“Panahon na dai Maggirong Asin Panahon na Magtaram”

PIRANG beses na kamong nanambitan, “Kutana dai ko idto sinabi”? Pero, tibaad kamo may nagigirumdoman na iba pang okasyon na dai kamo nakapagtaram. Sa paggirumdom, tibaad inisip nindo, ‘Kutana may nasabi ako.’

An Biblia nagsasabi na igwa nin “panahon na dai maggirong asin panahon na magtaram.” (Eclesiastes 3:7) Kun siring, uya an problema​—an pagdesisyon kun noarin mataram asin kun noarin dai magirong. An satong bakong sangkap na naturalesa bilang tawo sa parate pinipirit kitang gibohon asin sabihon an mga bagay sa salang panahon. (Roma 7:19) Paano niato makokontrol an satong suwayan na dila?​—Santiago 3:2.

Mga Paagi na Mamanso an Dila

Tanganing matabangan kita na magdesisyon kun noarin mataram asin kun noarin masilensio, dai niato kaipuhan an halabang lista na yaon na dian an gabos na posibleng situwasyon. Imbes, kaipuhan kitang giyahan nin mga kualidad na nasa naturalesa na kan Kristianong personalidad. Ano an mga kualidad na ini?

Ipinaliwanag ni Jesu-Cristo na an pagkamoot iyo an pangenot na kualidad na nagmomotibar sa saiyang mga disipulo. “Paagi kaini an gabos makaaaram na kamo an sakong mga disipulo, kun kamo nagkakaminorootmootan,” an sabi nia. (Juan 13:35) Mientras na orog niatong ipinaheheling an siring na pagkamoot sa tugang, mas orog na makokontrol niato an satong dila.

Dakula man an ikatatabang nin duwang konektadong kualidad. An saro kaini kapakumbabaan. Pinangyayari kita kaiyan na ‘ibilang an iba na mas halangkaw kisa sa sato.’ (Filipos 2:3) An saro pa iyo an kahoyoan, na ‘nakapopogol sa sato sa irarom nin karatan.’ (2 Timoteo 2:​24, 25) Sangkap na halimbawa niato si Jesu-Cristo kun paano maninigong gibohon an mga kualidad na ini.

Mantang mas depisil na kontrolon an satong dila kun kita nasa irarom nin pangigipit, horophoropon niato an banggi bago nagadan si Jesus​—panahon na sia ‘nahahadit nin makuri.’ (Mateo 26:​37, 38) Bakong makangangalas na arog kaini an namatean ni Jesus, huling an daing sagkod na ngapit kan bilog na katawohan nakadepende sa saiyang pagdadanay na fiel sa Dios.​—Roma 5:​19-21.

Ini tunay nanggad na panahon para ki Jesus na makipag-olay sa saiyang langitnon na Ama. Kaya huminale sia tanganing mamibi, na hinahagad sa tolo niang disipulo na magpuka. Paghaloyhaloy nagdatong sia asin inabotan nia sinda na natotorog. Huli kaiyan sinabihan nia si Pedro: “Ano, dai man lamang kamo makakapagpuka minsan sarong oras sa kaibanan ko?” An mamomoton na pagsagweng ini may kaibang mga tataramon na nagpaheling nin pagsabot sa mga kaluyahan ninda. Sinabi nia: “Siempre, an espiritu nagmamawot na gayo, alagad an laman maluya.” Paghaloyhaloy, nagdatong na naman si Jesus asin naabotan an mga disipulo na tororog. Kinaolay nia sinda na may kabootan asin sia ‘naghale asin namibi nin ikatolo.’​—Mateo 26:​36-44.

Kan ikatolong beses na naabotan ni Jesus an mga disipulo na natotorog, dai sia nagin maisog kundi nagsabi: “Sa panahon na arog kaini kamo natotorog asin nagpapahingalo! Uya! An oras harani na tanganing an Aki nin tawo pasaloiban sa mga kamot nin mga parakasala.” (Mateo 26:​45) Solamente saro na an puso pano nin pagkamoot, igwa nin tunay na mahoyo asin mapakumbabang kaisipan, an makagagamit sa dila sa arog kaiyan na paagi sa siring kasakit na panahon.​—Mateo 11:29; Juan 13:1.

Dai nahaloy pakalihis kaiyan, si Jesus inarestar asin binista. Digdi manonodan niato na kun beses pinakamarahay na dai maggirong, dawa kun nasa Kristianong ministeryo. Desididong magpakana tumang ki Jesus, an poon na mga saserdote mayo man lamang nin interes na manodan an katotoohan. Kaya sa madaling magkainitan na kamugtakan na ini, si Jesus nagdanay na silensio.​—Ikomparar an Mateo 7:6.

