Pagranga Gikan sa “Dios nin Gabos na Karangahan”

“Omawon logod an Dios asin Ama kan satong Kagurangnan na si Jesu-Cristo, an Ama nin maboot na mga pagkaherak asin an Dios nin gabos na karangahan, na minaranga sa samo sa gabos niamong kasakitan.”​—2 CORINTO 1:​3, 4.

1, 2. Anong klaseng karangahan an kaipuhan kan mga tawong nagmomondo?

AN MGA tawong nagmomondo nangangaipo nin tunay na karangahan​—bakong mga sarabihon na perming ginagamit asin nakauuyam na. Nadangog na niato gabos na ‘an panahon an mapapila sa lugad,’ pero sa enot na mga aldaw kan pagmondo, siisay na tawong labi-labi an pagmondo an mararanga kan ideyang iyan? Aram kan mga Kristiano na an Dios nanuga nin pagkabuhay liwat, pero dai kaiyan naoolang an hararom na kolog asin tension sa emosyon bunga nin biglang pagkagadan. Asin tunay nanggad na kun kamo nagadanan nin aki, an iba pang nawalat na mga aki dai puwedeng isalida sa mahal na sarong iyan.

² Sa mga panahon na kita nagadanan, natatabangan kitang marhay nin tunay na karangahan, karangahan na igwa nin marigon na basihan sa mga panuga nin Dios. Nangangaipo man kita nin pakikidamay. Siertong totoo ini sa mga taga-Rwanda, asin nangorogna sa ginatos na pamilya nin mga Saksi ni Jehova duman na nagadanan nin mga namomotan sa diabolikong lagduan na paggaradanan na idto nin mga tribo. Sa kiisay makakakua nin karangahan an gabos na nagmomondo?

Si Jehova​—An Dios nin Karangahan

3. Paano si Jehova nagtatao kan halimbawa sa pagtao nin karangahan?

³ Si Jehova nagtao kan halimbawa sa pagtao sato gabos nin karangahan. Isinugo nia digdi sa daga an saiyang bugtong na Aki, si Cristo Jesus, tanganing tawan kita nin daing katapusan na karangahan asin paglaom. Itinokdo ni Jesus: “An Dios namoot na gayo sa kinaban na itinao nia an saiyang Aking bugtong, tanganing an lambang maggibo nin pagtubod sa saiya dai mapahamak kundi magkaigwa nin buhay na daing katapusan.” (Juan 3:16) Sinabihan man nia an saiyang mga parasunod: “Mayo nin siisay man na namoot nin orog pa kaini, na itao nin saro an saiyang kalag dahel sa saiyang mga katood.” (Juan 15:13) Sa saro pang pangyayari sinabi nia: “An Aki nin tawo nagdigdi, bakong tanganing paglingkodan, kundi tanganing maglingkod asin magtao kan saiyang kalag bilang pantubos na karibay nin dakol.” (Mateo 20:28) Asin si Pablo nagsabi: “Ipinamimidbid nin Dios an saiyang pagkamoot sa sato sa paagi na, mantang kita mga parakasala pa, si Cristo nagadan para sa sato.” (Roma 5:8) Paagi kaini asin kan dakol pang ibang teksto, namamansayan niato an pagkamoot nin Dios asin ni Cristo Jesus.

4. Taano si apostol Pablo ta nangorognang may utang na boot ki Jehova?

⁴ Si apostol Pablo nangorognang nakamate kan dai na kutana maninigong kabootan ni Jehova. Kinalda sia hale sa gadan na kamugtakan sa espirituwal, hale sa pagigin panatikong paralamag sa mga parasunod ni Cristo pasiring sa pagigin pinaglalamag na Kristiano mismo. (Efeso 2:​1-5) Ilinadawan nia an saiyang eksperyensia: “Ako an pinakasadit sa mga apostol, asin bako akong angay na apodon na apostol, huli ta pinaglamag ko an kongregasyon nin Dios. Alagad huli sa dai na kutana maninigong kabootan nin Dios ako nagin arog kaini. Asin an saiyang dai na kutana maninigong kabootan na ipinaheling sa sako dai nasayang, kundi ako nagpagal nin labi kisa sainda gabos, alagad bakong ako kundi an dai na kutana maninigong kabootan nin Dios na nasa sako.”​—1 Corinto 15:​9, 10.

