Kamagurangan​—Trataron an Aripompon nin Dios na May Pagkamoot!

“Kami nagin maboot sa tahaw nindo, arog kan pagmamahal nin nag-aaling na ina sa saiyang mga aki.”—1 TESALONICA 2:7.

 1. Taano ta puwedeng makamateng tiwasay an lambang maimbod na Saksi ni Jehova?

SI Jehova an Dakulang Pastor. Nagtatao sia nin abundang probisyon para sa saiyang arog karnerong mga lingkod asin naggigiya sainda “sa mga dalan nin katanosan” huli kan saiyang banal na ngaran. Kaya, idtong mga naggigibo kan saiyang kabotan dai nangangaipong matakot sa ano man asin puwedeng domolok sa saindang maheherakon na Dios para sa karangahan. Iyo nanggad, an lambang maimbod na Saksi ni Jehova igwa nin marahay na rason tanganing makamateng tiwasay sa mamomoton na pangangataman nin Dios.—Salmo 23:1-4.

 2. Bilang an ladawan kan kamurawayan nin Dios, anong mga kuwalidad an ipinaheling ni Jesus?

² Si Jesu-Cristo “an ladawan kan kamurawayan [nin Dios] asin an eksaktong representasyon kan saiya mismong naturalesa.” (Hebreo 1:1-4) Kaya si Jesus, an Marahay na Pastor, nagpapaheling man nin pagkamoot asin pagkaherak. (Juan 10:14, 15) Bilang halimbawa, sa sarong okasyon “naheling nia an sarong dakulang kadaklan, alagad ta sia naherak sa sainda, ta garo sinda mga karnero na mayo nin pastor. Asin sia nagpoon na magtokdo sa sainda nin balakid na mga bagay.”—Marcos 6:34.

 3. (a) Siring ki Jehova Dios asin ki Jesu-Cristo, an Kristianong mga katabang na pastor maninigong magpaheling nin anong mga kuwalidad? (b) Anong sadol asin patanid an itinao ni apostol Pablo sa mga paraataman?

³ An gabos na Kristiano maninigong ‘mag-arog sa Dios asin padagos na maglakaw sa pagkamoot kun paanong si Cristo man namotan sinda.’ (Efeso 5:1, 2) Kaya maninigo sindang magin mamomoton asin maheherakon. Espesyalmenteng maninigong magin totoo ini sa katabang na mga pastor sa aripompon nin Dios. Si apostol Pablo nagsabi: “Mag-ingat kamo sa saindong sadiri asin sa bilog na aripompon, na sa tahaw kaiyan kamo ninombrahan kan banal na espiritu bilang mga paraataman, na pastoran an kongregasyon nin Dios, na saiyang binakal paagi sa dugo kan saiyang sadiring Aki. Aram ko na pakahale ko may malaog dian sa tahaw nindo na maringis na mga lobo asin dai magigin maboot sa aripompon, asin hale mismo dian sa saindo may mga lalaking matindog asin mataram nin biribid na mga bagay tanganing maguyod ninda sa sainda an mga disipulo.”—Gibo 20:28-30.

 4. (a) Sa tamang panahon, ano an nangyari manongod sa patanid ni Pablo sa Gibo 20:29, 30? (b) Anong mga hapot an maninigo ngonyan na konsideraron?

⁴ Sa tamang panahon, naglataw an apostatang “maringis na mga lobo” asin “dai nagin maboot sa aripompon.” Alagad maogma nanggad kita na an kamagurangan sa tahaw kan mga Saksi ni Jehova dai naggigibo nin siring na karingisan! Alagad, anong klaseng pagtratar an puwedeng laoman na akoon kan mga kapagtubod hale sa nombrado nin espiritu na mga paraataman na ini? Asin paano puwedeng ipaheling kan siring na mga nombrado an maboot na pagmakolog sa mga karnero ni Jehova?

Dai Naghahadehadean sa Aripompon nin Dios

 5. (a) Paano parateng tinatratar kan kinabanon na mga lider an saindang mga sakop? (b) Paano ipinaheling ni Jesus na an karingisan mayo nin lugar sa tahaw kan saiyang mga parasunod?

