Maggayagaya ki Jehova!

“Danay kamong maggayagaya dian sa Kagurangnan. Sa giraray sasabihon ko, Maggayagaya kamo!”​—FILIPOS 4:4.

1. Taano ta tibaad maghorophorop kita kun ano an boot sabihon ni Pablo kan sia magsabing an mga Kristiano maninigong danay na maggayagaya?

NGONYAN na panahon, an mga dahelan para sa paggayagaya garo baga kakadikit asin bibihirang marhay. An mga tawong gibo sa kabokabo, maski an tunay na mga Kristiano, napapaatubang sa mga situwasyon na nakakapamondo​—kawaran nin trabaho, maluyang salud, pagkagadan nin mga namomotan, mga problema sa personalidad, o pagtumang kan daing pagtubod na mga miembro nin pamilya o dating mga katood. Kaya paano niato dapat na saboton an sadol ni Pablo, “Danay kamong maggayagaya”? Kun manongod sa maraot asin masakit na mga kamugtakan na dapat atubangon niato gabos, posible man nanggad daw ini? An pagpaliwanag sa konteksto kan mga tataramon na ini makakatabang sa paglinaw sa bagay.

Maggayagaya​—Taano Asin Paano?

2, 3. Ano an kahalagahan nin kagayagayahan, arog kan iinilustrar sa mga kamugtakan ni Jesus asin kan suanoy na mga Israelita?

² “Danay kamong maggayagaya dian sa Kagurangnan. Sa giraray sasabihon ko, Maggayagaya kamo!” Puwedeng magpagirumdom ini sato kan mga tataramon na ipinanongod sa mga Israelita kaidtong mga 24 siglo na an nakaagi: “An kagayagayahan ni Jehova iyo an saindong pailihan,” o sono sa traduksion na Moffatt: “An paggayagaya dian sa Daing Katapusan iyo an saimong kakosogan.” (Nehemias 8:10) An kagayagayahan nagtatao nin kosog asin garo pailihan na an saro puwedeng makakua nin karangahan asin proteksion. An kagayagayahan nagin instrumento sa pagtabang na makatagal minsan sa sangkap na tawong si Jesus. “Huli kan kagayagayahan na ibinugtak sa atubangan nia tinios nia an pasakitan na kahoy, hinamak an kasopganan, asin nagtukaw sa too kan trono nin Dios.” (Hebreo 12:2) Malinaw nanggad, an pakapaggayagaya sa atubang nin mga kasakitan mahalaga para sa kaligtasan.

³ Bago kan paglaog sa Dagang Panuga, an mga Israelita pinagbotan: “Maggayagaya ka sa gabos na karahayan na itinao ni Jehova na saimong Dios sa saimo asin sa saimong harong, ika asin an Levita patin an nakikihimanwa na yaon sa tahaw mo.” Masakiton an mga resulta kan dai pakapaglingkod ki Jehova na may paggayagaya. “An gabos na panumpang ini maabot nanggad saimo asin lalapagon ka asin aabotan ka sagkod na ika mapara . . . huli kan katunayan na dai ka naglingkod ki Jehova na saimong Dios na may kaogmahan asin kagayagayahan sa puso huli sa kadakolan nin gabos na bagay.”​—Deuteronomio 26:11; 28:​45-47.

4. Taano ta puwedeng dai kita nakapaggagayagaya?

⁴ Importante, kun siring, na an mga linahidan na natatada ngonyan asin an kairiba nindang “ibang karnero” maggayagaya! (Juan 10:16) Si Pablo, paagi sa pag-otro sa saiyang hatol, “sa giraray sasabihon ko,” idinoon an kahalagahan nin paggayagaya sa gabos na karahayan na ginibo ni Jehova para sato. Kita daw iyo? O kita daw nababangkag sa pan-aroaldaw na rutina sa buhay na kun beses sato nang nalilingawan an dakol na dahelan niato sa paggayagaya? Nagdadakol daw an problema na inoolang na kaiyan an satong pananaw sa Kahadean asin sa mga bendisyon kaiyan? Tinotogotan daw niato an ibang bagay​—an pagmasumbikal sa mga pagboot nin Dios, pag-ignoro sa banal na mga prinsipyo, o pagpabaya sa Kristianong mga obligasyon—​na haleon sato an satong kagayagayahan?