5. Ano an isinurat ni Pablo manongod sa karangahan gikan sa Dios?

⁵ Angay kun siring na si Pablo nagsurat: “Omawon logod an Dios asin Ama kan satong Kagurangnan na si Jesu-Cristo, an Ama nin maboot na mga pagkaherak asin an Dios nin gabos na karangahan, na minaranga sa samo sa gabos niamong kasakitan, tanganing maranga niamo an mga nasa ano man na kasakitan paagi sa karangahan na irinaranga mismo sa samo nin Dios. Huli ta kun paanong an mga kasakitan para ki Cristo nagsosopay sa samo, siring man an samong karangahan nagsosopay huli ki Cristo. Ngonyan baga man kami nagsasakit, iyan para sa saindong karangahan asin kaligtasan; o baga man kami rinaranga, iyan para sa saindong karangahan na naghihiro tanganing papagtagalon kamo sa kaparehong mga kasakitan na tinitios mi man. Kaya an samong paglaom sa saindo dai nagliliwatliwat, huling aram mi na, kun paanong kamo nakikikabtang sa mga kasakitan, makikikabtang man kamo sa karangahan.”​—2 Corinto 1:​3-7.

6. Ano an ipinaririsa kan termino sa Griego na trinadusir na “karangahan”?

⁶ Abaa kanakaiinspirar na mga tataramon! An termino sa Griego na trinadusir digding “karangahan” konektado sa “pag-apod na dumolok sa saro.” Kaya, “iyan an pagtindog sa kataed nin saro tanganing pakosogon sia kun sia nag-aagi nin makuring pagbalo.” (A Linguistic Key to the Greek New Testament) An sarong iskolar sa Biblia nagsurat: “An termino . . . perming nangangahulogan nin labi pa sa nakagiginhawang pakikidamay. . . . An Kristianong karangahan iyo an karangahan na nagtatao nin kosog nin boot, an karangahan na nagpapangyari sa tawo na mapangganahan an gabos na kadepisilan sa buhay.” Kabale man dian an nakararangang mga tataramon na basado sa marigon na panuga asin paglaom​—an pagkabuhay liwat kan mga gadan.

Si Jesus Asin Pablo​—Madinamayon na mga Pararanga

7. Paano si Pablo nakararanga sa saiyang Kristianong mga tugang?

⁷ Kanigoan kagayon na halimbawa si Pablo sa pagtao nin karangahan! Nakasurat sia sa mga tugang sa Tesalonica: “Kami nagin maboot sa tahaw nindo, arog kan pagmamahal nin nagpapasusong ina sa saiyang mga aki. Kaya, huli sa pagkaigwa nin mamomoton na kapadangatan sa saindo, kami naogmang gayo na itao sa saindo, bako sanang an maogmang bareta nin Dios, kundi siring man an samong kalag, huli ta kamo nagin mahal sa samo. Kaoyon kaiyan aram na gayo nindo kun paano, arog kan ginigibo nin ama sa saiyang mga aki, kami padagos na nagsadol sa lambang saro sa saindo, asin nagranga patin nagpatotoo sa saindo.” Siring nanggad sa mamomoton, mapagpadangat na mga magurang, kita gabos puwedeng maghiras kan satong init asin pagsabot sa iba sa saindang panahon nin pangangaipo.​—1 Tesalonica 2:​7, 8, 11.

