Dai Kami Maretiro!

“DAI KAMI MARETIRO!” an mensaheng mamamatean nindo kun songkoon nindo an sarong pambihirang harong sa Tokyo, Hapon. Sarong pamilya na igwa nin 22 na lalaki asin babae, na may promedyong 70 anyos an edad, an nag-iistar duman. Nagkakasararo sinda bakong huli sa relasyon sa dugo kundi huli sa pararehong interes​—an paglilingkod bilang misyonero. Nagmaigot sinda sa pambilog na panahon na paghuhulit sa laog nin total na 1,026 na taon! An tolong pinakagurang na miembro namundag kan 1910. An pito sainda nagpoon sa saindang pambilog na panahon na paglilingkod mantang sinda tin-edyer pa. Siyam sa sainda an nakaheling sa pagtalubo kan paghuhulit kan Kahadean sa Hapon poon kan kapinonan kaiyan pakalihis kan Guerra Mundial II.​—Isaias 60:22.

Minsan siring, an anom na eskalon na dating edipisyong ini kan sanga kan Watch Tower sarong lugar nin pagpapakosog, nangorogna huli sa espiritu, sa nangingibabaw na inklinasyon, kan mga misyonero na nag-iistar duman. Dawa ngani an kadaklan sa sainda igwa nin pisikal na mga limitasyon na konektado sa edad asin maluyang salud, mayo sa espirituwal na mga parapakilaban na ini an gustong umontok. Biyo nang hinirahay kan mga Saksing Hapones an edipisyo para sa sainda, na nagbugtak nin sarong Kingdom Hall sa sirong asin sarong pampasaherong elevator.

Kun Ano an Nakakapaogma sa Sainda

Nasa saindang asignasyon sa laog nin kadakoldakol nang taon, an pagmate kan mga misyonerong ini iyo na ini na an saindang harong. “Kan ako bumuwelta sa Australia para sa pandistritong kombension kaining nakaaging tig-init,” nagsabi an saro sa pinakagurang na miembro kan pamilya, “gusto ko nang magpuli pakalihis nin duwang semana!” Namomotan ninda an mga tawo na pinaglilingkodan ninda asin hararom na an pagpadangat sa sainda. Pinahahalagahan kan gabos na misyonero an mga surat asin apod sa telepono na nakapagpapagirumdom kan mga aktibidad kan nakalihis na mga aldaw.

Iyan an bunga nin mahigos na ministeryo. Napahiro kan pagkamoot ki Jehova, sibot na naghulit kan Tataramon nin Dios an mga misyonero sa irarom nin manlaenlaen na kamugtakan. (Ikomparar an 2 Timoteo 4:2.) “Sinanay niamo an samong sadiri na magin magayagaya huli sana ta naglilingkod kami ki Jehova,” nagsabi si Vera MacKay, na 37 nang taon na naglilingkod sa Hapon. “Dawa pa kun mayo ni sarong magdolok sa pinto, yaon kami dian tanganing magpatotoo dapit ki Jehova.”

Dose sa mga misyonerong ini an dai noarin man nag-agom, pero maogma sinda na makapaglingkod sa Kagurangnan na mayo nin nakakalingling. (1 Corinto 7:35) Si Gladys Gregory, na 43 nang taon na naglilingkod bilang misyonera, saro sa sainda. Nagsabi sia: “Tanganing magkaigwa nin orog na katalingkasan sa paglilingkod ki Jehova, luminaog ako sa pagpapayunir, pagkatapos sa Gilead [Paadalan sa Biblia kan Watchtower sa Gilead], dangan sa pagmimisyonero. Minsan ngani dai man ako nanumpa dapit dian, nagdanay akong mayong agom, asin siring sa nagkapirang katood, nungka na pinagbasolan ko iyan.”

Pagigin Andam na Makibagay

Minsan ngani may mga tawo na nagigin matagas an payo mantang sinda naggugurang, an mga misyonero perming andam na makibagay. Si Lois Dyer, Molly Heron, asin Lena saka Margrit Winteler nasa mas sadit na erokan nin misyonero sa sarong panresidensiang lugar sa Tokyo. Nag-istar sinda duman sa laog nin labing 20 taon asin nagin dayupot na sa mga tawo sa lugar na idto. Sa saindang mga teritoryo, an magtugang na Winteler nagkaigwa nin 40 katawo sa saindang ruta sa magasin, asin si Molly saka Lois nagkaigwa nin 74 sa ruta ninda. Dangan, pinabalyo sinda kan Sosyedad sa anom na eskalon na erokan nin misyonero sa sentro nin Tokyo. “Kan primero ako pinanluyahan nin boot asin namondo,” inadmitir ni Lena. Minsan siring, sinda nakibagay sa saindang bagong asignasyon arog kan dati. Ano an saindang namamatean ngonyan? “Maogmahon,” nagsimbag si Lena. “Ngonyan duwang tugang na lalaking taga-Bethel an yaon digdi tanganing magluto para sa samo asin maglinig kan erokan. Inaataman kaming marhay.” Minaoyon sinda gabos ki Lois, na nagsabi: “An mamomoton na pangataman na itinatao sa samo kan organisasyon ni Jehova nakakatabang sa samo na magpadagos sa paghihingoa.”

