An mga Gurang Iginagalang nin Tunay na mga Kristiano!

“AN MGA gurang,” sabi kan parasiyasat na si Suzanne Steinmetz, “nasa poro na kan saindang buhay na mabunga sa paaging ekonomiko, na iyo an basihan kan pagpapahalaga kan satong kultura sa mga indibiduwal asin pagtao sa sainda nin onra, posisyon, paggalang asin mga balos.” Kaya an punto-de-vista kan modernong sosyedad sa mga gurang mapungaw, negatibo. Kun siring, bakong makangangalas na parate kitang nakababasa manongod sa pagpabaya asin pag-abuso sa sainda.

Minsan siring, ano an punto-de-vista kan Biblia sa mga gurang? An Tataramon nin Dios realistikong nagmimidbid na an paggurang bakong pasil. An salmista namibi: “Dai mo man logod ako ipagsikwal sa panahon nin kagurangan; kun an sakuyang kosog nawawara na, dai mo ako pagpabayaan.” (Salmo 71:9) Sa saiyang kagurangan, namatean nia nin orog kasuarin pa man an pagsuportar ni Jehova. Asin an punto-de-vista kan Biblia positibo sa pagsabi na kita man maninigong magtao nin atension sa mga pangangaipo kan mga gurang.

Totoo, inapod ni Salomon an kagurangan na “maraot na mga aldaw” na dian an saro mawawaran nin “kawilihan.” (Eclesiastes 12:1-3) Alagad an “lawig nin mga aldaw asin taon nin buhay” iinaasosyar man kan Biblia sa mga bendisyon gikan sa Dios. (Talinhaga 3:1, 2) Bilang ilustrasyon, si Jehova nanuga ki Abraham: “Kun manongod sa saimo, . . . ika ilolobong na gurang nang marhay.” (Genesis 15:15) Tunay na dai sinisentensiahan nin Dios an maimbod na si Abraham sa mapungaw, “maraot na mga aldaw” na dian sia ‘mayo na nin kawilihan.’ Si Abraham nagkamit nin katoninongan asin katrangkilohan sa mga huri niang taon, na sinasalingoy na may pagkakontento an buhay na ginamit sa paglilingkod ki Jehova. Makalalaom man sia sa “siudad na may tunay na mga pundasyon,” an Kahadean nin Dios. (Hebreo 11:10) Kaya puwede siang magadan na “gurangon na asin kontento.”—Genesis 25:8.

Kun siring, taano ta inapod ni Salomon an kagurangan na “maraot na mga aldaw”? An boot sabihon ni Salomon iyo an dai mapopogolan na pagluya nin lawas na nangyayari sa paggurang. Minsan siring, an saro na dai ‘nakagirumdom sa saiyang Dakulang Kaglalang sa mga aldaw kan saiyang pagkabarobata’ partikularmente na nakamamate na an saiyang mga taon nin pagluya maraot. (Eclesiastes 12:1) Huling sinayang nia an saiyang buhay, an siring na gurang ‘mayo nin kawilihan’ sa saiyang huring mga aldaw nin buhay. An saiyang maraot na pamumuhay tibaad nagbunga pa ngani nin pisikal na mga problema na nakadadagdag sa mga kasakitan nin paggurang. (Ikomparar an Talinhaga 5:3-11.) Kaya kun tinatanaw an ngapit, mayo sia nin naheheling na kaaabtan kundi an lolobngan. An saro na idinusay an saiyang buhay sa paglilingkod sa Dios nakamamate man nin “maraot na mga aldaw” mantang minaluya an saiyang hawak. Alagad kapareho ni Abraham, puwede siang maogma asin makontento sa buhay na ginamit sa kapakipakinabang na paagi asin sa paggamit kan natatada pa niang kosog sa paglilingkod sa Dios. “An pagkaigwa nin uban korona nin kagayonan kun iyan nakukua sa dalan nin katanosan,” sabi kan Biblia.—Talinhaga 16:31.

An totoo, an kagurangan igwa ngani nin nagkapirang bentaha. “An pagkahoben asin pagkabarobata daing kamanungdanan,” sabi ni Salomon. Minsan ngani an mga hoben mabagsik an salud, parate na sinda mayo nin kabatidan asin paghusgar. Pero an kagurangan may kaibang bilog na buhay na kabatidan. An gurang ‘minalikay sa kapahamakan,’ bakong arog kan pabigla-biglang barobata na parateng minadaguso dian. (Eclesiastes 11:10; 2 Timoteo 2:22) Kaya, si Salomon nakapagsabi: “An kamurawayan nin mga gurang iyo an saindang pagkaigwa nin uban.”—Talinhaga 20:29.

Kaya an Biblia nagtatao nin onra sa mga gurang. Paano ini nakaaapektar sa pagtratar sa sainda nin mga Kristiano?

