“Dai Mahadit an Saindong Puso”

“Dai mahadit an saindong puso. Tumubod kamo sa Dios, tumubod man kamo sa sako.”—JUAN 14:1.

 1. Taano ta napapanahon na gayo an mga tataramon ni Jesus sa Juan 14:1?

KAIDTO Nisan 14 kan taon 33 C.E. May sadit na grupo nin mga lalaki na nagtitiripon sa sarong kuwarto sa itaas sa Jerusalem pagkasolnop kan aldaw. Tinatawan sinda kan saindang Lider nin huring hatol asin pagpakosog. Sa sarong kabtang sia nagsabi: “Dai mahadit an saindong puso.” (Juan 14:1) Napapanahon nanggad an saiyang mga tataramon, huli ta madali nang mangyari an nakakukubhan na mga pangyayari. Kan bangging idto sia dinakop, binista, asin sinentensiahan na gadanon.

 2. Taano ta kritikal nanggad an aldaw na idto, asin ano an nakatabang sa mga disipulo?

² May marahay na dahelan kamong ibilang an aldaw na iyan na pinakakritikal sa kasaysayan, na nakaaapektar sa bilog na ngapit nin katawohan. An sakripisyal na pagkagadan kan Lider, si Jesus, nakaotob sa dakol na suanoy na hula asin nagtao kan basihan para sa daing katapusan na buhay sa mga nagtutubod sa saiya. (Isaias 53:5-7; Juan 3:16) Alagad ta an mga apostol, na namungnan asin naribong huli sa makolog na mga pangyayari kan bangging idto, nataranta asin natakot sa kadikit na panahon. Pinaindahan pa ngani ni Pedro si Jesus. (Mateo 26:69-75) Minsan siring, kan akoon na kan maimbod na mga apostol an ipinanugang paratabang, an banal na espiritu, sinda nagin mapuso asin kalmado. (Juan 14:16, 17) Kaya, kan si Pedro asin Juan umagi sa makosog na pagtumang asin ibinilanggo, sinda nag-arang sa Dios nin tabang sa pagtaram kan saiyang tataramon “na may kapusoan.” Sinimbag an saindang pamibi.—Gibo 4:1-3, 29-31.

 3. Taano ta nahahadit na gayo ngonyan an kadakol na tawo?

³ Ngonyan, kita nabubuhay sa kinaban na nahahadit na gayo. Marikas na nagdadangadang an katapusan kan daan na palakaw na ini nin mga bagay. (2 Timoteo 3:1-5) Minilyon an personal na apektado o nahahadit na gayo sa grabeng pagbagsak kan buhay pampamilya asin moral na mga pamantayan, makatatakot na paggrabe nin misteryosong mga helang, politikal na kariribokan, kadaihan nin trabaho, kakulangan nin kakanon, terorismo, asin sa peligro nin guerra nuklear. Dakol na puso an nariribok nin dai nahahaleng pagkatakot sa ngapit. Arog kan ihinula ni Jesus, igwa nin “kahandalan nin mga nasyon . . . mantang an mga tawo nalulunosan huli sa takot asin paghalat sa mga bagay na maabot sa ineerokan na daga.”—Lucas 21:25, 26.

 4. Anong mga bagay an puwedeng magin dahelan na makamate nin tension an mga Kristiano?

⁴ Minsan an mga Kristiano puwedeng maapektaran na gayo kan siring na makamomondong mga bagay. Tibaad mapaatubang man sinda sa tension huli sa relihiyosong pan-aapi o pagtumang nin mga paryentes, pagtaraed, katrabaho, kaklase, asin mga autoridad nin gobyerno. (Mateo 24:9) Kaya paano daw kita makapagdadanay na kalmado, trangkilo, sa masakit na mga panahon na ini? Paano niato mapagdadanay an toninong na isip kun nagigin masakit an kamugtakan? Paano niato maaatubang na may kompiansa an ngapit? Ano an makatatabang sato na mapangganahan an grabeng kahaditan na nauuso? Kita nasa panahon na kapareho kan itao ni Jesus an hatol sa Juan 14:1, kaya siyasaton niato iyan nin igo.

