Nag-abot Na an Oras kan Paghokom nin Dios

“Matakot sa Dios asin pamurawayon sia, huli ta nag-abot na an oras kan saiyang paghokom.”—KAPAHAYAGAN 14:7.

 1. Ano an kabale sa enot na mga kapitulo nin Kapahayagan?

AN LIBRO nin Kapahayagan may makawiwiling mga hula na may kaotoban sa satong aldaw. An sinusundan na artikulo nagpaliwanag kan nagkapira, pati an pagbukas sa anom na simbolikong selyo. An binukasan na mga selyong ini nagpahayag kan mapanlaglag na pagsakay kan apat na apokaliptikong parakabayo sa “huring mga aldaw” na ini. (2 Timoteo 3:1; Kapahayagan 6:1-8) Iyan nagsasaysay man manongod sa mga maghahade kaiba ni Cristo sa langit asin sa mga makaliligtas sa “dakulang kahorasaan” tanganing mag-erok sa daga sagkod lamang. Ipinaheheling kan anom na selyo na an “itinalaan na panahon” nin Dios sa paghohokom “harani na.”—Kapahayagan 1:3; 7:4, 9-17.

 2. Paano gagamiton an pitong simbolikong trumpeta sa Kapahayagan kapitulo 8?

² Alagad igwa pa nin sarong selyo, an ikapito. Sinasabi sato kan Kapahayagan 8:2 kun ano an ihinayag kan iyan bukasan: “Asin naheling ko an pitong anghel na nagtitindog sa atubangan nin Dios, asin may itinao sa saindang pitong trumpeta.” An bersikulo 6 nagsasabi: “Asin an pitong anghel na igwa kan pitong trumpeta nag-arandam sa pagpatanog kaiyan.” Sa mga panahon kan Biblia, an mga trumpeta ginamit tanganing magsenyal nin mahahalagang okasyon. Sa kaparehong paagi, an pitong pagtanog na ini kan trumpeta nag-aapod nin atension sa mga bagay na may buhay-asin-kagadanan na halaga sa satong panahon. Asin minsan ngani mga anghel an nagpapatanog sa mga trumpeta, an mga Saksing tawo sa daga sinusundan iyan paagi sa pagpalakop kan mahahalagang bareta na ipinaiisi kan kada tanog nin trumpeta.

Kun Ano an Kahulogan kan mga Tanog kan Trumpeta

 3. Ano an kahulogan kan pitong tanog nin trumpeta?

³ An mga tanog na ini kan trumpeta nagpapagirumdom sato kan mga damat na ibinubo ni Jehova sa suanoy na Egipto. An mga damat na ini kapahayagan kan paghokom ni Jehova sa enot na kapangyarihan pankinaban na idto asin sa falsong relihiyon kaiyan, pero iyan nagbukas man kan dalan na makadulag an banwaan nin Dios. Kaagid kaiyan, an mga tanog na ini kan trumpeta sa Kapahayagan mga damat sa modernong aldaw, ngonyan sa bilog na kinaban ni Satanas asin sa falsong relihiyon kaiyan. Alagad iyan bakong literal na mga damat kundi mapandamat na mga mensahe manongod sa mga paghokom ni Jehova. Iyan nagsasabi man kan paagi na makaligtas an banwaan nin Dios.

 4. Paano an pitong tanog nin trumpeta naotob sa satong panahon?

⁴ Kaoyon sa pitong tanog na ini kan trumpeta, an epektibong mga resolusyon tumang sa kinaban ni Satanas itinampok sa pitong espesyal na taonan na kombension kan banwaan ni Jehova poon kan 1922 sagkod 1928. Ginatos na milyon na kopya kan mga resolusyon an iwinaras. Minsan siring, an pagpatanog kan nakapapasong mga mensaheng iyan bako sanang kan mga taon na idto, kundi iyan nagpapadagos sa huring mga aldaw na ini. Asin ngonyan an pagtanog kaiyan mas makosog kisa kasuarin pa man, mantang idinugang kan minilyon na “dakulang kadaklan” an saindang tingog sa sadit na grupo nin mga linahidan na naenot na naghuhulit pakalihis kan Guerra Mundial I. (Kapahayagan 7:9) Kada taon ngonyan, sa nag-oorog na kosog asin bilang, an minilyon na ini nagpapahayag na an kinaban ni Satanas biyong malalaglag.