‘Pagtindog’ sa Atubangan nin mga Gurang

Ginibo nin Dios na nasyonal na palakaw sa Israel an paggalang sa mga gurang. An Pagboot ni Moises nagsabi: “Magtindog ka sa atubang nin may uban, asin magpaheling ka nin konsiderasyon sa persona nin gurang.” (Levitico 19:32) An mga Judio kan nahuring mga taon malinaw na sinabot nin literal an pagboot na ini. An sabi ni Dr. Samuel Burder sa saiyang librong Oriental Customs: “Sinasabi nin mga parasurat na Judio na an reglamento, tumindog sa atubang ninda kun an distansia ninda apat na maniko; asin pagkahale tolos ninda, tumukaw giraray, tanganing marisa na sinda tuminindog huli sana sa paggalang sa sainda.” An siring na paggalang bako sanang sa prominenteng mga tawo. “Igalang pati an gurang na nawaran na kan saiyang inadalan,” sabi kan Talmud. An sarong rabbi nangatanosan na maninigo man na iiba sa paggalang na ini an ignorante asin daing inadalan na gurang. “An mismong bagay na sia gurang na,” an pangangatanosan nia, “dapat na tawan nin merito.”—The Jewish Encyclopedia.

An mga Kristiano ngonyan bako nang sakop kan mga ley kan Pagboot ni Moises. (Roma 7:6) Alagad dai ini nangangahulogan na sinda dai na obligado na magpaheling nin espesyal na paggalang sa mga gurang. Ini maririsa sa instruksion na itinao ni apostol Pablo sa Kristianong paraataman na si Timoteo: “Dai mo pagtatsaran nin labi-labi an sarong gurang. Kundi pakiolayan mo sia siring sa ama, . . . an gurang na mga babae siring sa mga ina.” (1 Timoteo 5:1, 2) Sinabihan ni Pablo an hoben pang si Timoteo na sia may autoridad na “magboot.” (1 Timoteo 1:3) Minsan siring, kun an saro na mas gurang sa saiya—nangorogna an saro na naglilingkod na paraataman—masala sa paghusgar o makagibo nin salang kapahayagan, dai sia dapat na ‘tatsaran nin labi-labi’ ni Timoteo bilang mas hababa. Imbes, sia dapat na may paggalang na ‘pakiolayan sia siring sa ama.’ Si Timoteo dapat man na magpaheling nin kaparehong paggalang sa gurang na mga babae sa kongregasyon. Iyo, sia garo baga ‘matindog sa atubang nin may uban.’

Kaya an Kristianismo relihiyon na may paggalang sa mga gurang. Alagad ta, kabaliktaran sa linalaoman, an dakol na pagmaltrato sa mga gurang nangyayari sa mga nasyon na naghihingakong Kristiano. Alagad igwa nin mga parasamba na sagkod ngonyan nangangapot sa mga pamantayan kan Biblia. Halimbawa, ikinaoogma nin mga Saksi ni Jehova an presensia nin rinibong gurang sa tahaw ninda; dai ninda sinda ibinibilang na pagabat o kaolangan. Minsan ngani an maluyang salud tibaad makaolang sa mga gurang na iyan sa pagigin aktibo na arog kan dati, an dakol igwa nin halawig na rekord nin maimbod na Kristianong paglilingkod, asin ini nagpapakosog sa mga mas hoben na Saksi na arogon an saindang pagtubod.—Ikomparar an Hebreo 13:7.

Minsan siring, an mga gurang dai linalaoman na magin dai na sanang girong sa kongregasyon. Sinda sinasadol na magtao nin marahay na mga halimbawa sa pagigin “tama sana sa gawe, pormal, marahay an kaisipan, makosog an pagtubod, . . . magalang sa hiro,” na ihinihiras an saindang kadonongan asin kabatidan sa iba. (Tito 2:2, 3) Si Joel naghula na kabilang sa mga makikakabtang sa pagbalangibog kan mensahe kan Biblia, an “gurang na mga lalaki.” (Joel 2:28) Sierto na kamo personal na nakamasid na an dakol na gurang nang Saksi naoogma pa man giraray na aktibong makikabtang sa paghuhulit sa harong-harong.

Pagpaheling nin Paggalang sa Sainda “nin Orog”

An mga Saksi ni Jehova naghihingoa na tawan nin espesyal na konsiderasyon sa dakol na paagi an mga gurang. Sa taonan na relihiyosong mga kombension, halimbawa, parate na iinaareglo ninda na may mga tukawan na reserbado sa mga gurang. Pinahehelingan man sinda nin konsiderasyon bilang indibiduwal. Sa Hapon an sarong Saksi ipinahuhunod an saiyang tukawan sa kotse kan pamilya tanganing an sarong 87 anyos na babae makasakay pasiring sa pagtiripon kan kongregasyon. Paano sia mismo nakaduduman sa pagtiripon? Paagi sa pagbisikleta. Sa Brazil igwa nin bilog na panahon na paraebanghelyo na 92 anyos na. Ibinabareta nin mga nagmamasid na an mga Saksi duman “tinatrato siang may paggalang, kinakaolay sia . . . Sia kapakipakinabang na kabtang kan kongregasyon.”