Si Norrine Thompson nakibagay man sa bagong mga sirkumstansia. “Sa laog nin 15 taon,” nagsabi sia, “nagkaigwa ako kan pribilehiyo na ibanan an sakong agom [na gikan sa New Zealand] sa pandistritong gibohon kan sasaro pa sanang distrito an bilog na Hapon.” Alagad, nagruro an salud kan saiyang agom, asin kinaipuhan niang pangganahan an pinakadakulang pagbalo sa saiyang buhay​—an kagadanan kaini 18 taon na an nakaagi. “Kan panahon na idto,” nagsabi sia, “an nagpangyari sako na makapagpadagos sa pagmimisyonero iyo an pagkamoot na ipinaheling kan mga tugang sa bilog na Hapon, kaiba an pamibi asin pagdadanay na sibot sa paglilingkod.”

Pagtagal sa Irarom nin mga Problema sa Salud

“An kadaklan igwa nin problema sa salud, pero maogma sinda, asin an saindang pagmawot na maglingkod sarong ekselenteng kuwalidad,” nagsabi si Albert Pastor, an paraataman kan erokan nin misyonero. Tanganing maasikaso an mga misyonero, an sarong doktor asin an saiyang agom, na sarong nars, idinestino sa erokan.

Sarong aldaw mga tolong taon na an nakaagi, si Elsie Tanigawa, sarong graduwado sa ika-11 klase kan Paadalan sa Gilead, bigla na sanang nawaran nin pakaheling sa wala niang mata. Pakalihis nin apat na bulan, naapektaran man an saiyang toong mata. “Kun beses talagang namomondo ako na dai na ako nakakapaglingkod siring kan dati kong nagigibo. Pero huli sa gabos na maboot na probisyon kan Sosyedad asin sa mamomoton na tabang kan sakong kapareha asin kan iba, padagos akong nakakanompong nin kagayagayahan sa paglilingkod ki Jehova,” nagsabi si Elsie.

Si Shinichi Tohara asin an saiyang agom, si Masako, na mga kaklase ni Elsie sa Gilead, napaatubang sa dakol na pagbalo mapadapit sa saindang salud sa nakalihis na pirang taon. Para ki Shinichi, sarong may kakayahan na espiker, dakulang angat an dai mabasa an saiyang mga nota huli sa saiyang nagluluyang pagheling. Maski ngani uminagi na sia nin dakula asin sadit na operasyon sa dai pa sana nahahaloy na mga taon, nagliliwanag an saiyang mga mata kun sia nag-eestorya manongod sa sarong 90-anyos nang estudyante sa Biblia na saiyang tinatabangan ngonyan.

Sa ibong kan pagkakaigwa nin “tonok sa laman,” an pagheling kan mga misyonerong ini sa saindang mga kaluyahan kapareho ki apostol Pablo, na nagsabi: “Kun ako maluya, dangan ako makosog.” (2 Corinto 12:​7-10) Asin tunay nanggad na mapuwersa sinda! Minabangon sinda para sa pan-agang pagsamba sa ala siete aroaldaw. Pakapamahaw, an mga may kakayahan pa sa pisikal minaluwas sa amay na agang ministeryo sa langtad.

Si Richard asin Myrtle Shiroma kabilang duman sa mga regular na nagluluwas sa paglilingkod. Si Myrtle pinagparaatake na dahelan sa pagpoon nin arteriosclerosis sa hotok kan 1978, pero inibanan nia an saiyang agom sa gibohon na pagbiyahe sagkod kan Nobyembre 1987. Ngonyan si Richard, na 70 anyos na man, tinatabangan si Myrtle na magibo an gabos na bagay. Minabangon sia nin ala 5:00 n.a., binabangon si Myrtle sa katre, pinaparigosan, ginugubingan, binubugtakan nin kolorete, asin hinuhungit. Dangan ilinuluwas nia sia na nasa wheelchair para sa paglilingkod sa langtad kada aga, na naghaharongharong sa laog nin mga sarong oras asin pakatapos kaiyan nagpapatotoo sa mga tawo sa mga pondohan nin awto. Dai na nakakataram si Myrtle, alagad an huring mga tataramon na sinabi nia Dendo, dendo, na Hapones para sa “Paghuhulit, paghuhulit.”

An saindang aki, si Sandra Sumida, buminalyo na sa erokan nin misyonero tanganing tabangan sinda. Si Sandra nagadanan pa sana kan namomotan niang agom na inatake sa puso. Pinahahalagahan nia an maboot na areglo kan Watch Tower Society sa pagdestino giraray sa saiya sa Hapon hale sa Guam, kun saen sia naglingkod bilang sarong misyonero kaiba an saiyang agom. “Permi kong namamatean na bakong gayong dakula an kabtang ko sa pagtabang sa sakong mga magurang huli ta nasa Guam ako,” nagsabi sia. “An sakong tugang, si Joanne, an nag-asikaso sainda sa erokan na ini. Kaya kan mabuksan an oportunidad, naogma ako dapit kaiyan. An pakamate na kinakaipuhan ako digdi nagin sakuyang bolong poon kan biglang magadan an sakong agom.”

