Kapahayagan—An Mamuraway na Kulminasyon Kaiyan Harani Na

Kapitulo 15: “Siisay an Angay na Bumuka sa Balumbon?”

1. Ano ngonyan an nangyari sa bisyon ni Juan?

Magayonon! Kahangahanga! Siring kaiyan an nakapupukaw na bisyon sa trono ni Jehova sa kamugtakan kaiyan sa tahaw kan mga ilawan nin kalayo, kerubin, 24 magurang, asin dagat na salming. Alagad Juan, ano an sumunod na naheheling mo? Isinentro ni Juan an atension sa mismong sentro kan langitnon na eksenang ini, na sinasabi sato: “Asin naheling ko sa toong kamot kan Saro na nagtutukaw sa trono an sarong balumbon na nasusuratan sa laog asin sa likod, na nabobogkos nin higot nin pitong tatak. Asin naheling ko an sarong makosog na anghel na nagsasabi sa makosog na tingog: ‘Siisay an angay na bumuka sa balumbon asin tumangkas sa mga tatak kaiyan?’ Alagad ta dai ni saro sa langit o sa ibabaw kan daga o sa irarom kan daga na nakabuka kan balumbon o nakaheling dian. Asin ako nanangis nin makuri huli ta mayo nin nakuang angay na bumuka kan balumbon o humeling kaiyan.”​—Kapahayagan 5:​1-4.

2, 3. (a) Taano ta galaga si Juan na may manompongan na saro na mabuka sa balumbon, alagad ta ano an garo baga malalaoman para kaiyan? (b) Ano an galagang hinahalat kan linahidan na banwaan nin Dios sa satong panahon?

² Si Jehova mismo, an Soberanong Kagurangnan kan gabos na linalang, iyo an nagkakapot kan balumbon. Segurado na iyan pano nin mahahalagang impormasyon, ta iyan may surat sa ibabaw asin sa likod. Napukaw an satong pag-usyoso. Ano daw an laog kan balumbon? Magigirumdoman niato an imbitasyon ni Jehova ki Juan: “Sakat digdi, asin ipaheheling ko sa saimo an mga bagay na kaipuhan na mangyari.” (Kapahayagan 4:1) May maogmang paghalat, naglalaom kitang maaraman an mga bagay na iyan. Alagad ta higot an pagkalulon kan balumbon, na sirrado nin pitong tatak!

³ May manonompongan daw an makosog na anghel na saro na angay na bumuka kan balumbon? Sono sa Kingdom Interlinear, an balumbon nasa “ibabaw kan toong kamot” ni Jehova. Ini nagsusuherir na iyan nakakapotan nia sa saiyang bukas na palad. Alagad minalataw na mayo sa langit o sa ibabaw nin daga na angay na umako kan asin bukahon an balumbon. Minsan sa irarom kan daga, sa maimbod na mga lingkod nin Dios na nagadan, mayo nin kuwalipikado para sa halangkaw na onrang ini. Bakong makangangalas na nahadit na gayo si Juan! Tibaad dai nia maaraman “an mga bagay na kaipuhan na mangyari.” Sa sato man na aldaw, an linahidan na banwaan nin Dios galagang naghalat ki Jehova na itao an saiyang liwanag asin katotoohan manongod sa Kapahayagan. Ini gigibohon nia nin progresibo sa itinalaan na panahon para sa kaotoban kan hula, tanganing giyahan an saiyang banwaan sa dalan nin “dakulang kaligtasan.”​—Salmo 43:​3, 5.

An Sarong Angay

4. (a) Siisay an nadiskobre na angay na bumuka sa balumbon asin sa mga tatak kaiyan? (b) Sa anong balos asin pribilehiyo nakikakabtang ngonyan an grupong Juan asin an saindang kairiba?

⁴ Iyo, igwa nin saro na nakabuka kan balumbon! Si Juan nagsasaysay: “Alagad an saro sa mga magurang nagsabi sa sako: ‘Dai ka magtangis. Uya! An Leon kan tribo ni Juda, an gamot ni David, nakadaog tanganing bukahon an balumbon asin an pitong tatak kaiyan.’ ” (Kapahayagan 5:​5) Kaya Juan, pahida an luha mo! An grupong Juan asin an maimbod nindang kairiba ngonyan nagtagal man nin dakol na dekada nin grabeng mga pagbalo mantang mapasensiang naghahalat para sa kaliwanagan. Nakararanga nanggad na balos an yaon sa sato ngonyan sa pakasabot sa bisyon, asin kanigoan na pribilehiyo na makikabtang sa kaotoban kaiyan paagi sa pagbalangibog kan mensahe kaiyan sa iba!