Minsan siring, si Jesus dai nagdanay na silensio kan hagadon kan halangkaw na saserdote: “Sa ngaran kan nabubuhay na Dios ibinubugtak taka sa irarom nin sumpa na magsabi sa samo kun baga ika an Cristo na Aki nin Dios!” (Mateo 26:​63) Huling ibinugtak si Jesus sa irarom nin sumpa, panahon na para sa saiya na magtaram. Kaya suminimbag sia: “Ika an nagsabi. Pero ako nagsasabi sa saindo, Poon ngonyan maheheling nindo an Aki nin tawo na nagtutukaw sa too nin kapangyarihan asin naghihilig sa mga panganoron nin langit.”​—Mateo 26:​64.

Durante kan pano nin pangyayaring aldaw na idto, si Jesus naggibo nin sangkap na pagpopogol sa saiyang dila. Sa kamugtakan nia, an pagkamoot, kahoyoan, asin kapakumbabaan natural nang mga kabtang kan saiyang personalidad. Paano niato magagamit an mga kualidad na ini sa pagkontrol sa satong dila kun kita nasa irarom nin pangigipit?

Pagkontrol sa Dila kun Naaanggot

Kun kita naaanggot, parateng dai niato nakokontrol an satong dila. Halimbawa, si Pablo asin Bernabe kaidto nagkaigwa nin magkalaen na opinyon. “Desidido si Bernabe na ipag-iba man si Juan, na inaapod Marcos. Alagad si Pablo naghona na bakong marahay na ipag-iba an sarong ini, mantang sia buminulag sa sainda sa Pamfilia asin dai uminiba sa sainda sa gibohon. Dangan nangyari an matarom na pagputok nin kaanggotan, kaya sinda nagbulag.”​—Gibo 15:​37-39.

Si Michael,a na nagkapirang taon nang nagtatrabaho sa mga proyekto nin pagtogdok, nagsasaysay: “May saro sa lugar kan konstruksion na midbid kong marhay asin iginagalang. Alagad garo baga permi niang hinahanapan nin sala an sakong trabaho. Nakokolgan an boot ko asin nauuyam ako alagad sinadiri ko na sana an sakong mga saboot. Sarong aldaw napano na ako kan tatsaran nia an katatapos ko pa sanang trabaho.

“Ilinuwas ko an gabos na itinatago kong saboot. Sa pagkainit ko, nalingawan ko an siertong nagin maraot na impresyon kaini sa gabos na kaibanan niamo. Sa bilog na aldaw na idto, habo kong makipag-olay sa saiya o minsan maheling sia. Narealisar ko ngonyan na bakong tama an pagkaatubang ko sa problema. Mas marahay kutana kun ako dai naggirong asin nagtaram kan malipot na an payo ko.”

Nakaoogma, an Kristianong pagkamoot nagpahiro sa duwang indibiduwal na ini na resolberan an dai ninda pagkakaintindihan. Ipinaliliwanag ni Michael: “Pakatapos nin prangkang komunikasyon, mas nasabotan niamo an kada saro, asin makosog na ngonyan an samong pagkakatood.”

Siring kan nanodan ni Michael, kun kita naaanggot, kun beses madonong na dai maggirong. “An tawong may pakamansay malipot an espiritu,” an sabi kan Talinhaga 17:27. An pakamansay asin pagkamoot sa tugang tatabangan kitang makontrol an satong tendensia na magtaram nin nakakokolog sa boot. Kun kita napagkasalaan, kaolayon niato an tawo na sia sana sa mahoyo asin mapakumbabang espiritu, na an katuyohan ikabalik an katoninongan. Ano kun may nangyari nang pagputok nin kaanggotan? Kun siring an pagkamoot pahihiroon kita na halonon an satong kapalangkawan asin mapakumbabang hingoahon na makipag-uli. Ini an panahon na magtaram, magpahayag nin pagbasol asin paomayan an nakolgan na boot paagi sa sinserong komunikasyon.​—Mateo 5:​23, 24.

