Lakop sa Kinaban na Katiwasayan sa Pagsakop kan “Prinsipe nin Katoninongan”
Kapitulo 16: An “Dakulang Kadaklan” Naglalakaw na Ngonyan sa “Lansangan” Pasiring sa Organisasyon nin Dios
1, 2. Noarin naootob sa espirituwal an Isaias kapitulo 35, asin anong paglaladawan an itinatao kan enot na duwang bersikulo?
SA PANAHON kan Milenyal na Paghade kan “Prinsipe nin Katoninongan,” an dakol na kabtang kan Isaias kapitulo 35, na ngonyan naootob bago an pagkalaglag kan Dakulang Babilonya, maheheling sa literal na sentido sa katawohan. Huli ta an nagibo sa espirituwal na paagi seguradong gigibohon sa pisikal na paagi. An mayor na espirituwal na kaotoban kan hulang ini nangyayari ngonyan mismo, sa pakapuli kan mga lingkod nin Dios hale sa pagkabihag sa Dakulang Babilonya. Iyan ilinadawan ni propeta Isaias sa magayonon na pagkataram na ini:
2 “An kapatagan asin an alang na lugar mag-oogma, asin an disyerto maggagayagaya patin mamumurak na arog kan azafran. Daing duwa-duwa na iyan mamumurak, asin iyan nanggad magigin maogmahon na may kurahaw nin kaogmahan asin kagayagayahan. An kamurawayan nin Libano mismo itatao dian, an kagayonan nin Carmelo asin nin Saron. Igwa nin mga makakaheling kan kamurawayan ni Jehova.”—Isaias 35:1, 2.
3. Kaidtong ikaanom na siglo B.C.E., saen an dagang daing laog, asin paano iyan mag-oogma?
3 Yaon saen an kapatagan asin an alang na lugar patin an disyerto? Kan ikaanom na siglo B.C.E., iyan yaon sa teritoryo kan kahadean nin Juda. Pag-abot nin 537 B.C.E., an dagang idto 70 taon nang gaba asin daing nag-iistar. Alagad ta paano makapag-oogma an kapatagan? Kaipuhan na ibalik dian an mga dating nag-iistar. Idto ilalangkaw hale sa hababang kamugtakan kaiyan asin tatawan kan dignidad kan haralangkaw na bukid nin Libano.
Paggibo nin Piguratibong Tatamnan nin Eden
4, 5. (a) Kasuarin, sa modernong mga panahon, nangyari an kaparehong pagkaliwat nin siring na mapungaw na daga, asin taano? (b) Ano an ibinunga kan mga aktibidad sa pagbabagong buhay kan linahidan na natatada? (c) Paano ilinadawan kan Isaias 35:5-7 an saindang nabagong espirituwal na kamugtakan?
4 An modernong katimbang, sa espirituwal na sentido, sa pagkaliwat na ini nin sarong daga hale sa mapungaw na kamugtakan pasiring sa kamugtakan na nagpapatunay kan nakabalik na pag-oyon ni Jehova nagpoon na mangyari kan 1919. An nakabalik na banwaan ni Jehova determinado na lubos na aprobetsaran an panahon nin katoninongan na nabukasan. An Orog na Dakulang Ciro, si Jesu-Cristo, asin an saiyang Ama, si Jehova Dios, iinasignar an nakatalingkas na natatada sa espirituwal na mga Israelitas na gumibo nin makangangalas na gibohon na katimbang kan pagtogdok liwat sa templo ni Jehova kan nakapuling natatada sa suanoy na Israel pakalihis nin 537 B.C.E. An mga aktibidad sa pagbabagong buhay pakalihis kan 1919 nagbunga kan pakagibo nin piguratibong tatamnan nin Eden.
5 Ini ihinula sa mga tataramon na ini kan Isaias 35: “Sa panahon na iyan an mga mata kan mga buta magkakaburuklat, asin an mismong mga talinga kan mga bongog magkakaburukasan. Sa panahon na iyan an pilay matukad na garo usa, asin an dila kan pula magkukurahaw sa kaogmahan. Huli ta an katubigan maburakbusak sa kapatagan, asin an kasalogan sa disyerto. Asin an alang na daga magigin siring sa danaw na may mga gaho, asin an pahang daga siring sa mga burabod nin tubig. Sa erokan nin mga layas na ayam, na pahingaloan ninda, magkakaigwa nin berdeng doot na may mga gaho asin papiro.”—Isaias 35:5-7.
6. Ano an dai naolang kan padagos na pag-eksister kan antitipiko, modernong Edom, asin siisay ngonyan an maogmang nagkukurahaw kaiba kan nakabalik na natatada?
6 An pag-eksister kan antitipiko, modernong Edom dai nakaolang sa pakabalik kan espirituwal na Israel sa paraisong kamugtakan bilang kaotoban kan Isaias kapitulo 35. Kaya an modernong mga Edomita mayo nin dahelan na maggayagaya kapareho kan nakabalik na natatada sa espirituwal na Israel, kaiba an nagdadakol na “dakulang kadaklan.” An “dakulang kadaklan” igwa nin dakulang kabtang sa mantension kan espirituwal na paraiso kan modernong mga Saksi ni Jehova.