 5. Siisay an “ikatolong kabtang” kan kinaban na enot na sisilotan, asin taano?

⁵ Sa Kapahayagan 8:6-12, nagtanog an enot na apat na trumpeta. Ibinubo an graniso, kalayo, asin dugo, na nagbunga kan pagkalaglag kan “ikatolong kabtang” kan kinaban. Taano ta nasasabihan an “ikatolong kabtang” bilang an may kasalan na kabtang kan kinaban na enot na sinilotan? Huli ta minsan ngani an bilog na palakaw ni Satanas may kasalan sa Dios, an sarong kabtang mas grabe an kasalan. Arin na kabtang? An kabtang na inginaran sa sadiri an ngaran ni Cristo—an Kakristianohan. Asin kan an mga mensahe nin paghokom nin Dios dumatong tumang sa saiya pakalihis kan Guerra Mundial I, an Kakristianohan kaidto nakasasakop sa mga ikatolong kabtang nin katawohan.

 6. Taano ta pinabayaan ni Jehova an Kakristianohan na malaglag?

⁶ An relihiyon nin Kakristianohan bunga kan 1,900 na taon nang apostasiya gikan sa tunay na Kristianismo na ihinula ni Jesus asin kan saiyang mga disipulo. (Mateo 13:24-30; Gibo 20:29, 30) An klero nin Kakristianohan irenerepresentar an sadiri na mga paratokdo nin Kristianismo, alagad ta an saindang mga doktrina harayoon sa katotoohan kan Biblia, asin an saindang maraot na mga gibo daing pondo sa pagtao nin langhad sa ngaran nin Dios. Nabuyagyag an saindang kasalan sa dugo huli sa pagsuportar sa mga guerra sa ika-20 siglong ini. An Kakristianohan biyong kaiba sa palakaw nin mga bagay ni Satanas. Kaya, sia nag-aako nin makokosog, nandadamat na mga mensahe gikan ki Jehova na nagpapaheling na sia dai maninigong umako nin banal na pag-oyon. Pinabayaan na ni Jehova sa kalaglagan an harong kan Kakristianohan kun paanong pinabayaan nia an harong kan mga Judio kan enot na siglo!—Mateo 23:38.

Binuhay Liwat Para sa Lakop sa Kinaban na Paghuhulit

7, 8. (a) Sa Kapahayagan kapitulo 9, ano an ihinahayag kan ikalimang tanog kan trumpeta? (b) Siisay an isinisimbolo kan mga doron?

⁷ Sa Kapahayagan 9:1 pinatanog kan ikalimang anghel an saiyang trumpeta, asin ipinaheling kan bisyon an sarong bitoon na naghihilig sa daga. An bitoon na ini may liyabe sa saiyang kamot. Paagi kaiyan binukasan nia an sarong bungaw na nalalaoman nin sarong mahibog na panganoron nin mga doron. An bitoon iyo an bagong patukawon ni Jehova na langitnon na Hade, si Jesu-Cristo. An mga doron mga lingkod nin Dios, na pinaglamag asin garo baga napapondo na kan an nangengenot nindang mga opisyales mabilanggo kan 1918. Alagad si Cristo, na ngonyan nasa kapangyarihan kan Kahadean sa langit, binutasan sinda tanganing magibo liwat ninda an saindang lakop sa kinaban na paghuhulit sa publiko, sa dakulang panluluya nin boot kan klero, na nagpakana na gadanon an saindang gibohon.—Mateo 24:14.

⁸ An mga doron ilinaladawan sa Kapahayagan 9:7 nin arog kaini: “Asin an mga doron garo mga kabayo na inandam sa pakilaban; asin sa saindang mga payo igwa nin garo mga korona na siring sa bulawan, asin an saindang mga lalauogon garo mga lalauogon nin mga tawo.” Idinudugang kan bersikulo 10: “Siring man, igwa sinda nin ikog asin sugod na siring sa mga amamatak.” An mga doron na ini marahayon na naglaladawan sa binuhay liwat na natatada sa mga paramana kan Kahadean na naglaog na naman sa espirituwal na pakikilaban magpoon kan 1919. May nakabalik na kosog, ibinalangibog ninda an makolog na mga mensahe nin paghokom nin Dios, nangorogna tumang sa maraot na Kakristianohan.

