Lakop sa Kinaban na Katiwasayan sa Pagsakop kan “Prinsipe nin Katoninongan”

Kapitulo 3: An Paghade kan “Prinsipe nin Katoninongan” sa Tahaw nin mga Kaiwal

1, 2. (a) Anong huring mga tataramon an isinabi ni Jesu-Cristo sa sarong grupo kan saiyang mga disipulo? (b) Ini daw nag-apod para sa pagkakombertir kan kinaban bago sia maghade bilang “Prinsipe nin Katoninongan”?

DAI mahaloy bago sia sumakat sa langit kaidtong labi nang 19 siglo an nakaagi, an kaidto magigin “Prinsipe nin Katoninongan,” si Jesu-Cristo, nagsabi kan huring mga tataramon na ini sa sarong grupo kan saiyang maimbod na mga disipulo: “Kaya paduman kamo asin gumibo kamo nin mga disipulo sa mga tawo kan gabos na nasyon, na bautismohan nindo sinda sa ngaran kan Ama asin kan Aki patin kan banal na espiritu . . . Asin, uya! ako danay na nasa saindo sagkod sa pagtatapos kan palakaw nin mga bagay.”—Mateo 28:19, 20.

² An mga tataramon daw na iyan ni Jesus nag-apod para sa pagkakombertir kan kinaban bago an “pagtatapos kan palakaw nin mga bagay” na nagpoon kan 1914? Dai. Ngonyan, sa paghihinanapos kan ika-20 siglo, an kinaban nin katawohan harayoon pa man giraray sa pagkakombertir ki Jesu-Cristo bilang Paraligtas asin may diretsong Hade kaiyan. Minsan siring, dai kaini naatraso an pagkaotob kan ihinula ni Jehova sa mga hula kan Biblia. Noarin man dai nagin katuyohan nin Dios na an bilog na kinaban nin katawohan makombertir bago si Jesu-Cristo magpoon na maghade bilang an “Prinsipe nin Katoninongan.” Al kontraryo nanggad, sia ihinula na magpopoon na maghade sa tahaw kan saiyang mga kaiwal.

 3. Paano an pagkasambit ni Jesus sa Salmo 110 nagpaparisa na sia maghahade sa tahaw nin mga kaiwal?

³ Dawa kan sia yaon digdi sa daga, aram ini ni Jesu-Cristo. Dai mahaloy bago sia magadan bilang sarong martir, may pakipagdiskutiran sia sa saiyang relihiyosong mga parakontra asin nagkotar sa Salmo 110. Mababasa niato an manongod digdi sa Lucas 20:41-44: “Sia nagsabi man sainda: ‘Paano na sinasabi ninda na an Cristo aki ni David? Huli ta si David man sana nagsasabi sa libro nin mga Salmo, “Si Jehova nagsabi sa sakong Kagurangnan, Tumukaw ka sa sakong too sagkod na ibugtak ko an saimong mga kaiwal na tongtongan kan saimong mga bitis.” Kun siring, inapod sia ni David na “Kagurangnan”; kaya paano na sia aki nia?’”

4-6. (a) Paano man ipinaheheling kan Salmo 2 na si Jesus dai kaipuhan na maghalat sa pagkakombertir kan kinaban bago pumoon sa saiyang paghade bilang “Prinsipe nin Katoninongan”? (b) Sa anong panahon naotob an Salmo 2:7?

⁴ Kaya maliwanag na si Jesu-Cristo, bilang an Aki ni David, dai mapoon na maghade pagkakombertir kan bilog na kinaban. Imbes, sia mapoon na maghade sa tahaw nin mga kaiwal na paagi sa pakikilaban gigibohon ni Jehova na tongtongan kan bitis kan saiyang natutukaw sa tronong Aki. An Salmo 2, sa minasunod na mga tataramon, ipinaririsa man an pagpopoon kan saiyang paghade bilang an “Prinsipe nin Katoninongan” sa tahaw nin mga kaiwal:

⁵ “Taano ta ribaraw an mga nasyon asin an mga banwaan mismo nagpaparagumodgumod nin daing halagang bagay? Nagtumang an mga hade kan daga asin an haralangkaw na opisyal mismo nagsororog tumang ki Jehova asin tumang sa saiyang linahidan [an saiyang Cristo], na nagsasabi: ‘Laglagon ta an saindang mga panggapos asin iapon ta an saindang mga lubid!’ An mismong Saro na nagtutukaw sa kalangitan magngingisi; si Jehova mismo mag-oolog-olog sainda. Sa panahon na iyan sia mataram sa sainda sa saiyang kaanggotan asin sa naglalaad niang kabangisan riribokon nia sinda, na an sabi: ‘Ako mismo nagpatukaw kan sakuyang hade sa Sion, an sakong banal na bukid.’