5. Taano an bakong makatanosan na tawo ta nadedepisilan na maggayagaya?

⁵ “Ipaaram nindo sa gabos na tawo an saindong pagkamakatanosan. An Kagurangnan harani.” (Filipos 4:5) An bakong makatanosan na tawo mayo nin pagkatimbang. Tibaad dai nia maasikaso nin tama an saiyang salud, na an saiyang hawak ipinaiirarom sa dai kinakaipuhan na tension o kahaditan. Tibaad dai nia nanodan na akoon an saiyang mga limitasyon asin mamuhay sono dian. Puwedeng magbugtak sia nin halangkawon na mga pasohan nia dangan hinihingoang aboton iyan ano man an mangyari. O tibaad gamiton nia an saiyang mga limitasyon bilang sarahotan sa pagluway o paghinugak. Nagkukulang nin pagkatimbang asin nagigin bakong makatanosan, madedepisilan siang maggayagaya.

6. (a) Ano an maninigong maheling sa sato kan mga kapwa Kristiano, asin noarin sana ini mangyayari? (b) Paano kita tinatabangan kan mga tataramon ni Pablo sa 2 Corinto 1:24 asin Roma 14:4 na magin makatanosan?

⁶ Dawa kun mga panatiko an pagheling sato kan mga paratumang, an mga kapwa Kristiano maninigo na perming maheling an satong pagkamakatanosan. Asin gigibohon ninda iyan kun kita timbang asin dai naglalaom nin pagkasangkap baga man sa satong sadiri o sa iba. Orog sa gabos, dapat niatong likayan an pagpaotob nin mga pasan sa iba na lihis sa hinahagad kan Tataramon nin Dios. Si apostol Pablo nagsabi: “Bako na kami an mga kagurangnan kan saindong pagtubod, kundi kami mga katabang para sa saindong kagayagayahan.” (2 Corinto 1:24) Bilang sarong dating Fariseo, aram na gayo ni Pablo na an estriktong mga susundon na ginibo asin ipinaotob kan mga may autoridad nakapopogol sa kagayagayahan, mantang an nakakatabang na mga suhestion na itinatao nin mga katabang makadadagdag kaiyan. An katunayan na “an Kagurangnan harani” maninigong magpagirumdom sa makatanosan na tawo na bako kita an dapat na ‘maghokom sa oripon nin iba. Sa saiyang kagurangnan sia nagtitindog o napupukan.’​—Roma 14:4.

7, 8. Taano ta dapat laoman kan mga Kristiano na magkaigwa nin mga problema, pero paano posible na makapadagos sindang naggagayagaya?

⁷ “Dai kamo maghadit sa ano man na bagay, kundi sa gabos na bagay paagi sa pamibi asin pagngayongayo na may pasalamat ipahayag nindo sa Dios an saindong mga kahagadan.” (Filipos 4:6) Naeeksperyensiahan niato ngonyan an “delikadong mga panahon na masakit pakibagayan” na dapit kaiyan si Pablo nagsurat. (2 Timoteo 3:1-5) Kaya dapat na laoman kan mga Kristiano na mapaatubang sa mga problema. An mga tataramon ni Pablo na “danay na maggayagaya” dai hinahale an posibilidad na an sarong maimbod na Kristiano puwedeng makamate nin paminsanminsan na kawaran nin paglaom o pagkadisganar. Sa kamugtakan mismo ni Pablo, realistiko niang inako: “Kami nagigipit sa palibot, alagad dai man naiipit na dai na makahiro; kami nahahandal, alagad dai nahahalean nin paglaom; kami pinaglalamag, alagad dai pinababayaan; kami ilinalampog, alagad dai nalalaglag.” (2 Corinto 4:​8, 9) Alagad, an kagayagayahan nin sarong Kristiano nakaiina asin sa huri nagdodominar sa temporaryong mga peryodo nin kahaditan asin kamondoan. Itinatao kaiyan an kinakaipuhan na kosog tanganing makapadagos na nag-aabante, na dai noarin man linilingawan an dakol na dahelan sa paggayagaya.