⁵ Tama sanang laoman niato na tatrataron kita kan kamagurangan sa maheherakon na paagi. Bako sindang siring kan kinabanon na mga namamahala, na parateng naghahadehadean sa saindang mga sakop. Bilang halimbawa, ireneport na an hadeng Pranses na si Carlomagno (na namahala kan 768-814 C.E.) “pinirit an mga Saxon, sa irarom nin kolog nin kagadanan, na umako nin bautismo, kinondenar sagkod sa pinakamakuring mga pagpadusa an mga nagbalga kan Semana Santa, asin saen man rinibayan nin puwersa an pangongombensir.” (The History of the Christian Church, ni William Jones) An karingisan dai nin lugar sa tahaw kan mga parasunod ni Jesus, huli ta sinabi nia: “Naiisihan nindo na an mga poon kan mga nasyon naghahadehadean sa sainda, asin an mga darakulang tawo sainda naggagaramit nin karingisan sainda. Bakong siring kaini dian sa tahaw nindo, kundi an siisay man na boot na magin dakula sa saindo kaipuhan na iyo an mani paralingkod sa saindo, asin an siisay man na boot mangenot sa saindo kaipuhan na iyo an mani oripon nindo, siring sa Aki nin Tawo nagdigdi bakong tanganing paghalaton, kundi tanganing maghalat sa ibang tawo, asin magtao kan saiyang buhay tanganing tubuson an kadakol na iba.”—Mateo 20:25-28, An American Translation.

 6. (a) Manongod sa kamagurangan, anong pangenot na nakakakontribuwir na mga bagay an minalataw? (b) An kongregasyon igwa nin rason na maglaom nin ano sa kamagurangan, asin paano maninigong mansayon kan mga lalaking ini an saindang sadiri?

⁶ An Kristianong lalaki na ‘nagmamawot sa katongdan nin paraataman nagmamawot nin marahay na gibo.’ (1 Timoteo 3:1) Kun kinokonsiderar niato ini asin an sadol ni Jesus na sinitar pa sana, naglalataw an pangenot na nakakakontribuwir na mga bagay na ini: (1) an Kristianong kamagurangan dai maninigong magin maringis sa iba; (2) idtong mga nagsasaabaga nin paninimbagan sa tahaw kan mga parasunod ni Jesus maninigong magin mga oripon ninda, bakong saindang mga kagurangnan; asin (3) an mga lalaking nagmamawot sa katongdan nin paraataman maninigong mansayon ini bilang “marahay na gibo,” bakong sarong halangkaw na posisyon. (Talinhaga 25:27; 1 Corinto 1:31) An terminong “magurang” dai naglalangkaw sa siisay man sa iba pang parasamba ni Jehova. Imbes, an kongregasyon may rason na maglaom sa gabos na magurang na magin maygurang sa espirituwal, eksperyensiado, asin mapakumbabang mga lalaki na nangengenot sa banal na paglilingkod. Iyo nanggad, maninigong mansayon kan kamagurangan an saindang sadiri bilang mapakumbabang mga oripon ni Jehova Dios, ni Jesu-Cristo, asin kan kapuwa mga Kristiano.—Roma 12:11; Galacia 5:13; Colosas 3:24.

 7. (a) Paano maninigong iaplikar kan kamagurangan an 2 Corinto 1:24 sa pagtratar sa iba? (b) Ano an maninigong gibohon kan kamagurangan manongod sa mga instruksion na naako ninda hale sa Namamahalang Grupo?

⁷ An mapakumbabang pagpaoripon sa kapakanan nin iba natural sanang mapogol sa sarong magurang sa pagmamaigot na “maghadehadean” sainda. Asin marahayon nanggad na an satong mga paraataman nagpapaheling nin kaisipan na kaagid kan ki Pablo! Sinabihan nia an mga Kristiano sa Corinto: ‘Bako kami an mga kagurangnan kan saindong pagtubod, kundi kami mga katabang para sa saindong kaogmahan.’ (2 Corinto 1:24) Kaoyon kaini, idtong mga naggigibo nin mamomoton na pangangataman dai pinagagabatan an mga kapagtubod nin dai kinakaipuhan na mga regulasyon nin tawo. Imbes, an mga paraataman sa tahaw kan mga Saksi ni Jehova sakop kan Makakasuratan na mga prinsipyo asin nagtatao nin maboot, matinabang na paglilingkod. Nagpapaheling man sinda nin hararom na pagmakolog para sa aripompon nin Dios paagi sa pag-aplikar tolos-tolos kan mga instruksion na inako hale sa Namamahalang Grupo kan mga Saksi ni Jehova.—Gibo, kapitulo 15.