5. (a) Anong hula an isinabi manongod ki Juda, asin saen naghade an mga gikan ni Juda? (b) Siisay si Silo?

⁵ A, “an Leon kan tribo ni Juda”! Pamilyar si Juan sa hula na isinabi ni Jacob, an apoon kan rasang Judio, manongod sa ikaapat niang aki, si Juda: “Si Juda sarong ogbon na leon. Paghale sa paniniba, aki ko, na ika matindog. Sia luminokmo, sia huminigda na siring sa leon asin, siring sa leon, siisay an mangangahas na pukawon sia? An setro dai mahale ki Juda, ni an sogkod nin pagkapoon hale sa tahaw kan saiyang mga bitis, sagkod na dumatong si Silo; asin mapapasaiya an pagkuyog kan mga tawo.” (Genesis 49:​9, 10) An makahadeng linya kan banwaan nin Dios gikan ki Juda. Magpoon ki David, an gabos na hade na naghade sa Jerusalem sagkod na laglagon kan mga Babilonyo an siudad na idto mga gikan ni Juda. Alagad mayo ni saro sa sainda an Silo na ihinula ni Jacob. An Silo nangangahulogan “Sia na Nanonongdan [kan Diretso].” Sa hula, an ngaran na ini nagtokdo ki Jesus, an saro na ngonyan iyo an permanenteng kagsadiri kan Kahadean ni David.​—Ezequiel 21:​25-27; Lucas 1:​32, 33; Kapahayagan 19:16.

6. Sa anong paagi na si Jesus “sanga” ni Jese asin “gamot ni David”?

⁶ Madaling namidbid ni Juan an pagkasambit sa “gamot ni David.” An ipinanugang Mesiyas inaapod sa hula na kapwa “sanga sa pungo ni Jese [ama ni Hadeng David] . . . sarong supang” asin “gamot ni Jese na matindog bilang sarong tanda para sa mga banwaan.” (Isaias 11:​1, 10) Si Jesus sanga ni Jese, mantang namundag sa makahadeng linya ni David, aki ni Jese. Dugang pa, bilang gamot ni Jese, sia an Saro na nagpangyari sa dinastiya ni David na magkasupang liwat, na tinatawan iyan nin buhay asin ikabubuhay sagkod lamang.​—2 Samuel 7:16.

7. Ano an minagibo ki Jesus na angay na kumua kan balumbon sa kamot kan Saro na nagtutukaw sa trono?

⁷ Si Jesus iyo an nangongorog na, bilang sangkap na tawo, naglingkod ki Jehova sa integridad asin sa irarom nin masakit na gayong mga pagbalo. Sia an nagtao kan kompletong simbag sa angat ni Satanas. (Talinhaga 27:11) Kaya, nasabi nia an arog kan sinabi nia kan banggi bago an saiyang kagadanan bilang atang, “Nadaog ko an kinaban.” (Juan 16:33) Sa dahelan na ini, ipinaniwala ni Jehova sa binuhay liwat na si Jesus “an gabos na kapangyarihan sa langit asin sa daga.” Sia sana sa gabos na lingkod nin Dios an kuwalipikado na umako kan balumbon, na an katuyohan ipahayag an mahalagang mensahe kaiyan.​—Mateo 28:18.

8. (a) Mapadapit sa Kahadean, ano an nagpapaheling kan pagigin angay ni Jesus? (b) Taano ta angay na saro sa 24 magurang an nagsasabi ki Juan kun siisay an angay na bumuka sa balumbon?

⁸ Angay nanggad na si Jesus an bumuka kan balumbon. Poon kan 1914 sia pinatukaw sa trono bilang Hade sa Mesiyanikong Kahadean nin Dios, asin an balumbon na iyan kadakol kan ihinahayag manongod sa Kahadean asin sa gigibohon kaiyan. Si Jesus maimbod na nagpatotoo sa katotoohan kan Kahadean mantang yaon sia digdi sa daga. (Juan 18:​36, 37) Tinokdoan nia an saiyang mga parasunod na ipamibi an pagdatong kan Kahadean. (Mateo 6:​9, 10) Pinonan nia an paghuhulit kan maogmang bareta kan Kahadean sa kapinonan kan panahon Kristiano asin ihinula an kulminasyon kan paghuhulit na iyan sa panahon kan katapusan. (Mateo 4:​23; Marcos 13:10) Angay man na saro sa 24 magurang an maghayag ki Juan na si Jesus an saro na mabukas sa mga tatak. Taano? Huli ta an mga magurang na ini nagtutukaw sa mga trono asin may mga korona, mantang kairibang paramana ni Cristo sa saiyang Kahadean.​—Roma 8:​17; Kapahayagan 4:4.