9, 10. (a) Ano an ihinahayag kan ikaanom na tanog kan trumpeta? (b) Sairisay an kairiba sa manorosampulong ribong makokosog na kabayo?

⁹ Sumunod, pinatanog kan ikaanom na anghel an saiyang trumpeta. (Kapahayagan 9:13) Ipinahahayag kaini an pagbutas sa mga hukbo nin mga parakabayo. An bersikulo 16 nagsasabi na an kabilangan ninda “duwang manampulong ribo nin manorosampulong ribo,” na bale 200 milyones! Asin sinda ilinaladawan sa bersikulo 17 asin 19 nin arog kaini: “An payo kan mga kabayo garo payo nin mga leon, asin sa saindang ngoso may nagluluwas na kalayo asin aso patin asupre. . . . An saindang ikog garo mga halas.” An mga hukbong ini nangangabayo sa paggiya kan Hade, si Cristo Jesus. Asin makatatakot nanggad sindang paghelingon!

¹⁰ Ano an irenerepresentar kan makokosog na kabayong ini? Mantang minilyon an kabilangan ninda, dai puwede na sinda an linahidan na natatada sana, na ngonyan mga 8,800 na sana digdi sa daga. An manorosampulong ribong mga kabayong ini seguradong kaiba an “dakulang kadaklan” sa Kapahayagan kapitulo 7, an mga may paglaom na mabuhay sagkod lamang digdi sa daga. Sa Biblia, an terminong “manorosampulong ribo” (sa Ingles, “myriad”) parateng nangangahulogan nin dakulaon, dai masabing kabilangan. Kaya, kaiba sa simbolikong mga kabayong ini bako sanang an nagdidikit na mga linahidan kundi pati an nagdadakol asin may makosog na boses na minilyon sa “dakulang kadaklan” nin “ibang karnero” na nagpapadagos kan gibohon sa publiko na pinonan kan garo-doron na linahidan na natatada.—Juan 10:16.

11. Taano ta sinasabi na “an kapangyarihan kan mga kabayo yaon sa saindang ngoso,” asin paano sinda ‘nagpapasakit paagi sa saindang ikog’?

¹¹ Sinasabi kan Kapahayagan 9:19: “An kapangyarihan kan mga kabayo yaon sa saindang ngoso,” asin “paagi [kan saindang ikog] sinda nagpapasakit.” Sa anong paagi na an kapangyarihan nasa saindang ngoso? Sa paagi na sa dakol na dekada, paagi sa Teokratikong Paadalan sa Pagmiministro asin iba pang pagtiripon, an mga lingkod nin Dios tinokdoan kun paano ihuhulit an saiyang mga mensahe nin paghokom sa paaging may autoridad paagi sa pagtaram. Asin sa anong paagi na sinda nagpapasakit paagi sa saindang mga ikog? Sa paagi na sinda nagwawaras nin binilyon na mga babasahon na basado sa Biblia sa bilog na kinaban, sa siring nagwawalat nin makolog na mga mensahe tumang sa kinaban ni Satanas. Para sa saindang mga kaiwal, an mga hukbong ini nin mga parakabayo talagang garo manampulong ribo nin manorosampulong ribo.

12. Ano an dapat na ipagpadagos na gibohon kan simbolikong mga doron asin kabayo, asin may anong epekto?

¹² Kaya, an simbolikong mga doron asin kabayo kaipuhan na ipahayag an mga mensahe nin paghokom nin Dios nin mas klaro asin makosog mantang nagdadangadang an saiyang aldaw nin pamalos. Para sa mga may sadiosan na puso, an mga mensaheng iyan iyo an pinakamarahay na bareta sa daga. Alagad para sa mga gusto sa kinaban ni Satanas, iyan maraot na bareta, ta iyan nangangahulogan na an saindang kinaban madali nang laglagon.

