohon tanganing makamtan an mga bendisyon kan Mesiyanikong Kahadean, na madali nang mag-interbenir sa mga nangyayari sa kinaban para sa kapakinabangan nin gabos na may matanos na puso.

[Nota sa Ibaba]

[Kahon sa pahina 5]

“Asin an Tanda . . . Naootob”

‘Ano an sala sa pagkonsulta sa parahula o sa pagbasa kan saindong horoskopo sa diaryo? Bako daw na ini aling-alingan sana na dai man nakaaano?’

Sa Biblia bakong arog sana kaiyan kagian an bagay. An totoo, pinatatanidan kita kaiyan tumang sa mga patagolainan asin paratoodtood. Sa librong Deuteronomio, si Jehova nagtao kan minasunod na patanid: “Kun . . . an propeta o parapangatorogan nin pangatorogan . . . tumao sa saimo nin tanda o ngangalasan, asin mangyari an tanda o ngangalasan na isinabi nia sa saimo, na sinasabi, ‘Sumunod kita sa ibang mga dios,’ . . . dai ka maghinanyog sa mga tataramon kan propetang iyan o kan parapangatorogan kan pangatorogan na iyan.”—Deuteronomio 13:1-3.

Mangnoha na dai pinagdududahan kan Kasuratan an bagay na an ibang prediksion nin mga patagolainan asin astrologo puwedeng maotob. Imbes, pinatatanidan kita kan Biblia na, kun an mga prediksion na ini basado sa mga signos sa langit o sa ibang paagi nin pagtoodtood, iyan gikan sa mga demonyo, nakadadaya, asin puwedeng makapatalikod kan mga tawo sa tunay na Dios.—Helingon an Gibo 16:16-18.

An pagdangog sa mga astrologo o sa iba na naghihingakong nakapagsasabi kan maabot pagsapeligro na magkaigwa nin grabeng espirituwal na mga problema asin pagigin oripon kan “maraot na espiritung mga puwersa sa langitnon na mga lugar.” (Efeso 6:12) Kaya, an pagkonsulta sa siring na mga tawo ibinibilang nin Dios na magabat na kasalan; an mga naggigibo kaiyan makababalde sa saiyang pagheling asin dai sinda magmamana kan saiyang Kahadean.—Kapahayagan 22:15.

Kaya para sa satong ikararahay na pinatatanidan kita kan Biblia tumang sa astrolohiya asin sa gabos na klase nin pagtoodtood.

[Kahon sa pahina 6]

IHINULA KAN BIBLIA BAGO PA NA:

◆ Si Jesus mamumundag sa Betlehem.—Miqueas 5:2

◆ Sia mamumundag sa pamilya ni Jese, an ama ni Hadeng David.—Isaias 11:1, 10

◆ Sia gagadanon sa hariging pasakitan.—Salmo 22:16, 17

◆ Mayong mababari sa saiyang mga tolang.—Salmo 34:20