‘An Kordero na Ginadan’

9. Imbes na leon, ano an naheheling ni Juan na nagtitindog “sa tahaw kan trono,” asin paano an pagkaladawan nia dian?

⁹ Hineling ni Juan an “Leon kan tribo ni Juda.” Alagad makangangalas! Nagluwas an laen nanggad na simbolikong pigura: “Asin naheling ko na nagtitindog sa tahaw kan trono asin kan apat na buhay na linalang asin sa tahaw kan mga magurang an sarong kordero na garo baga ginadan, na may pitong sungay asin pitong mata, mga mata na nangangahulogan kan pitong espiritu nin Dios na isinugo sa bilog na daga.”​—Kapahayagan 5:6.

10. Siisay an “kordero” na naheling ni Juan, asin taano ta angay an termino?

¹⁰ Sa tahaw mismo, sa kataed kan trono, sa laog kan sirkulo na binilog kan apat na buhay na linalang asin kan 24 magurang, igwa nin sarong kordero! Daing duwa-duwa na madaling ikinaasosyar ni Juan an korderong ini sa “Leon kan tribo ni Juda” asin “gamot ni David.” Aram nia na, labing 60 taon bago kaini, ipinamidbid ni Juan na Bautisador si Jesus sa nagmamasid na mga Judio bilang “an Kordero nin Dios na naghahale kan kasalan kan kinaban!” (Juan 1:29) Sa bilog niang buhay sa ibabaw kan daga, si Jesus nagdanay na daing digta kan kinaban​—siring sa korderong daing kaninan—​tanganing ikadolot nia an saiyang buhay na daing kasalan bilang atang para sa katawohan.​—1 Corinto 5:​7; Hebreo 7:26.

11. Taano ta bako man na daing dignidad na irepresentar si Jesus bilang “sarong kordero na garo baga ginadan”?

¹¹ Garo daw nakamimenus o daing dignidad na irepresentar an mamuraway na si Jesus bilang “sarong kordero na garo baga ginadan”? Dai man! An bagay na si Jesus nagdanay na maimbod sagkod sa kagadanan dakulang pagkadaog ni Satanas asin dakulang kapangganahan para ki Jehova Dios. An pagrepresentar ki Jesus sa paaging ini buhay na naglaladawan kan saiyang pakadaog sa kinaban ni Satanas asin nagpapagirumdom kan hararom na pagkamoot ni Jehova asin ni Jesus para sa katawohan. (Juan 3:​16; 15:​13; ikomparar an Colosas 2:15.) Kaya si Jesus itinotokdo bilang an ipinanugang Banhi, na kuwalipikado nanggad na bumuka kan balumbon.​—Genesis 3:15.

12. Ano an ilinaladawan kan pitong sungay kan Kordero?

¹² Ano pa an nakadadagdag sa satong pag-apresyar sa “korderong” ini? Sia may pitong sungay. An sungay sa Biblia parateng simbolo nin kapangyarihan o autoridad, asin an pito tanda nin pagkakompleto. (Ikomparar an 1 Samuel 2:​1, 10; Salmo 112:​9; 148:14.) Kaya, an pitong sungay kan Kordero nagrirepresentar sa pagigin lubos kan kapangyarihan na ipinaniwala ni Jehova ki Jesus. Sia “mas halangkaw kisa lambang gobyerno asin autoridad asin kapangyarihan asin kasakopan patin sa gabos na ngaran na inginaran, bako sanang sa palakaw na ini nin mga bagay, kundi siring man sa maabot.” (Efeso 1:​20-23; 1 Pedro 3:22) Si Jesus partikularmenteng nagkapot nin kapangyarihan, kapangyarihan sa paggobyerno, poon kan 1914 kan patukawon sia ni Jehova sa trono bilang langitnon na Hade.​—Salmo 2:6.

13. (a) Ano an ilinaladawan kan pitong mata kan Kordero? (b) Ano an ginibo kan Kordero?