13. Ano an “ikatolong herak man” na kalabot sa ikapitong tanog nin trumpeta, asin paano na iyan “herak man”?

¹³ An nandadamat na mga doron asin mga hukbo nin mga parakabayo ilinaladawan bilang an enot asin ikaduwa sa tolong “herak man” na itinalaga nin Dios. (Kapahayagan 9:12; 11:14) Ano an “ikatolong herak man”? Sa Kapahayagan 10:7 sinasabi sa sato: “Sa mga aldaw kan pagpatanog kan ikapitong anghel, . . . an banal na hilom nin Dios sono sa maogmang bareta na saiyang ipinahayag sa saiyang mga oripon na mga propeta tunay na matatapos na.” An banal na hilom na ini may labot sa “banhi” na enot na ipinanuga sa Eden. (Genesis 3:15) An “banhing” iyan sa pangenot iyo si Jesus pero kaiba man dian an saiyang linahidan na kairiba na maghahade kaiba nia sa langit. Kaya an banal na hilom manongod sa langitnon na Kahadean nin Dios. An Kahadean magtatao kan ikatolong “herak man” na katuyohan nin Dios, ta ootobon kaiyan an mga paghokom nin Dios tumang sa kinaban ni Satanas sagkod sa katapusan.

Pinatindog an Kahadean

14. Ano an ipinaisi kan ikapitong tanog nin trumpeta sa Kapahayagan 11:15?

¹⁴ Dangan iyan nangyari! An Kapahayagan 11:15 nagsasabi: “Asin pinatanog kan ikapitong anghel an saiyang trumpeta. Asin nadangog an makokosog na tingog sa langit, na nagsasabi: ‘An kahadean kan kinaban nagin nang kahadean kan satong Kagurangnan [si Jehova] asin kan saiyang Cristo, asin sia maghahade sagkod lamang.’ ” Iyo, ipinaiisi na an Kahadean nin Dios paagi ki Cristo pinatindog sa langit kan taon 1914. Asin kan an natatada buhayon liwat pakalihis kan Guerra Mundial I, ipinahayag ninda an baretang ini.

15. Kan 1922, anong okasyon an nagsenyal sa bagong pagkosog nin paghuhulit kan Kahadean?

¹⁵ Sa sarong kombension kan 1922 nin mga lingkod ni Jehova sa Cedar Point, Ohio, E.U.A., an rinibong nag-atender nakadangog sa makaoogmang paisi: “Iyo ini an aldaw nin gabos na aldaw. Uya, an Hade naghahade na! Kamo an saiyang mga parabareta. Kun siring ipaisi, ipaisi, ipaisi, an Hade asin an saiyang kahadean.” Pinonan kaiyan an dakulang pagkosog kan paghuhulit kan Kahadean sa publiko na kaiba an mga paghokom na ipinahayag kan pitong mga paratrumpetang anghel. Ngonyan, mga tolo may kabangang milyon na lingkod ni Jehova sa labing 57,000 na kongregasyon sa bilog na kinaban an kalabot sa lakop sa globong paghuhulit kan Kahadean na ini. Manorosampulong ribo nanggad!

16. Sa Kapahayagan kapitulo 12, ano pang dugang na pangyayari mapadapit sa langit asin daga an ihinayag kan ikapitong tanog nin trumpeta?

¹⁶ Alagad igwa pa nin ihahayag an ikapitong anghel. An Kapahayagan 12:7 nagsasabi na kaidto “puminotok an ralaban sa langit.” An bersikulo 9 nagsasabi sato kan resultang ini kan paghiro ni Cristo na Hade: “Kaya ihinolog an dakulang dragon, an enot na halas, an inaapod Diablo asin Satanas, na nandadaya sa bilog na ineerokan na daga; ihinolog sia sa daga, asin an saiyang mga anghel ihinolog sa kaibanan nia.” Idinudugang kan bersikulo 12: “Huli kaini mag-ogma, kamo kalangitan asin kamo na nag-eerok dian!” Iyo, an kalangitan lininigan kan impluwensia ni Satanas, sarong dahelan nin dakulang pag-ogma kan maimbod na mga anghel. Alagad ano an kahulogan kaiyan para sa mga tawo? An bersikulo man sanang iyan minasimbag: “Herak man kan daga asin kan dagat, huli ta huminilig na dian saindo an Diablo, na may dakulang kaanggotan, sa pakaaram na halipot na sana an saiyang panahon.”

