Siisay na Dios an Saindong Sinasamba?

SA BILOG na kinaban, laen-laen an magigin simbag nin mga tawo sa hapot na iyan. Si apostol Pablo nagkomento: “Igwa nin dakol na ‘mga dios’ asin dakol na ‘mga kagurangnan,’” asin ngonyan an mga dios na sinasamba minilyon na an kabilangan. (1 Corinto 8:5) Alagad, aram daw nindo na an dakol nagsasamba sa dios na laen man sa pinaghohona nindang saindang sinasamba? Asin aram daw nindo na dakol na ateista an mas debotado kisa mga nagtutubod sa sarong dios? Paano?

Bueno, an sarong kahulogan nin pagsamba “paghelingon na may dakula, sobra pa nganing paggalang, onra, o debosyon.” Sa orihinal na mga tataramon kan Biblia, an mga termino para sa pagsamba igwa kan ideya nin paglilingkod o paghuruhod sa atubangan nin saro. Nasa isip ini, helingon niato kun paano puwedeng masala an mga tawo sa kun siisay o ano an talagang sinasamba ninda.

Pinagsalak na Pagsamba

Halimbawa an suanoy na mga Samaritano. An kadaklan sa sainda dating mga tagaibang nasyon na dinara sa Palestina kan mga Asirio tanganing makasalida sa nadistiyerong sampulong tribo sa amihanan nin Israel. Dati, sinda nagsusunod sa mga dios na pagano, pero ngonyan sinda naghingoa na manodan an manongod ki Jehova, an Dios nin Israel. Tinalikdan na daw ninda an dati nindang relihiyon? Dai. An Biblia nagbabareta: “An ginigibo ninda sono sa saindang dating relihiyon. Asin an mga nasyon na ini nagin matatakton ki Jehova, alagad ta an saindang sadiring mga ladawan an saindang pinaglilingkodan.” (2 Hade 17:40, 41) Kaya an mga Samaritano, mantang sa ngaran nagmimidbid ki Jehova, naglilingkod pa man giraray sa dati nindang mga dios, sa siring pinagsalak na relihiyon an ginigibo.

Arog man kaiyan an nangyari kan iintrodusir nin mga misyonero an Romano Katolisismo sa Amerika del Sur. Nakombertir ninda an kadaklan sa mga tawo, alagad arog kan suanoy na mga Samaritano, dai liningawan kan mga tawo an dati nindang mga dios. Kaya, sa Brazil an paganong mga rituwal nin voodoo siniselebrar sagkod ngonyan nin mga “Kristiano,” siring man an mga selebrasyon na nagtatao nin onra sa suanoy na mga dios, arog baga kan diosang si Iemanjá. Nangyayari man an kaagid na mga bagay sa iba pang nasyon sa Amerika del Sur.

Dugang pa, an relihiyon na iinintrodusir kan mga misyonerong idto sa Amerika del Sur saro na mismong pinagsalak na relihiyon. An kadaklan sa mga doktrina kaiyan, arog kan Trinidad, impiernong may kalayo, asin inmortalidad kan kalag, gikan sa suanoy na paganong mga relihiyon asin pilosopiya. Tunay na iyan dai manonompongan sa Biblia. Siring man, an mga kapiyestahan kaiyan—kabale na an Navidad asin Pasko—bakong Kristiano an pinaghalean.a Mapupuwede daw na magselebrar kan siring na paganong mga kapiyestahan asin tumubod sa siring na bakong Kristianong mga doktrina patin magsamba pa man giraray sa Dios kan Biblia, na nagsabi: “Dai ka magkaigwa nin ibang mga dios tumang sa sakong lalauogon”? (Exodo 20:3) Dai nanggad!

“Maglikay Kamo sa mga Ladawan”

Helinga an saro pang paagi na an mga tawo nadadaya mapadapit sa pagsamba. Si apostol Juan nagsurat: “Saradit na aki, maglikay kamo sa mga ladawan.” (1 Juan 5:21) Mga sarong ribong milyon katawo an nalilista na miembro nin Kakristianohan, asin an mga ini ipinamumugtak na naghihingakong nagsasamba sa iyo man sanang Dios na sinamba ni Juan. Pero, an ginatos na milyon sa sainda naghuhuruhod sa mga ladawan nin mga “santo,” ni Jesus, asin kan birhen na si Maria.