⁸ Kun minalataw an mga problema, ano man na klase iyan, an magayagayang Kristiano mapakumbabang nag-aarang para sa tabang ni Jehova paagi sa pamibi. Dai sia napadadara sa labi-labing kahaditan. Pakatapos na gibohon an makatanosan na magigibo nia mismo sa pagresolber sa problema, iwinawalat nia an kaaabtan sa mga kamot ni Jehova kaoyon kan pangagdang: “Bugtakan an saimong pasan ki Jehova mismo, asin sia matabang sa saimo.” Mientras tanto, an Kristiano padagos na nagpapasalamat ki Jehova sa gabos Niang karahayan.​—Salmo 55:22; helingon man an Mateo 6:​25-34.

9. Paano an kaaraman sa katotoohan nagtatao nin katoninongan sa isip, asin ano an marahay na epekto kaini sa sarong Kristiano?

⁹ “An katoninongan nin Dios na minalampas sa gabos na kaisipan mag-iingat kan saindong puso asin kan saindong mga pag-isip paagi ki Cristo Jesus.” (Filipos 4:7) An kaaraman sa katotoohan kan Biblia pinatatalingkas sa mga kaputikan an kaisipan nin Kristiano asin tinatabangan siang pataluboon an marahay na mga arogan nin pag-isip. (2 Timoteo 1:13) Kaya natatabangan sia na likayan an sala o mangmang na gawe na makararaot sa matoninong na relasyon sa iba. Imbes na madisganar sa inhustisya asin karatan, saiyang ibinubugtak an saiyang pagsarig ki Jehova na resolberan an mga problema nin katawohan paagi sa Kahadean. An siring na katoninongan nin isip iniingatan an saiyang puso, pinapadanay na dalisay an saiyang mga motibo, asin ginigiyahan an saiyang pag-isip sa dalan nin katanosan. An dalisay na mga motibo asin tamang pag-isip nagtatao man nin dai mabilang na mga dahelan sa paggayagaya, sa ibong nin mga problema asin pangigipit na pinapangyayari kan maribok na kinaban.

10. An tunay na kagayagayahan maeeksperyensiahan sana paagi sa pagtaram asin pag-isip manongod sa ano?

¹⁰ “Sa katapustapusi, mga tugang, ano man na totoo, ano man na seryosong bagay, ano man na matanos, ano man na malinig, ano man na makawiwili, ano man na marahay an dangog, ano man na marahay asin ano man na inoomaw, padagos na horophoropon an mga bagay na ini.” (Filipos 4:8) An sarong Kristiano dai naoogma sa pagtaram o pag-isip manongod sa maraot na mga bagay. Automatikong hinahale kaini an kadaklan na aling-alingan na itinatao kan kinaban. Mayo ni saro na makapagpapadanay nin Kristianong kagayagayahan kun pinapano nia an saiyang isip asin puso nin mga kaputikan, bastos na sorobahan, asin mga bagay na bakong matanos, inmoral, daing karahayan, makaoongis, asin makababalde. Sa simpleng pagtaram, mayo ni saro na makanonompong nin tunay na kagayagayahan paagi sa pagpano nin ati sa saiyang isip asin puso. Sa maraot na kinaban ni Satanas, nakapakokosog nanggad na maaraman na an mga Kristiano igwa nin kadakol na marahay na bagay na dapat pag-isip-isipon asin pag-orolay-olayan!