8. Taano an katokdoan ni Jesus ta sarong karangahan para sa mga nagmomondo?

⁸ Sa pagpaheling nin siring na pagpadangat asin kabootan, inaarog sana ni Pablo an saiyang dakulang Arogan, si Jesus. Girumdoma an madinamayon na pangagda na ipinaaabot ni Jesus sa gabos na nasusurat sa Mateo 11:​28-30: “Madia kamo sa sako, kamo gabos na napapagal asin nagagabatan, asin tatawan ko kamo nin kaginhawahan. Pasana nindo an sakong sakal asin makanood sa sako, huli ta ako maboot asin mapakumbaba sa puso, asin makakakua kamo nin kaginhawahan para sa saindong kalag. Huli ta an sakong sakal maboot asin an sakong pasan magian.” Iyo, nakagiginhawa an katokdoan ni Jesus huli ta nagtatao iyan nin paglaom asin panuga​—an panugang pagkabuhay liwat. Ini an paglaom asin panuga na itinatao niato sa mga tawo, halimbawa, kun winawalatan niato sinda kan brochure na Kun Magadan an Sarong Namomotan. An paglaom na ini puwedeng makatabang sa sato gabos, dawa kun haloy nang panahon na kita nagmomondo.

Kun Paano Rarangahon an mga Nagmomondo

9. Taano ta dai kita maninigong mawaran nin pasensia sa mga tawong nagmomondo?

⁹ An kamondoan bako sanang durante nin dati nang itinalaan na peryodo pakatapos tolos kan pagkagadan kan namomotan. An ibang tawo dinadaradara an gabat kan saindang kamondoan sa bilog nindang buhay, nangorogna an mga nagadanan nin mga aki. An sarong maimbod na Kristianong mag-agom sa España nagadanan kan saindang 11-anyos na aki kan 1963 na biktima nin mininghitis. Sagkod ngonyan, napapaluha pa giraray sinda kun pinag-oolayan si Paquito. An mga anibersaryo, retrato, subenir, puwedeng pumukaw nin mamondong mga paggirumdom. Kaya, dai kita noarin man maninigong mawaran nin pasensia asin maghona na an iba maninigong tapos na ngonyan na ipagmondo an pagkagadan. An sarong autoridad sa medisina nag-admitir: “An depresyon asin pagbarubago nin emosyon puwedeng lumawig sagkod sa nagkapirang taon.” Kaya girumdomon na kun paanong an pisikal na pinilaan sa hawak puwedeng magdanay sa sato sa bilog na buhay, siring man an dakol na pinilaan sa emosyon.

10. Ano an dapat niatong gibohon tanganing tabangan an mga nagmomondo?

¹⁰ Ano an nagkapirang praktikal na bagay na puwede niatong gibohon tanganing rangahon an mga nagmomondo sa Kristianong kongregasyon? Sa bilog na sinseridad tibaad magsabi kita sa sarong tugang na lalaki o babae na nangangaipo nin karangahan, “Kun igwa akong ano man na ikakatabang, sabihon mo sana sako.” Alagad gurano kaparate na an sarong nagadanan talagang minaapod sato tanganing magsabi, “May naisip akong ikakatabang mo sako”? Malinaw nanggad, dapat kitang angay na magsadiring boot kun gusto niatong rangahon an mga nagadanan. Kaya, ano an puwede niatong gibohon sa kapakipakinabang na paagi? Uya an nagkapirang praktikal na suhestion.

11. Paano puwedeng magin karangahan sa iba an satong paghinanyog?

¹¹ Maghinanyog: An saro sa pinakanakatatabang na magigibo nindo iyo na makidamay sa kolog kan nagadanan paagi sa paghinanyog. Puwede nindong ihapot, “Gusto daw nindong ipakipag-olay iyan?” Pabayaan na sia an magdesisyon. Nagigirumdoman nin sarong Kristiano kan magadan an saiyang ama: “Talagang nakatabang sako kan an iba hinahapot ako kun ano an nangyari dangan talagang naghihinanyog.” Siring kan isinadol ni Santiago, magin listo sa paghinanyog. (Santiago 1:19) Mapasensia asin madinamay na maghinanyog. “Makitangis kamo sa mga tawong nagtatangis,” an irinirekomendar kan Biblia sa Roma 12:15. Girumdomon na si Jesus nakitangis ki Marta asin Maria.​—Juan 11:35.