Ini dai nangangahulogan na mayo na nin mapaooswag dapit sa paggalang sa mga gurang. Si Pablo nagsurat sa mga Kristiano sa Tesalonica: “Minsan siring, kun mapadapit sa pagkamoot sa magturugang, . . . ginigibo nindo iyan sa gabos na tugang sa bilog na Macedonia. Alagad sinasadol mi kamo, mga tugang, na padagos na gibohon iyan nin orog.” (1 Tesalonica 4:9, 10) An kaagid na hatol kun beses kaipuhan man ngonyan pag-abot sa pagtratar niato sa mga gurang. Halimbawa, an sarong 85 anyos na Kristiano namondong gayo kan dai sia makaresibi nin kopya nin sarong bagong publikasyon na basado sa Biblia. An problema? Haros bongog na sia asin dai nia nadangog an paisi na nagpapagirumdom sa gabos na pumedido na kan libro; ni naisipan man kan siisay man sa kongregasyon na ipedido sia. Siyempre, listong itinanos an kamugtakan. Pero iyan nag-iilustrar na yaon an pangangaipo na espesyalmenteng magin mapaggirumdom sa mga pangangaipo nin mga gurang.

Kadakol kan paagi na ini magigibo kan banwaan nin Dios ngonyan “nin orog.” An Kristianong pagtiripon nagtatao nin oportunidad na ‘sadolon’ an mga gurang “sa pagkamoot asin sa marahay na mga gibo.” (Hebreo 10:24, 25) Asin mantang an hoben asin gurang dati nang nagsasaralak nin daing pag-alangan sa Kingdom Hall nin mga Saksi ni Jehova, seguro magigibo an orog pang paghihingoa sa bagay na iyan. Halimbawa, an nagkapirang magurang sinasadol an saindang mga aki na magalang na dumolok asin makiestoryahan sa gurang na mga miembro kan kongregasyon.

An paggalang puwede man na padagos na ipaheling sa mga gurang sa impormal na paagi. Kaoyon sa prinsipyo na isinabi ni Jesus sa Lucas 14:12-14, orog na paghihingoa an magigibo na imbitaran an mga gurang sa sosyal na mga katiriponan. Dawa kun dai ninda kayang umatender, seguradong aapresyaron ninda an pakagirumdom nindo sa sainda. An mga Kristiano sinasadol pa na “magin parapasakat.” (Roma 12:13) Ini dai nagkakaipo nin andam na magastos o mamahalon. An suhestion nin sarong Saksi na taga-Alemania: “Imbitaran an mga gurang na uminom nin tsa, asin ipaestorya sainda an saindang mga inagihan.”

Si apostol Pablo nagsabi: “Sa pagpaheling nin paggalang sa lambang saro mangenot kamo.” (Roma 12:10) Sa mga Saksi ni Jehova, an nombradong kamagurangan sa kongregasyon espesyalmenteng nangengenot sa paggalang sa gurang nang mga Kristiano. Parate na an kamagurangan ikinaaasignar an mga may edad na sa angay na mga trabaho, arog baga kan pagtotokdo sa mga bagohan bilang mga paraebanghelyo o pagtabang sa pag-asikaso sa mga lugar na tiriponan nin mga Kristiano. An mas hoben na mga lalaki na naglilingkod na kamagurangan sa kongregasyon nagpapaheling nin paggalang sa mas gurang na mga paraataman paagi sa mapakumbabang paghagad sa sainda nin hatol, na ginagamit an pagmansay sa pagkua kan saindang maygurang na mga punto-de-vista. (Talinhaga 20:5) Sa mga miting nin kamagurangan, inaarog ninda an halimbawa sa Biblia kan hoben na si Eliu asin may paggalang na nagpapahunod sa mas gurang, mas eksperyensiadong mga lalaki, na tinatawan sinda nin lubos na oportunidad na enot na magpahayag kan saindang saboot.—Job 32:4.

Totoo, madaling mawaran nin pasensia sa mga gurang huli ta sinda bakong arog kalisto an hiro o isip sa mga hoben. Ilinaladawan ni Dr. Robert N. Butler an nagkapira sa mga problemang dara nin paggurang: “Nawawara sa saro an saiyang pisikal na bagsik, an saiyang abilidad na makasabay sa iba, asin iyan sana puwede nang magin makatatakot na gayo. Puwedeng mawara sa saro an mahalagang mga pagmate na arog kan pagdangog o pagheling.” Mantang nasasabotan ini, bako daw na an mga mas hoben maninigong magpaheling nin pakikidamay asin magin maheherakon?—1 Pedro 3:8.

Iyo, an mga Kristiano ngonyan obligadong magpaheling nin tunay na pagkamoot, pagmakolog, asin paggalang sa mga gurang na nasa tahaw ninda. Asin sa mga Saksi ni Jehova, ini ginigibo sa marahayon na paagi. Alagad ano an nangyayari kun an gurang na mga Kristiano—o an mga magurang nin mga Kristiano—maghelang o magtios? Siisay an may paninimbagan na mag-ataman sa sainda? Ipaliliwanag kan huring duwang artikulong pag-aadalan kun paano sinisimbag kan Biblia an mga hapot na ini.

[Mga ritrato sa pahina 7]

Sa mga kongregasyon nin mga Saksi ni Jehova, an mga gurang nakanonompong nin dakol na nakakokontentong trabaho