17. Taano ta angay an paglaladawan sa gobyerno kan kinaban bilang “mabangis na hayop” sa Kapahayagan kapitulo 13?

¹⁷ An Kapahayagan 12:3 ilinaladawan si Satanas bilang ‘dakulang dragon, na igwa nin pitong payo asin sampulong sungay,’ sarong makatatakot na garo-hayop na paralaglag. Ini nagpapaheling na sia an kagdisenyo sa daganon na politikal na “mabangis na hayop” na ilinaladawan sa kapitulo 13, bersikulo 1 asin 2. An hayop na iyan igwa man nin pitong payo asin sampulong sungay, kapareho ni Satanas. An bersikulo 2 nagsasabi: “An dragon [si Satanas] nagtao sa hayop kan kapangyarihan kaiyan asin kan trono kaiyan patin dakulang autoridad.” An paglaladawan sa politikal na mga gobyerno bilang mabangis na hayop talagang maninigo, huli ta sa ika-20 siglo sanang ini, labing sanggatos na milyon katawo an nagadan sa mga guerra kan mga nasyon.

18. Ano an may duwang sungay na hayop sa Kapahayagan 13:11, asin paano an mga gibo kaiyan nakatatabang na ipamidbid iyan?

¹⁸ An sumunod na eksena sa Kapahayagan 13 nagpapaheling, arog kan sabi kan bersikulo 11, “nin saro pang mabangis na hayop na nagluluwas hale sa daga, asin iyan igwa nin duwang sungay siring sa kordero, alagad ta iyan nagpoon na magtaram na siring sa dragon.” An may duwang sungay na hayop na ini iyo an politikal na magkasorog na Anglo-Amerikano. Iyan garo-kordero ta iyan nagsasagin bakong maisog, an pinakaedukadong klase nin gobyerno. Pero iyan nagtataram na siring sa dragon, siring ki Satanas, asin inaapod na “saro pang mabangis na hayop” huli ta an mga gibo kaiyan sa pamamahala arog-hayop. Iyan namimirit asin nan-uuma patin naggagamit pa ngani nin kadahasan kun dai inaako an paagi nin pamamahala kaiyan. Iyan nagsasadol, bakong nin pagpapasakop sa Kahadean nin Dios, kundi, imbes, nin pagpairarom sa kinaban ni Satanas. Kaya an bersikulo 14 nagsasabi: “Iyan nandadaya sa mga nag-eerok sa daga.”

19, 20. (a) Ano an ipinaheheling kan integridad kan mga lingkod ni Jehova? (b) Paano niato naaaraman na an linahidan na natatada seguradong manggagana sa kinaban ni Satanas?

¹⁹ An kinaban na ini na sakop ni Satanas masakit na istaran kan mga, kaoyon sa pagboot ni Jesus sa tunay na mga Kristiano, bakong kabtang kaiyan. (Juan 17:16) Kaya, sarong pambihirang kapahayagan kan kapangyarihan asin bendisyon ni Jehova na an saiyang mga lingkod sa bilog na kinaban ngonyan nagdadanay sa integridad asin sararong nagpapadagos na omawon si Jehova asin an saiyang matanos na mga dalan. Ginigibo ninda ini sa atubang nin grabeng pagtumang, paglamag, asin pati kagadanan.

²⁰ An linahidan na natatada sa partikular nagin punteriya ni Satanas ta sinda magigin kairibang hade ni Cristo. Alagad ipinaheheling kan Kapahayagan kapitulo 14 na an bilog na kabilangan ninda, 144,000, mapangganang tinipon kaiba ni Cristo sa kapangyarihan kan Kahadean. Sinda maimbod na nagdanay sa saindang Kagurangnan, ta arog kan sabi kan bersikulo 4: “An mga ini iyo an padagos na nagsusunod sa Kordero minsan sia magsaen”—sa ibong kan maringis na paglamag sa sainda ni Satanas.