 8. Ano an kaisipan ni Pablo sa mga kapagtubod, asin paano maninigong makaapektar ini sa ika-20 siglong kamagurangan?

⁸ Huli ta si Pablo igwa nin mamomoton na pagmakolog sa aripompon nin Dios, puwede niang sabihon sa mga Kristiano sa Tesalonica: “Kami nagin maboot sa tahaw nindo, arog kan pagmamahal nin nag-aaling na ina sa saiyang mga aki. Kaya, huli sa pagkaigwa nin pagkamoot sa saindo, kami naogmang gayo na itao sa saindo, bako sanang an maogmang bareta nin Dios, kundi siring man an samong kalag, huli ta kamo nagin mahal sa samo.” (1 Tesalonica 2:7, 8) Si Pablo naghiro siring sa nag-aaling na ina, na namomotan na gayo an saiyang mga aki kaya saiyang ibinubugtak an saindang mga interes na enot sa saiyang sadiri asin igwa nin mamomoton na pagmakolog para sa sainda. Maninigo nanggad na magpahiro ini sa ika-20 siglong kamagurangan tanganing trataron an aripompon nin Dios na may pagkamoot!

Mga Pinaghahalean nin Tabang Asin Kaginhawahan

 9. Anong mga kamugtakan sa presenteng panahon na banwaan ni Jehova an ihinula sa Isaias 32:1, 2?

⁹ Sa pagtotokdo sa aldaw na ini kan pamamahala kan Kahadean paagi ki Jesu-Cristo, si propeta Isaias naghula na sarong hade an “magsasakop para sa katanosan mismo” asin “mga prinsipe” an magsasakop “para sa hustisya mismo.” Kaya, an kamagurangan sa presenteng panahon na teokratikong organisasyon nagkakapot kan mga interes kan naestablisar nang langitnon na Kahadean—sa-prinsipeng paglilingkod nanggad! Sa responsableng mga lalaking ini, minaaplikar an dugang pang tataramon ni Isaias: “An lambang saro magigin siring sa pailihan sa doros asin taguan sa bagyo, siring sa mga sapa nin tubig sa sarong disierto, siring sa limpoy nin dakulang gapo sa mainit na daga.”—Isaias 32:1, 2.

10. An lambang magurang sa tahaw kan mga Saksi ni Jehova maninigong paghalean nin ano?

¹⁰ Bakong siring sa maringis na relihiyosong mga lider, an kamagurangan sa tahaw kan mga Saksi ni Jehova mga pinaghahalean nin tabang asin kaginhawahan. Bilang grupo nin kamagurangan, pinaooswag ninda an katoninongan, katrangkilohan, asin seguridad sa tahaw kan banwaan ni Jehova. Bilang indibiduwal, an lambang magurang puwedeng makakontribuwir sa marahay na kamugtakan na ini paagi sa pagtratar sa aripompon nin Dios na may pagkamoot.

Igwa nin Hustisya Asin Katanosan

11. (a) Anong pankagabsan na kamugtakan na nag-eeksister sa tahaw kan enot na siglong mga Kristiano an nagdadanay sa kadaklan na kongregasyon kan mga Saksi ni Jehova ngonyan? (b) An mga paraataman igwa nin anong paninimbagan sa kongregasyon, asin taano?

¹¹ Minsan siring na naglataw an mga problema sa nagkapirang Kristianong kongregasyon kan enot na siglo, an saindang pankagabsan na kamugtakan igwa nin katoninongan, pagkasararo, asin kagayagayahan. (1 Corinto 1:10-12; 3:5-9; Efeso 1:2; Santiago 2:1-9; 3:2-12; 4:11, 12; 1 Juan 1:3, 4) An marahay na espirituwal na kamugtakan nag-eeksister man sa kadaklan na kongregasyon kan mga Saksi ni Jehova ngonyan huli kan bendisyon nin Dios, pangengenot ni Cristo, asin an maimbod na gibohon kan nombradong mga paraataman. Tanganing siertohon an katoninongan, pagkasararo, asin kagayagayahan kan kongregasyon, an mga lalaking ini naghahagad nin banal na tabang asin mahigos na gayong nagmamaigot na pagdanayon na malinig an organisasyon nin Dios, sa moral asin espirituwal. (Isaias 52:11) An maating organisasyon nungka na magin matoninong asin magayagaya, asin sierto nanggad na dai ini magkakaigwa kan pag-oyon asin bendisyon nin Dios. Sia “labi kalinig sa mga mata tanganing magheling sa maraot,” tanganing magkonsintir nin kasalan. (Habakuk 1:13) Orog sa iba pang bagay, kun siring, linalaoman an kamagurangan na mangataman sa hudisyal na mga bagay sa matanos, Makakasuratan na paagi. Alagad ano an nagkapirang bagay na girumdomon kun nagkakapot nin siring na mga kaso?