7. Ano an noarin man dai natanaw kan mga mata nin pakasabot kan natatada bago an 1914, asin nabukasan daw an saindang “butang” mga mata?
7 Bago matapos an Mga Panahon nin mga Hentil noarin man dai nabukasan an mga mata nin pakasabot kan espirituwal na mga Israelitas tanganing maheling na an kariribokan sa kinaban na nakatalaan na pumutok kan 1914 matatapos na igwa pa nin natatada sa sainda digdi sa daga. Ni naheling man ninda na sinda asin an “dakulang kadaklan” kan “ibang karnero” tatawan kan pribilehiyo na tumao nin lakop sa kinaban na patotoo sa pagpatindog sa Mesiyanikong Kahadean nin Dios. Kaya nangyari na kan 1919 an buta sa espirituwal na mga mata kan natatada nabukasan, asin kanigoan karahay na bisyon sa nagdadangadang na ngapit an namansayan kan nabukasan na mga matang idto!
8. Ano an nagin epekto kan duwang kombension sa Cedar Point, Ohio, sa espirituwal na mga talinga asin dila kan nakabalik na natatada?
8 Sa saindang mga kombension sa Cedar Point, Ohio, kan 1919 asin 1922, nag-ako sinda nin ideya sa gibohon na nasa enotan. Linukso ninda an gibong nasa atubangan ninda. An saindang espirituwal na mga talinga nabukasan tanganing madangog an nakapahihirong mensahe kan Kahadean nin Dios asin an pangangaipo na ipaisi iyan. Siring sa usa, haros lumukso sinda tanganing maglingkod bilang mga parapatotoo para sa Kahadean na iyan na haloyon nang ipinamimibi. An saindang mga dila, na bago kaini nagin pula, nagkurahaw sa kaogmahan manongod sa Mesiyanikong Kahadean na nasa kapangyarihan na sa kalangitan.—Kapahayagan 14:1-6.
9. Sa espirituwal, paano nagburakbusak an tubig sa kapatagan?
9 Iyo, garo baga nagkatubig an espirituwal na daga na dati alang asin daing laog, kaya ngonyan an gabos berde na huli sa marambong na mga pananom—andam na magin mabunga nanggad. Bakong makangangalas na an nakabalik na banwaan ni Jehova naggayagaya nin labi-labi asin napakosog na siring sa usa na mabagsik na minatukad sa mga kalangkawan! Tunay nanggad, an tubig nin katotoohan manongod sa Kahadean nin Dios, na pinatindog sa kamot ni Jesu-Cristo kan 1914, nagburakbusak nin pakosog nang pakosog, na nagbunga nin kanigoan na kapreskohan.—Isaias 44:1-4.
An “Lansangan” nin Kabanalan
10, 11. (a) Ano an kahulogan kan nakarerepreskong pagkaliwat na ini? (b) Paagi sa anong dalan na an natatada nakaabot sa saindang espirituwal na paraiso, asin paano iyan ilinaladawan kan Isaias 35:8, 9?
10 Ano an kahulogan kan nasa enotan? Ini: Enot an natatada dangan an “dakulang kadaklan” nin “ibang karnero” nagluwas na sa Dakulang Babilonya asin ginibong mga saksi kan Kahadean nin Dios. Alagad paagi sa anong agihan na sinda makababalik sa banal na pag-oyon asin makalalaog sa espirituwal na paraisong ini? An mangyayari garo may mabubukasan sa sainda na halakbang, mahiwas na dalan tanganing an mga kadaklan nin may espiritu sa pagpapayunir na mga Israelitas sararong magmartsa pasiring sa saindang daga na itinao nin Dios. Ini ipinaririsa kan maogmahon na hula ni Isaias:
11 “Asin magkakaigwa dian nin lansangan, nin sarong dalan; asin aapodon iyan na Dalan nin Kabanalan. Dai maagi dian an marigsok, asin iyan magigin para sa naglalakaw sa dalan, asin mayo nin mga mangmang na maglalakawlakaw dian. Dai dian magkakaigwa nin leon, asin an naninibang mabangis na mga hayop dai matukad dian.”—Isaias 35:8, 9.
12. Automatiko daw na binukasan kan katapusan nin Guerra Mundial I an “lansangan” para sa natatada, asin ano an nangyari kan ikaapat na aldaw kan taon 1919?
12 An katapusan kan Guerra Mundial I dai automatikong nagbukas nin “lansangan” sa modernong aldaw. An walo sa mga nagtatrabaho sa opisina prinsipal kan Watch Tower Society nabibilanggo pa asin luminuyang gayo an paghuhulit. Kan Enero 4, 1919, sa taonan na miting kan Watch Tower Society sa Pittsburgh, Pennsylvania, si J. F. Rutherford, an presidente kan Sosyedad, naelehir liwat sa katongdan, sa ibong kan saiyang pagkabilanggo, huli sa kasegurohan na sia daing salang lingkod kan Kaharohalangkaweng Dios.