Pag-ako nin Enot sa mga Paghokom nin Dios

21, 22. (a) Anong mga paisi an itinatao kan mga anghel sa Kapahayagan 14:7, 8? (b) Taano ta ipinaiisi kan anghel an pagkaholog kan relihiyosong Babilonya mantang sia nag-eeksister pa?

²¹ Sa Kapahayagan 14:7 may anghel na nagkukurahaw: “Matakot sa Dios asin pamurawayon sia, huli ta nag-abot na an oras kan saiyang paghokom, asin kaya sambahon an Saro na naglalang kan langit asin daga asin dagat asin mga burabod nin tubig.” Siisay an enot na mag-aako kan silot nin Dios? An bersikulo 8 minasimbag: “Asin an saro pa, an ikaduwang anghel, nagsunod, na nagsasabi: ‘Sia naholog na! An Dakulang Babilonya naholog na, sia na nagpainom sa gabos na nasyon kan arak kan kaanggotan nin saiyang pakikisaro!’ ” Digdi sa enot na pangyayari, pero bakong ultimo, an Kapahayagan nagtataram manongod sa “Dakulang Babilonya,” an panglobong imperyo nin falsong relihiyon.

²² Mantang an relihiyon sagkod ngonyan maimpluwensia sa manlaenlaen na kabtang kan daga, taano ta ipinaisi kan anghel na an Dakulang Babilonya naholog na? Bueno, ano an nangyari kan 539 B.C.E. kan maholog an suanoy na Babilonya pero dai pa biyong nalalaglag? Tara, an bihag na mga lingkod ni Jehova nagpuli sa saindang daga pakalihis nin duwang taon asin ibinalik an tunay na pagsamba! Sa kaparehong paagi, an pakabalik kan mga lingkod nin Dios sa kuminosog liwat na aktibidad asin espirituwal na prosperidad na nagpoon kan 1919 malinaw na ebidensia na kaidto, kan 1919, an Dakulang Babilonya naholog sa pagheling ni Jehova. Dian kinondenar sia nin Dios na mapara sa huri.

23. (a) Paano inaandam an dalan para sa paglaglag sa Dakulang Babilonya? (b) Ano pang mga hula an ipaliliwanag sa masunod na luwas kan An Torrengbantayan?

²³ Bilang kapinonan kan saiyang nagdadangadang na pagkapara, an modernong Babilonya may grabe nang problema. An saiyang karatan, grabeng inmoralidad, pandadaya, asin politikal na pakikilabot nabuyagyag sa gabos na lugar. Sa kadaklan na parte nin Europa, kakadikit na kan nagsisimba. Sa dakol na sosyalistikong nasyon, an relihiyon ibinibilang na “opyo kan mga tawo.” Siring man, an modernong Babilonya napasopog sa mata nin gabos na mamomoton sa Tataramon nin Dios nin katotoohan. Kaya garo baga sia naghahalat ngonyan sa selda nin mga sentensiadong magadan para sa makatanosan na paggadan sa saiya. Iyo, “harani na an itinalaan na panahon” para sa mga pangyayaring nakatatanyog sa kinaban! Asin sa masunod na luwas kan Torrengbantayan, an dugang pang mga artikulong pag-aadalan magpapaliwanag kan mga hula sa Kapahayagan manongod sa nagdadangadang na pagkalaglag kan relihiyosong “patotot,” asin kan bilog na palakaw nin mga bagay ni Satanas.

Ano an Isisimbag Nindo?

◻ Ano an kahulogan para sa satong aldaw kan pitong tanog nin trumpeta na minapoon sa Kapahayagan kapitulo 8?

◻ Taano ta enot na sinisilotan an Kakristianohan?

◻ Paano ilinaladawan sa Kapahayagan kapitulo 9 an paghuhulit kan linahidan na natatada asin kan “dakulang kadaklan”?

◻ Ano an nagin kahulogan para sa langit asin daga kan paisi sa Kapahayagan 11:15?

◻ Siring sa ilinaladawan sa Kapahayagan 14:8, paano naholog kan 1919 an relihiyosong Babilonya, asin ano an kahulogan kaini para sa saiya?