12. Anong klaseng pag-asegurar an puwede niatong itao sa mga nagmomondo?

¹² Tumao nin pag-asegurar: Girumdomon na an sarong nagadanan puwedeng sa primero makamateng may sala, na nag-iisip na tibaad igwa pa kutana siang ginibo. Siertohon sa saiya na posibleng ginibo an gabos na mahihimo (o ano man na aram nindong totoo asin positibo). Aseguraron sia na an saiyang namamatean bako man pambihira. Iestorya sa saiya an dapit sa iba na aram nindo na mapangganang nakaatubang sa kaparehong kawaran. Sa ibang pagtaram, magin sensitibo sa pagmate nin iba asin madinamay. An satong maboot na tabang puwedeng magin dakulaon an kahulogan! Si Salomon nagsurat: “Siring sa mga mansanas na bulawan sa mga inukit na pirak an tataramon na itinaram sa tamang kapanahonan kaiyan.”​—Talinhaga 16:24; 25:11; 1 Tesalonica 5:​11, 14.

13. Kun kita andam sa pagtabang, paano iyan puwedeng makatabang?

¹³ Magin andam na tumabang: Magin andam na tumabang bako sanang sa laog kan enot na nagkapirang aldaw na yaon pa an dakol na katood asin paryentes kundi pakalihis nin mga bulan kun kaipuhan, na an iba nagbalik na sa saindang normal na rutina. An peryodo nin pagmondo magkakalaen na marhay, depende sa indibiduwal. An satong Kristianong interes asin pakikidamay dakulang marhay an ikakatabang sa ano man na panahon nin pangangaipo. An Biblia nagsasabi na “igwa nin katood na labi pa kadayupot sa tugang.” Kaya, an sarabihon na, “An katood na yaon sa panahon nin pangangaipo katood na totoo,” sarong malinaw na katunayan na maninigo niatong gibohon.​—Talinhaga 18:24; ikomparar an Gibo 28:15.

14. Ano an puwede niatong pag-olayan tanganing maranga an mga nagadanan?

¹⁴ Pag-orolayan an manongod sa marahay na mga kuwalidad kan nagadan: Ini saro pang dakulang tabang kun itinao sa tamang panahon. Mag-estorya nin positibong mga anekdota na nagigirumdoman nindo manongod sa indibiduwal. Dai matakot na gamiton an ngaran kan tawo. Dai kamo umakto na garo baga an nagadan na namomotan nungkang nag-eksister o dai nabuhay. Nakararangang maaraman an sinabi nin sarong publikasyon hale sa Harvard Medical School: “May nakakamit nang pagrahay kun sa katapustapusi naiisip na kan nagadanan an nagadan na dai sia nakamamate nin labi-labing kamondoan . . . Mantang inaako asin sinasabot an bagong katunayan, an kamondoan nagigin nang mahalagang mga memorya.” “Mahalagang mga memorya”​—kanigoan kanakararanga na girumdomon an mahalagang mga panahon sa kaibahan nin sarong namomotan! An sarong Saksi na nagadan an saiyang ama nagkapirang taon na an nakaagi nagsabi: “An sarong espesyal na memorya para sa sako iyo an pagbasa sa Biblia kaiba ni Tatay dai nahaloy pakapoon niang mag-adal sa katotoohan. Siring man an paghigda sa may pangpang nin salog na pinag-oolayan an nagkapira kong problema. Nagkakahelingan sana kami kada tolo o apat na taon, kaya mahalaga an mga okasyon na idto.”