Kun an Pagsilensio Bakong Solusyon

An kaanggotan o pagkauyam puedeng papangyarihon kita na dai girongon an saro na kinasusuyaan ta. Ini puedeng makadanyar na marhay. “Durante kan enot na taon na pag-ibaiba mi mag-agom, may mga okasyon na dai ko kinakaolay an agom ko sa laog nin nagkapirang aldaw,” an pagtuga ni María.b “Sa parate, iyan bakong huli sa darakulang problema kundi, imbes, huli sa nadamot na saradit na pagkauyam. Pigpaparaisip-isip ko an gabos na pagkasuya na ini sagkod na iyan magin nang garo bukid na olang. Dangan naabot an oras na dai ko na kayang tagalan iyan, asin basta na sana ako minapondong kaolayon an sakong agom sagkod na makalihis an sakong pagkadisganar.”

Idinagdag pa ni María: “An sarong partikular na teksto sa Biblia​—‘dai pagpasolnopon an aldaw na kamo may kaanggotan’—​nakatabang sa sako na pakarhayon liwat an sakong kaisipan. Kami mag-agom nagmaigot na paoswagon an komunikasyon tanganing dai dumakula an mga problema. Bako iyan na pasil, alagad pakalihis nin sampulong taon nin pagigin may agom, naoogma akong sabihon na mas bihira nang marhay an mga panahon na ini nin dai paggironggirong. Minsan siring, aadmitiron ko na sagkod ngonyan nagmamaigot pa akong kontrolon an tendensiang ini.”​—Efeso 4:26.

Siring kan nadiskobre ni María, kun may tension sa pag-oltanan nin duwang tawo, an pagputol sa komunikasyon bakong solusyon. Sa irarom kan siring na mga kamugtakan, posibleng tumubo an paghinanakit, asin puedeng madanyaran an relasyon. Sinabi ni Jesus na kita maninigong magin ‘marikas sa pakipaghusay.’ (Mateo 5:25) “An tataramon na itinaram sa tamang kapanahonan” makatatabang sa sato na ‘hanapon an katoninongan.’​—Talinhaga 25:11; 1 Pedro 3:11.

Kaipuhan man kitang magtaram kun kita nangangaipo nin tabang. Kun kita nasasakitan huli sa sarong espirituwal na problema, tibaad nag-aalangan kitang pagabatan an iba. Alagad kun dai kita magirong, an problema puedeng grumabe. An nombradong Kristianong kamagurangan may pagmakolog sa sato asin, kun totogotan niato sinda, daing duwa-duwa na galagang tumabang. Ini panahon na kita maninigong magtaram.​—Santiago 5:​13-16.

Orog sa gabos, maninigo kitang makipag-olay ki Jehova nin regular paagi sa odok sa pusong pamibi, arog kan ginibo ni Jesus. Tunay nanggad, ‘biyo niatong ipahayag an laog kan satong puso’ sa satong langitnon na Ama.​—Salmo 62:8; ikomparar an Hebreo 5:7.

“Panahon na Magtaram” Manongod sa Kahadean nin Dios

An Kristianong ministeryo sugo nin Dios na dapat na otobon bago dumatong an katapusan. Daing kaagid kasuarin pa man, mahalagang marhay kun siring na an mga lingkod ni Jehova magpahayag kan maogmang bareta kan Kahadean. (Marcos 13:10) Arog kan mga apostol, an tunay na mga Kristiano ‘dai puedeng mag-ontok sa pagtaram dapit sa mga bagay na saindang naheling asin nadangog.’​—Gibo 4:20.

Siempre, bakong gabos gustong magdangog kan maogmang bareta. Sa katunayan, kan isinusugo an saiyang mga disipulo na maghulit, sinadol sinda ni Jesus na ‘hanapon an mga maninigo.’ Mantang nungka na pinipirit ni Jehova an siisay man na sumamba sa saiya, dai kita pipiriton na makipag-olay sa saro na marigon na nagsisikwal sa mensahe kan Kahadean. (Mateo 10:​11-14) Alagad naoogma kitang makipag-olay manongod sa pagkahade ni Jehova sa mga “may tamang tendensia sa buhay na daing katapusan.”​—Gibo 13:48; Salmo 145:​10-13.

An pagkamoot, kahoyoan, asin kapakumbabaan mga kualidad na makatatabang sa sato na makontrol an satong bakong sangkap na inklinasyon na magtaram nin pabiglabigla o dai na maggironggirong. Mantang kita nagtatalubo sa mga kualidad na ini, kita orog na masasangkapan na mamidbid an kalaenan kan tamang panahon asin salang panahon na magtaram.

[Mga Nota sa Ibaba]

[Retrato sa pahina 23]

An mga problema puedeng maresolberan paagi sa marahay na komunikasyon