¹³ Dugang pa, si Jesus lubos na napano nin banal na espiritu, na ilinaladawan kan pitong mata kan Kordero, na “nangangahulogan kan pitong espiritu nin Dios.” Si Jesus pinakapaagihan kan pagbolos kan kalubosan kan puwersa aktiba ni Jehova sa Saiyang daganon na mga lingkod. (Tito 3:6) Malinaw na paagi kan iyo man sanang espiritung ini na naheheling nia hale sa langit an nangyayari digdi sa daga. Kapareho kan saiyang Ama, si Jesus may sangkap na pakamansay. Mayo nin natatago sa saiya. (Ikomparar an Salmo 11:​4; Zacarias 4:10.) Malinaw na, an Aking ini​—an nagdanay sa integridad na nakadaog sa kinaban; an Leon kan tribo ni Juda; an gamot ni David; an saro na nagdolot kan saiyang buhay para sa katawohan; an saro na may lubos na autoridad, banal na espiritu, asin sangkap na pagmansay gikan ki Jehova Dios​—iyo, an sarong ini angay nanggad na kumua kan balumbon sa kamot ni Jehova. Nag-aalangan daw siang akoon an paglilingkod na ini sa mamuraway na organisasyon ni Jehova? Dai! Imbes, “sia nagdolok asin tolos na kinua iyan [an balumbon] sa toong kamot kan Saro na nagtutukaw sa trono.” (Kapahayagan 5:​7) Kanigoan karahay na halimbawa nin odok na pagkuyog!

Mga Awit nin Pag-omaw

14. (a) Ano an reaksion kan apat na buhay na linalang asin kan 24 magurang sa pagkua ni Jesus sa balumbon? (b) Paano an impormasyon na inako ni Juan manongod sa 24 magurang nagpapatunay sa kun siisay sinda asin sa saindang katongdan?

¹⁴ Ano an reaksion kan iba na nasa atubangan kan trono ni Jehova? “Asin kan kuanon nia an balumbon, an apat na buhay na linalang asin an duwang polo may apat na magurang naghorohod sa atubangan kan Kordero, na an lambang saro may arpa asin mga mangkong bulawan na pano nin insenso, asin an insenso nangangahulogan kan mga pamibi kan mga banal.” (Kapahayagan 5:​8) Arog kan apat na buhay na linalang na kerubin sa atubangan kan trono nin Dios, an 24 magurang minadoko sa atubangan ni Jesus sa pagmidbid sa saiyang autoridad. Alagad an mga magurang sanang ini an igwa nin mga arpa asin mangko nin insenso.a Asin sinda sana an nag-aawit ngonyan nin bagong awit. (Kapahayagan 5:9) Kaya sinda nakaaagid kan 144,000 na banal na “Israel nin Dios,” na may dara man na mga arpa asin nag-aawit nin bagong awit. (Galacia 6:​16; Colosas 1:​12; Kapahayagan 7:​3-8; 14:​1-4) Dugang pa, an 24 magurang ipinaheheling na may inootob na langitnon, sa saserdoteng trabaho, na ilinadawan kan mga saserdote sa suanoy na Israel na nagtotong nin insenso ki Jehova sa tabernakulo​—trabaho na natapos sa daga kan haleon na nin Dios an Pagboot ni Moises, na ipinako iyan sa hariging pasakitan ki Jesus. (Colosas 2:14) Ano an konklusyon niato sa gabos na ini? Na digdi an linahidan na mga nakadaog naheheling sa saindang ultimong asignasyon bilang ‘mga saserdote nin Dios asin kan Cristo, na naghahade kaibanan nia sa laog nin sangribong taon.’​—Kapahayagan 20:6.

15. (a) Sa Israel, siisay sana an may pribilehiyong lumaog sa Kabanalbanale kan tabernakulo? (b) Taano ta natataya an buhay o kagadanan para sa halangkaw na saserdote na magtotong nin insenso bago lumaog sa Kabanalbanale?

¹⁵ Sa suanoy na Israel, an nakalalaog sana sa Kabanalbanale sa atubangan kan simbolikong presensia ni Jehova iyo an halangkaw na saserdote. Para sa saiya, an pagdara nin insenso bagay na natatayaan nin buhay o kagadanan. An pagboot ni Jehova nagsabi: “Kaipuhan na kuanon [ni Aaron] an bugtakan nin kalayo na pano nin baga nin kalayo sa altar na nasa atubangan ni Jehova, asin an duwa niang palad pano nin pinong insensong mahamot, asin kaipuhan na darahon nia iyan sa likod kan lipod. Kaipuhan na ibugtak man nia an insenso sa ibabaw kan kalayo sa atubangan ni Jehova, asin an aso kan insenso kaipuhan na makaluyap sa ibabaw kan takop kan Kaban, tangani na sia dai magadan.” (Levitico 16:​12, 13) Imposible para sa halangkaw na saserdote na makalaog sa Kabanalbanale kun dai sia magtotong nin insenso.

16. (a) Sa Kristianong palakaw nin mga bagay, siisay an minalaog sa antitipikong Kabanalbanale? (b) Taano an linahidan na mga Kristiano ta kaipuhan na ‘magtotong nin insenso’?