⁶ “Pabayae akong sambiton an pagboot ni Jehova; sia nagsabi sa sako [si Cristo]: ‘Ika an sakong aki; ako, ngonyan, ako nagin saimong ama. [An Salmo 2:7 naotob kan buhayon liwat ni Jehova an saiyang Aki hale sa mga gadan, sa siring nagin an daing sagkod na Ama ni Jesus. (Roma 1:4)] Hagada sako, tanganing itao ko saimo an mga nasyon bilang saimong mana asin an kaporoporohi kan daga bilang saimong mga sadiri. Sinda saimong papasaon nin setrong batbat, siring sa lalagan kan paragibo nin koron roronoton mo sinda.’ Asin ngonyan, O mga hade, maggibo kamo nin pagmansay; pabayae nindo na kamo tanoson, O mga hokom kan daga. Maglingkod ki Jehova na may pagkatakot asin mag-ogma na may pagtakig. Maghadok sa aki, tanganing Sia dai maanggot asin dai kamo mapara, huli ta an saiyang kaanggotan madaling lumaad. Maogma an gabos na minapaili saiya.”

 7. Anong pagsambit sa Salmo 2 an ginibo kan mga apostol ni Jesu-Cristo pakalihis kan aldaw nin Pentecostes?

⁷ Sono sa Gibo 4:24-27, nasambitan kan mga apostol ni Jesu-Cristo an ikaduwang salmong ini pakalihis kan aldaw nin Pentecostes, 33 C.E.: “Sinda sararong nagkurahaw sa Dios asin nagsabi: ‘Soberanong Kagurangnan, ika an Saro na guminibo sa langit asin daga asin dagat patin sa gabos na bagay na yaon dian, asin na paagi sa banal na espiritu nagsabi paagi sa ngoso kan samong apoon na si David, an saimong oripon, “Taano an mga nasyon ta naribok asin an mga banwaan naghohorophorop sa mga bagay na daing data? An mga hade kan daga nagtirindog asin an mga poon nagtiripon bilang saro tumang ki Jehova asin tumang sa saiyang linahidan.” Kaya, si Herodes asin Poncio Pilato kaibanan an mga tawo nin mga nasyon asin mga banwaan nin Israel sa katotoohan nagtiripon sa siudad na ini tumang sa saimong banal na oripon na si Jesus, na saimong linahidan.’”

Mayor na Kaotoban kan Salmo 2

 8. (a) Kasuarin nangyari an enot na kaotoban kan Salmo 2:1, 2? (b) Poon kasuarin nangyayari an mayor na kaotoban kan Salmo 2?

⁸ An taon 33 kan enot na siglo nakaheling sa enot na kaotoban kan makahulang mga tataramon na idto kan Salmo 2:1, 2. Ini may koneksion sa tawong si Jesu-Cristo digdi sa daga. Linahidan sia kan banal na espiritu ni Jehova kan panahon na sia bautismohan ni Juan Bautista. Alagad an mayor na kaotoban kan Salmo 2 nangyayari poon kan matapos an Mga Panahon nin mga Hentil kan taon 1914. (Lucas 21:24) Igo nang napatunayan na “an itinalaan na mga panahon kan mga nasyon,” na nagpoon kan enot na malaglag an siudad nin Jerusalem kan 607 B.C.E., natapos kan taon 1914.a Kaidto nadangog an plegaria para sa mga nasyon kan kinaban na ini, kaiba an nasa Kakristianohan.

 9. Ano an nangyari kan enot na pagkalaglag nin Jerusalem mapadapit sa Kahadean nin Dios na ipinagrerepresentar kan makahadeng linya ni Hadeng David?

⁹ Kan enot na laglagon an Jerusalem, kan mga Babilonyo, natapos an Kahadean ni Jehova Dios sa nasyon nin Israel, na ipinagrerepresentar kan makahadeng linya ni Hadeng David. Poon kaidto, an mga Judio sa laman dai na nagkaigwa nin hade sa linya kan makahadeng harong ni David. Alagad ta an Kahadean kan Kaharohalangkaweng Dios sa kamot nin sarong gikan ni David, na pinakipagtipanan ni Jehova para sa sarong daing katapusan na Kahadean sa linya nia, dai magdadanay na gadan sagkod lamang.