12. Minsan siring na dai hinahagad sa kamagurangan na makiaram sa personal na mga bagay na dai nagbabalga sa mga pagboot o prinsipyo kan Biblia, ano an maninigong gibohon sa liwanag kan Galacia 6:1?

¹² Sarong bagay, sa mga kaso manongod sa personal na dai pagkasarabotan, tibaad posible para sa mga indibiduwal na pribadong areglohon an mga bagay. (Mateo 18:15-17) Mantang an kamagurangan bakong ‘mga kagurangnan kan satong pagtubod,’ dai sinda lalaoman na aramon an personal na gayong mga bagay na dai naglalabot nin seryosong mga pagbalga sa mga pagboot asin prinsipyo kan Biblia. Natural sana, kun may patotoo na an tawo nakagibo nin “kasalan bago nia iyan maaraman,” idtong igwa nin espirituwal na mga kuwalipikasyon maninigong “pagmaigotan na ibangon an tawong iyan sa espiritu nin kahoyoan.”—Galacia 6:1.

13. Paano ipinaheheling kan Kasuratan na an kamagurangan maninigo sanang humiro sa patotoo nin kasalan, bakong sa barebareta?

¹³ An kamagurangan maninigong maglingkod “para sa hustisya mismo,” na perming dai nagpapalaen. Kaya maninigo sindang humiro sono sa patotoo nin kasalan, bakong sa barebareta sana. Nagsadol si Pablo: “Dai pag-akoon an akusasyon tumang sa magurang, apuwera sana sa patotoo nin duwa o tolong saksi.” (1 Timoteo 5:19) Sono sa pamantayan ni Jehova, sa suanoy na Israel an tawong sinahotan nin dakulang kasalan gagadanon ‘sa ngoso nin duwa o tolong saksi, bakong saro.’ Dugang pa, malinaw na an isinumbong igwa nin oportunidad na atubangon an mga nagsumbong sa saiya, asin kun igo an patotoo, ‘an kamot kan mga saksi an enot sa gabos na mabugtak sa saiya sa kagadanan.’—Deuteronomio 17:6, 7.

14. (a) Ano an sala nanggad na pinagmaigotan na gibohon ni Diotrefes? (b) Ano an linalaoman nin Dios sa kamagurangan kun nagkakapot sinda nin hudisyal na mga bagay?

¹⁴ Maninigong igwa nin marahay na Makakasuratan na basehan para sa hudisyal na aksion. Maogma nanggad kita na an mga paraataman sa kongregasyon bakong siring sa maabhaw na si Diotrefes kan enot na siglo C.E.! Salang gayo niang pinagmaigotan “na iluwas sa kongregasyon” idtong mga nagmamawot na mapagpadagos na akoon an nagbibiyaheng mga tugang. Dai minansay na magian sana ni apostol Juan an bagay na ini asin iba pang salang gibo kundi nagpatanid: “Pagdatong ko, gigirumdomon ko an saiyang mga gibo.” (3 Juan 9, 10) Kaya, an presenteng panahon na hudisyal na komite maninigong siertohon na igwa nin Biblikal na basehan an ano man na aksion nin pagtitiwalag na ginigibo ninda.a Siyempre pa, linalaoman nin Dios na an Kristianong kamagurangan magigin matanos sa pagtratar ninda sa iba. Iyo nanggad, idtong mga namamahala kan mga palakaw sa daganon na organisasyon ni Jehova maninigong mga “lalaking may kakayahan, natatakot sa Dios, mga lalaking mapaniniwalaan.”—Exodo 18:21.