¹⁶ Sa Kristianong palakaw nin mga bagay bako sanang an antitipikong Halangkaw na Saserdote, si Jesu-Cristo, kundi pati an kada saro sa 144,000 na katabang na saserdote sa katapustapusi makalalaog sa antitipikong Kabanalbanale, an lugar kan presensia ni Jehova sa langit. (Hebreo 10:​19-23) An paglaog sa Kabanalbanaleng ini imposible para sa mga saserdoteng ini, na irinirepresentar digdi kan 24 magurang, kun dai sinda ‘magtotong nin insenso,’ an boot sabihon, daing ontok na magdolot nin mga pamibi asin pagngayongayo ki Jehova.​—Hebreo 5:​7; Judas 20, 21; ikomparar an Salmo 141:2.

Sarong Bagong Awit

17. (a) Anong bagong awit an inaawit kan 24 magurang? (b) Paano an ekspresyon na “bagong awit” parateng ginagamit sa Biblia?

¹⁷ Nadangog ngonyan an awit na magayonon an tono. Iyan inaawit para sa Kordero kan saiyang kairibang saserdote, an 24 magurang: “Asin sinda nag-aawit nin sarong bagong awit, na an sabi: ‘Angay ka na magkua kan balumbon asin bukasan an mga tatak kaiyan, huli ta ika ginadan asin paagi kan saimong dugo binakal mo an mga tawo manongod sa Dios hale sa lambang tribo asin tataramon asin banwaan patin nasyon.’ ” (Kapahayagan 5:​9) An ekspresyon na “bagong awit” naglataw nin makapira sa Biblia asin parateng nanonongod sa pag-omaw ki Jehova para sa sarong makapangyarihan na akto nin pagliligtas. (Salmo 96:​1; 98:​1; 144:9) Kaya, an awit bago ta an paraawit makapagsasabi ngonyan nin dagdag na makangangalas na mga gibo ni Jehova asin makapagpapahayag nin bagong apresasyon sa Saiyang mamuraway na ngaran.

18. Huli sa ano na inoomaw si Jesus kan 24 magurang paagi sa saindang bagong awit?

¹⁸ Alagad digdi, an 24 magurang nag-aawit nin bagong awit sa atubangan ni Jesus imbes na sa atubangan ni Jehova. Alagad pareho man sana an prinsipyo. Inoomaw ninda si Jesus para sa bagong mga bagay na saiyang ginibo, bilang Aki nin Dios, para sa sainda. Paagi sa saiyang dugo, sia an nagin parapangoltanan sa bagong tipan asin kun siring ginibong posible an pagpaluwas nin bagong nasyon bilang espesyal na rogaring ni Jehova. (Roma 2:​28, 29; 1 Corinto 11:​25; Hebreo 7:​18-25) An mga miembro kan bagong espirituwal na nasyon na ini gikan sa dakol na mga nasyon sa laman, alagad ta pinagsararo sinda ni Jesus sa sarong kongregasyon bilang sarong nasyon.​—Isaias 26:​2; 1 Pedro 2:​9, 10.

19. (a) Anong bendisyon an dai nakamtan kan Israel sa laman huli sa saindang pagigin bakong maimbod? (b) Anong bendisyon an nakakamtan kan bagong nasyon ni Jehova?

¹⁹ Kan gibohon ni Jehova an mga Israelitas na magin sarong nasyon kaidtong kaaldawan ni Moises, sia nakipagtipan sa sainda asin nanuga na kun sinda magdadanay na maimbod sa tipan na iyan, sinda magigin sarong kahadean nin mga saserdote sa atubangan nia. (Exodo 19:​5, 6) An mga Israelitas dai nagmaimbod asin noarin man dai nakaeksperyensia kan kaotoban kan panugang iyan. Sa ibong na kampi, an bagong nasyon, na binilog sa merito kan bagong tipan na an parapangoltanan si Jesus, nagdanay na maimbod. Kaya an mga miembro kaiyan magsasakop sa daga bilang mga hade asin maglilingkod bilang saserdote, na tinatabangan an mga may matanos na puso sa tahaw nin katawohan na makipag-uli ki Jehova. (Colosas 1:20) Iyan arog kan pagkasabi kan bagong awit: “Asin ginibo mo sinda na mani kahadean asin mga saserdote kan satuyang Dios, asin sinda magsasakop bilang hade sa daga.” (Kapahayagan 5:​10) Kanigoan an kagayagayahan kan 24 magurang sa pag-awit kan bagong awit na ini nin pag-omaw sa pinamuraway na si Jesus!

(Ipagpapadagos sa masunod na luwas.)

[Nota sa Ibaba]