Paano Niato Mapanggaganahan an Kahaditan?

 5. Anong nakapakokosog na mga sadol an itinatao sato kan Kasuratan?

⁵ Kan ikatao an mamomoton na pagpakosog na ‘dai mahadit an saindang puso,’ sinabihan ni Jesus an saiyang mga apostol: “Tumubod kamo sa Dios, tumubod kamo sa sako.” (Juan 14:1) An ipinasabong na Kasuratan nagtatao sato nin dakol na kaagid na mga sadol: “Bugtakan an saimong pasan ki Jehova mismo, asin sia matabang sa saimo.” “Idolot mo ki Jehova an saimong dalan, asin manarig ka sa saiya, asin sia mismo mahiro.” (Salmo 55:22; 37:5) Tinawan ni Pablo an mga taga-Filipos kan napakahalagang hatol na ini: “Dai kamo maghadit sa ano man na bagay, kundi sa gabos na bagay paagi sa pamibi asin pagngayongayo na may pasalamat ipahayag nindo sa Dios an saindong mga kahagadan; asin an katoninongan nin Dios na minalampas sa gabos na kaisipan mag-iingat kan saindong puso asin kan saindong mga pag-isip.”—Filipos 4:6, 7.

6, 7. (a) Ano an sarong paagi na mainaan an tension? (b) Paano niato makukultibar an dayupot na relasyon ki Jehova?

⁶ An kahaditan o kapurisawan huli sa mga problema asin magabat na paninimbagan kun beses puwedeng makaapektar sa satong salud saka sa satong espiritu. Minsan siring, an sarong medikal na eksperto, sa librong Don’t Panic, nagkokomento: “Kun ikinakapakipag-olay nin mga tawo an saindang problema sa saro na iginagalang ninda . . . , parate na an grado nin tension naiinaan na gayo.” Kun iyan an kaso manongod sa pakikipag-olay sa sarong tawo, gurano pa daw na orog kadakula an tabang gikan sa pakikipag-olay sa Dios. Siisay pa an ibang igagalang niato nin orog kisa ki Jehova?

⁷ Iyan an dahelan na an dayupot na personal na relasyon sa saiya napakahalaga para sa mga Kristiano ngonyan. Aram na gayo ini nin maygurang na mga lingkod ni Jehova, kaya nag-iingat sindang likayan an pakikiiba sa mga kinabanon o an klase nin mga aling-alingan na puwedeng makapaluya sa relasyon na iyan. (1 Corinto 15:33) Nasasabotan man ninda kun gurano kahalaga na makipag-olay ki Jehova sa pamibi, bako sanang saro o duwang beses kada aldaw, kundi parate. An hoben o bagong mga Kristiano nangorognang kaipuhan na kultibaron an dayupot na relasyon na ini ki Jehova paagi sa dayaday na pag-adal asin paghorophorop sa saiyang Tataramon asin Kristianong pakikiasosyar saka paglilingkod. Sinasadol kita: “Rumani kamo sa Dios, asin sia marani sa saindo.”—Santiago 4:8.

Hatol na Itinao ni Jesus

8, 9. Ikaaaplikar niato an anong positibong hatol manongod sa mga problema sa kabuhayan?