15. Anong papel an maninigong magin kabtang nin pamibi sa hudisyal na mga pagbista?

¹⁵ An lambang Kristianong hudisyal na komite maninigong maghagad kan tabang ni Jehova sa odok sa pusong pamibi. An pakikitipon sa sarong tugang na lalaki o babae na isinumbong huli sa seryosong pagkakasala maninigong bukasan nin pamibi. Sa katunayan, angay na mamibi sa ano man na panahon durante kan pag-orolay kun sarong partikular na pangangaipo para sa tabang ni Jehova an maglataw.—Santiago 5:13-18.

16. Sa anong paagi maninigong ikondukta kan kamagurangan an hudisyal na mga pagbista, asin taano?

¹⁶ Aram kan kamagurangan na an isinumbong huli sa pagkakasala sarong “karnero” sa aripompon nin Dios asin maninigong trataron na may pagkamoot. (Ikomparar an Ezequiel 34:7-14.) An literal na mga karnero nangangaipo nin mamomoton na pag-ataman, huli ta sinda matatakoton na mga linalang na nagdedepende sa saindang pastor para sa proteksion. Kaya, kumusta an piguratibong mga karnero sa lokal na kongregasyon? Mayong duwa-duwa na sinda nakamamate na tiwasay sa pangangataman kan Dakulang Pastor, si Jehova Dios, asin sa Marahay na Pastor, si Jesu-Cristo. Alagad an mga katabang na pastor kan aripompon maninigong gumawe sa mga paaging nakakokontribuwir sa panlaog na katoninongan asin pakamate nin seguridad kan arog karnerong mga lingkod ni Jehova. Kun kamo Kristianong katabang na pastor, kun siring, an saindo daw na mga tugang na lalaki asin babae nakamamate na tiwasay asin toninong sa saindong pangangataman? Iyo, an kamagurangan maninigong marigon nanggad na mamogol sa mga pagboot asin prinsipyo kan Biblia. Alagad sinda hinahagadan na trataron an mga karnero sa mamomoton na paagi asin isagibo an hudisyal na mga pagbista sa kalmado, areglado, maboot, asin makonsiderar na paagi.

17. Anong Makakasuratan na mga punto an maninigong girumdomon kan kamagurangan, espesyalmente durante kan hudisyal na mga pagbista?

¹⁷ Sa pagigin bakong sangkap, “kita gabos nasisingkog nin dakol na beses” sa satong sinasabi. (Santiago 3:2) An lambang saro sa sato nangangaipo nin pagkaherak nin Dios asin kan “pantubos na atang” ni Cristo. (1 Juan 1:8–2:2; Salmo 130:3) Kaya an sarong Kristianong katabang na pastor maninigong magkaigwa nin mapakumbabang pagmansay sa saiyang sadiri. Maninigo man niang girumdomon an mga tataramon ni Jesus: “Kun ano an boot nindong gibohon saindo nin mga tawo, iyo man an gibohon nindo sainda.” (Lucas 6:31) Espesyalmenteng maninigong iaplikar an sadol na ini durante kan hudisyal na mga pagbista. An kuwalipikado sono sa Kasuratan na mga lalaki maninigong magmaigot na ibangon an nagkakasalang Kristiano ‘sa espiritu nin kahoyoan, mantang binabantayan man ninda an saindang sadiri, ta tibaad sinda masugotan man.’—Galacia 6:1; 1 Corinto 10:12.

18. (a) Ano an magigin resulta kun tinatratar sa maringis na paagi kan kamagurangan an iba durante kan hudisyal na mga pagbista? (b) Sa liwanag kan Marcos 9:42, tumang sa paggibo nin ano maninigong mag-ingat an kamagurangan asin iba pang Kristiano?