Sagkod Ngonyan Nagpapadagos

Dawa ngani namamatean kan mga misyonero an mga epekto nin paggurang, nagsasayuma sindang isuko an saindang espiritu nin pagmimisyonero. (Salmo 90:10; Roma 5:12) Si Jerry asin Yoshi Toma, na kabilang sa kaenot-enoteng mga naggraduwar sa Gilead na uminabot sa Hapon, minaluwas pa sa komersial na teritoryo sa sentro kan Shibuya. “Kan umabot kami sa duwang eskalon na edipisyo na natotogdok digdi kan 1949, sinasarosaro ming dumanan an mga tagoan na kalot. Ngonyan an Tokyo nagin nang sarong dakulaon na siudad. Gurang na kami asin dai na makakagibo nin siring kadakol kan ginigibo mi kaidto. Pero kun minapuli kami hale sa paghuhulit, narerepreskohan kaming marhay,” nagsabi si Yoshi.

Si Lillian Samson 40 taon nang misyonera sa Hapon asin naoogmang marhay sa saiyang ministeryo. “Tinatabangan ko ngonyan an sarong 80-anyos na babae na nakipag-adal sa sakong kapareha, si Adeline Nako, na nagbuwelta na sa Hawaii sa pag-asikaso sa saiyang naghehelang na ina. An babae nagin parahayag kan Kahadean dai pa sana nahahaloy pakatapos na mapangganahan an problema sa pagsamba sa mga apoon. Nagduman sia sa templo asin sinabihan an agom kan padi, ‘Nakombertir na ako sa Kristianismo!’” Huli sa mga kagayagayahan na iyan sa saiyang buhay, nungkang nagbasol si Lillian sa aldaw na sia, sa edad na 19, uminontok sa saiyang sekular na trabaho asin nagpoon sa pagpapayunir.

Si Ruth Ulrich asin Martha Hess, magkaparehang misyonera sa laog nin labi nang 45 taon, 35 nang taon na naghuhulit hale sa erokan na ini nin misyonero. Midbid na sindang marhay sa teritoryo. Sarong paraataman sa sirkito an sarong beses hinapot si Martha: “Puwede daw na pasublion mo ako kan saimong lalauogon sa pagharongharong?” Midbid kan mga tawo an lalauogon ni Martha asin kinukua na an mga magasin, mantang an paraataman sa sirkito nadedepisilan sa pagpoon nin mga pag-orolay.

Si Ruth igwa nin sarong babae sa ruta nia sa magasin na dai nakakabasa huli sa mga problema sa salud. Minsan siring, padagos na nag-aako an babae kan mga magasin asin nag-ako pa ngani kan matagas an patos na librong Mankind’s Search for God. Iniisip-isip ni Ruth kun baga maninigo niang ipagpadagos an paghatod kan mga magasin huling garo baga mayo ni saro na nagbabasa kan literatura. Dangan sarong aldaw an agom kan babae dinolok si Ruth na dara an librong Search, na nagsasabi: “Magayonon na libro ini! Duwang beses ko nang nabasa ini.” Pinonan ni Ruth an pag-adal sa Biblia kaiba nia asin an agom kaini.

An erokan mismo na ini nin misyonero nakakaakit sa interesadong mga tawo. Sarong banggi, sarong soltero an uminabot sa erokan asin nagsabi: “Nabaretaan ko na kun dumigdi ako, makakakua ako nin tabang na manodan an Biblia.” Naponan an pag-adal sa Biblia kaiba nia. Bilang sarong kusinero sa restawran na Intsik, katrabaho nia an sarong daraga na natiwalag sa laog nin dakol nang taon. An ikinapasakamot na mga magasin kan sumongko an sarong parahayag sa restawran nakaabot sa kusina. Nagustohan iyan kan hoben na kusinero asin nagpoon na magparahapot sa dating Saksi. Dai nasimbag an mga iyan, sinabihan sia kaini na sumongko sa erokan nin misyonero. Ngonyan naglilingkod na sia bilang ministeryal na lingkod asin payunir. Pag-abot nin panahon, nakabalik an natiwalag na babae, asin sa katapustapusi sia nagin regular payunir man.

An gabos na misyonero sa erokan mapagpahalaga sa ginibo sa sainda ni Jehova. Hale sinda sa Australia, Canada, Hawaii, Switzerland, asin Estados Unidos, asin 11 an gikan sa ika-11 klase o mas enot na mga klase sa paadalan nin misyonero sa Gilead. Naheling ninda an pag-oswag kan gibohon na pan-Kahadean sa Hapon asin kapareho an mga saboot kan ki Hadeng David, na nagsabi: “Ako nagin hoben man, asin naggurang man, alagad dai ako noarin man nakaheling nin siisay man na matanos na lubos na pinabayaan, ni an saiyang mga aki na nakikilimos nin tinapay.” (Salmo 37:25) Bilang pag-apresyar sa mamomoton na pagmakolog nin Dios, determinado an mga misyonerong ini na dai magretiro kundi magdanay sa paglilingkod ki Jehova.