⁸ Sa dakol na nasyon, an kadaihan nin trabaho asin pagtios sa kabuhayan seryosong mga dahelan nin paghadit. Si Jesus nagtao nin positibo nanggad na hatol manongod sa mga kapurisawan na ini: “Dai na kamo magparahadit dapit sa saindong kalag kun ano an saindong kakakanon o kun ano an saindong iinomon, o dapit sa saindong hawak kun ano an saindong gugubingon. Bako daw na an kalag orog sa kakanon asin an hawak orog sa gubing?” (Mateo 6:25) Iyo, an kalag asin hawak, o an bilog na tawo, mas mahalaga nanggad kisa kakanon asin gubing. An mga lingkod nin Dios makasisierto na tatabangan nia sinda na makakua kan saindang pundamental na mga pangangaipo. Itinao ni Jesus an halimbawang ini: “Masdan nindo nin odok an mga gamgam sa langit, huli ta sinda dai nagsasabwag nin banhi o nag-aani o nagtitipon sa mga tambobong; pero pinapakakan sinda kan saindong langitnon na Ama. Bako daw na kamo orog na mahalaga kisa sainda?” (Mateo 6:26) Imposible na an Dios magtagama para sa mga gamgam pero pabayaan man an saiyang mga lingkod na tawo, na napakahalaga para sa saiya asin pinagdusayan ni Cristo kan saiyang buhay.

⁹ Dangan pinarigon pa ini nin orog ni Jesus paagi sa pagsambit sa mga liryo sa oma na dai nagpapagal ni naghahabol, pero “minsan si Salomon sa bilog niang kamurawayan dai nagubingan nin siring sa saro kaini.” An paghade ni Hadeng Salomon nabantog sa kamurawayan kaiyan. Dangan may pagrangang ihinapot ni Jesus: “Kamo pa daw an dai paggubingan” nin Dios?—Mateo 6:28-32; Awit ni Salomon 3:9, 10.

10. (a) Kiisay ipinanonongod an nakararangang mga tataramon ni Jesus? (b) Anong hatol an itinao nia manongod sa ngapit?

¹⁰ Minsan siring, ipinaliwanag ni Jesus na ini para sana sa mga ‘naghahanap kan kahadean asin kan saiyang katanosan.’ Sa bilog na kinaban, an tunay na mga Kristiano nakasasabot kun ano man nanggad an Kahadean nin Dios asin inienot iyan sa saindang buhay. Sa sainda, minaaplikar an sadol ni Jesus: “Dai kamo noarin man maghadit dapit sa masunod na aldaw, huli ta an masunod na aldaw magkakaigwa kan saiyang sadiring mga kahaditan. Igo na para sa kada aldaw an sadiring karatan kaiyan.” (Mateo 6:33, 34) Sa ibang pagtaram, atubangon an kada problemang lumataw, asin dai magparahadit nin sobra manongod sa ngapit.

11, 12. Paano nakamate an ibang Kristiano na tinabangan sinda ni Jehova bilang simbag sa saindang mga pamibi?

¹¹ Alagad an kadaklan na tawo may tendensiang maghadit manongod sa ngapit, nangorogna kun sala an dalagan nin mga bagay. Alagad an mga Kristiano puwede asin maninigong dumolok ki Jehova na may pagtubod. Helinga si Eleanor. Grabe an helang kan saiyang agom, asin sa laog nin sarong taon dai nakapagtrabaho an agom nia. May duwa siang saradit na aki asin gurang nang ama na kaipuhan na atamanon, kaya dai nia kayang magtrabaho nin bilog na panahon. Naghagad sinda nin tabang ki Jehova. Sarong aga, dai nahaloy pakalihis kaini, nakaheling sinda nin sobre sa pinto. Idto may laog na dakulang halaga nin kuwarta—igo na mabuhay sinda sagkod na makapagtrabaho giraray an agom nia. Nagpasalamat na gayo sinda para sa napapanahon na tabang na ini. Mayo nin pasisikadan sa Biblia para sa paglaom na mangyayari an kaagid kaini sa kada Kristianong nangangaipo, alagad makasisierto kita na dadangogon ni Jehova an satong mga agrangay asin na sia may kakayahan na tabangan kita sa laen-laen na paagi.