15. Paano puwedeng magboluntaryo an saro na tumabang?

¹⁵ Magboluntaryo kun angay: An ibang nagmomondo mas nakapanggagana kisa sa iba. Kaya, depende sa mga kamugtakan, gumibo nin praktikal na mga paagi na makatabang. An sarong nagmomondong Kristiana nakagirumdom: “Dakol an nagsabi, ‘Kun igwa ako nin ano man na magigibo, sabihon mo sa sako.’ Pero an sarong Kristianang tugang dai naghapot. Duminiretso na sia sa kuwarto, hinarale an mga gamit sa kama, asin linabahan an naatian na tamong asin kobrekama. An saro pa nagkua nin balde, tubig, asin mga panlinig asin ninusnos an alpombra na nasukahan kan agom ko. An mga ini tunay na mga katood, asin dai ko sinda noarin man malilingawan.” Kun igwa nin risang pangangaipo para sa tabang, magboluntaryo na kamo​—tibaad paagi sa pagluto nin kakanon, pagtabang sa paglinig, o pag-asikaso sa mga dudumanon. Siyempre, maninigo kitang magin maingat na dai magboot kun an nagadanan gustong magsolo. Kaya, maninigo niatong isapuso an mga tataramon ni Pablo: “Kaya, bilang mga pinili nin Dios, banal asin namomotan, isolog nindo an mamomoton na mga pagmate nin pagdamay, kabootan, kababaan nin boot, kahoyoan, asin pakatios.” An kabootan, pagpasensia, asin pagkamoot nungkang nasusudya.​—Colosas 3:​12; 1 Corinto 13:​4-8.

16. Taano ta makatatao nin karangahan an surat o kard?

¹⁶ Sumurat o magpadara nin nakararangang kard: An parateng nalilingawan iyo an halaga nin surat nin pagranga o magayon na kard nin pakikidamay. An bentaha kaiyan? Puwedeng basahon iyan nin paorootro. An siring na surat dai kaipuhan na magin halawig, pero maninigo iyan na magpaheling kan saindong pagdamay. Iyan maninigo man na espirituwal an tono pero dai man nagsesermon. An mismong simpleng mensahe na “Yaon kami tanganing tabangan ka” puwedeng magin karangahan.

17. Paano makatatao nin karangahan an pamibi?

¹⁷ Mamibi kaiba ninda: Dai pagmenuson an halaga kan saindong mga pamibi kaiba kan asin para sa mga nagadanan na kapwa Kristiano. An Biblia nagsasabi sa Santiago 5:16: “An pagngayongayo nin matanos na tawo . . . may dakulang puwersa.” Halimbawa, kun nadadangog kita kan nagmomondo na namimibi para sa sainda, nakakatabang iyan sa sainda na haleon an ano man na negatibong mga saboot na arog baga nin pakamate nin sala. Sa mga panahon nin satong kaluyahan, o panluluya nin boot, hinihingoa ni Satanas na paluyahon kita paagi kan saiyang “mga pakana,” o “mga katusohan.” Ini an panahon na kaipuhan niato an karangahan asin tabang nin pamibi, arog kan sabi ni Pablo: “Kaiba an gabos na porma nin pamibi asin pagngayongayo padagos kamong mamibi sa gabos na panahon sa espiritu. Asin sa katuyohan na iyan danay na magpuka sa bilog na panahon asin may pagngayongayo para sa gabos na banal.”​—Efeso 6:​11, 18, Kingdom Interlinear; ikomparar an Santiago 5:​13-15.

Kun Ano an Dapat na Likayan

18, 19. Paano kita makapaheheling nin taktika sa satong mga pakikipag-olay?

¹⁸ Kun nagmomondo an saro, igwa man nin mga bagay na dai dapat gibohon o sabihon. An Talinhaga 12:18 nagpapatanid: “Igwa nin nagtataram na dai iniisip arog kan mga bono nin espada, alagad an dila kan mga madonong bolong.” Kun minsan, dai iyan narerealisar, dai niato nahihimong magpaheling nin taktika. Halimbawa, tibaad magsabi kita, “Aram ko an namamatean mo.” Alagad totoo daw talaga iyan? Nagadanan na daw kamo sa arog nanggad kaiyan na paagi? Siring man, manlaenlaen an reaksion nin mga tawo. An reaksion nindo puwedeng bakong kapareho kan reaksion kan sarong nagmomondo. Tibaad mas sensitibo sa pagmate nin iba na magsabing, “Nakikidamay nanggad ako sa saimo ta naagihan ko na man iyan kan an sakong . . . magadan haloy-haloy na.”