Dai Mabilang na Dahelan sa Paggayagaya

11. (a) Ano an maninigo na nungkang pagpalimanlimanan, asin taano ta dai? (b) Ano an nagin epekto sa sarong delegado asin sa saiyang agom kan pag-atender sa sarong internasyonal na kombension?

¹¹ Kun nagtataram dapit sa mga dahelan sa paggayagaya, dai niato paglingawan an satong internasyonal na asosasyon nin magturugang. (1 Pedro 2:17) Mantang an kinabanon na nasyonal asin rasyal na mga grupo nagpapahayag nin makosog na pagkaongis sa lambang saro, an banwaan nin Dios mas magkadarayupot sa pagkamoot. An saindang pagkasararo nangorognang naheheling sa internasyonal na mga kombension. Manongod kan saro na ginibo kan 1993 sa Kiev, Ukraine, an sarong delegadong taga-Estados Unidos nagsurat: “An magayagayang mga luha, an maogmang mga mata, an padagos na pag-abot nin garo kapamilyang mga kugos, asin an mga pataratara na ipinaabot sa ibong kan pinagkakawatan kan mga grupo na nagwawagayway nin makokolor na mga payong asin panyo malinaw na nagpatotoo nin teokratikong pagkasararo. An samong puso nagsopay nin pag-orgolyo sa milagrosong ginibo ni Jehova sa pambilog na kinaban na asosasyon nin magturugang. Ini odok na nakapahiro sa samong mag-agom asin nakadagdag nin bagong kahulogan sa samong pagtubod.”

12. Paano naootob an Isaias 60:22 na naheheling kan sato mismong mga mata?

¹² Nakapakokosog nanggad sa pagtubod para sa mga Kristiano ngonyan na maheling kan saindang mga mata na naootob an mga hula sa Biblia! Horophoropa, halimbawa, an mga tataramon sa Isaias 60:22: “An sadit mismo magigin sangribo, asin an sadangoton magigin makosog na nasyon. Ako mismo, si Jehova, maparikas kaiyan sa kapanahonan kaiyan.” Sa pagkamundag kan Kahadean kan 1914, solamente 5,100​—sadit—​an aktibong naghuhulit. Pero durante kan nakaaging limang taon, an bilang kan pambilog na kinaban na asosasyon nin magturugang nagdakol sa promedyong rikas na 5,628 bagong nabautismohan na mga Saksi kada semana! Kan 1993, naabot an peak na 4,709,889 aktibong ministro. Imahinara nanggad! Ini nangangahulogan na “an sadit” kan 1914 literal na harani na sa pagigin “sangribo”!

13. (a) Ano an nangyayari poon pa kan 1914? (b) Paano kinukuyog kan mga Saksi ni Jehova an prinsipyo sa mga tataramon ni Pablo sa 2 Corinto 9:7?

¹³ Poon kan 1914 an Mesiyanikong Hade nagluwas sa pandaog sa tahaw kan saiyang mga kaiwal. An saiyang pamamahala sinuportaran nin boluntad na mga parasunod na tawo na nagkokontribuwir nin panahon, kosog, asin kuwarta sa pagpadagos kan pambilog na kinaban na paghuhulit siring man kan internasyonal na kampanya nin pagtogdok. (Salmo 110:​2, 3) Naggagayagaya an mga Saksi ni Jehova kaya ginigibo an pinansial na mga kontribusyon tanganing mahaman an mga aktibidad na ini, minsan ngani an kuwarta bihirang nasasambitan sa saindang mga pagtiripon.a (Ikomparar an 1 Cronica 29:9.) An tunay na mga Kristiano dai kaipuhan na sadolon na magtao; ibinibilang nindang pribilehiyo na suportaran an saindang Hade sagkod na itinotogot kan saindang mga kamugtakan, an lambang saro “oyon sa napagdesisyonan nia sa saiyang puso, bakong sa maraot na boot o sa kapiritan.”​—2 Corinto 9:7.