¹² An sarong balong Kristiana sa timog nin Aprika kaipuhan na humanap nin trabaho tanganing masustentohan an duwa niang saradit na aki. Pero makosog an kamawotan nia na magtrabaho sana nin kabangang aldaw tanganing may panahon siang makaibanan sinda. Pagkakua nia nin trabaho, napiritan siang magdemitir kan an manedyer magdesisyon na kaipuhan nia an bilog na panahon na sekretarya. Huling mayo na naman nin trabaho, an tugang na ini odok na namibi ki Jehova para sa tabang. Pakalihis nin tolong semana, an dati niang manedyer pinakiolayan siang bumuwelta na kabangang aldaw na sanang magtatrabaho. Ogmahon sia! Namatean nia na sinimbag ni Jehova an saiyang mga pamibi.

Magngayongayo ki Jehova

13. (a) Ano an kahulogan kan “pagngayongayo”? (b) Ano an mga halimbawa niato sa Kasuratan nin pagngayongayo?

¹³ Tabi mangnohon na pakapagsadol na, “Dai kamo maghadit sa ano man na bagay,” idinugang ni Pablo, “kundi sa gabos na bagay paagi sa pamibi asin pagngayongayo na may pasalamat ipahayag nindo sa Dios an saindong mga kahagadan.” (Filipos 4:6) Taano ta nasambitan an “pagngayongayo”? An terminong iyan nangangahulogan nin “odok na pakiolay,” o ‘nakikimaherak na pamibi.’ Iyan odok na gayong pag-arang sa Dios, arog sa panahon nin grabeng kagipitan o peligro. Kan nabibilanggo, pinakiolayan ni Pablo an mga kapwa nia Kristiano na magngayongayo para sa saiya tanganing daing takot na ikahulit nia “an maogmang bareta . . . [bilang] embahador na nakakadenahan.” (Efeso 6:18-20) An Romanong opisyal nin hukbo na si Cornelio “danay [man] na nagngayongayo sa Dios.” Seguradong ogmahon sia kan an sarong anghel magsabi: “An saimong mga pamibi asin balaog nin pagkaherak nag-itaas bilang girumdoman sa atubangan nin Dios”! Asin kanigoan kadakula kan nagin pribilehiyo nia na makabilang sa enot na mga Hentil na linahidan kan banal na espiritu!—Gibo 10:1-4, 24, 44-48.

14. Paano niato maaaraman kun baga sarong beses sanang gigibohon an odok na pakimaherak ki Jehova?

¹⁴ Mahalagang mangnohon na an siring na odok na pakimaherak ki Jehova parate na bako sanang sarong beses na ginigibo. Itinokdo ni Jesus sa saiyang bantog na Sermon sa Bukid: “Padagos na maghagad, asin ta iyan itatao sa saindo; padagos na maghanap, asin ta kamo makakakua; padagos na magtoktok, asin ta iyan bubuksan sa saindo.” (Mateo 7:7) An dakol na bersion kan Biblia itinatradusir ining: “Maghagad . . . maghanap . . . magtoktok.” Pero an orihinal na Griego nagtatao kan ideya nin nagpapadagos na aksion.a

15. (a) Taano ta mamondo si Nehemias kan nagseserbi nin arak ki Hadeng Artajerjes? (b) Paano na si Nehemias labi pa an ginibo kisa pagdolot sana nin halipot na pamibi?

¹⁵ Kan si Nehemias naglilingkod sa hade nin Persia na si Artajerjes bilang namamahala sa arak, ihinapot kan hade kun taano sia ta mamondoon. Sinabi ni Nehemias na an dahelan naaraman nia na an Jerusalem gaba. Dangan an hade naghapot: “Ano ining pinaghahagad mo?” Tolos-tolos si Nehemias naghagad nin tabang ki Jehova, daing duwa-duwa na halipot sana, daing girong. Dangan naghagad sia nin permiso na magpuli sa Jerusalem tanganing itogdok liwat an saiyang namomotan na siudad. Itinao an saiyang kahagadan. (Nehemias 2:1-6) Minsan siring, bago an kritikal na pag-atubang na idto, si Nehemias dakol nang aldaw na nakikimaherak, nagngangayongayo, ki Jehova para sa tabang. (Nehemias 1:4-11) Naheheling daw nindo kun ano an leksion digdi para sa saindo?