¹⁹ Magpapaheling man nin pagkasensitibo sa pagmate nin iba na likayan an pagkomento manongod sa kun baga an nagadan bubuhayon liwat o dai. May mga tugang na lalaki asin babae na nakolgan na marhay nin may paghusgar na mga pananaram manongod sa mga posibilidad sa ngapit nin sarong nagadan na agom na daing pagtubod. Bako kita an mga hokom sa kun siisay an bubuhayon liwat o dai. Makapagpapasalamat kita na si Jehova, na nakakaheling sa puso, magigin orog na maheherakon kisa sa kadaklan sa sato kasuarin pa man.​—Salmo 86:15; Lucas 6:​35-37.

Mga Teksto na Nakararanga

20, 21. Ano an nagkapirang teksto na puwedeng makaranga sa mga nagadanan?

²⁰ An saro sa pinakadakulang burabod nin tabang, kun itinatao sa tamang panahon, iyo an pag-orolay sa mga panuga ni Jehova para sa mga gadan. Mapapakinabangan an mga kaisipan na ini na hale sa Biblia baga man an nagadanan dati nang Saksi o saro na nakakaolay niato sa ministeryo. Ano an nagkapira sa mga tekstong ini? Aram niato na si Jehova iyo an Dios nin gabos na karangahan, huli ta sia nagsabi: “Ako​—ako mismo an Saro na nagraranga sa saindo.” Sia nagsabi man: “Siring sa sarong tawo na padagos na rinaranga kan saiya mismong ina, siring man sana na ako mismo padagos na magraranga saindo.”​—Isaias 51:12; 66:13.

²¹ An salmista nagsurat: “Ini an karangahan ko sa sakong kamondoan, huli ta an saimong tataramon pinapagdanay akong buhay. Nagirumdoman ko an saimong mga paghokom poon sa panahon na daing katapusan, O Jehova, asin nakakanompong ako nin karangahan para sa sako. An saimong mamomoton na kabootan magin logod, tabi, karangahan sa sako, sono sa tataramon mo sa saimong lingkod.” Mangnoha na an terminong “karangahan” paorootrong ginamit sa mga tekstong iyan. Iyo, puwede kitang makanompong nin tunay na karangahan para sa satong sadiri asin para sa iba paagi sa pagtao nin atension sa Tataramon ni Jehova sa panahon nin satong kamondoan. Ini, kadungan nin pagkamoot asin pagdamay kan mga tugang, makatatabang sato na matagalan an pagkawara asin panoon giraray an satong buhay nin magayagayang aktibidad sa Kristianong ministeryo.​—Salmo 119:50, 52, 76.

22. Anong paglaom an nasa atubangan niato?

²² An satong kamondoan puwede man na medyo mapangganahan niato paagi sa pagigin sibot sa pagtabang sa iba sa saindang kapurisawan. Mantang itinatao niato an satong atension sa iba na nangangaipo nin karangahan, nakukua man niato an tunay na kaogmahan sa pagtao sa espirituwal na sentido. (Gibo 20:35) Ihiras niato sa sainda an ladawan kan aldaw nin pagbuhay liwat na an mga tawo hale sa gabos na nasyon kaidto, sa sunod-sunod na kapag-arakian, masabat sa saindang nagadan na mga namomotan hale sa mga gadan pasiring sa sarong bagong kinaban. Kanigoan na paglaom! Kanigoan na mga luha nin kagayagayahan an matoro sa panahon na iyan mantang ginigirumdom niato na si Jehova iyo nanggad an Dios “na nagraranga sa mga mamondo”!​—2 Corinto 7:6.

Nagigirumdoman daw Nindo?

◻ Paanong si Jehova “an Dios nin gabos na karangahan”?

◻ Paano rinanga ni Jesus asin Pablo an mga nagmomondo?

◻ Ano an nagkapirang bagay na puwede niatong gibohon tanganing rangahon an mga nagmomondo?

◻ Ano an maninigo niatong likayan kun nakikipag-olay sa mga nagadanan?

◻ Ano an paborito nindong mga teksto para sa pagranga sa mga panahon na may nagadanan?

[Retrato sa pahina 15]

Mataktikang magboluntaryo tanganing tabangan an mga nagmomondo