10, 11. (a) Ano an isinabi nin Dios paagi sa saiyang propetang si Ezequiel manongod sa trono ni David? (b) Siisay an nag-abot na may “legal na katanosan” sa trono ni David? (c) Ano an isinabi kan grupo nin mga Judio kan ipresentar nia an saiyang sadiri bilang an legal na paramana?

¹⁰ Sa hade kan suanoy na Jerusalem, dai mahaloy bago an enot na kalaglagan kaiyan, pinapangyari ni Jehova an propeta niang si Ezequiel na isabi an mga tataramon na ini: “Ika, O may lugad na nakagagadan, maraot na prinsipe nin Israel, na an aldaw nag-abot na sa panahon kan kasalan kan katapusan, iyo ini an isinabi kan Kagurangnan na Jehova, ‘Halea an diadema, asin tangkasa an korona. Ini dai na magigin siring. Langkawan an hababa, asin babaan an halangkaw. Gagabaon ko, gagabaon ko, gagabaon ko iyan. Asin kun dapit man kaini, dai iyan magigin sadiri nin siisay man sagkod na magdatong sia na igwa kan legal na katanosan, asin iyan itatao ko sa saiya.’”—Ezequiel 21:25-27.

¹¹ An saro na may “legal na katanosan” nag-abot sa persona ni Jesu-Cristo, asin an saiyang linahe magpoon ki David nasusurat sa Mateo 1:1-16 asin Lucas 3:23-31. Sa kadaklan sia inaapod na “Aki ni David.” Kan aldaw nin saiyang mapangganang paglaog sa Jerusalem, na sakay sa sarong asno bilang kaotoban sa hula, an nag-oogmang kadaklan nin mga Judio na nag-iba sa saiya asin sa saiyang mga apostol maogmang nagkururahaw: “Ligtasan, ipinakikimaherak niamo, an Aki ni David! Omawon sia na minadatong sa ngaran ni Jehova! Ligtasan sia, ipinakikimaherak niamo, sa kaitaasan!”—Mateo 21:9.

“An Aki ni David” Natutukaw Na sa Trono sa Langit

12. Kan matapos an Mga Panahon nin mga Hentil kan 1914, saen pinatukaw sa trono si Jesu-Cristo, bilang an permanenteng paramana ni David?

¹² An 2,520 taon na babatayan kan mga Hentil an Kahadean nin Dios sa kamot kan harong ni David natapos kan 1914. Dangan uminabot an panahon para ki Jesu-Cristo, “an Aki ni David,” na patukawon sa trono, bakong digdi sa sarong daganon na trono, kundi sa pinakahalangkaw na kalangitan sa too ni Jehova Dios!—Daniel 7:9, 10, 13, 14.

13. (a) Poon kasuarin itinokdo an taon 1914 bilang an katapusan kan Mga Panahon nin mga Hentil, asin niisay? (b) Ano an kaisipan kan mga nasyon sa daga manongod sa bagong tumukaw sa tronong “Aki ni David”?

¹³ An mahalagang petsang iyan itinokdo poon pa kan 1876 kan mga naasosyar sa Watch Tower Bible and Tract Society. Alagad ta an mga nasyon sa daga, pati an sa Kakristianohan, nagsayumang midbidon iyan bilang an panahon na ientrega ninda an saindang daganon na mga soberaniya sa bagong tumukaw sa tronong “Aki ni David.” Dai ninda minidbid na nasa saiya an itinao nin Dios na diretso sa soberaniya sa bilog na daga, na iyo an tongtongan ni Jehova Dios. (Mateo 5:35) Ipinaheling ninda an saindang hayag na pagsikwal sa may diretsong Hade paagi sa paglaog sa enot na guerra mundial.

14. (a) Kan pumutok an Guerra Mundial I, ano an iginawe kan mga nasyon sa mga Kristiano na asosyado sa Watch Tower Society? (b) Huli kaini, ano an kahulogan kan kamugtakan sa bilog na kinaban?