Igwa nin iba pang tusong mga klase nin pagsamba sa ladawan. Kan taon 44 C.E., si Hadeng Herodes Agripa nagtao nin pahayag sa publiko, asin naogmang gayo an banwaan kaya sinda nagkururahaw: “Tingog nin sarong dios, asin bakong nin sarong tawo!” (Gibo 12:21, 22) Iyo, sinamba ninda si Herodes, na ginigibo siang dios. Nangyayari man ngonyan an kaagid na mga bagay. Sa nakabuburat na mga aldaw kan an Nazismo nagigin makapangyarihan sa Europa, an kurahaw na “Heil Hitler!” sa katotoohan kurahaw nin pagsamba. Dakol an andam na makipaglaban asin magadan para sa Führer na garo sia dios, an paraligtas kan nasyon. Pero, an kadaklan sa mga nagtatao nin siring na onra mga miembro kan mga iglesya nin Kakristianohan!

Bago asin pakalihis ni Hitler, an iba pang namomoon sa politika ilinangkaw man an sadiri bilang mga paraligtas asin naghagad nin esklusibong debosyon. An mga napadara ginibong dios an mga tawong ini, ano man an pormal na relihiyon kan mga “parasamba” o dawa pa kun sinda naghihingakong ateista. An onra na inaako nin mapan-agyat na mga bitoon sa karawat, sa pelikula, asin iba pang artista gikan sa mga naghahanga sa sainda garo man pagsamba.

Pagsamba sa Kuwarta

Saro pa, isip-isipa an implikasyon kan mga tataramon ni Jesus kan sia magsabi: “Mayo nin siisay man na makapaglilingkod sa duwang kagurangnan; huli ta ikaoongis nia an saro asin mamomotan nia an ikaduwa, o magigin dayupot sia sa saro asin isisikwal nia an ikaduwa. Dai kamo makapaglilingkod sa Dios asin sa Kayamanan.” (Mateo 6:24) May midbid daw kamo na miembro nin sarong relihiyon pero an pangenot na pinagkakainteresan sa buhay paghanap nin kuwarta? Kun siring, siisay an talagang pinaglilingkodan kan sarong iyan, an Dios o kayamanan? Pirang may pagtubod an midbid nindo na napapalabot sa natatarantang paghanap nin kuwarta? Tunay na sinda man mga parasamba sa kuwarta, tibaad mas maigot pa kisa dakol na nagtutubod.

Ipinaliwanag ni apostol Pablo an kaagid na prinsipyo kan sia sumurat: “Kaya gadanon nindo an mga kabtang kan saindong hawak na yaon sa ibabaw kan daga kun dapit sa pakikisaro, karigsokan, seksuwal na horot, maraot na mawot, asin kaaraan, na pagsamba sa ladawan.” (Colosas 3:5) Kun makosogon an satong pagkaara sa sarong bagay kaya inuubos niato an gabos niatong paghihingoa tanganing kamtan iyan, tibaad linalapas pa an ley, kun siring para sa sato an bagay na iyan sarong ladawan, sarong dios. (Efeso 5:5) Sa saro pang surat, si Pablo nagsurat manongod sa pirang parakasala: “An saindang dios iyo an saindang tulak.” (Filipos 3:19) Kun an bilog niatong katuyohan sa buhay panigoan an satong sadiri, na garo baga binabasog an satong tulak, kun siring kita man sana an dios niato. Pira an midbid nindo na nagsasamba sa dios na ini?

Iyo, arog kan isinurat ni apostol Pablo: “Igwa nin dakol na ‘mga dios’ asin dakol na ‘mga kagurangnan.’” Asin sa dakol na kaso, an mga parasamba dian arog kan suanoy na mga Samaritano, na naglilingkod sa sarong dios paagi sa saindang tataramon asin sa iba man paagi sa saindang hiro. Alagad, an totoo, solamente saro an Dios na maninigo niatong sambahon. Aram daw nindo kun siisay sia? Saro pa, may sarong bagay na nakabobogkos sa pagsamba sa gabos na ibang dios na siblag sa saiya. Ano daw iyan? Maheheling niato sa minasunod na artikulo.

[Nota sa Ibaba]