¹⁸ Kun tatrataron sa maringis na paagi kan kamagurangan an iba durante kan hudisyal na mga pagbista, tibaad makaraot ini sa siring na mga indibiduwal. Alagad minsan pa kun dai magresulta sa emosyonal o pisikal na danyos, puwedeng magkaigwa nin grabeng espirituwal na danyos, asin an mga kuwalipikasyon kan mga paraataman tibaad pagdudahan man. (Ikomparar an Santiago 2:13.) Kaya, durante kan hudisyal na mga pagbista asin sa gabos na iba pang panahon, an kamagurangan maninigong magin maboot asin maninigong mag-ingat na dai makapasingkog sa iba. Siyempre pa, an gabos na Kristiano maninigong mag-ingat sa bagay na ini, huli ta sinabi ni Jesus: “An siisay man na magpasingkog sa saro kan saradit na ini na nagtutubod, mas marahay pa sa saiya na bitayan sa liog nin sarong gapong gilingan arog kan pinabibirik nin asno asin itapok sia sa dagat.” (Marcos 9:42) An gilingan sa itaas puwedeng magin dakulaon na gayo kaya an kosog nin sarong hayop an natural sanang kaipuhan tanganing ibirik ini, asin mayo nin siisay man na itinapok sa dagat na may siring na gabat sa palibot kan saiyang liog an puwedeng makaligtas. Sierto nanggad, kun siring, an sarong magurang kaipuhan na mag-ingat na dai makapasingkog na puwedeng magbunga nin nagdadanay na espirituwal na danyos sa saiya mismo asin sa siisay man na indibiduwal na nasingkog.—Filipos 1:9-11.

Padagos na Magpaheling nin Mamomoton na Pagmakolog

19. Anong sadol an itinao ni Pedro sa kapuwa kamagurangan, asin ano an koneksion kan tamang paghimate digdi sa saindang mga paglaom?

¹⁹ Ipinaheling ni apostol Pedro kun paano papastoran kan kapuwa mga paraataman an aripompon kan saiyang isurat: “Pastoran an aripompon nin Dios na nasa saindong pangangataman, bakong sa kapiritan, kundi sa sadiring boot; bakong huli sa pagkamoot sa madayang pakinabang, kundi may kaigotan; ni siring sa naghahade sa mga mana nin Dios, kundi magin mga halimbawa sa aripompon. Asin kun mahayag na an poon na pastor, aakoon nindo an dai napaparang korona nin kamurawayan.” (1 Pedro 5:2-4) Paagi sana sa pag-aaplikar kan siring na sadol asin sa pagpapaheling nin mamomoton na pagmakolog para sa aripompon nin Dios kaya puwedeng akoon kan linahidan na mga paraataman an saindang langitnon na balos bilang inmortal na espiritung mga linalang asin puwedeng akoon kan kamagurangan na igwa nin daganon na mga paglaom an buhay na daing sagkod sa nagdadangadang na panglobong Paraiso.

20. (a) Paano maninigong trataron kan Kristianong mga katabang na pastor an saindang mga kapagtubod? (b) Ano an namamatean nindo manongod sa arogan na paglilingkod asin mamomoton na pangangataman kan mamomoton na kamagurangan?

²⁰ Si Jehova Dios asin si Jesu-Cristo kapuwa mamomoton, maheherakon na mga Pastor. Kaya mantang an Kristianong mga katabang na pastor marigon na gayong namomogol sa banal na mga pamantayan, maninigo sindang magpaheling nin pagkamoot asin pagkaherak sa pagtratar sa saindang arog karnerong mga kapagtubod. Sierto nanggad, an gabos na maimbod na Saksi ni Jehova nag-aapresyar na gayo sa arogan na paglilingkod kan siring na mapagsakripisyo sa sadiring kamagurangan na nag-iingat kan ipinaniwala sa sainda asin nagtatratar sa aripompon nin Dios na may pagkamoot. An apresasyon na iyan, kairiba an angay na paggalang, puwedeng ipaheling paagi sa pagigin makinuyog sa mga nangengenot sa tahaw niato.

[Nota sa Ibaba]

Ano an Kaisipan Nindo?

◻ Paano ipinaheling ni Jesus na mayong lugar an karingisan sa tahaw kan saiyang mga parasunod?

◻ Ano an maninigong gibohon kan kamagurangan kun makaako nin mga instruksion hale sa Namamahalang Grupo?

◻ Sono sa Isaias 32:1, 2, an kamagurangan maninigong magin paghahalean nin ano?

◻ Paano ipinaheling kan Kasuratan na an kamagurangan dai maninigong humiro sono sa barebareta sana?

◻ Paano maninigong trataron kan Kristianong mga katabang na pastor an aripompon?

[Ritrato sa pahina 18]

An odok sa pusong pamibi mahalaga kun an hudisyal na komite nakikitipon sa kapagtubod