¹⁴ Sa gabos na nagraralaban na nasyon, an nagdusay na mga Kristiano na asosyado sa Watch Tower Society napairarom sa grabeng pangigipit na talikdan an saindang desisyon na magdanay na ligtas sa kasalan sa dugo. Kaidto dai pa ninda lubos na nasasabotan an kahagadan para sa Kristianong neutralidad. An hula kan “Aki ni David,” si Jesu-Cristo, sa saiyang mga disipulo manongod sa “pagtatapos kan palakaw nin mga bagay” makologon na naotob: “Ikaoongis kamo kan gabos na nasyon huli sa ngaran ko.” (Mateo 24:9) An pagkaongis na ini dai nainaan poon kan katapusan kan Guerra Mundial I. Huli sa makahulogan na mga katotoohan na ini sa modernong kasaysayan, ano an kahulogan kan kamugtakan sa bilog na kinaban? Ini: An “Prinsipe nin Katoninongan” naghahade sa tahaw nin mga kaiwal na yaon mismo digdi sa daga!

15. Ano an nangyari ki Satanas na Diablo asin sa saiyang mga hukbong demonyo kan pumutok sa langit an ralaban, asin sa anong taon na seguradong nagin sierto an resulta?

¹⁵ Pinapangyari kan Makakamhan sa gabos na Dios na mamundag an ipinanugang Mesiyanikong Kahadean sa saiyang itinalaan na panahon sa ibong kan gabos na kaiwal na yaon sa langit asin sa daga. An Kapahayagan 12:1-9 nagpapaheling na pagkamundag kan ‘aking lalaking’ Kahadean sa kalangitan hale sa garo baga matris kan garo-agom na organisasyon ni Jehova, tolos-tolos na puminotok an ralaban sa langit mismo. An banal na kalangitan bako nang lugar para sa simbolikong dragon, si Satanas na Diablo, asin kan saiyang demonyong mga anghel. Sa ralaban na ini, na dai naheheling kan mga mata nin tawo, an natawan na nin makahadeng kapangyarihan na “Aki ni David” nakipaglaban nin mapanggana asin pinalayas si Satanas na Diablo asin an saiyang mga hukbong demonyo sa kalangitan asin linaom sinda sa palibot kan satong daga. An pagholog na ini kan mga hukbong sataniko malinaw na lubos na nagibo kan 1918, an taon na an Guerra Mundial I natapos.

Ibinaba, an Diablo Nakikipaglaban

16, 17. (a) Siisay an kinakalaban kan ibinabang si Satanas na Diablo? (b) Siisay an ginagamit nia sa pakikilaban na ini?

¹⁶ An ibinabang si Satanas na Diablo, an simbolikong dragon, ngonyan nangorognang anggot sa garo-agom na organisasyon ni Jehova Dios. (Kapahayagan 12:17) Kaya maringis niang kinakalaban an pinaniaki sa espiritung natatada nin nagdusay na mga Kristiano na may ebidensia na an organisasyon an saindang espirituwal na ina.—Galacia 4:26.

¹⁷ Kinakalaban man ni Satanas an “ibang karnero,” na makinuyog na nagtatrabaho kaiba kan linahidan na natatada sa pagpatotoo sa pagkamundag kan Kahadean. (Juan 10:16) Bako sanang ginagamit nia an saiyang ibinabang mga hukbong demonyo, na ngonyan nasa palibot kan daga, kundi ginagamit man an naheheling na kabtang kan saiyang organisasyon sa pakikilaban na ini tumang sa natatada asin sa “ibang karnero.”

18. (a) Minsan ngani an Diablo maringis na nakikipaglaban tumang sa linahidan na natatada asin sa saindang kairiba, anong nagpoprotehir na hukbo an nasa sainda? (b) Anong kabtang kan paghade kan “Prinsipe nin Katoninongan” an madali nang matapos?

¹⁸ An paghade kan “Prinsipe nin Katoninongan” sa tahaw kan saiyang mga kaiwal digdi sa daga harani nang matapos. Ekselente an saiyang pag-iingat sa situwasyon. Aldaw asin banggi an saiyang maimbod na banal na mga anghel atentong nagtitindog, andam na umako nin makahadeng pagboot hale sa saiya asin kuyogon iyan nin listo. Sinda naglilingkod bilang nagpoprotehir na hukbo para sa linahidan na natatada asin sa saindang kairiba, an “dakulang kadaklan” nin “ibang karnero,” mantang an mga ini nagpapadagos na maglingkod sa intereses kan Kahadean sa marikas na nauubos na panahon na ini na an “Prinsipe nin Katoninongan” naghahade sa tahaw kan saiyang mga kaiwal.—Kapahayagan 7:9.

[Mga Nota sa Ibaba]