Si Jehova Minasimbag

16. (a) Ano an espesyal na pribilehiyo ni Abraham? (b) Ano an mapuwersang mga pantabang na yaon sa sato na puwedeng mapalabot sa mga simbag sa satong pamibi?

¹⁶ Kun beses, si Abraham kaidto may pribilehiyo na makikomunikar ki Jehova paagi sa mga anghel. (Genesis 22:11-18; 18:1-33) Minsan ngani iyan dai nangyayari ngonyan, kita binendisyonan nin makapangyarihan na mga pantabang na mayo ki Abraham. Saro an kompletong Biblia—dai mauubos na burabod nin paggiya asin pagranga. (Salmo 119:105; Roma 15:4) Parateng gayo, ikatatao sato kan Biblia an paggiya o pagpakosog na kaipuhan niato, na tinatabangan kita ni Jehova na magirumdoman an minamawot na teksto. Sa parate, an konkordansia o saro sa dakol na publikasyon sa Biblia na itinao nin Dios paagi sa saiyang organisasyon makatatao sato kan simbag. An detalyado asin marahay na indese sa mga publikasyon na ini saro pang napakahalagang pantabang sa paghanap sa kinakaipuhan na impormasyon.

17. Sa ano pang ibang paagi tibaad simbagon ni Jehova an satong pamibi, asin paano makatatabang an maboot, madinamayon na mga Kristiano?

¹⁷ Kun kita nahahadit sa sarong problema o mamondo o nanluluya an boot, an simbag sa satong mga pamibi tibaad umabot man sa ibang paagi. Halimbawa, an sarong pahayag sa Biblia sa kongregasyon o sa kombension nin mga Saksi ni Jehova tibaad igwa kan tamang-tamang “bolong” na kaipuhan niato. Sa ibang panahon, an pakiestoryahan sa saro pang Kristiano matao kan kaipuhan niato. Sa dakol na beses an kamagurangan kan kongregasyon makatatao nin pagpakosog o hatol. Minsan an pagpahayag sana kan laog kan satong puso sa sarong maygurang, maboot, asin madinamayon na Kristiano na marahay na magdangog sa parate makapararahay na kan satong pagmate. Nangorogna kun an katood na ini tinatabangan kita na maghorophorop sa mga punto sa Biblia. An siring na orolay puwedeng makahale kan nakakapagabat sa satong isip asin puso.—Talinhaga 12:25; 1 Tesalonica 5:14.

18. Anong espesyal na aktibidad an makatatabang sa mga Kristiano na mapaglabanan an mga panahon nin kamondoan, asin paano ini nakatabang sa sarong hoben na payunir?

¹⁸ An laen-laen na klase nin pagmondo uso sa “delikadong mga panahon [na ini] na masakit pakibagayan.” (2 Timoteo 3:1) An mga tawo pinanluluyahan nin boot asin nagmomondo huli sa laen-laen na dahelan. Ini puwede man na mangyari sa mga Kristiano, asin iyan puwedeng magin maraot nanggad na eksperyensia. Pero nadiskobre nin dakol na an paghuhulit kan maogmang bareta nakatabang sainda na mawara an temporaryong atake nin kamondoan.b Naprobaran na daw nindo iyan? Kun medyo mamondo, probaran na makikabtang sa sarong klase nin paglilingkod sa Kahadean. An pakipag-olay sa iba manongod sa Kahadean nin Dios parateng matabang saindo na maliwat an saindong kaisipan hale sa negatibo pasiring sa positibo. An pagtaram manongod ki Jehova asin paggamit kan saiyang Tataramon makatatao saindo nin kagayagayahan—sarong bunga kan saiyang espiritu—asin magtatao saindo nin ibang pagmate. (Galacia 5:22) Narisa man nin sarong hoben na payunir na huli sa pagigin sibot sa gibong pan-Kahadean narealisar nia na “kun ikokomparar sa problema nin iba, [an saiya] saditon sana asin temporaryo.”