14. Anong kamugtakan sa tahaw kan banwaan nin Dios an malinaw na naheling poon kan 1919, na nagtatao sainda nin anong dahelan sa paggayagaya?

¹⁴ An ihinulang pagbalik sa tunay na pagsamba sa tahaw kan banwaan nin Dios nagbunga kan pagkalalang nin sarong espirituwal na paraiso. Poon kan 1919 progresibong pinahiwas kaiyan an mga linderos. (Salmo 14:7; Isaias 52:​9, 10) An resulta? An tunay na mga Kristiano nakakaeksperyensia nin “kaogmahan asin kagayagayahan.” (Isaias 51:11) An resultang marahay na mga bunga patotoo sa kayang otobon kan banal na espiritu nin Dios paagi sa bakong sangkap na mga tawo. An gabos na kredito asin onra ki Jehova, pero anong pribilehiyo an maorog pa kisa pagigin katabang nin Dios? (1 Corinto 3:9) Si Jehova makapangyarihan na gayo na pahiroon an mga gapo, kun kaipuhan, tanganing ikurahaw an mensahe nin katotoohan. Minsan siring, pinagmarhay nia na dai gamiton an paaging ini kundi, imbes, motibaron an boluntad na mga linalang na gibo sa kabokabo tanganing gibohon an saiyang kabotan.​—Lucas 19:40.

15. (a) Anong modernong mga pangyayari an may interes niatong sinusubaybayan? (b) Sa anong pangyayari kita naglalaom na may paggayagaya?

¹⁵ Pano nin pagngalas, an mga lingkod ni Jehova ngonyan nagmamasid sa mga pangyayari sa kinaban mantang minaaplikar ini sa lataw na mga hula sa Biblia. An mga nasyon nagmamaigot na marhay​—alagad sayang sana—​na magkamit nin nagdadanay na katoninongan. Pinipirit sinda kan mga pangyayari na mangapodan sa organisasyon nin Naciones Unidas na humiro sa mariribok na parte kan kinaban. (Kapahayagan 13:​15-17) Mientras tanto, an banwaan nin Dios naghahalat na may dakulang pag-antisipar sa saro sa pinakamagayagayang mga pangyayari kasuarin pa man, saro na naghaharani kada aldaw. “Mag-ogma kita asin maggayagaya nin labi-labi, asin itao niato sa saiya an kamurawayan, huli ta nagdatong na an kasal kan Kordero asin nag-andam na kan saiyang sadiri an saiyang agom.”​—Kapahayagan 19:7.

Paghuhulit​—Sarong Kagabatan o Kagayagayahan?

16. Iilustrar kun paano an dai pakagibo kan saiyang nanodan makakahale sa Kristiano kan saiyang kagayagayahan.

¹⁶ “An mga bagay na saindong nanodan asin inako asin nadangog patin naheling mapadapit sa sako, gibohon nindo; asin mapapasaindo an Dios nin katoninongan.” (Filipos 4:9) Paagi sa paggibo kan saindang nanodan, makakalaom an mga Kristiano na mag-ako kan bendisyon nin Dios. An saro sa pinakaimportanteng mga bagay na saindang nanodan iyo an pangangaipong ihulit an maogmang bareta sa iba. Iyo nanggad, siisay an magkakamit nin katoninongan sa isip o magin magayagaya kun dai nia itatao an impormasyon sa sadiosan an pusong mga tawo na an mismong buhay minadepende sa pakadangog kaiyan?​—Ezequiel 3:​17-21; 1 Corinto 9:16; 1 Timoteo 4:16.