13, 14. Anong mga pangyayari kan 1919 an nagparisa na may piguratibong lansangan na nabukasan para sa natatada, asin siisay an naglakaw sa “lansangan” na iyan?
13 Kan Marso 25, 1919, sia asin an pitong kairiba nia sa bilanggoan nakaluwas asin kan huri biyong pinatunayan na daing sala. An The Watch Tower kan Setyembre 15, 1919, pahina 283, nagkaigwa kan nakapakokosog sa boot na bareta na, sa Oktubre 1, 1919, an mga opisina kan Sosyedad ibabalik hale sa Pittsburgh pasiring sa Brooklyn Bethel sa 124 Columbia Heights. Dangan, sa luwas na Disyembre 15, 1919 kan The Watch Tower, an duwa kada bulan na publikasyon na ini ipinaisi na ipinupublikar na liwat sa Brooklyn, Nueva York.
14 Kaya nangyari na kan 1919 may piguratibong lansangan na nabukasan para sa magayagayang mga lingkod nin Dios. An mga boot na magin banal sa pagheling ni Jehova iyo an mga naglakaw sa “lansangan” na iyan, “an Dalan nin Kabanalan.” An siisay man na mayo kan tamang katuyohan, malinig na motibo, dai naglakaw sa piguratibong “Dalan nin Kabanalan” na iyan asin nakabalik sa banal na pag-oyon.
15. Ano an nagtatao nin naheheling na pruweba na an “dakulang kadaklan” naglaog na sa piguratibong lansangan?
15 Kan Hunyo 1, 1935, sa kombension sa Washington, D.C., 840 sa “dakulang kadaklan” an nabautismohan sa tubig, na nagtao nin naheheling na pruweba na sinda nagpoon nang lumaog sa “lansangan.” Ngonyan, minilyon sa sainda an naglaog na sa lansangan, na nakiiiba sa nagkakadikit na linahidan na natatada. Matoninong asin sa maogmang pag-iribaiba, sinda ngonyan magkairibang naglalakaw sa “lansangan,” determinado na, sa tabang kan Makakamhan sa gabos na Dios sa langit, mayo nin ano man na makalalaglag sa saindang pagkasararo.
16. Sa piguratibong pagtaram, taano ta mayo nin leon o iba pang naninibang hayop sa lansangan na ini?
16 Sa piguratibong pagtaram, mayo nin leon o ano man na ibang naninibang hayop na manonompongan sa lansangan na ini. An boot sabihon, mayo nin ano man na magigin kaolangan o katatakotan kan linahidan na natatada asin kan “dakulang kadaklan.” Sinda may kompiansang naglalakaw sa dalan na binukasan para sa sainda ngonyan kan saindang Paraligtas, an Orog na Dakulang Ciro, na an dudumanan an Sion.
17. (a) Minsan ngani harayo na an naabot niato sa “pagtatapos kan palakaw nin mga bagay,” bukas pa daw an “lansangan”? (b) Siisay an naglalaog sa “Dalan nin Kabanalan,” asin paano ninda iyan ginibo?
17 Ngonyan, na harayoon na an naabot sa “pagtatapos kan palakaw nin mga bagay,” an itinao nin Dios na “lansangan” na iyan bukas pa. Kadakol na may pagpahalagang mga tawo an minakuyog sa impormasyon na an Dakulang Babilonya buminagsak sa pagsalakay kan Orog na Dakulang Ciro, si Jesu-Cristo. Asin sinda minadulag dian, na minalaog sa dalan kan espirituwal na paraiso, “an Dalan nin Kabanalan.”—Jeremias 50:8.
18. Paano ilinaladawan kan huring bersikulo nin Isaias 35 an presenteng kamugtakan kan maimbod na mga saksi ni Jehova, asin siisay an maninigong pasalamatan para sa pagkaotob kan hulang ini?
18 Sinda nagkakamit nin dai ikaladawan na kagayagayahan asin kaogmahan, arog kan sabi kan huring bersikulo kan Isaias kapitulo 35: “Asin an mismong mga binalukat ni Jehova mabalik asin sierto nanggad na maduman sa Sion na may maogmang kurahaw; asin an kaogmahan sagkod sa panahon na daing katapusan mamumugtak sa saindang payo. Maaabot ninda an kaogmahan asin kagayagayahan, asin madulag an kamondoan asin pagtangis.” An saindang kamondoan asin pagtangis huli sa pagigin dai nakakapaoyon ki Jehova Dios kaidto nagdulag na poon kan 1919. Asin an kamondoan asin pagtangis dai na nagbuwelta sa maimbod, magayagayang mga saksi ni Jehova. Salamat sa nagsasabi nin totoong Dios, si Jehova, na inotob sa kaomaw-omaw na paagi an magayonon na hulang iyan kan Isaias kapitulo 35!