19. Paano napaglabanan nin sarong Kristianong maluya an salud an negatibong mga kaisipan?

¹⁹ Kun beses, an medyo maluyang hawak, na tibaad nadugangan pa nin mga kahaditan o problema, puwedeng magbunga nin kamondoan. Tibaad ini magin dahelan na an saro mapagmata kun banggi na nahahadit, arog kan may beses na nangyayari sa sarong medyo may edad nang Kristiano na maluya an salud. Pero nadiskobre nia na an odok sa pusong pamibi tunay na tabang. Basta sia mapagmata na nakakamate nin kamondoan, kalmado siang namimibi ki Jehova. Dai mahaloy minarahay an saiyang pagmate. Nadiskobre man niang nakakapakalma an pag-otro sa tinoom na nakararangang mga teksto sa Biblia, arog baga kan Salmo 23. An espiritu ni Jehova, na naghihiro bilang simbag sa pamibi o paagi sa saiyang Tataramon, perming minatabang na salidahan an mamondong isip nin mas maogma. Kan huri, nahohorophorop na kan tawong ini an saiyang mga problema na timbang asin kalmado, na iniisip kun paano iyan mapanggaganahan o nakamamate nin kosog na tagalan iyan.

20. Taano ta may beses na garo baga atrasado an simbag sa pamibi?

²⁰ Ini sarong halimbawa kun paano sinisimbag an pamibi. Pero kun beses garo baga atrasado an pakanompong nin solusyon. Taano? Seguro an simbag kaipuhan na maghalat sa itinalaan na panahon nin Dios. Minalataw na sa nagkapirang kaso tinotogotan nin Dios na an mga nag-aarang sa saiya ipaheling an rarom kan saindang kapurisawan, an kosog kan saindang pagmawot, an pagigin tunay kan saindang debosyon. Iyan an naeksperyensiahan kan saro sa mga salmista!—Salmo 88:13, 14; ikomparar an 2 Corinto 12:7-10.

21. Taano ta dakulang pribilehiyo an magin saro sa mga Saksi ni Jehova ngonyan, asin paano kita makapagpapaheling nin pag-apresyar?

²¹ Ano man an mangyari, an pakikomunikar sa Dios na Makakamhan sa gabos sa pamibi sarong eksperyensiang nakapagpapakosog sa pagtubod na makakakalda sato hale sa pagkadesesperar pasiring sa pagkompiar. Nakararanga nanggad na maaraman na sia nagdadangog asin minasimbag! Arog kan isinurat ni Pablo sa kongregasyon sa Filipos, maninigong idolot niato an satong mga pamibi asin pagngayongayo “na may pasalamat.” (Filipos 4:6) Iyo, aroaldaw maninigo niatong bukasan an satong puso sa pagpasalamat ki Jehova asin “magpasalamat kamo para sa gabos na bagay.” (1 Tesalonica 5:18) Ini makakokontribuwir sa dayupot, mainit na relasyon asin magtatao sato nin katoninongan. An minasunod na artikulo nagpapaliwanag kun gurano ini kahalaga para sa mga lingkod ni Jehova sa maribok, peligrosong mga panahon na ini.

[Mga Nota sa Ibaba]

Ano an Isisimbag Nindo?

◻ Ano an puwedeng magin mga dahelan na mahadit an mga Kristiano?

◻ Ano an makatatabang sato na mapangganahan an kahaditan?

◻ Taano ta makasisierto an mga Kristiano na tatabangan sinda nin Dios sa saindang pundamental na mga pangangaipo?

◻ Ano an kahulogan kan “pagngayongayo,” asin paano an nakaaging mga halimbawa nag-iilustrar kun paano minasimbag si Jehova?

◻ Sa anong laen-laen na paagi tibaad simbagon ni Jehova an satong mga pamibi?

[Ritrato sa pahina 9]

‘Pinapakakan kan saindong langitnon na Ama an mga gamgam. Bako daw na kamo orog na mahalaga kisa sainda?’