17. Taano an satong aktibidad na paghuhulit ta maninigong danay na magin gikanan nin kagayagayahan?

¹⁷ Kanigoan na kagayagayahan na makanompong nin arog-karnerong mga tawo na andam na makanood manongod ki Jehova! Iyo nanggad, an mga naglilingkod na igwa nin tamang motibo danay na manonompongan an paglilingkod sa Kahadean bilang gikanan nin kagayagayahan. Ini huli ta an pangenot na dahelan sa pagigin sarong Saksi ni Jehova iyo na omawon an Saiyang ngaran asin suportaran an Saiyang posisyon bilang Soberanong Poon. (1 Cronica 16:31) An saro na nagmimidbid sa katunayan na ini maggagayagaya dawa kun an mga tawo may kamangmangan na sinasayumahan an dara niang maogmang bareta. Aram nia na an paghuhulit sa mga daing pagtubod sarong aldaw matatapos; an pag-omaw sa ngaran ni Jehova magpapadagos sagkod lamang.

18. Ano an nagmomotibar sa sarong Kristiano na gibohon an kabotan ni Jehova?

¹⁸ An tunay na relihiyon minomotibar an mga naggigibo kaiyan na gibohon an mga bagay na hinahagad ni Jehova, bakong huli ta dapat nindang gibohon iyan, kundi huli ta boot nindang gibohon iyan. (Salmo 40:8; Juan 4:34) Dakol na tawo an nadedepisilan na saboton ini. May sarong misis na sarong beses sinabihan an sarong Saksing babae na nagsosongko saiya: “Aram mo, dapat takang tawan nin komendasyon. Nungka nanggad akong maghaharongharong na naghuhulit manongod sa sakong relihiyon arog kan ginigibo mo.” May paghuyom na nagsimbag an Saksi: “Nasasabotan ko an saindong namamatean. Bago ako nagin saro sa mga Saksi ni Jehova, dai nindo ako mapapaduman sa ibang tawo na makipag-olay dapit sa relihiyon. Pero ngonyan boot ko na.” An misis nag-isip-isip nin kadikit dangan nagkonklusyon: “Malinaw na an saimong relihiyon igwang ikinatatao na dai nagigibo kan relihiyon ko. Seguro maninigo akong magsiyasat.”

19. Taano ta panahon na ngonyan na maggayagaya kisa kasuarin pa man?

¹⁹ An 1994 teksto kan taon, na naheheling na marhay sa satong Kingdom Hall, danay kitang pinagigirumdom: “Manarig ka ki Jehova sa bilong mong puso.” (Talinhaga 3:5) Igwa pa daw nin maorog na dahelan sa paggayagaya kisa sa pakapanarig niato ki Jehova, an satong pailihan na sa saiya nagpapaili kita? An Salmo 64:10 nagpapaliwanag: “An matanos maggagayagaya dian ki Jehova asin magpapaili nanggad sa saiya.” Bako ini an panahon na mag-urongsulong o sumuko. An kada minaaging bulan irinarani kita sa katunayan kan hinidaw na maheling kan mga lingkod ni Jehova poon pa kan kaaldawan ni Abel. Ngonyan na an panahon na manarig ki Jehova sa bilog niatong puso, sa pakaaram na nungka kisa kasuarin pa man na nagkaigwa kita nin kadakol na dahelan na maggayagaya!

[Nota sa Ibaba]

Paano Nindo Sisimbagon?

◻ Taano, sono sa Nehemias 8:​10, ta maninigo kitang maggayagaya?

◻ Paano ipinaheheling kan Deuteronomio 26:11 asin 28:​45-47 an kahalagahan nin paggayagaya?

◻ Paano makatatabang sato an Filipos 4:​4-9 na danay na maggayagaya?

◻ Anong dahelan na maggayagaya an itinatao sato kan 1994 teksto kan taon?

[Ritrato sa pahina 16]

An mga Saksing Ruso asin Aleman naggagayagaya na magin kabtang nin internasyonal na asosasyon nin magturugang

[Ritrato sa pahina 17]

An paghiras kan katotoohan sa iba sarong dahelan sa paggayagaya